Jati Mula (277 Peti 89) — Digital Diplomatic Edition of Jati Mula (277 Peti 89)

⟨Folio 1⟩
⟨1-23⟩ Ndah varahhakna na puhun, jati luput tanpa katuduhhan, vuit mula tanpa nama, taṅkal mula tanpa ṅaran, vatu mula jati tan hana, na puhun luput jati saṅhiyaṅ hayu, ña mana hatә luput, bvana hatә, hatә katuduh, di jati luput niṅ hatә katuduh ti jati luput niṅ bihәṅ hatә katuduh, ti jati luput tan katuduh, tan kәna dituduh, ti jati luput tan katuduhhan, tan kәna dituduh, ti jati luput niskala tanpa katuduh, tan kәna dituduh, ti jati luput tan hana tanpa katuduhhan tan kәna dituduh; ña mana hatә katuduhhan, nu mәtukәn tan hana, jati tan hana, luput tan hana; ña mana puhun luput jati tanpa katuduhhan, ña mana dayәhhannana ña maha visesa, vәnaṅ nuṅgalkәn puhun jati luput laṅgәṅ sadakala, nu tanpa katuduh jati.

⟨Folio 1⟩
⟨23-26⟩Luput namana, luput tanpa namana, luputna tanpa ṅaranna, nu tanpa katuduh puhun ṅaraniya.

⟨Folio 1⟩
⟨26-30⟩Beak bahe gan agәs
⟨label 7 at the top of line 26-30⟩⟨7⟩zie blg 7 gәs di jati di maneh pun, ṅaraniya na tәgәr jatina bәnәr, laṅgәṅ na tәmәn sadakala, na agәs puhun tugal jati laṅgәṅ sadakala.

⟨Folio 1-2⟩
⟨31-2⟩Iña kapagәhhan jati carita niṅ bәnәr, ña kaliṅaniya pun; ñaho di puhun luput jati carita tanpa katuduhhan, ña puhun tuṅtuṅ gantuṅ, tutuṅ ma-tuṅan di bvana, ti mana, bvana mana, hatә bvana hatә, hatә katuduhhannana, hatә namana,| hatә ṅaranna, pun; iñana nu madiyana dayәhhannanna, nu vәnaṅ ṅavisesakәn uraṅ sabvana, tanpa namana, tanpa ṅaranna, pun.

⟨Folio 2⟩
⟨6-8⟩ Iña tu puhun luput tanpa katuduhhan, ña-mana hatә namana, hatә ṅaranna, pun.

⟨Folio 2⟩
⟨9-19⟩ Iña tu puhun uraṅ, mana vaya katuduhhan sabvana, uraṅ tanpa namana; iña puhun luput carita niṅ tanpa katuduh, vvat mula carita tanpa katuduhhan, vvat mula carita niṅ tanpa nama, mula jati carita niṅ tanpa ṅaran, carita jati tan hana, vvat mula carita jati niskala, pun.

⟨Folio 2⟩
⟨20-36⟩ Sakitu anakiṅ nu tan hana, lәvih niṅ laraṅ ajñana; aiṅ magahhan sugan hamo ñaho, ti nis-ñanana carita, ti niskala, na mula jati bәhәla, na vvat jati bihari, na puhun jatina tanpa katuduhhan; saturunna ti puhun, aiṅ magahhan sugan hamo ñaho, ti nis-ñanana carita, ti niskala, na mula jati bəhəla, na vvat jati bihari, na puhun jatina tanpa katuduhhan. saturunna ti puhun

⟨Folio 2-3⟩
⟨37-14⟩ saṅ pandita, gəsanna di vvat bvana, vvat mulaniṅ suniya bvana, di jati niskala tan hana, tanpa
⟨Folio 3⟩ namana, gəssanna ñamana hatə katuduhhananna, gəsan saṅ pandita vaya katitisan ñana, na vvat mula niṅ ajñana jati, pakənna gəlisna patiṅtinan, pakən lidahna rarasan, mata muliya ttaan niṅ sabda, satiya niṅ utama. maka prəmana ajñana, lidah laraṅan. maka vidu tutur vastu niṅ rahayu, maka tuṅgal uraṅ, ləga, ṅənah, manah liṅlaṅ, satia jati nirmala. maka visesa nisna cipta nirmala.

⟨Folio 3⟩
⟨15-19⟩ maka vastu nisna jati saṅhiyaṅ hayu, maka tuṅgal jati manah liṅlaṅ, ləga ṅənah nisna nirmala, padaṅ caaṅ rahina sada, di jatina caaṅ sadakala.

⟨Folio 3⟩
⟨20-38⟩ini na jati puhun, kiñar hibar, hinar, padaṅ, caaṅ rahina sada, bəraṅ caaṅ sadakala, nu tanpa katuduhhan. iñana puhun hurip, nu maka caaṅ uraṅ sabvana, nu tan kəna ku pətəṅ, ja nu maka pətəṅ tan kapətəṅan ku pətəṅ, nu tan kəna ku kiñar, ku hibar, ku hinar. ja nu maka kiñar, hibar, hinar, tan kəna ku padaṅ, caaṅ, rahina sada, ja litana vvat padaṅ, caaṅ rahina sada, tan kəna ku bəraṅ caaṅ sadakala. ja vvat bəraṅ, caaṅ, sadakala, maka tuṅgal ka puhun, ka nu maka jati laṅgəŋ sadakala, kitu kaliṅana na sadaṅ agəs jatina puhun.

⟨Folio 3-4⟩
⟨39-12⟩ aṅgəs tan kəna ku sadaṅ, nu ñaho di nu maṅka di nu
⟨Folio 4⟩ maka ñaho, hamo kañahoan, ja hatə katuduh ti nu hatə katuduhhan, ña tuna vvat tanpa namana, ña nama hatə kəna ku sadaṅ, tan kəna disadaṅan ku sadaṅ, nu ñaho, ja lita nu ñiən sadaṅ. nu ñadaṅan, tan kəna ku sadaṅ, ja nu ṅavayakən nu ñaho, hatə kañahoan ku nu ñaho, ja lita nu maka ñaho di nu ñaho, hamo kañahoan ku nu ma ka ñaho.

⟨Folio 4⟩
⟨13-21⟩ ja nu maka hatə katuduh, ja nu maka hatə, nu maka hatə katuduhhan, ña tu nu tanpa namana, tanpa katuduhhannanna. ña keh tuṅgal kaliṅana, ka jati tanpa katuduh ka puhun, ña kaliṅaniya sida, ka jati panteg ka agəs.

⟨Folio 4⟩
⟨22-31⟩ ini turunna ti puhun, ti luput puhun jati niṅ tanpa katuduh, cat ka jati niṅ tanpa katuduh, ti jati cat ka saṅ pandita. diña niṅgalan vvat mula tataniṅ ñana, mula jati niṅ tanpa katuduhhan, niṅ ajñana, ja tinu hatə katuduhhan nu hatə kanamaan, nu hatə kaṅarannan.

