Tattva Brata as Transmitted in Balinese Manuscripts: Digital Critical Edition and Parallel Translation —

om̐ avighnam astu.

nihan parikramaniṅ brata, yan kita mabrata, hayva pati pati, yan duruṅ amvit iṅ saṅ asәḍahan brata, hyaṅ kaki citra gopta, nini citra gopta, tarimanən iṅ sumur, caru, sәḍah putih hijo, ma, pukulun kaki citra gopta, nini citra gopta, iṅsun amvit abrata pukulun, dulurәn iṅsun abrata, katәkana sapinakṣan iṅsun, yan asalah abrata, asalaha riṅ saṅ asәḍahan brata, sabratanta maṅkana. mvah sisigiṅ abrata, kaṅ rahayu tәmən, ambulu, pha, sugih mās, sisig kayən, pha, bahu putra, sisig vaṅkal, pha, sugih pari, sisig lampәni, pha, labdhavara kita. vor sama kvehnya, yogya kayatnākәna tәmən.

nihan saṅ hyaṅ tattva brata, kayatnākәna de saṅ amet kasiddhan, kasiddhaniṅ brata, tan pāvak tattvannira saṅ hyaṅ dharma, rajəg turus, tattvanika, apan pinakāvak balәbəd, lavan tattvaniṅ brata, mvaṅ aṅlәpasakən kasiddhyan, sira kadyaṅganiṅ avak kiva tәṅən, maṅkana saṅ hyaṅ tattva brata mvaṅ tapa, mataṅnyan lәkasakәna de nira saṅ amet hayu, anom alәkas anom amaṅggih phalaniṅ brata, nora dadi yan tan ginave, nora ṅalap titahiṅ atitah, kady aṅggāniṅ haḍaṅ esuk, esuk amaṅan, havan haḍaṅ, havan amaṅan, yan iṅ sore aḍaṅ, sore maṅan, yan tan paḍaṅ tan pamaṅan, saolah saolih, maṅkana kramanya, apan hala hayuniṅ pagave katәmu, mataṅnyan larisakәna pagave hayu, mijil sakeṅ tattva brata.

nihan pariñciniṅ brata, kavruhakәna.

§III.1 hana brata mәgat rasa, ṅa, yan satәṅah amaṅan, suməṅkāṅinaṅ, apәnəd tan paṅucap, vus aṅinaṅ, malih amaṅan, satahun samayanya, bhaṭāri Umā hyaṅnya, ma, Om̐ mam̐ Umāyai namah, pamit, pha, tan pәgat sihniṅ malaky arabi, mvaṅ samanta janma paḍa sih.

§III.2 hana brata maṅan sәga ṅgi, satahun pituṅ lek samayanya, bhaṭārī vastu hyaṅnya, ma, pamit, pha, tan pәgat sihniṅ malaky arabi, ṅuniveh sihniṅ sama janma paḍāsih avәlas i kita.

§III.3 hana brata bhūmipātra, ṅa, yan amaṅan tan paharyan, aṅlak i lәmah, hyaṅ vaiśravaṇa hyaṅnya, satahun pituṅ lek samayanya, ma, Om̐ sam̐ vaiśravaṇāya namah, pamit, pha, sugih lәmah, śīma jana anurāga kita ri saṅ prabhu bhūmi viku.

§III.4 hana brata nulamidam, ṅa, aṅupavāsa savәguṅ, atәlasan savәguṅ, tigaṅ lek samayanya, pha, siṅ prih meṅgal katәmu denya, jana anurāga kita, bhaṭāra brahmā hyaṅnya, ma, om̐ Am̐ brahmane namah, pamit.

§III.5 hana brata amaṅan tan kasurupan saṅ hyaṅ śiva raditya, tigaṅ tahun samayanya, bhaṭāra śiva hyaṅniṅ brata, pha, apaḍaṅ kaṅ ati, praṇa aṅən aṅənta, ekasadya, ma, om̐ mam̐ śivāya namah, yan ahyas.

§III.6 hana brata tan pamaṅan yan kasurupan saṅ hyaṅ sūrya, satahun divasanya, bhaṭāra śiva hyaṅnya, ma, Om̐ namah śivāya, pamit, pha, prajñan riṅ sarva kārya, makādi vidya, muvah yan agamәlan katha, kakavin tan apiṅgiṅ, apәkik tan pasiriṅ.

§III.7 hana brata mūrṇama, ṅa, naṅkən pūrṇama, aṅupavāsa, pituṅ tahun pituṅ lek samayanya, bhaṭārī ratih hyaṅnya, ma, Om̐ śrīratih devyai namah, pamit, pha, siddha kāryanta, deva bhūṭāsih iri kita.

§III.8 hana brata nilәm, ṅa, aṅkən tilәm kita aṅupavāsa, pituṅ lek samayanya, bhaṭārī rātri devī hyaṅnya, ma, Om̐ rātri devyai namah, pamit, pha, kinasihaniṅ rāt kita, deva bhūṭāsih iri kita.

§III.9 hana brata narasvatī, ṅa, tan pamaṅan sәkul iṅiliran kevala tumpəṅ juga, tan paivak, kevala uyah, satahun pituṅ lek samayanya, bhaṭārī rāja lakṣmī hyaṅnya, ma, Om̐ śri rāja lakṣmyai namah, pamit, pha, təka guṇanta, mvaṅ siddha saprayojananta,tәhәr subhaga kita, lavan sihniṅ malaky arabi.

§III.10 hana brata muṣpasadā, ṅa, yan amaṅan mevak kəmbaṅ rumuhun, satahun lavasnya, saṅ hyaṅ smara hyaṅnya, ma, Om̐ śri smarāya namah, pamit, pha, riṅ rūpa tan pasiriṅ, akveh rәsəp asih iri kita.

