K. 302-20 (= IMA 25). Pillar at cruciform gallery of Prasat Angkor Wat, 1584 Śaka

⟨1⟩ sabbhammasatu maṅgala bahulacestā jeyātiyreka ⟨2⟩ 1584 ˘saka ˘nakakhsatra chnāṁma khāla Aṭṭhami rojja pusa thṅai ⟨3⟩ braḥhasasamtiya bārasāraṇā Isa juṁnuṁ mhāsağharājja bā- ⟨4⟩ rājjasomaṅgalasilāpubitra no qnaka yeṅa qnaka saṁ- ⟨5⟩ mtaeca pavaravīdūpubitra no qnaka saṁmtaeca Ūdaiyapañā- ⟨6⟩ pubitra no qnaka saṁmteca satthāvivarapubitra no qnaka saṁ- ⟨7⟩ mteca gāthāpārmmiyapubitra no Isa saṁmteca braḥ grū ⟨8⟩ therarānotherasamnera phoṅa nā E grahasa sota no ⟨9⟩ māna qnaka braḥ Inr̥syeṅa 1 qnaka braḥ sūra braḥ Aṅga 1 qnaka ⟨10⟩ braḥ Ūbheyarājja 1 qnaka qaeva 1 qnaka nū 1 qnaka nuṅa 1 ⟨11⟩ qnaka braṁhma 1 Isa qnaka ˘da Aṁmpāla neḥ siṅa giỵ jā sukkhi- ⟨12⟩ viñāṇa E qnaka mhāsağharāja braḥ rājasilācāryyapubitra ⟨13⟩ braḥ Aṅga Ānucadhamma do heỵ noḥ no māna co bo me ⟨14⟩ Aṁmma gi jā phUṇa heỵ co braṁhma me paeña co sukkha me sūsa ⟨15⟩ co dhuna co rasa me bo co braṁhma sota me mokkha co ⟨16⟩ braṁhmanai me O me pūla me nova siṅa gi jā kmuoya ta māna ci- ⟨17⟩ tta siṅa ta sāraddhā sammosara Anukūla mūla brama Anamoda- ⟨18⟩ nā jā kusala mūỵ Anleha niṅa mhāsağharāja braḥ Aṅga Ā- ⟨19⟩ nucadhamma do noḥ Isa qnaka ˘da Ampāla noḥ moka prosa ⟨20⟩ me Epa me mokkha mtāya niṅa kūna neḥ Oya rruoca jā brai ⟨21⟩ jrāḥ salāḥ heỵ mūỵ nī sota Oỵya … braḥ Aṅga mhāsağha- ⟨22⟩ rājja Ānucadhamma noḥ hoṅa narrū poṅa phUṇa kūṇa kmūya Inā2 ⟨23⟩ mūỵ moka bibāta māttrā srati thā me Epa me moka neḥ jā ⟨24⟩ khñuṁma leỵ Oya binai toya cpāppa hoṅa heỵ māna tae Aṁ- ⟨25⟩ mpāla noḥ leỵ Oya randāḥ ˘daṅa Anandacakkrabāla kuṁmpi Oya ⟨26⟩ ˘paña jheha ta dai krailaeṅa leỵ Oya ˘paña tae qnaka noḥ sa- ⟨27⟩ ppa2 jāta kaṁneta hoṅa māna tae Aṁmpāla noḥ leỵ rī ⟨28⟩ braḥ ˘da Aṁmpāla khs(ae)ca kaṁmpi trā prosa qnaka noḥ tala mto[[ṅa]] ⟨29⟩ leya hoṅa kāla nā pe sūbhābva toya no dharmma sota ⟨30⟩ Oya qnaka noḥ pāna sampāta nirabāna sapa2 jāta kuṁneta hŏ ⟨31⟩ cārika neḥ qnaka mhāthera pañāvinai poḥ