⟨Folio 4-5⟩
⟨32-5⟩ ña mana hatə katuduhhannanna, pakən na jati di puhun, sakitu ti puhun ka saṅ pandita, kapitəṅgəlan ti jati niskala tan hana, niṅgalan saṅ pandita, vvat jati tanpa nama, tanpa ṅaran, tuṅtuṅna puhun tanpa katuduh. sakitu ti tan hana, na paniṅgalan ajñana
⟨Folio 5⟩ jati di saṅ pandita. ti niskala niṅgalan na jati tanpa katuduh, jatina luput, jatina bihəṅ, na jatina nu mətu hana sakeṅ tan hana.

⟨Folio 5⟩
⟨6-20⟩ yana vvat jati mula niṅ ṅavarah, jati mula niṅ ajñana ti niskala disaṅ pandita, saṅ padita agəs katitisan ka jati, vvat mula jati mataṅiyan, teka vaya hurip ti jati vvat hurip, ti mula niṅ bvana, niskala tan hana katuduhhan mataṅiyan, teka vaya huripniṅ bvana, kena ku jati hurip vastu niṅ bvana. ñamana dədəgna bvana, ñamana gəlisna bumi, kena vayana jati, huripna vidu jati tanpa vastu pun.

⟨Folio 5⟩
⟨21-26⟩ ña mana vayana katuduhhan di bvana, sakala niskala kena vayana jati, huripna jati tanpa katuduh. ti iña saṅ pandita ñamana, mətuna katuduhhan niṅ ajñana.

⟨Folio 5-6⟩
⟨27-2⟩ kena ti puhun agəs nu ñiən bvana, matəmahhan vaya kahannan, hatəna kahanan, bihəṅna kahanan, luputna kahanan, tanpa katuduh na kahanan, niskalana kahanan, tə hanana kahannan, luput katuduhhan. tanpa namana kahannan, tanpa ṅaranna kahannan, ja luput hatə katuduhhan na kahannan, ja luput na rvana, hatəna kahannan, na kahannan hatə, luputna mana, hatə
⟨Folio 6⟩ na mana, jati mana bvana, mana hatə, ja hatə katuduhhan.

⟨Folio 6⟩
⟨3-4⟩ tan kəna dibasaan, tan kəna dinamaan, kəna diṅaranan, pun.

⟨Folio 6⟩
⟨5-19⟩ ña tu dayəhhannan nu luput ti puhun, tan kəna dituduh, ja nu ñiən tanpa katuduh, ja nu ñiən tanpa nama, ja nu ñiən tu ṅaran, ja nu ñiən luput, ja nu ñiən puhun, ja nu ñiən luput mana, ja nu ñuun jati mana, ja nu ñiən tan hana, ja nu ñiən niskala, ja nu ñiən tanpa katuduhhan, ja nu ñiən luput, ja nu ñiən bihəṅ, ja nu ñiən hatə, hatə katuduh.

⟨Folio 6-7⟩
⟨20-4⟩ nu ñiən puhunna na jati, tan kəna dituduh jati, nu ñiən puhunna laṅgəṅ, tan kəna dituduh laṅgəṅ, nu ñiən puhunna sadakala, tan kəna dituduh sadakala, nu ñiən puhunna hurip, tan kəna dituduh sadakala, nu ñuun puyuna hurip, tan kəna dituduh hurip. ja nu maka hurip na hurip, tan kəna dipatian ku pati, ja matian nu pati, dihirupan nu maka hirup nu hirup. ñamana na jati tan kəna ku pati, tan kəna ku hurip, ja hatə ganal, hatə alit, ja na jati hatə katuduh, ja nu maka hatə ganal, ja nu maka hatə alit, ja na puhun jati tanpa katuduh, ja na puhun jati huripna laṅgəṅ, tan kəna dituduh laṅgəṅ, ja iña nu ma-
⟨Folio 7⟩ ka laṅgəṅ, puhunna jati huripna sadakala, tan katuduh, ja nu maka sadakala, nu sadakala tan katuduh.

⟨Folio 7⟩
⟨5-22⟩ nu ñiən bvana, luput, maka jati mana, ti mana bvana hatə, nu ñiən puhun, hatə katuduh, ja tan kəna dinamaan, tan kəna diṅaranan, ja puhun luput, jati tanpa katuduh, vvat jati mula tanpa nama, vvat mula tanpa ṅaran tu puhun, nu tan katuduh, nu tan mətu hana, nu tan mətu tan hana, ña na vvat nu mətukən na hana, ña na vvat sakeṅ tan hana, mataṅiyan vaya katuduhhan niṅ ajñana, tan hana. ti iña ñiən bvana jati niskala, jati bvana ləṅis, jati bvana laraṅ.

⟨Folio 7⟩
⟨23-30⟩
⟨label 7a at the left of line 23-30⟩Holle: zie blg iH hatə, bihəṅ, luput tan katuduh niskala tan hana, tanpa nama, tanpa ṅaran, tanpa katuduhhan-nanna. ñamana jati di puhun-niṅ luput, tanpa katuduh di puhun, luputna jati pun, tanpa katuduh nu agəs, pun.

⟨Folio 7⟩
⟨31-37⟩ ini na puhun, vvat mula jati carita niṅ bənər, vvat mua jati carita niṅ tanpa nama, luput carita tanpa ṅaranna, puhun luput carita niṅ tanpa katuduhhan.

⟨Folio 7-8⟩
⟨38-29⟩ lamun hamo ñaho di jati carita, jati niṅ bənər, hamo ñaho di jati di maneh, lamun
⟨Folio 8⟩ ñaho di puhun jati carita niṅ bənər, ñaho di jati di maneh, ñaho di jati bənər di maneh, kaliṅaniya bənərna təgərna təmən, dəṅ na agəs ñaho di f kala tanpa katuduh, ja litana jati, vvatna ṅavayakən ṅahatəkən, tan kəna divayakən ku nu vaya, tan kəna dihatəkən ku hatə, ja na puhun jati laṅgəṅ tanpa katuduh, kaliṅaniya sadaṅ saṅ pandita, ti puhun kana jati, tanpa katuduh dipigəsan nuduh na jati ajñana, nuduhhan jati parayuga niṅ ajñana, jati saṅ Manon, puhun jati ma hurip niṅ bvana, mana vaya saṅ pandita nuduhhan ka jati niskala, di jati bvana, vvat mula niṅ devata. ka jati seda bvana, ka bvana jati suda, di vvat niṅ jati manusa, di hantara manusa bvana məkah, di jati bvana cina, sakatuduh niṅ bvana loka, nu visesa di desaniṅ nusa haṅkarra.