§III.11 hana brata ṅlepana, ṅa, yan amaṅan mevak alalab rumuhun tigaṅ tahun samayanya, bhaṭārī śrī hyaṅnya, ma, Om̐ śrī śrī devyai namah, pamit, pha, rūpanta śrī amenak, sugih pari, akveh asih avlas iri kita.

§III.12 hana brata tan paṅinaṅ, satahun salek samayanya, saṅ hyaṅ manodeva hyaṅniṅ brata, ma, Om̐ manodevāya namah, pamit, pha, meṅət rūpanta manis,mvaṅ akveh bhrānta hyun iri kita.

§III.13 hana brata lәga prāṇa, ṅa, yan amaṅan amaṅku duhuṅ, satahun pituṅ lek samayanya, ma, Om̐ namo rudrāya svāha, pamit, pha, akeh vvaṅ tumualaṅ riṅ jīvanta, mvaṅ akeh avәlas asih iri kita.

§III.14 hana brata birā, ṅa, yan amaṅan mevaka uyah, satahun tigaṅ lek samayanya, bhaṭāra Iśvara hyaṅnya, ma, Om̐ mam̐ īśvarāya namah, pamit, pha, prih meṅgal katәmu, kinasihaniṅ rāt kita , mvaṅ deva bhūṭa sih ri kita.

§III.15 hana brata tan pamaṅan sərәh iṅapvan, satahun samayanya, bhaṭārī bhagāvati hyaṅnya, ma, Om̐ namo bhagavatyai namah, pamit, pha, luputiṅ sarvaviṣa, nirvighna kita.

§III.16 hana brata amaṅan ṅaryan roṇḍon, pituṅ tahun samayanya, bhaṭāreśvara hyaṅnya, ma, Om̐ mam̐ Īśvarāya namah, pamit, pha, mantuk iṅ pada bhaṭāra Īśvara, sasarnya maṅjanma ri juru bhāṣaṇa, sugih hulun, labdha riṅ saṅ prabhu mvaṅ mantrī, tan pada lavan rovaṅta kabeh.

§III.17 hana brata ṅraka, ṅa, amaṅan sarva buṅkah, tigaṅ tahun samayanya, hyaṅ īśvara hyaṅnya, ma, Om̐ mam̐ ⟨śivā⟩ya namah svāhā, pamit, pha, mantuk iṅ pada bhaṭāra śiva, sasarnya maṅjanma riṅ viku guṇavān, sugih pirak, labdha riṅ saṅ prabhu mvaṅ mantrī.

§III.18 hana brata ṅumbhakarṇa, ṅa, yan aturu miriṅ satahun, lumah satahun, kumurәb satahun, tigaṅ tahun samayanya, bhaṭāra rudra hyaṅniṅ brata, ma, Om̐ namo rudrāya namah, pamit, pha, kinasihaniṅ paṇḍita kita. samanta janma samatvaṅ, siddha saprayojananta.

§III.19 kunaṅ ikaṅ yan mona ṅisiṅ, prih meṅgal katәmu, bahu śiṣya kita.

§III.20 kunaṅ ikaṅ yan mona napu, pha, kinasihaniṅ paṇḍita, mvaṅ deva prabhu, rahayu riṅ pañjanmanta.

§III.21 kunaṅ ikaṅ mona sisig, pha, jaya kāryanta.

§III.22 kunaṅ ikaṅ mona bhasma, pha, mantuk iṅ bhaṭarī rātri, sasarnya majanma ri saṅ paṇḍita.

§III.23 hana brata yan aturu tan pakalasa, satahun tigaṅ lek samayanya, hyaṅ nāga rāja hyaṅniṅ brata, ma, Om̐ nāga rājāya namah, pamit, pha, deva bhūṭa sih iri kita, mvaṅ sarvaguṇa təka.

§III.24 hana brata turu sumaṇḍah, tigaṅ lek samayanyā, bhaṭāra viṣṇu hyaṅnya, ma, Om̐ Um̐ viṣṇave namah, pamit, pha, mandi svara kita riṅ samajanma, labdha vara.

§III.25 hana brata prāṇa, ṅa, tan pamaṅan sarvāmbǝkan, tan pamaṅan asiṅ prāṇi, pituṅ tahun samayanya, hyaṅ devātara hyaṅnya, ma, Om̐ devātarāya namah svaha, pamit, pha, putra vrәddhi, mvaṅ vәnaṅ vәnaṅ, kәbo sapi, sarva tinanǝmta vrәddhi kabeh.

§III.26 hana brata amaṅan pisan savәguṅ, saṅ hyaṅ sambhu devatanya, satahun divasanya, ma, Om̐ śambhave namah, pamit, pha, mañjanma riṅ kula putra, subhaga siddhi siṅ saprayojananta, prih meṅgal katәmu.

§III.27 hana brata, amaṅan pisan savәguṅ, saṅ hyaṅ śambhu hyaṅiṅ brata, tigaṅ tahun lavasnya, pha, drәman aputra, siṅ prih meṅgal katəkan.

§III.28 hana brata maṅan pisan sadina, sakavaśaniṅ abrata, saṅ hyaṅ śambhu hyaṅnya, pha, majanma riṅ kula putra, siddha saprayojananta.

§III.29 hana brata yan amaṅan anūtakǝn vulan, lvirnya, taṅgal pisan, sakәpǝl, yaniṅ avuvuh taṅgal, avuvuh sakәpǝl, makahiṅan lima vәlas kәpǝl, yaniṅ pūrṇama, apan atambǝh sakǝpǝl irikaṅ sarahina, kunaṅ ri paṅlvaṅ, lvaṅana ta ya sakәpǝl, naṅkǝn rahina, avәkasan aṅupavaśa yaniṅ tilǝm, tәluṅ lek samayanya, bhaṭāra indra hyaṅnya, ma, Om̐ surendrāya namah, pamit, pha, mantuk iṅ pada bhaṭāra śiva, sasarnya majanma riṅ ratu prajñan, mvaṅ viku bahu śiṣya kita.

