Kompong Thom stela of Jayavarman V (K. 444), 896 Śaka

⟨Face A⟩ ⟨A1⟩ ||| śrīy¡a!⟨·⟩ s¿a?⟨i⟩ddh¿a?⟨i⟩ svasti jaya ° 896 śaka pañcam[ī] ⟨A2⟩ ket· puṣya candravāra śatabhīṣa-nakṣatra ° nu mān· ⟨A3⟩ vraḥ ¿śāna?⟨śāsana⟩ dhū⊔li vraḥ pāda dhūli jeṅ· vraḥ kamra⟨A4⟩teṅ· A⊔ñ· śrī jayava⊔rmmadeva ta svey· vraḥ ⟨A5⟩ dharmma-rājya nu śūnya-nava-Aṣṭa ⊔ śakka ◯ thve vra(hma)ya⟨A6⟩jña pi kamrateṅ· Añ ta vraḥ guru thve mahāddhvara-vidhī nā ⟨A7⟩ (vāgīśvarī)-yāga nu (dh)ūli vraḥ pāda (dh)ūlī je⊔ṅ· vraḥ ka⟨A8⟩mrate⊔ṅ· Añ· ja⊔yavarmmade⊔va ryyān· saṁracca gi ⟨A9⟩ vraḥ vidyā phoṅ· ° ta tri-pa⊔ñcaśat· pa⊔(rvva) ta A⊔ṣṭama ⟨A10⟩ [di]vasa Ādi-madhyāvasāna Āy· na[ga]ra śrī yaśo⟨A11⟩dharaparvvata Āy· ⊔ vraḥ śilātatā(ka °) ma⊔n· srā⟨A12⟩[c] vidhi ⊔ mān· vraḥ śāsana dhūlī vraḥ pāda dhūli je⟨A13⟩[ṅ] vraḥ kamrateṅ· Añ· ta ⊔ kamrateṅ· ⊔ Añ· ta ⟨A14⟩ (vraḥ) guru pre res· paṁnvās· Āy· [ta neḥ] saptavarṇṇa ⟨A15⟩ [nu ku]le nai Ācā⊔ryya-pradhā[na pradvān] (mo)k· ⟨A16⟩ (du)k· mūla (khmu)k· vraḥ (kra)lā (Arcca)na 20+ mūla karmmāntara ⟨A17⟩ [20+ O]y· cra(lo phle sruk· sre bhūmyākara leṅ·) ⟨A18⟩ [si]ddhi jā (varṇṇa neḥ ta vyar· nā khmuk vraḥ) kralā Ar(cca)⟨A19⟩[na] nu karmmā(ntara ° nā paṁnvās·) gus· gi nā thve vraḥ rā⟨A20⟩jakāryya vvaṁ (Āc ti Oy· vrīhi) pa⊔ryya⊔ṅ· viṣa[ya] ⟨A21⟩ cañcūlī (phoṅ·) phle Anvaya neḥ ⊔ nā khmuk· vraḥ ⟨A22⟩ vraḥ (kralā Arccana nu) karmmāntara yā⊔vat· vraḥ ⟨A23⟩ candrāditya mān· [dau vvaṁ] Āc ti mān nā svatantra ⟨A24⟩ ta ⊔ dai ti [leṅ khloñ· khmuk·] vraḥ [kralā] Arccaṇa ⟨A25⟩ nu khloñ· [karmmāntara pradvān· dau ° nau rūpa paṁ]nvās· ⟨A26⟩ ta mān· vi[dyā nu śila nu Ācāra phoṅ· re]s· ⟨A27⟩ ta neḥ varṇṇa [ta vyar·] gi ta [Ac cval jā] Ā⟨Face B⟩⟨B1⟩cāryya[homa] Ācāryya caturācāryya pradhā⟨B2⟩na ° nau (Aṁpalla) [ku]le ta strī⊔jana Oy ta qnak ta U⟨B3⟩ttama pi śivabhakti ° _ vvaṁ Āc ti qnak· ta hīnajāti yo⟨B4⟩[k· dau] p¿a?⟨i⟩ pañjā qnak· khloñ(·) hetu man· dai sañjak· pi ⟨B5⟩ mukhya ta kamrateṅ· phdai karom(·) gus· ⊔ pi yok· ⟨B6⟩ vvaṁ Āc· ti Oy ta qnak· ta ⊔ sañjak· ta rok· kanaka⟨B7⟩danda ° ri ⊔ man· Oy ta varṇṇa ta Uttama piy¡a!