⟨Folio 8⟩
⟨30-37⟩ sakitu ti saṅ pandita, ja uraṅ agəs kavayakən paṅgavay, ti puhun katuduhhan niṅ ajñana, sabvana loka, ti puhun ka jati, dipipaṅəsi bumi, lamba parək aṅəsian bvana lamba, ṅəsian bvana parək, əsina bvana lavan sarira.

⟨Folio 8-9⟩
⟨38-1⟩ ja agəs pahi kaəsian na paṅgavay, na kahanan, jati ma hurip niṅ bvana, ti puhun-
⟨Folio 9⟩ na katuduhhan bvana loka.

⟨Folio 9⟩
⟨2-4⟩ pahi agəs titis lantis, tata ratas, limpas saratpas sañana, bvana loka.

⟨Folio 9⟩
⟨5-9⟩ agəs pəpək pənuh nikaṅ bumi, agəs pasra ləpas sarat niṅ bvana loka, səsək kapərəd bvana iṅ sor maṅduhuṅ.

⟨Folio 9⟩
⟨9-17⟩ pənuh ku katuduhhan niṅ ajñana, pənuh ku bayu, pənuh ku sabda, pənuh ku hidəp, ku tutur, ku miṅət saṅ Manon, pənuh ku bvana rasa lavan sarira, pənuh ka bumi ku kahanan, pənuh ku sunia sunian taya, paramarata niṅ bvana loka.

⟨Folio 9⟩
⟨18-23⟩ saṅ pandita nuduhhan na paṅgavay ti puhun-na jati bvana laṅgəṅ. ña mana agəs visesa, dina jatina kahanan tutur laṅgəṅ, nuṅguan jatina bvana.

⟨Folio 9⟩
⟨24-26⟩ ditu dina prətivi, di bvana lavan akasa, tutur laṅgəṅ jati ma hurip niṅ bvana.

⟨Folio 9⟩
⟨27-31⟩ kitu tutuṅgalna di vulan, ventaṅ, aditiya, tuṅgal laṅgəṅ tutur jati ma hurip di bvana lavan sarira, tutur bənər, təgər, təmən jatina laṅgəṅ namaniya.

⟨Folio 9-10⟩
⟨32-6⟩ kitu na-mana na ləmah lavan laṅit, tuṅgal, ti puhun ka jati, sa-vvat ma hurip lavan bvana prətivi. iñana jati vvat hurip niṅ kaṅ bvana loka anəlan jati vvat mula jati pusərran bvana, muliyana jati, citana jati
⟨Folio 10⟩ pujar niṅ bvana, mataṅiyan vaya kahananna jati, ñamana dədəg laṅgəṅ tutur jati. hurip bvana jati prətivi. mataṅiyan vaya kahanan təmahhan hurip niṅ kaṅ jagat.

⟨Folio 10⟩
⟨7-9⟩ kitu kapagəhanna jati bvana lavan sarira, sakaliṅannan na katuduhhan niṅ aydñana.

⟨Folio 10⟩
⟨10-19⟩ Lamun vaya təmahan di bvana lavan prətivi. nu katuduh: vaya rupa, reka varna, maka ditrəna trəne, tarula, ta henake, guluma, lamun ron-ronan, uruta rarambatan. lamun neja ṅagədəg sarva niṅ kakayon, maka divaya kasaṅga, təmahhan niṅ kaṅ jagat.

⟨Folio 10⟩
⟨31⟩ nu katuduh: ləmah, cai, kayu, batu, maka di sarva sato nikaṅ jagat, iṅ sor, iṅ ruhur, iṅ darat, iṅ cai, paṅəsi lmah lavan tasik, sakveh kumilip niṅ kaṅ prətivi, sakvey kumədap niṅ kaṅ bvana. pada mahi kaduumman, ma hurip nikaṅ sarira, pindah ka sarira, sarira hurip niṅ kaṅ bvana, ṅaranna katuduhhanniya.

⟨Folio 10⟩
⟨32-37⟩ jati ma hurip, mataṅiyan pasraniṅ desa, pasraniṅ bvana, jati mataṅiyan ma hurip, pasra sagara hantara niṅ bvana, yan katuduhhanniya.

⟨Folio 10-11⟩
⟨38-13⟩ lamun dituduh jati patala, tan kəna dituduh, tala patala. ja jati vvat patala, jati
⟨Folio 11⟩ bvana. tan kəna dituduhhan, lamun iṅ sor, iṅ ruhur tan kəna dituduh. kala di i-sor, tala sapta, patala niṅ tala, tan kəna dituduh: di luhur, tapa-patala, tala niṅ tala, di sapta-tala talaniya niṅ bvana laka, tan kəna dituduh tala, nu ñana puhun jati, nu ñiən bvana. patala talaniṅ tala bvana loka. samaṅkana, katuduhhaniya ti jati niṅ tanpa katuduh, pun.

⟨Folio 11-12⟩
⟨14-13⟩ ini katuduhhan ti puhun, dəṅ ti jati ma hurip niṅ bvana. jati ajñana tanpa katuduh, jati sadakala tanpa katuduh, jatina laṅgəṅ tanpa katuduh, jatina saṅ Manon tanpa katuduhm jati saṅ visesa, tanpa katuduh, jati saṅ tuṅgal tanpa katuduh, jati saṅ prəmana, tanpa katuduh, jati mataṅiyan, tanpa katuduh. jati niṅ iyatna, tanpa katuduh, jati niṅ iṅət, tanpa katuduh, jati niṅ tutur tanpa katuduh, jati niṅ hidəp tanpa katuduh, jati niṅ sabda tanpa katuduh. jati niṅ bayu tanpa katuduh, jati niṅ tasa tanpa katuduh. jati niṅ sarira, tanpa katuduh. jati niṅ kama ratih, tanpa katuduh. jati bvana sarira tanpa katuduh bvana. jati niṅ alit tanpa katuduh, alit jati niṅ acitiya, tan kəna dituduh. acitiya, jatina cita
⟨Folio 12⟩ tan kəna dituduh, cita. jatina ləñəp, tan kəna dituduh ləñəp, jati niṅ ləñəp, tan kəna dituduh ləñəp. jati niṅ ləṅəs, tan kəna dituduh ləṅəs. jatina nis, tan kəna dituduh nis, jatiniṅ purusa, tan kəna dituduh jati purusa. jati kamoksahhan, tan kəna dituduh kamoksahhan. jatina kaləpasan, tan kəna dituduh kaləpasan. jati niskala tanpa katuduhhannanna niṅ ajñana.

⟨Folio 12⟩
⟨14-26⟩ niskala tanpa namana, tanpa ṅaranna, jati nu namaan, tan kəna dinamaan. na jati nu ṅaranan, tanpa diṅaranan jati tan katuduhhan ku ajñana uraṅ sabvana. ja di nu sakala di nu niskala, ja nu puhun jati dayəhhananna, dina uraṅ sabvana, jatina tanpa katuduh di jati bvana lavan sarira. samaṅkana ajñana katuduhhan ti puhun ka jati, pun.