§III.30 hana brata pattrāhāra, ṅa, amaṅan sarva roṇḍon, sari-sari, bhaṭāra maheśvara hyaṅnya, ma, Om̐ Om̐ maheśvarāya namah, pamit, pha, mantuk iṅ svarga bhaṭāra guru, sasarnya mañjanma riṅ svarga bhaṭāra brahmā, mvaṅ bhaṭāra viṣṇu, yaniṅ dlāha.

§III.31 hana brata phalāhāra, ṅa, maṅan sarvaphala, sari-sari, bhaṭāra brahmā hyaṅnya, ma, Om̐ Am̐ brahmane namah, pamit pha, mulih mariṅ svarga bhaṭāra guru, mvaṅ umaṅgguh śiva pada, sasarnya mañjanma riṅ kula putra kiteṅ dlāha.

§III.32 hana brata nirambu, ṅa, tan pamaṅan sarva ambә-ambә, bhaṭāra rudra hyaṅnya, ma, Om̐ namo rudrāya namah, pamit, pha, mantuk iṅ pada bhaṭāra rudra, sasarnya añjanma riṅ lituhayu prajña kita.

§III.33 hana brata ṅasaṅa, ṅa, abrata yan aṅkǝn kasaṅa, saṅ hyaṅ bāyu hyaṅnya, ma, Om̐ tam̐ bāyave namah, pamit, pha, mantuk iṅ svargan bhaṭāra prajāpati, rare mukti sukha tәkeṅ atuha.

§III.34 hana brata mopavāsa, aṅkǝn dvadaśi śukla pakṣa, kālaniṅ kapitu juga, brata bhaṭāra bhīma, [ṅa], ma, Om̐ bam̐ bhīmāya namah, pamit, pha, vīryavan kapintuhu deniṅ ratu, sugih mās pirak, mvaṅ rare hulun, putra vrәddhi, siddha kāryanta.

§III.35 hana brata aṅasta, ṅa, amaṅan i haryan, lәpa-lәpaniṅ taṅan kiva, mevaka uyah, tumpaṅakәn iṅ taṅan, sabhāgya yan tan pauyah, pha, agə̄ṅ kasiddhyanta, apagǝh kaprajñanta tan medan.

§III.36 hana brata pratipāda supta, ṅa, yan aturu pisan, tan paturu muvah, pha, ikaṅ abhicāra vәdi iri kita.

§III.37 hana brata trisandhyā, ṅa, madyus piṅ tiga sarahina, mvaṅ vәṅi, pha, lituhayu, sugih lәvih sakiṅ tapa vijilnya.

§III.38 hana brata amr̥ta māsa, ṅa, maharyan rvaniṅ vuṅlon, makādi añcaṅkokiṅ vvahnya, pha, siddha siṅ sakāryanta, lituhayu, sugih subhaga kita.

§III.39 hana brata narahan, ṅa, tan pamaṅan savrәddhiniṅ srī, vәnaṅ sarvamaṅśa paṅanǝnta, pha, siddha siṅ pinalakunta, kinahyunaniṅ strī kita.

§III.40 hana brata nirāmiṣa, ṅa, tan pamaṅan sarvamaṅśa, lvire, kәbo, sapi, celeṅ, makādinya tan paṅanǝnta, kevala siṅ tan kәneṅ olah, ivak kaṅ kәna paṅanǝnta, isiniṅ lvah, mvaṅ tambak, isiniṅ sāgara, kakaraṅan, iku vәnaṅ bhuktinta, pituṅ lek samayanya, pha, lәvih sakeṅ samanta janma, tan hana niriṅane kita, tur mantuk iṅ svargan bhaṭāra viṣṇu, sasarnya majanma riṅ viku bahu śiṣya,hayu tәmǝn.

§III.41 hana brata nirāmiṣa, yan amaṅan mevaka uyah, satahun tigaṅ lek samayanya, hyaṅ īśvara hyaṅnya, ma, Om̐ mam̐ īśvarāya namah, pamit, pha, siṅ pinrih meṅgal katәmu, tur kinasihan deniṅ rāt kita, mvaṅ deva bhūṭāsih iri kita.

§III.42 hana brata candra vr̥tti, ṅa, vrr̥ti ginave candra rūpa, panunu sәkul saśirahiṅ vānara gə̄ṅnya, yan kālanta maṅan, pasaṅ taṅ vr̥tti, tumpaṅakәn iṅ sәkul, saśirahiṅ vānara, umarәp vetan kita maṅan, yan mati ika riṅ vr̥tti , avusana denta amaṅan, pha, siṅ kāryanta meṅgal, siddha katәmu siṅ pinakṣa, subhaga kita, kinasihaniṅ saṅ paṇḍita, mvaṅ saṅ prabhu, rәsǝp asih kabeh kabeh.

§III.43 hana brata ṅrakta, ṅa, amaṅan lakәtan baṅ, satahun divasanya, pha, siṅ kāryanta siddha, mvaṅ mantuk iṅ svarga bhaṭāra brahmā, sasarnya mañjanma riṅ baṇyaga sugih.

§III.44 hana brata durga, ṅa, amaṅan sәkul jali, limaṅ lek samayanya, pha, mantuk iṅ svarga bhaṭāra viṣṇu, sasarnya mañjanma riṅ viku bahu śiṣya.

§III.45 hana brata kanaka drava, ṅa, amaṅan sәkul kuniṅ, tigaṅ tahun samayanya, pha, mantuk iṅ svarga saṅ hyaṅ mahādeva, sasarnya mañjanma riṅ da mpuhavaṅ sugih.

§III.46 hana brata phala āhāra, ṅa, amaṅan sarvaphala, tigaṅ lek samayanya, pha, mantuk iṅ svarga bhaṭāra sadāśiva, sasarnya mañjanma riṅ vvaṅ sugih, bahu śiṣya, bahu vadvā.

