K. 302-13 (= IMA 18). Pillar at cruciform gallery of Prasat Angkor Wat, 1555 Śaka

⟨1⟩ sabbhammastu svastī śrīỵ bhimmaṅgala bahūlacestā ⟨2⟩ jaiỵātqoereka 1555 sakka rakā naksatra khaeha bbhisāka 2 ⟨3⟩ roja thṅaiya suka buttabārrannā Assa jjaṁmanuṁma naka tūna mo- ⟨4⟩ ka nū me sūsa nū me Aṅa cco ñāna nū ccau brambhicita nū ccau braḥ ccau ⟨5⟩ kaeva ccau toṅa me Aṁma me tīya me jaiỵ me rosa me sara rīya A- ⟨6⟩ ssa naka d˘ā Aṁmpāla noḥ sota moka sāṅa gūsala phhala pona rīya ⟨7⟩ naka tūna moka sota sāṅa braḥ butatharrūpa Aṅga 1 doṅa 1 riya me ⟨8⟩ sūsa braḥ butatharrūpa Ă 3 doṅa 1 rīya me Aṅa nū kūṇa prasāha sāṅa braḥ bu- ⟨9⟩ tatharrūpa Aṅa 3 doṅa 1 bbhittāna 1gatti jā sūreca heỵ riya Assa ⟨10⟩ naka d˘ā Aṁmpāla noḥ sota moka māna cita noḥ brama laṁmmaṁ jāmūya heỵ ⟨11⟩ moka Adoessathāna me moka neḥ Oqaya rruca jā brāṇāsrama sralaḥ Ata kaṁ- ⟨12⟩ mataṁṅa leỵ riya E sākasīviỵñāna naka tūna moka sota E qa- ⟨13⟩ ssa Āriyassaṅa phoṅa māna naka yĕṅa naka samteca braḥ maniỵsṭhā- ⟨14⟩ hapūbitra nū naka yeṅa naka samteca braḥ maniỵjjetapūbita nū naka ye- ⟨15⟩ ṅa naka samteca pañāŪdaiỵ nū naka pavaramaniỵpūbita Assa kaṁmarra- ⟨16⟩ ttaeṅa bhbikatherarānūtherasamnera phoṅa crena gatti jā prathṭhāna naka tū- ⟨17⟩ na moka neḥ hoṅa nā E grāhaḥsa sota māna Okahloṅa thādhū- ⟨18⟩ ppesa 1 nū ccau maniyavara 1 nū ccau sammāniỵ 1 ccau noṅa ccau ⟨19⟩ Ana ccau braḥ E srīya sota māna me tīya 1 me kaena 1 me yasa ⟨20⟩ 1 me kaeva 1 me lūra 1 Isa naka d˘ā Aṁmpāla noḥ siṅa jā viñāna ⟨21⟩ hoṅa doḥ kūṇa gata gtīya doḥ kmūya gata gtīya doḥ ccau gata gtīya Isa ⟨22⟩ ñāttīkā d˘ā 7 santāna siṅa jā taṁmniṅa heỵ thā pe nnā mūya moka bi- ⟨23⟩ bāta māttrā me moka neḥ jā khñuma viṅa leỵ braḥ trāssa Aṁmpāla khsāca ⟨24⟩ gtīya kaṁmpiya prossa naka noḥ pāna leỵ hoṅa doḥ bvuṁ noḥ sota ra- ⟨25⟩ ndāḥ d˘ā Ānanacakkrabāla pāña mhā prattabbhiya gtiya pāña jheh brika- ⟨26⟩ sā dhuṁma gtīya kaṁppī Oqaya trūva jheh noḥ leỵ Oqaya trūva taeha naka ⟨27⟩ ta bibāta māttrā thā jā khñuṁma noḥ ssapa2 jāta kaṁmneta hoṅa doḥ ⟨28⟩ bvuṁ noḥ sota thā peha traccaeka nnā mūya ¯l̥ heỵ nova thā jā ¯l̥ Oqaya ⟨29⟩ traccaeka naka noḥ hoṅa broṅa brāya banarāya luḥva Ai ta sūra sampā- ⟨30⟩ ta nāya hoṅa doḥ yoppiya traccaeka nnā mūya ¯l̥ heỵ thveha jā ma- ⟨31⟩ na ¯l̥ tīṅa heỵ thveha jā mana tīṅa viña Oqaya tracaeka naka noḥ thallă ⟨32⟩ 2 ssapa jāta kaṁmneta hoṅa . mūya niya sota kālla noḥ naka ⟨33⟩ tūna moka Adisṭhāṇa me moka neḥ māna naka yeṅa naka samte- ⟨34⟩ ca pañāŪdaeyapūbitra nū naka pavaramniya pūbitra nū naka braḥ sarasū- ⟨35⟩ tadhāmapūbitra braḥ Aṅa d˘ā 3 noḥ gi jā magolakāra taeṅa paña- ⟨36⟩ yola Oqaya parapūra hoṅa . cārik neḥ qnaka naiỵ ⟨37⟩ sāṅa cuṁpa thṅaiya Ādita 3 keta jā parapūra hoṅa .