⟨Folio 12-13⟩
⟨27-5⟩ ini cipta ajñana, jati ti puhun, dougan vaya di nu tihəla, di nu pandəri, ti nu sakala, ti nu niskala. sugan vaya nu milaṅan iña, na tata ajñana di kakuraṅananna, tata ajñana. dipajarkən ñasabkən, maka ṅuni di kaluputananna kaduhhan ajñana. sugan dipajarkən ṅaduhuṅkən nu agəs vəruh di puhun, sugan vaya nu milihhan iña, dəṅna iña, dəṅna lain,
⟨Folio 13⟩ dəṅna juti, dəṅna jati. sugan vaya nu milaṅan ñana, tata katuduhhan niṅ ajñana, nu iyatna di taṅkal nu ilik di jati.

⟨Folio 13⟩
⟨6-13⟩ sugan vaya na pandita, parasatiya, agəs cita atajñana, avas di rasa, agəs ilik di alit, cita təhərna iyatna, parekot təhərna ñaho, iṅət təhərna bənər, agəs rampuṅ puput vəruh, tatas lantas, titis lantis, cita avas di rasana.

⟨Folio 13⟩
⟨14-18⟩ agəs tərus ma naravaṅ niṅ bvana, puput vrəh paritama, tatas rampuṅ niṅ ajñana, ñaho di jati vvat niṅ ganal, alit niṅ ajñana pun.

⟨Folio 13⟩
⟨19-21⟩ jati saṅ pandita, pun, hegan kami samodana ku na katuduhhan niṅ ajñana.

⟨Folio 13⟩
⟨21-28⟩ lamun vaya nu milaṅan iña, mulah ditamakən, mulah dikaliṅakən, mulah dipirahasea, iña ma mulah dipuji, kena hatə kajəəṅ səri, dipedah ma hatə kajəəṅ suṅkan, hatə kajəəṅ rua.

⟨Folio 13⟩
⟨29-37⟩ iñana jati nu hatə kəna dipuji, nu hatə kəna dipeda. siar di jati rasa soraṅan, ñaho ma di jati nu muji, ñaho ma di jati nu meda, hatə kabava muji, hatə kabava meda, hatə kabava ku na kairəṅan, hatə kabava ku na kabisaan jana jati.

⟨Folio 13-14⟩
⟨38-3⟩ tan kabava ku tita laṅgaṅna ñana, ku nu cəta ṅagivaṅ ñana, hayva siṅkara
⟨Folio 14⟩ visesa, hayva siṅkara prəjaña, sikara bisa, sikara ajñana, hayva sikara darma, pun.

⟨Folio 14⟩
⟨4-8⟩ Lamun vaya nu mikarma iña, padita parasatiya, papada siya di tapa, di pada janma, vayaṅ-vayaṅ səkar rava, ja tulus tapa ka papa, pun.

⟨Folio 14⟩
⟨9-14⟩ lamun vaya nu visesa mataṅ desa, pada siya puṅa carita ratu prabu. lamun mikarma iña siyara visesa, vayaṅ-vayaṅ səkar rava, ja tulus tapa ka papa.

⟨Folio 14⟩
⟨15-20⟩ lamun vaya nu mikarma iñana, ñaho di vvat jati saṅhiyaṅ hayu, vayaṅ-vayaṅ səkar rava, ja tulus tapa ka sorga devata, ka jati niskala pun.

⟨Folio 14⟩
⟨21-30⟩ ñaho kadi kaliṅaniṅ jati vuruṅan tapa, mana papa hatə kañaho di jati nu ñiən tapa, mana papana di tapa, kena hatə ñaho di jati di maneh. lamun ñaho di jati nu ñiən tapa, muku papa ja jati dayəhhan tapa, tan kəna dituduh tapa, pun.

⟨Folio 14⟩
⟨30-40⟩ ñaho kana jati suniya hnəṅ bvana, heraṅna jati nirmala, gəsan saṅ pandita satiya tuṅgal ajñana, ti jati visesa, vvatna hurip jati mula mataṅiyan, jati mula niṅ ajñana, na mula jati saṅ Manon, jati mula saṅ tuṅgal, vvat mula jati prəmana.

⟨Folio 15⟩
⟨1-6⟩ vvat jatina alit, vvat mula tina carita, mula jati acitiya, taṅkal jatina ləñap, vvat jati niṅ ləñəp, jati mulaniṅ ləñəp, jati vvat niṅ ləṅis, vvat jatina nis, na hatə katuduh.

⟨Folio 15⟩
⟨7-16⟩ jati mula niṅ iyatna, vvat jatiniṅ ləṅis, puhun jatiniṅ tutur, vvat jati niṅ hidəp, na mula jatiniṅ sabva, na puhun jatiniṅ bayu, na mula jatiniṅ rasa, na vvat jati sarira, puhun vvat jati kama ratih, vvat jati niṅ bvana.

⟨Folio 15-16⟩
⟨17-3⟩ Tuṅtuṅ təgəlan na carita, +nis di kaliṅaniṅ tuṅgal, tuṅgal ñaho kafi kaliṅaniṅ bənər, bənər ñaho kadi kaliṅaniṅ təgər, təgər ñaho, kadi kaliṅaniṅ təmən, təmən ñaho, kadi kaliṅaniṅ jati, jati ñaho, kadi kaliṅaniṅ laṅgəṅ, laṅgəṅ ñaho, kadi kaliṅaniṅ sadakala, sadakala ñaho, kadi kaliṅaniṅ puhun, puhun ñaho, kadi kaliṅaniṅ agəs, agəs ñaho, kadi kaliṅaniṅ hatə, hatə ñaho kadi kaliṅaniṅ tanpa katuduhhan, tanpa katuduhhan ñaho, kadi kaliṅaniṅ tanpa nama, tanpa nama, ñaho kadi kaliṅaniṅ tanpa ṅaran. ñana luput puhun, tanpa katuduhhan-nanna, ajñana uraṅ sabvana, di nu sakala, di nu niskala,
⟨Folio 16⟩ ja hatə tanpa katuduh, ja bihəṅ tanpa katuduh, ja luput tanpa katuduh, ja tan katuduh.

⟨Folio 16⟩
⟨4-7⟩ tan kəna dituduh, ja niskala tanpa katuduh. ja tan hana tanpa katuduh, tanpa namana, tanpa ṅaranna.