§III.47 hana brata ndhūma, ṅa, tan pamaṅan tampakiṅ apuy, tigaṅ tahun samayanya, pha, mantuk iṅ svarga bhaṭāra brahmā, sasarnya mañjanma riṅ vvaṅ sugih saṅkan rare, lituhayu paripūrṅa.

§III.48 hana brata ṅalivon, ṅa, moliha pituṅ tumpǝk kalivon, pha, prih meṅgal katәmu.

§III.49 hana brata maṅan sarva vīja, mvaṅ pucukiṅ alaṅ alaṅ, pha, vāk bajra, siddhi mantra, jaya kita.

§III.50 hana brata bhūmi patra, ṅa, yan amaṅan tan paharyan, saṅaṅ tahun samayanya, pha, kasambega deniṅ saṅ paṇḍita, sugih lәmah sīma, vrәddhi kaṅ varga kadaṅta, pinituhu deniṅ rāt, bahu śiṣya, vidyā āgama, kinatvaṅan de saṅ prabhu, yoganya śila gaṇa juga, maṅkana phalanya.

§III.51 hana brata anūtakǝn puṣpa bhaṭāra gaṇa, amaṅan moliha nǝm kәpǝl pisan aṅkǝn dina, pha, mantuk iṅ pada bhaṭāra guru, sasarnya mañjanma riṅ viku ijo, śakti dūradarśaṇa, sojarira keḍәp.

§III.52 hana brata tan paṅinum bañu, ri huvusniṅ amaṅan, pituṅ tahun samayanya, pha, tan kacalan phalanta.

§III.53 hana brata tan paṅinum bañu, aṅinaṅ sәrәh tan vinalik, satahun samayanya, pha, cinavǝtan deniṅ strī, yaniṅ strī tinapihan deniṅ kakuṅ, tәhәr tan mandi ikaṅ viṣya iri kita.

§III.54 hana brata ṅekadaśi, ṅa, yan taṅgal piṅ savәlas iṅ kasapuluh, kita matiāhāra, moliha tigaṅ kasapuluh, pha, mantuk iṅ pada bhaṭāra īśvara, sasarnya mañjanma riṅ ratu śakti.

§III.55 hana brata lәvih sakeṅ pañca mona, ikaṅ amona sadā kāla, aṅraṅkul brata kabeh, pha, kapaṅgih suka magə̄ṅ, mañjanma riṅ sugih saṅkan rare, sugih sәkul, atәhәr saśabdanta keḍәp deniṅ rāt kabeh.

§III.56 hana brata maḍaṅ, ṅa, tan pamaṅan sәkul madaṅ, pituṅ lek samayanya, pha, akveh vvaṅ harṣe kita.

§III.57 hana brata tan kәneṅ dyus, tan kәneṅ lǝṅa, tigaṅ lek samayanya, pha, lituhayu paripūrṇa, wicakṣaṇa, kinasihan deniṅ samanta janma.

§III.58 hana brata maṅan tan pakevuhan, tan karәṇan, tan vәnaṅ akarvan, satahun samayanya, pha, keḍәp deniṅ rāt, lituhayu paripūrṅa, prih meṅgal katәmu.

§III.59 hana brata maṅan tan paimbuh, pituṅ tahun samayanya, pha, prih meṅgal katәmu.

§III.60 hana brata aṅraditya, ṅa, aṅkǝn raditya amatiāhāra, satahun samayanya, pha, vāk bajra, siddhi mantra, jayeṅ śatru kita.

§III.61 hana brata maṇḍāva, ṅa, amaṅan limaṅ kәpǝl sari sari, limaṅ lek samayanya, pha, aṣṭaguṇa, subhaga paripūrṇa.

§III.62 hana brata saṅ bhīmā, ṅa, yan taṅgal piṅ pat bǝlas iṅ kapitu, amatiāhāra, pha, suka vrәddhi, siddhi mantra, jayeṅ śatru, keḍәp deniṅ rāt, prajña bisa agamǝl, aṅiduṅ, sugih mās pirak, mvaṅ rare hulun, vәnaṅ vәnaṅ, kәbo sapi, akveh punpunanya, kramanya, yaniṅ tәṅah vәṅi aṅadǝg aṅekapāda, tan kәneṅ turu, mvaṅ asaṅguni, siddhi kita.

§III.63 hana brata tan pamaṅan ivak bavi, pha, tan kataman deniṅ sarvaviṣya, mvaṅ ila vuḍug, sakvehnya paḍa doh, siddhi mantra kita, deva bhūṭa paṇḍita mānuṣa paḍa sih.

§III.64 hana brata mәgat rasa, ṅa, tan pamaṅan ivak celeṅ, tan pamaṅan asiyuṅan, tan pamaṅan ivak taṅiri, tan pamaṅan kәtan gajih, tan pamaṅan duryan, mvaṅ naṅka, mvaṅ gәḍaṅ varaṅan, tan pamaṅan kacaṅ hijo, kunaṅ phala buṅkah, phala gantuṅ, pha, śakti lәvih, sakārәpta katəkan tǝmbe.