⟨·⟩ noḥ ⟨B8⟩ dau ⊔ sañjak· ⊔ pi rok kanakadanda noḥ kule noḥ ⟨B9⟩ man· Oy· v(va)ṁ Āc ti [trāp·] (dau nā mr̥ttakadhana) ° nau rū ⟨B10⟩ kule ta qna[k· si man ka qāc ti] paryyanna hoṅ· nā(ṁ) mok· ⟨B11⟩ Oy(·) Ācāryya [caturācāryya] pre paryyān(·) siksā Ā⟨B12⟩y· nagara pi (pre nā vraḥ rāja)kāryya nā paṁ⊔nvās(·) vvaṁ Āc ti ⟨B13⟩ bhāgavata (@) [kamrateṅ· Añ] vraḥ guru res· ⊔ nāṁ ⊔ yal· ⟨B14⟩ dhūli vraḥ [pāda dhūli jeṅ·] (vraḥ kamrateṅ·) Añ· nāṁ ⟨B15⟩ [yal·] (vnek·) [ni ta vraḥ vleṅ· nu vrāhmaṇā]cāryya nu kaṁsteṅ· Añ· ⟨B16⟩ [rāja]ku[la-mahāmantri nu khloñ· vala] (phoṅ·) vraḥ karu⟨B17⟩ṇā [duk· jā] (varṇṇa) [khmuk·] vraḥ [kralā Arccana] (jā varṇṇa kar)mmā⟨B18⟩ntara _ vraḥ [hau pandval· vṅya Oy· vara prasiddhi] (neḥ) varṇṇa ta vya⟨B19⟩[r· siddhi] nā (khmuk· vraḥ kra)[lā Arccana nu] karmmāntara vraḥ ⟨B20⟩ [pre du]k ta vraḥ rikta kamvī [mās· Āy· kan]lo⊔ṅ· vraḥ pre ⟨B21⟩ [duk ta] vraḥ rikta kaṁvi (prāk·) [Āy· ta vraḥ] dharmmādhikaraṇa ° ⟨B22⟩ pre duk· praśasta [śilāstambha ta gi] ⊔ sruk· naya neḥ ⟨B23⟩ [varṇṇa] ta vyar(· nau Aṁpall) [2+] phnvas travāṅ· ° nu sruk· sre ⟨B24⟩ (bhūmyā)⊔kara khñuṁ [nu vraḥ puṇya] [3+] prasiddhi ta neḥ varṇṇa ⟨B25⟩ [ta vyar· ta mān· ta vraḥ rikta] (kaṁvī mās· nu) kaṁv¿i?⟨ī⟩ prāk· nu ⟨B26⟩ [ta gi] pra(śasta)-śi[lāstambha ta] mān ta gi sruk· vvaṁ Āc· ti khlo⟨B27⟩[ñ· teṁ] vidā[ryya pi cāp· vi]ṅ· leṅ· ° nā ⊔ varṇṇa ta vya⊔r· ⟨B28⟩ [nau] ge ta vvaṁ [thve roḥ] vraḥ kalpanā dhūli vraḥ pā⟨B29⟩dadhūli je[ṅ· vraḥ] kamrateṅ· Añ(·) śrī⊔jayavarmmadeva ⟨B30⟩ phle māheśva[rānva]ya dharmmakathā vyavahāra neḥ qnak· noḥ pi ni⟨B31⟩rnnaya leṅ· ru qnak ta sāhasi⊔ka Ukka ° ge ⊔ noḥ ta vvaṁ thve ⟨B32⟩ toy· […] dau ⊔ ta dvātriṁśanara⊔ka nuv· _ santā⊔nā ⟨B3⟩ [nvaya pho]ṅ· ge mān· ⊔ Is· yātanā yāvat· ⟨Face C⟩ ⟨C1⟩ candrāditya mān¡a!⟨·⟩ ⟨C2⟩ dau ta gi neḥ I⟨C3⟩haloka lvaḥ pa⟨C4⟩ralo_ka _ ° nau sā⟨C5⟩dhu sajjaṇa ta ⟨C6⟩ ñāṅ· varddheya ⟨C7⟩ qdeṅ ta _ gi pi thve ⟨C8⟩ roh¡a!⟨·⟩ vraḥ kalpanā ⟨C9⟩ nai dhūli vraḥ pā⟨C10⟩da ⊔ dhū_li je_ṅ· ⟨C11⟩ vraḥ kamrateṅ· ⟨C12⟩ Añ· śrī jaya⟨C13⟩varmmadeva ta sve⟨C14⟩y· vraḥ dharmmarā⟨C15⟩jya nu śunyanava⟨C16⟩Aṣṭa śaka ° ta ⟨C17⟩ neḥ varṇṇa ta vyar(·) ⟨C18⟩ ge mān· svar⊔gga ⟨C19⟩ nu santānānvaya ⟨C20⟩ phoṅ¡a!⟨·⟩ yā⊔vat(·) ⟨C21⟩ vraḥ candrāditya ⟨C22⟩ mānna ⊔ dau ta gi ⟨C23⟩ neḥ Ihaloka ⟨C24⟩ lvaḥ ta gi paralo⟨C25⟩ka ° ge mān· sukha ⟨C26⟩ sthiti ° Ṛddhi nuv(·) ⟨C27⟩ santānānva⊔ya ⟨C28⟩ pho⊔ṅ· _ @ ⟨Face D⟩ ⟨D1⟩ mūla [ste]ñ· parama⟨D2⟩śivācāryya ⟨D3⟩ loñ¡a!⟨·⟩ gaṅ· ⟨D4⟩ loñ¡a!⟨·⟩ sata ⟨D5⟩ loñ¡a!⟨·⟩ saha ⟨D6⟩ lo[ñ·] hariśarmma ⟨D7⟩ teṅ[·] mās· ⟨D8⟩ teṅ· des· ⟨D9⟩ teṅ· pau ⟨D10⟩ teṅ· lyaṅ· ⟨D11⟩ teṅ· ⊔ vrā ⟨D12⟩ teṅ· vai ⟨D13⟩ teṅ qyak·