⟨Folio 16⟩
⟨8-39⟩ ja na puhun luput, nu maka luput, tanpa katuduhhan niṅ tanpa ṅaran, ja luput nu maka luput, niṅ tanpa katuduhhan tanpa nama, ja nu maka luput, nu luput, luputna niṅ tanpa katuduhan niṅ tan hana, ja nu maka luput, luput-luputna, tanpa katuduhhan na niskala. ja nu maka luput, nu luput, luputna tanpa katuduh ti nu luput. tan katuduh, ja nu maka luput, luput-luputna, tanpa katuduh ti nu luput. ja nu maka luput, luput-luputna, tanpa katuduh na bihəṅ, ja nu maka luput, nu luput-luputna, tanpa katuduh. tina hatə, ja nu ñiən puhun hatə katuduh, di puhun. iña di jati tan hana, iña di jati niskala, iña di jati satiya, saṅ pandita, iña di jati devata, iña di jatina seda, iña di jatina sakti, iña di jati manusa, jati suda, iña di jati sakala, jati niskala, pun.

⟨Folio 16-17⟩
⟨40-11⟩ lamun ñaho ma di kaliṅaniya,
⟨Folio 17⟩ di nu ñiən puhun, di jati di agəs, hatə katuduh di tanpa namana, di tanpa ṅaranna, di jatina hatə katuduhhan-nanna uraṅ sabvana, di sakala, di niskala. lamun ñaho ma di jati hatə katuduhhananna, ñaho di puhun hatə katuduhhananna, ñaho ma di agəs hatə katuduhhan-nanna.

⟨Folio 17⟩
⟨12-25⟩ lamun ñaho ma di kaliṅaniya, di agəs hatə katuduhhananna, ñaho di agəs di jati agəs, di maneh. ñaho di puhun agəs di maneh, ñaho di agəs, agəs di maneh, agəs katuduhhananna. ṅaraniya, kaliṅaniya ñaho di jati di maneh. lamun hatə ñaho di jati agəs, hatə katuduh di puhun agəs, hatə katuduh di agəs, hatə katuduh. lamun lamun ñaho di kaliṅaniya, ñaho di jati di maneh.

⟨Folio 17⟩
⟨25-27⟩ lamun hatə ñaho di kaliṅaniya, hatə ñaho di jati di maneh, pun.

⟨Folio 17⟩
⟨28-40⟩ Ini nu ñiən ajñana, pipañalinduṅanən cita prəjña arajñana, saṅhiyaṅ ajñana, dipitəṅ
⟨Folio 17-18⟩
⟨40-21⟩ jati uraṅ sabvana,
⟨Folio 18⟩ di nu sakala, di nu niskala, di nu tan hana. lamun dek ñaho di jati di maneh, tiṅgalkən na nisna saṅsaya, di drabiya kabeh ti sarira. tuṅgalkən ka-bənər-bənər, tuṅgalkən ka təgər-təgər, tuṅgalkən ka təmən-təmən, tugalkən ka jati-jati, tuṅgalkən ka laṅgəṅ-laṅgəṅ, tuṅgalkən ka sadakala. sadakala tuṅgalkən ka puhun. puhun tuṅgalkən ka aṅgəs, aṅgəs tuṅgalkən ka hatə, hatə tuṅgalkən ka tanpa katuduhhannanna, ka tanpa namana, ka tanpa ṅaranna. sakitu na pigunaən, lamun dek ñaho di jati, di puhun, di aṅgəs, agəs hatə katuduhhannana. sakitu lamunna kapilu na, ñiar na jati soraṅan, pun.

⟨Folio 18-19⟩
⟨22-1⟩ ini na sadaṅ ti jati, turunna ti puhun, nu ṅayatnaan na jati, dihinarran tan kahinarran, dipadaṅan, tan kapadaṅan, dituduhhan, tan katuduh, diucap tan kaucap, tan katoṅton, tan kavrətan, tan karagap, tan kasikəp, tan kagaməl, tan karasa, tan kaprəvasa, tan kaloran deneṅ lor, tan kakidulan deneṅ kidul, tan kakulonan deneṅ kulon, tan kavetanan deneṅ vetan. tan lor, tan kidul, tan kulon, tan vetan, tan sor, tan luhur, tan ganal, tan alit, tan bayu, tan sabda, tan hidap, tan vulan, tan ventaṅ, tan aditiya, tan kukus, tan saṅhub,
⟨Folio 19⟩ nir siuh tan hananiya kabeh.

⟨Folio 19⟩
⟨2-17⟩ ini na pigunaən təmən, pakən na diri ti bumi, pakən na niṅgalkən jati bvana lavan sarira, na pakən ṅahusir na jati, pakən ṅadoṅkap ka taṅkal, pakənna cunduk ka puhun, paṅkatna jati ti suniya nisna nirmala, ti suniya nisna ləñəp, nisna saṅsaya, ti suniya ləñəp ləpas nirmala, ti jati ləñəpna ləṅis-na nisna satiya, na atis tina tiisna, ṅənah manah liṅlaṅna tuṅgal, na ciciṅna, jatina laṅgəṅna.

⟨Folio 19⟩
⟨18-30⟩ lamun-na paṅkatna jati ti sarira, niṅgalkən na jati kahannan, tanpa rasana niṅgalkən na kaləpasan, kamoksahhan, pakənna paṅkat ti ləñap, pakənna paṅkat ti ləñap, pakənna diri ti ləṅit, pakən niṅgalkən na katuduhhan di sarira. paṅkatna jati ti sarira, hatə ləmpaṅ teka təka, hatə təka teka dataṅ. lamun paṅkat ti sarira, teka hatə ti sarira, paṅkatna lac hatə ti sarira.

⟨Folio 19⟩
⟨31-35⟩ teka sida tanpa paran na jati sakədap, sida agəs ka jati, agəs kadoṅkap na taṅkal, agəs cuduk ka puhun, kaagəs hatə katuduhhananna, pun.

⟨Folio 19-20⟩
⟨36-8⟩ ini na paritah pakən paṅkat ti sarira, na jati, lamun diri ti lətikna nət ti ləñəp, ti suniya alit-niṅ ləñap, niṅ ñana, paṅkat ti atintiya, lac
⟨Folio 20⟩ mana hatə ti ləñəp, ləñap mana teka sida, sakaparanna niskala, sakədap aṅgəs sida, ka jati tan hana, teka sida sakaparan ka jati tanpa nama, ka jati tanpa ṅaran, ka sida luput jati tanpa katuduhhananna, jati agəs visesa dayəhhananna, pun.

⟨Folio 20⟩
⟨9-22⟩ ini hatə katuduhhananna, na pakən agəs panteg ka vvat, pakən ləṅit ti jati, pakən pupus ti puhun, pakən luput ti tanpa katuduh, pakənna paṅkat ti ləñap, ti tanpa nama, pakənna hilaṅ sakədap, tanpa paranna, hilaṅ ti tanpa ṅaran, sakədap sida, lac hatə katuduhhan. teka sida tanpa paranna. sakədap sida, mana luput puhun sida, mana luput tanpa katuduhhananna. sakədap sida, agəs dataṅ ka vvat madiyana, tanpa katuduhhananna, pun.