§III.65 hana brata ṅasapuluh, ṅa, bratanira saṅ sinuhun iṅ panatharan, kramanya nәkul bañu, tan paṅinaṅ, amvitane ri taṅgal pisaniṅ kadaśa, avusana ri tilǝmi kasapuluh, salek samayanya, rehi caru amvit, yan alәkasa brata, anǝmbah iṅ saṅgar, ca, tumpәṅ gurih, ivak lambaraṅ itik, dulurana gәraṅ grih, kapitiṅ, antiga, kacambah, pelas lalab, uraṅ iṅasinan, pisaṅ kǝmbaṅ, raka vovohan, duvәgan, tәbu, bañu kuvuṅ, sәkar maṅle, gambir inaṅgit, maṅle tuñjuṅ, campaka, salviraniṅ kǝmbaṅ vaṅi, aturakәn iṅ deva, lәṅa vaṅi burat vaṅi, hurap urap jajā, sakalviraniṅ amikāmikan, vastra piṅe saparadǝg, sasari gnǝp, hartha, 225, dhūpa dhipā mәñan caṅdhanā, mvaṅ candhanenasab, vija kǝmbhaṅ skār urā, nihan deniṅ amantrā, mvītā sǝsǝdhǝp rumuhun, kavrәttārok lavan madhu, sǝsǝdhǝpakәna, dukāmvita ta ya, anǝmbahakәna kavaṅi, riṅ saṅgar, ma, Om̐ śrī mahādevāya namah, tәlas, ṅaturi caru, ma, Om̐ devadāru vidadhāmi, sa ba ta a i, nama śivāya, a u ma, ah, Om̐ devās sukham bhavantu, tәlas ta ’ṅǝmbaṅ urā, anambuta brata, savulan anәkul bañu, amәkasaneṅ tīlәm, sǝsǝḍǝpi samaṅkana, Uyah harәṅ, ma, Om̐ namo mahā devāya namah, namah śivāya, avighnam astu. caruniṅ labahana brata, sapuluṅ sapuluṅ mevakǝmbaṅ, kadi ṅūnī mantra. yan āṅarddhānakǝñ caru, kadi duk amvita juga, huvusan, ma, Om̐.

§III.66 hana brata vr̥kodara, ṅa, savulan lavasnya, amvitana i taṅgal pisan iṅ karo, tan pamaṅana sarvaprāṇi, mvaṅ salviriṅ vijiliṅ sagāra, śāntā veṣa ta kita, mavastra piṅe, agәgәlaṅa lave kinuniran, taṅan tәṅǝn, hayva mamati mati sarvāmbәkan, makacarunya amvita brata, sәkuliṅ tamas, ulamana sarvagaṅan, vaḍah limas, tuhuṅ salvirnya, papare, baligo, sambǝl, salviranya tan patarasi, gogoreṅan kolentaṅ, cacaṅanon ginoreṅ, mvaṅ papare ginoreṅ, padha ǝmbanana sasavi, hǝmba sakalor, huvus ratǝṅ tumpaṅakniṅ sәkul iṅtamas, makadi yan ana pәhan, miñak, mavaḍah limas, den aśrī deniṅ aniṅkah caru, sәḍah voh, raka vovohan, pisaṅ kǝmbaṅ den asaṅkǝp, duvgan, Upacara dhūpā dhipā, vija caṅdhanenasab, sajiakәna paraniṅ caru, riṅ bhaṭāra gaṅāpati, saṅ bhrәṅgiritī, saṅ hyaṅ iśvarā, bhaṭārī umā, sira paḍa aturana caru, lumәkas kita anambuta brata, maśucya radina śarīra, aṅabakti riṅ saṅgar, ma, Om̐ nandīśvara mahākālaya namah, Om̐ bhrәṅgiriṭībhyaṃ namah, Om̐ sam̐ sāptaṛṣibhyo namah, Om̐ maheśvarāya namah, Om̐ śrī umāyai namah, tәlas haturakǝn carunta riṅ deva, ma, Om̐ im̐ namah, Om̐ deva carave namah, amr̥tātmakāya svāhā. yan alabvana brata kadi ṅūni, duk vahu lumәkasa brata, luvarana gәlaṅ lave kuniṅ, mahuvusana ri tibhadralǝmiṅ bhadravāda juga.

§III.67 nihan tiṅkahiṅ abrata riṅ amr̥ta māsa, ṅa, alǝkasa kita amati gәni, samaptā rahinā, mvaṅ caru sarvapavitra, tumpəṅ putih, papaṅgaṅ itik, graṅ grih hantiga, sәḍah voh, raka vovohan, pisaṅ kǝmbaṅ, dhūpa den asaṅkǝp. nihan paṅvijinya,

⟨1⟩riṅ vulan, ka, 4, purṇnamā, stuti nira riṅ saṅgar, ma, Om̐ ṣṭacedevamrәttatvaṃ, purṅnamā sinamostute, mamocyā sarvapapebhyoh, ta candrā leki gaccata. haturakna carunta kadi ṅūni, ma, Om̐ deva carave namah, candrā deva ya.

⟨2⟩yaniṅ vulan, kalīma, tīlǝm, paṅastunira riṅ saṅgar, ma, Om̐ mitri deva mrәttatvaṃ, Avamasya namostute, mamocya sarva papebhyoh, Aghnalokaṃ sagaccate. hatūrakna carunta kadi kadi ṅūnī, ma, Om̐ deva carave namah, Aghni deva ya.

⟨3⟩yaniṅ vulan ka nǝm, taṅgal piṅ, 8, stuti nira riṅ saṅgar, ma, Om̐ krәṣṇā ravā deva mrәtṭvam, Aṣṭāmyantu namostute, mamocya sarva papebhyoh, viṣṇu lokaṃ sagāccati. haturakna carunta kadi ṅūni, ma, Om̐ deva carave namah, viṣṇu devā ya svāhā.

⟨4⟩yaniṅ vulan kapitu, taṅ piṅ, 13, stutinira riṅ saṅgar, ma, Om̐ baruṇā deva mrәtvam, trayodāmna namostute, mamocya sarva papebhyoh, ṅudra lokaṃ sagaccāte. haturakna carunta kādī ṅūnī, ma, Om̐ deva cārave namah, rudra deva ya svāhā.

⟨5⟩yaniṅ vulan kavolu, taṅ, piṅ, 2, stutinira riṅ saṅgar, ma, Om̐ vivasvā deva mrәttatvam, dvātiyeva namostute, mamocya sarva papebhyo, sūryyalokaṃ sagaccate. haturakna carunta kadi ṅūni, ma, Om̐ deva carāve namah, suryyā devata ya namah svāhā.