⟨Folio 20⟩
⟨23-33⟩ sakitu, lamun kaiyatnakən na puhun, vvat mula jati kapulaṅan. paṅuvusna jati saṅhiyaṅ hayu, paṅṅuvusna puhun, luputna jati tanpa katuduhhan, paṅṅuvusna jati saṅ Mmnon, paṅṅuvusna jati ajñana, paṅṅuvusna jati ma hurip-niṅ bvana, paṅuvus ajñana, jati tanpa katuduhhan, pun.

⟨Folio 20⟩
⟨34-38⟩ lamun dek ñaho di puhun jati di maneh. pun, mulah mo laraṅankən maka təmən, mulah di maka rea nu ñaho kena litana jati, laraṅan ti niskala, pun.

⟨Folio 20-21⟩
⟨38-10⟩ sahur nu naṅtu: anakiṅ, nu tan hana ləvih niṅ laraṅ ajñana,
⟨Folio 21⟩ mulah mo iyatnakən na jati bvana, lavan sarira. iyatnakən na puhun musuh saṅhiyaṅ hayu, iyatnakən saṅkan niṅ sabda, taṅkal tulak tala saṅhara, panambay baya, ganal, alit, mulah dimaka nəmpuh di sarira. lamun-na nəmpuh di sarira, ganalna nəmu salah pamedana, na niskala papa sarira, lamun hamo iyatna di jati di maneh, pun.

⟨Folio 21⟩
⟨11-23⟩ iyatnakən na vvat mulaaṅ ka padaṅ, taṅkal tulakna tala saṅhara, panabay baya niṅ ajñana, iyatnakən na jati vvat-niṅ budi kaliṅa, iyatnakən na dkati vvatniṅ sadi panadi, puhunna tutur guru lagu, iyatnakən na jati vvat, mula sadi sadaya niṅ ajñana, cəcəkna, pada lisanna, iyatnakən na jati vvatniya həəh tə təiṅ. kena iñana jati, iñana puhun, duruna vvat niṅ siksa guru.

⟨Folio 21⟩
⟨24-29⟩ dərma pitutur, vvat mula dərma siksa, dasa sila, pasa siksa, na jati, vvat niṅ ulah, pamali. iyatnakən puhun musuh, ləbuh talapakakan, upa-drava cadu sakti, saṅ pandita.

⟨Folio 21⟩
⟨30-34⟩ mulah mo iyatna-yatna, dina jati di saṅhiyaṅ siysa, mulah dek nəbuk puhun, ṅarumpak hada, ulah ṅaleṅkahan dada, ṅalivatan sipat vataṅ, ulah pamali.

⟨Folio 21⟩
⟨34-38⟩ lamun hamo ñaho di kaliṅaniya, ulah pamali, lita puhun musuh, taṅkal saṅhara. na mula panabay baya, taṅkal mula kali saṅhara, papa sarira, pun.

⟨Folio 21-22⟩
⟨39-12⟩ lamun hamo ñaho madi budi kaliṅana, na ulah kəna ku sa-
⟨Folio 22⟩ jaka saṅhiyaṅ siksa, dasa sila, paca siksa. lamun kəna ku ulah ma, di ganal niṅ sarira, siya nəmu dosa, kəna ku cənda pedaan, duka, dopara, dirurud, dirampas ñandaṅ hutaṅ, katəbus kapihalaṅ sarira, sakagəsan na maṅkuk hulun hatə mənaṅ buṅah, sakagəsanna kapibahada, ku pada janma. sakitu kahuvusananna, janma məraṅ ulah nu hatə ñaho di jati maneh, pun.

⟨Folio 22⟩
⟨13-15⟩ lamun di niskala, kəna ku kavah saṅ iyana bala, papa niskala sarira, samaṅkana agəsniya, pun.

⟨Folio 22⟩
⟨16-26⟩ kaliṅaniya pamali ma, di ganal sariraniya, kəna ku cakna, sanjata saṅhiyaṅ Darma siksa, dasa-sila paca-siksa, kəna ku puhun musuh, ku taṅkal sahara, kəna ku taṅkal panabay baya, agəs kəna ku cadu sakti saṅ visesa, agəs kəna ku loka sabda, sa-rat nikaṅ jagat kaliṅaniya, pamali, palih kahuvusanniya. sakitu nu hatə ñaho di jati di maneh, pun.

⟨Folio 22-23⟩
⟨27-9⟩ nu hatə iyatna di sarira, nu mrəraṅ ulah nu mapag, taṅkal nu ṅarupak hada, nu ṅaləpaṅan vataṅ sipat saṅhiyaṅ siksa. na ulah, pamali, hamo ñaho di jati maneh, kəna ku sanjata siṅkara bala, ku cakra si hada bvana, karuruh ku musuh ganal, musuh alit. kasampak kahadaṅ lampah, ku hala saṅhara panabay baya. lamunna nəmpuh di sarira, sakagəsan nəmu mala, bala ditambaan. agəs bala, kali saṅhara, papa sarira, sakitu ma nu mriraṅ ulah,
⟨Folio 23⟩ nu hatə ñaho di jati, kasampak kahadaṅ lampah, sakaparanna nəmu saṅhara sarira. lamunna nəpuh pameda siksa niskala, samətuna hana sakeṅ tan hana di sarira. lamunna nəmpuh teka karasa, hatə karasa ruana, dataṅna ləmpaṅna, hatə ruana kala di lacan, ja hatə lacanənanna.

⟨Folio 23⟩
⟨10-18⟩ lamunna nəmpuh, na sameda niskala saṅhiyaṅ siksa, lamunna dataṅ ka saṅ Manon, saṅhiyaṅ siksa ta saṅ Manon: Lamunna nəpuhna pameda niskala, saṅhiyaṅ siksa, lamunna dataṅ ka saṅ Manon, saṅhiyaṅ siksa ha saṅ Manon. lamun hamo iyatna nu di jati di maneh, pun.

⟨Folio 23⟩
⟨19-37⟩ lamun ṅaləpaṅan saṅhiyaṅ, mrəraṅ, ulah pamali saṅ Manon, kəna ku niskala saṅhiyaṅ siksa. lamunna nəpuh ka saṅ Manon, samana mətu, hana sakeṅ tan hana, teka karasa tanpa saṅkan, na pameda niskala saṅhiyaṅ siksa, di sarira saṅ Manon, teka nəmu mala tanpa saṅkan, teka huam hoream, teka lamur putəkən, teka bolor, buta loroṅṅən, teka pecak padəm, mata hatə ñəəṅ, ləmpaṅna rumampa-rampa, papa rumakət deneṅ saṅsaya, papa rumakət deneṅ sarira.

⟨Folio 23-24⟩
⟨38-1⟩ sakitu kahuvusananna nu kədə, mriraṅ ulah nəmu mala, ku padrava saṅ-
⟨Folio 24⟩ hiyaṅ siksa pun.