⟨6⟩yaniṅ vulan kasaṅā, taṅ, piṅ, 6, stutīnira ri saṅgār, ma, Om̐ Astu nā teva mrәtṭatvaṃ, pāṣṭyente vānamostute, mamocya sarva papebhyo, Athalokaṃ sagaccati. haturakna carunta kadi ṅūnī, Om̐ deva caraveiya namah, Arkkā deva ya.

⟨7⟩yaniṅ vulan kadaśa, tāṅ, piṅ, 4, stutinira riṅ saṅgar, ma, Om̐ yāgave deva mrәttatavam, catur ddhyantu namostute, mamocya sarva papebbhyoh, brahma lokaṃ sagacāti. haturakna carunta kadi ṅūni, ma, Om̐ deva carave namah, dhatrә deva ya.

⟨8⟩yaniṅ vulan jyeṣṭa, taṅgal piṅ, 5, stutinira riṅ saṅgar, ma, Om̐ Indrāve deva mrәtṭatvaṃ, mañcamyāntu namostute, mamocya sarva papebhyo, I ndralokaṃ sagaccati. haturakna carunta kadi ṅūnī, ma, Om̐ deva cārave namah, Indra deva ya.

⟨9⟩yaniṅ vulan saddhā, taṅ, piṅ, 1, stutinirā riṅ saṅgar, ma, Om̐ Aryya madeva mrәtṭatvaṃ, praṭipadī namostute, mamocya sarva papebhyo, Aṣṭalokaṃ sagaccati. haturakna carunta kadi ṅūni, ma, Om̐ deva carave namah, Arkkā deva ya svāhā.

⟨10⟩yaniṅ vulan kaṣā, taṅ, piṅ, 10, stutinira riṅ saṅgar, ma, Om̐ bhaghā na devā mrәtṭattvaṃ, bhaṣāmyantu namostute, mamocya sarva papebhyo, sūryya lokaṃ sagaccati. haturākna carunta kadi ṅūni, ma, Om̐ deva carave namah, bhaghana deva ya.

⟨12⟩yaniṅ vulan ka tiga, taṅgal piṅ, 9, stutinira riṅ saṅgar, ma, Om̐ ṣajjā dyah deva mrәṭṭatvaṃ, navaṣyantu namostute, māmoccya sarva papebhyo, Indrā lokaṃ sagaccati. haturakna carunta kadi ṅūni, ma, Om̐ deva carave namah, Indrā devā ya.

gnǝp tiṅkahiṅ brata samaṅkana, rva vlas vulan, kalaniṅ hamrәtta maśa, Amati ghni,kapaṅgih de saṅ haṅanakǝn brata, dīrgghā yuṣa paripurṇna, riṅ dlāha, mandadi ratu viśeṣā, hayva cavuh yan kalaniṅ ābrattta, tlas, smā, tabrataṅkǝna mravani siṅ pravani, Uttamā dahat, tuhvā gana ta ya bharaṭā, byakta tuṣṭātmakāsaṅ pitārannirā, təka rīṅ kaki buyutira suka, nītya sukātmaka vaneh, Ika ta den agatiniṅ amaṅun ayuniṅ śarīrātma.

§III.68 hana brata hadyus hanuṅku rāt, ṅa,

yan riṅ śravaṇā maṣā, hadyusā davuh, 7, pisan riṅ sore, pha, hulun masihi ri kita.

yan riṅ bhadravadā, hadyusā davuh, 4, pha, kasubhaganuṅku rāt.

yaniṅ hasuji, hadyusā dhavuh, 5, pha, sarva salaka tkā.

yaniṅ karttikā, hadyusā dhavuh, 8, riṅ rātri, pha, bahuputra.

yan riṅ margghā sira, hadyusā davuh, 4, riṅ rātri, pha, prabhu masih.

yaniṅ poṣya maśa, hadyusa davuh, 6, sore, pha, viryyavan.

yaniṅ maghā maṣā, hadyusa davuh, 8, vaṅun rahina juga, pha, sugih pari.

yaniṅ phalguṇa maṣā, hadyusā davuh, 2, rahina, pha, bhoga gə̄ṅ katәmu.

yaniṅ cetra maśa, madyusa davuh, 3, rahina, pha, devā masih sarva kāryanta siddha.

yaniṅ veśaka maṣā, madyusa dhavuh, 4, pha, laraniṅāti hilaṅ.

yaniṅ jyeṣṭā, hadyusā dhavuh, 4, pha, siṅ kāryanta katəkan.

yaniṅ hasaddha maśa, madyusā davuh, 7, pha, hañjrahakǝn mās pirak, maṅkāna kramanya.

Itī śarīra śuddha, bhūmi socca, ṅa.

§III.69 hana brata ṅulante, ṅa, hamilan vulan,

kaṣa, tan pamaṅan sarva buṅkah, pha, dadi sarva tinandur.

vulan, 2, tan pamaṅan sapi, pha, sugih sapi, tan kagǝriṅǝn.

vulan, 3, tan pamaṅañ celeṅ, pha, sugih vvit, tan gǝriṅ āguṅ, halaṅ halaṅ.

vulan, 4, tan pamaṅam sarva roṇḍon, pha, dadi sarva rumambat, sarva gumantuṅ.

vulan, 5, tan patukar, tan panǝmbuṅ rare cili, pha, keḍәp havkasa paṅūcapta.

vulan, 6, tan paluluṅha, tulak vali, yen luṅha, pha, sugih kavulā,vrәddhi kabeh tur ākeh.

vulan, 7, tan pamaṅan sәga, pha, sugih pari, tan kakuraṅan tajak.

vulan, 8, haja maṅan suku phat, pha, sugih drәvve sarvǝ vdha.

vulan, 9, haja maṅan āñjiṅ, pha, hapkik tan pahes.

vulan, 10, tan tumṅeṅ tavaṅ, pha, prajñan kita.

vulan, jyeṣṭa, tan pamaṅan garәm, pha, sugih bhūmi, tan ilaṅ takonakna, tur keḍәp kapintuhu.

vulan, saddhā, tan paturū lavan strī, histri tan paturu lavan lanaṅ, pha, drәmmam halaki, kinasihaniṅ lanaṅ, lanaṅ kinasihaniṅ vadon, tur keḍәp sapaṅucapta.

§III.70 nihan hajī tutug kavruhakna,

pūrṇamaniṅ kaṣa, saṅ hyaṅ hamurvva bhuvaṅna, pinaka bala, hasih ri pinakeṅ huluṅ

purṅnamaniṅ karo, saṅ hyaṅ madhuśuddhaṇā, pinaka babu, hasih ri pinakeṅ hulun.

pūrṇamaniṅ katiga, saṅ hyaṅ madhu kusuma, pinakavakiṅ hulun listvayuparipurṇna, drәmman keḍәp puruṣā viśeṣa, prajñan vicakṣaṇā, suka sugih.

pūrṇamaniṅ kapat, saṅ hyaṅ āsmara pinaka lakiniṅ hulun, hapkik prajurit vicakṣaṇā, puruṣā viśeṣa, prajñan suka sugih jayeṅ śatru, hasih pinakeṅ hulun.

pūrṇamaniṅ kalimā, saṅ hyaṅ manobhava, pinakā hanakiṅ hulun, panǝṅgǝk lanaṅ, hapkikprajurit hasih pinakeṅ hulun.

purṇnamāniṅ kanǝm, saṅ hyaṅ hantanū, pinaka sanakiṅ hulun lanaṅ, paṅgulu, suka sugih, hasih pinakeṅ hulun.

purṇmaniṅ kapitu, saṅ hyaṅ kama jaya, pinakā sanakiṅ hulun lanaṅ panṅah, hasih pinakeṅ hulun.

pūrṇamaniṅ kavolu, saṅ hyaṅ kamā ratih pinaka sanakiṅ hulun lanaṅ vuruju, suka sugih hasih ri pinakeṅ hulun.

pūrṇamaniṅ kasaṅha, saṅ hyaṅ kumarā, pinakā kṣanā , dukiṅ hulun hāpapaṅanten pinaslaṅ.

pūrṇamaniṅ kaśapuluh, saṅ hyaṅ hamadhapā, samanā dukiṅ hulun ābobot.

pūrṇamaniṅ jyeṣṭā, saṅ hyaṅ kumara, pinakā hanak lanaṅ pambayun, hapkik prajurit, hasihiṅ pinakeṅ hulun, puruṣā viśeṣā, prajñan vicakṣaṇā, jayeṅ śatru, hahidhǝpinakeṅ hulun.

pūrṇamaniṅ hasaddhā, saṅ hyaṅ komari, pinakā hanak vadon paṅguṅgulu, listvasyu paripurṇnā, dhrәman keḍәp, puruṣa viśeṣā, prajñan vicakṣaṇā, hahidhǝpinakeṅ hulun.

phalaniṅ hulun āṅajī tutug, haṅavruhākǝn hanutuga bapa, hababu, tutugā malakya rabi, hanak ānak tutugā sanak, tutugākaki hanini, tutugāputu habuyut, tumus riṅ tǝmbe, habagus kalavanāyu, paripurṅnā, drәman keḍәp, suka sugih, śrī sadanā, mās maṇik, dodot lәmǝs, hakveh daśih , vәnaṅ vәnaṅ hasuku pat, hasuku ro, sugih tanyakna hiren, siddha saprayojñaṇā, siddha salampah salaku, lǝvih kapaṅgih riṅ tǝmbe pañjanman, lәvih kapaṅgih maṅke, bhagavan pañarikan hanulisākǝn, saṅ hyaṅ triyodaśa sākṣi hanakṣeni, bhaṭāra hyaṅ kabayan hañjǝnǝṅi.