⟨Folio 24⟩
⟨2-15⟩ ini iyatnakən, niskala saṅhiyaṅ siksa, di dati saṅhiyaṅ miṅət, lamun nəmbuṅ puhun, mapag taṅkal, ṅarumpak hada, mrəraṅ ulah saṅhiyaṅ siksa, saṅhiyaṅ miṅət katəpuhhan papa, kəna ku na pameda alitna, ulah pamali. lamun hamo ñaho di jati iṅət di maneh, katəpuhhan mala, di ganal sarira saṅhiyaṅ miṅət, sadataṅna pameda, samasana mətu hana sakeṅ tan hana, di sarira, teka karasa tanpa saṅkan.

⟨Folio 24⟩
⟨16-25⟩ lamunna cəli, sambuṅ katəmpuhan mala, teka coṅe, teka tosek, teka pəpət, teka pətəṅ, teka lupa, teka lipi, teka himəṅ, teka muṅəṅ, teka bana, ṅagəmba ṅamba rata, papa sarira tanpa ṅarəṅə, di jati saṅhiyaṅ miṅət. sakitu kahuvusananna, nu hatə ñaho di jati pun.

⟨Folio 24⟩
⟨26⟩lamunna dataṅ alit niskala, daṅhiyaṅ siksa kana tutur jati, hatutur jati, sugan hamo ñaho di tutur jati di maneh. sugan vaya nu muṅkurran, na puhun, mapagan taṅkal, ṅarupa ka hada, mri raṅ ulah saṅhiyaṅ siksa. lamun vaya nu kər ditutur, lain di jatina, katəpuhhan nəmu mala, di tutur sarira, kəna ku pameda alit niskala, saṅhiyaṅ siksa. teka karasa tanpa paranna, haja buruṅ tutur, haja
⟨Folio 25⟩ tiru makut vuruṅan tapa kabeh, papa sarira niṅ tutur, kapadəman ku saṅhiyaṅ siksa, dimaka vuruṅ tutur, vuruṅ mətu, vuruṅ reka, vuruṅ rupa, vuruṅ varna, tan mətu ganal, tan metu alit, tan mətu hana. maka vuruṅ sakaparan-paranna, maka tutur papa, maka hilaṅ tanpa kajajadiananna.

⟨Folio 25⟩
⟨11-13⟩ sakitu huvusananna tutur, nu hatə ñaho di jati di maneh, pun.

⟨Folio 25⟩
⟨14-39⟩ sadataṅna alit, niskala saṅhiyaṅ siksa, kana hidəp tanpa karasa, ka hidəp hamo ñaho di jati hidəp, di maneh. lamun salah hidəp, muṅkurran puhun, mapag taṅkal, ṅarumpak hada, mriraṅ ulah saṅhiyaṅ siksa, ta hidəp katəmpuhan mala hidep di sarira, kəna ku pameda alit, niskala saṅhiyaṅ siksa, maka disalah hidəp, salah ti niṅ salah aṅən-aṅən, salah rasa mika ləpas varna saṅsaya, mikahanan varna visaya, salah nu dipisari, visesa sarira hidəp, mikaləpas kahanan varna saṅsaya, di sari varna visaya, hasasab hidəp ja lain di jatna, kəna ku na niskala jati saṅhiyaṅ siksa, katəpuhhan papa hidəp, sakahanan bvana lavan sarira, pada sirəp pəjah, pada rumakət deneṅ kapapaan, di kavah saṅ iyana bala, hilaṅ tanpa kajajadiananna.

⟨Folio 25-26⟩
⟨40-2⟩ sakitu kahuvusananna, nu
⟨Folio 26⟩ kədə mrəraṅ ulah, saṅhiyaṅ sisa, pun.

⟨Folio 26⟩
⟨3-26⟩ ini siksaan jati ka saṅhiyaṅ sabda, pun. ta sabda sugan hamo ñaho di jati sabda di maneh, pun. mulah salah mətukən ñana sadana, sabda pamastuna. lamun mətukən jati sadana, na sabda jati satiya, utamana muliyana prəmanan, maka sabda jati, acitiyana, ləñəpna, ləṅisna, nirmalana, na sabda ləga ṅənahna, padaṅ caaṅna, rahina sadana, ahoh ahəniṅ aliṅlaṅ niṅ ras, srayana, ni lavane, ñamana sabda jati nirmalana. hala, mun vaya nu muṅkurran puhun, nu mapag taṅkal, nu ṅarupak hada, nu mrəraṅ ulah, niskala saṅhiyaṅ siksa, maka di nu salah tinuduh, haṅkara siṅkara sabda. maka di haṅkara sikara ajñana, haṅkara bisa, haṅkara sikara prəvña, haṅkara sikara darma, haṅkara sikara ñana, haṅkara sikara sadana.

⟨Folio 26⟩
⟨27-37⟩ lamunna mətu sabda ti sarira, nu maka givaṅ ajñana, pun. hamətuna ja lain sadana, kəna ku pameda alitna niskala saṅhiyaṅ siksa, katəpuhan mala, karasa, təmahan niṅ kaṅ sabda, di jati kahanan bvana lavan sarira. papa, saṅsara, pəjah, rumakət sakahanan nikaṅ sabda, kəna ku kavah sikara bala. maka papa hilaṅ muksah tanpa karana.

⟨Folio 26⟩
⟨38-40⟩ sakitu kahuvusananna, pun. nu kədə mreraṅ ulah saṅhiyaṅ siksa, pun.

⟨Folio 27⟩
⟨1-38⟩ ini alit niskala, siksaaniṅ bayu. lamun bayu hantə ñaho di hurip rasa jati di maneh, pun. lamun bayu ñaho di jati hurip di maneh, hamo muṅkurran puhun, mapad taṅkal, ṅarupak hada, mrəraṅ ulah saṅhiyaṅ siksa. lamun bayu salah mətuna, ti rasa lavan sarira. lamun mətu ti kahannan, tutur bayu təka maras, rasa məlas, rəvasniṅ sarira, teka usah, teka susah, teka rusah, teka geder, teka gedog, teka ṅecoṅ, teka liṅab, ikaṅ paviduan, təka gədag, teka iṅgut ikaṅ bvana, samətuna ti kahanan bvana lavan sarira, ja bayu lain-lain jatina, nu maka divaṅ bvana lavan sarira, bayu aṅkara niṅ bvana, bayu varna, bayu sadana, varna sarira, ja lain nu mahayu bayu jati di sarira, ta katəpuhhan nəmu mala, sakahanan nikaṅ bayu, di bvana lavan sarira, kəna ku pameda alitniskala saṅhiyaṅ siksa, bayu papa kəna ku sanjata cakra si-kəsta, rasana padəm pəjah, papa rumakət deneṅ sarira, di kavah ku saṅ iyana-na raspati, ma ka hilaṅ tanpa paranna, hilaṅ npa kajajadiyan. sakitot nu mrəraṅ nu kədə di saṅhiyaṅ siksa, kahuvusananna, pun.

⟨Folio 27-28⟩
⟨39-19⟩ ini lamun vaya nu iyatna di jatiniṅ bənər, di bvana jati
⟨Folio 28⟩ soraṅan, nu tan kəna ku sadaṅ budi, kaliṅanna tan kəna dikaliṅakən, nu tan kəna dipətukən, nu tan kəna divayakən, nu tan kəna dihatəkən, nu tan kəna dituduhhan, nu tan kena dibasaan, nu tan kəna dinamaan, nu tan kəna diṅaranan, tan kəna diirəṅkən, tan kəna dibasakən, tan kəna diñahokən, tan kəna dicitakən, tan kəna diajñanakən, disiar di rasa bvana lavan sarira, tan katəmu ku bayu, ku sabda, ku hidəp, tan katəmu ku tutur, ku miṅət, ku manin tan katon, tan katəmu, pun.

⟨Folio 28⟩
⟨20-31⟩ mo maku jatina, ku jati tərus manaravaṅ niṅ ajñana, jati tərus ma naravaṅ niṅ bvana, nu tan kəna dituduh ganal. alit, tan kəna dituduh batara, batari, dituduh deva, manusa, devata seda sakti, tan kəna dituduh ku tuṅgal, ku visesa, tan katəmu ku alit acitiya, tan katəmu ku ləñəp. ku ləñap, ku ləṅis, ku nis, ku ləpas, ku moksah, ku nirmala, tan katəmu.

⟨Folio 28⟩
⟨32-34⟩ mo maku jatina, lamun vaya nu iyatna di puhun jati niṅ bənər di maneh, pun.

⟨Folio 28⟩
⟨35-37⟩ ini pustaka ti puhun, luput jati tanpa katuduhhannanna, pun.

⟨Folio 28⟩
⟨38-40⟩ ini na vvat jati, mula tan luput, tanpa katuduhhananna, pun.

⟨Folio 29⟩
⟨1-4⟩ ini na vvat jati luput, tanpa nama. ini na vvat jati luput, tanpa ṅaranna. ini na vvat tan hana jati luput, tanpa katuduhhananna.

⟨Folio 29⟩
⟨5-6⟩ ini na vvat niskala jati luput, tanpa katuduhhananna.

⟨Folio 29⟩
⟨7-8⟩ ini na vvat jati luput, tanpa katuduhhananna.

⟨Folio 29⟩
⟨9-10⟩ ini na vvat luput jati, tanpa katuduhhananna.

⟨Folio 29⟩
⟨11-13⟩ ini na vvat na bihəṅ, jati laṅgəṅ suniya luput, tanpa katuduhhananna.

⟨Folio 29⟩
⟨14-16⟩ ini na vvat niṅ hantə, jati laṅgəṅ sunia luput, tanpa katuduhhannana.

⟨Folio 29⟩
⟨17-19⟩ ini na vvatna nis jati laṅgəṅ sunia luput, tanpa katuduhhannanna,

⟨Folio 29⟩
⟨20-22⟩ ini na vvatna ləṅis, jati laṅgəṅ sunia, luput tanpa katuduhhananna.

⟨Folio 29⟩
⟨23-25⟩ ini na vvat niṅ ləñap jati laṅgəṅ suniya, luput tanpa katuduhhananna.

⟨Folio 29⟩
⟨26-28⟩ ini vvat niṅ ləñəp, jati laṅgəṅ sunia, luput tanpa katuduhannana.

⟨Folio 29⟩
⟨29-31⟩ ini vvat acintiya, jati laṅgəṅ sunia luput, tanpa katuduhhananna.

⟨Folio 29⟩
⟨32-34⟩ ini vuit alit jati laṅgəṅ sunia luput, tanpa katuduhhannanna.

⟨Folio 29⟩
⟨35-37⟩ ini vuitna cinta, jati laṅgəṅ sadakala, sunia luput tanpa katuduhhananna.

⟨Folio 29⟩
⟨38-40⟩ ini vuitna tuṅgal, jati laṅgəṅ sadakala, sunia luput tanpa katuduhhananna.

⟨Folio 30⟩
⟨1-3⟩ ini vuitna visesa, jati laṅgəṅ sunia, luput tanpa katuduhhananna.

⟨Folio 30⟩
⟨4-6⟩ ini vuit niṅ bənər, jati laṅgəṅ sadakala, sunia luput tanpa katuduhhananna.

⟨Folio 30⟩
⟨7-9⟩ ini vuit niṅ təgər, jati laṅgəṅ sadakala, sunia luput tanpa katuduhhananna.

⟨Folio 30⟩
⟨10-12⟩ ini vvat niṅ təmən, jati laṅgəṅ sadakala, sunia luput tanpa katuduhhananna.

⟨Folio 30⟩
⟨13-15⟩ ini vvat jati laṅgəṅ sadakala, sunia luput tanpa katuduhhananna.

⟨Folio 30⟩
⟨16-18⟩ ini vvat laṅgəṅ jati laṅgəṅ, sadakala sunia luput tanpa katuduhhananna.

⟨Folio 30⟩
⟨19-21⟩ ini vvatna sadakala, jati laṅgəṅ sadakala, sunia luput tanpa katuduhhananna.

⟨Folio 30⟩
⟨22-25⟩ ini na puhun luput, jati tanpa katuduhhan niṅ ajñana, ñana vvat niṅ agəs, panteg hantə katuduhhananna.

⟨Folio 30⟩
⟨26-27⟩ jana vvat mula tanpa nama. vvat mula tanpa ṅaran.

⟨Folio 30⟩
⟨28-31⟩ mulana mana, ti mana, jati mana, luput mana, ti mana bvana hatə, mana bvana tanpa katuduhhananna.

⟨Folio 30⟩
⟨32-40⟩ puhun luput, tanpa katuduhhananna. tuṅtuṅ gantuṅ. bvana hantə. hantə tuṅtuṅ gantuṅ, mantuṅan niṅ buanna hantə, ja tan kəna dituduhhan bvana hantə. ja na vvat hantə katuduhhananna hantə.

⟨Folio 30-31⟩
⟨40-2⟩ ja na vvat hantə. nu
⟨Folio 31⟩ maka hantə nu hantə, luput katuduhhananna hantə.

⟨Folio 31⟩
⟨3-5⟩ lamun aṅgəs, ñaho di aṅgəs uraṅ sabvana, uraṅ hantə ñaho di puhun, pun.

⟨Folio 31⟩
⟨6-8⟩ na vvat paṅ kuvus ti nu luput, tanpa katuduhhan ti puhun, pun.

⟨Folio 31⟩
⟨9-10⟩ təlassi nulis riṅ saṅgara visesa, pun.