§III.71 nihan kramaniṅ habrata riṅ śaśih, ka, 4, riṅ praṭipadā śukla, caru suci riṅ saṅgar, sadaṇdhanan sovaṅ, riṅ sor pupulāskar sataman, hnahakna riṅ harәpiṅ saṅ amujā, vusniṅ ābhakti, tinirtthan, tәhәr haṅupavaśā, sadinā sarātri, Ikaṅ pupulā mvaṅ skar sataman, tәhәr vvināveṅ paturvan pinajaṅ pajaṅan, mne riṅ dhavuh, 2, təkaniṅ dhavuh, 7, haṅarәpakna labahan sәga pitā, Ivak hitik ginoreṅ sahā sasahur, yan tan ānaniṅ Iṭik, hantiga kunaṅ, garәm, hantajinya, catūr daśa dinā, tan dadi hanapak rigǝd, hasidhǝmpati, ṅa. mne ri pūrṇamaniṅ kapat, yan āhyun āmūjā smarā, hinyasan tikaṅ yaśa riṅ pamarantyan pinajaṅ pajaṅān, huṅgvaniṅ ābrata, yan vala pitambharā, yan vrәddha śvetāmbharā, hamarәm pva saha parāgi, ryuvusniṅ hasuci hadyus, riṅ saṅgar, ca, rvaṅ daṅdhanan deñ jaṅkǝp sahā catur, limas āguṅ, hiseni sәga kuniṅ, hivak hiṭik ginoreṅ, vinaṅgun hurip, gegembon, ṅa, hantiga pinlut, kampuhi cicirupan, tañcǝbi skār tlǝṅ, tumpāṅana riṅ limas āguṅ, tetebhogan hiseni sәga kuniṅ, masasahur, mevak hiṭik ginoreṅ, vinaṅun hurip, lalamaka daluvaṅ, tulisi śvara vyañjana, riṅ hibu dṅǝn, caru madaṇdhanan sovaṅ deñ jaṅkǝp, caru riṅ sumur, tumpə̄ṅ, 1, lalampadan, sasamuhan tadhah pavitra, caru riṅ sor kadi hisiniṅ pasilih, tan kari pupulā, skār sstaman , tlasniṅ caru trapakna sirәmiṅa skār, lumkas dhaṅ gurv amūjā sūryya śevana, kadi ṅrahina, taṅ abhakti sūryya, candrā, saṅgar, Ibu, dhṅǝn, kabasə̄ṅ sumur, tiṅkahiṅ haṅabhakti, dukiṅ sore, tәṅah vәṅi, meh rahinā, vusnīṅ aṅabakti, kinonta dyus āsucya taṅ abrata, tәhәr hiṅaskaran sinaṇdhiṅan pras, tinirtthañ jinaya jaya, tlas.halabuhana brata, padamə̄l, sәga livәt, tiṅkahiṅ āṅlivәt, dhaṅdhaṅ tulisana padmā, vusniṅ ānajeni, syoknīṅ antiga tambhar, tutupi, yan vus matәṅ hnahana muṅgviṅ tapi, jinaya jaya, muvah jaṅan raratusan, sabhageyan molih, 108, vārṇna, paruko tulis padmā, Ikaṅ nasi linivǝt ti numpaṅan gaṅan, muvah tumpǝṅ, hisenāna jǝbug ārūm, kaṅ vutuh, sadǝk, duk āṅaroni tinitisan madhu, phān, Ivaknya cārmmaniṅ kәbo yos baraṇā, hiṅǝmbanā don, mvaṅ jǝbug ārūm, sami rincah, tlas, nhǝr tan kneṅ turu, riṅ rahinanya, samaṅkana juga sakottamanya, satutugiṅ reh.kunaṅ phalanya, Ilaṅhikaṅ sarva vyaddhi, sarva duṣṭā, sarva bhāya, sarva bhoga kapaṅguh, kakarṣaṇa rikeṅ rāt, lituhayu paripurṇna, svārgga kapaṅgguh, mvaṅ kaniśreyaśan, dulurāna Ulah rahayu, tan paṅambah laraṅān, matvaṅ riṅ vvaṅātuhā, priyǝmbadā, tan vāk paruṣya, haglə̄m ataṅi, mabrataṅkǝn vei hayu, mvaṅ katpǝtaniṅ kasamyajñanan.

§III.72 madhū parkka tuyat bhakṣaṃ, sarva deva samanvitah, na sthama canarajñatva, sarva deva samānvitaṃ. Ikaṅ devata hana sanidva, ri saṅ hyaṅ madhū parkka, sira juga hidhpan raṣananta, kadilihñca mahādeva, Artthanya, Ikaṅ madhū viṣṇu devatanya, air tbhu brahmā devatanya, phan hiśvara devatanya, punti mahādeva devatānya. lavaṇo rudra mityuktaṃ, bhrәmgure sambhu mucyate, patraśvaṣā śivojñeyah, Ityetat devatāsthitah

hyaṅniṅ Uyah rudra, hyaṅniṅ bhrәm guru, hyaṅniṅ layaṅ sambhu, hyaṅniṅ lvā śiva, nihan taṅ devatā sanidya, hana riṅ madhū parkka. vituh pāpa dahet sarpih, vituh pāpañca madhūkaṃ, svātipāpa dahet kṣiraṃ, gatraṃ pāpaṃ kadalisaṃ.

Arthanya, Ilaṅ deniṅ air tbu pāpaniṅ bapa, kavisarjja denya, Ilaṅ deniṅ madhū parkka, pāpaniṅ babu, kavisarjja denya, Ilaṅ deniṅ phan, pāpaniṅ śarīranta, Ilaṅ deniṅ punti, pāpaniṅ vvaṅ sanakta kaḍaṅ varga, kavisarjja denya, mataṅyan kayatnakna deniṅ mantra madhū parkka, mā, Om̐ madhū pakaṃ Idhaṃ puṇyaṅ, pavitraṃ pāpanaśanaṃ, Iśvara nagisaṅśrәṣṭah, punanti sakalañjagat, mam̐, piṅ, 3, mamaṅan, piṅ, 3, masucya.

saha pūja parikrama karәhǝn, tәhәr haṅupavaśā, vusniṅ pinūja, haṅabhakti kadi haṅabhāktiniṅ habrattā.

ṅhadva kadva kādevye namah, pūr, Om̐ kusuma yudā mamakā devye namah, da, Om̐ kadārppa daśa paddha devye namah svāhā, pa, Om̐ manobhava strī mandha devye namah , bā, Om̐ makara dvajamandoratha devye namah svāhā, U, Om̐ mantra tatu bhaṅgā devye namah, ai.

Iti saṅ hyaṅ haṣṭa Devî.Om̐ hyaṅ hyaṅniṅ hyaṅ smara deva ya namah, Om̐ Indrā ya namah, Om̐ Om̐ svaṣṭi ya namah.

pratyakṣatvamihaloka, mānuṣa tvañca visuka devatvaṃ, sūkṣmatvaṃ sakalatvañca, Atmatvañca śariratvaṅ. Eka rūpañca visuka sadanaṃ, candrā vatsa tetemekaṃ, trei lokya viyosa śakti. Iśvara vara devañca, brahmājāyañja vijayaṃ, mahādeva varatvañca, viṣṇu vijayare vañca. Indra rājaca jayatvaṃ, sarva deva ya ratvañca, sarva de [17v]va Devî tatvaṃ, trelokya sevitantah. citta mani mahendraśca, sarva kumarā rājatvaṅ, kumara rāja sajñaccā, Iṣṭā kamacayaṅ jakaṃ. Aṣṭātanvavi patiñca, Ugra devā ca sajñakaṃ, sarva pāpa haret siddhi, sarva rogha praharaṇaṅ.sarva śatru vinaśanaṃ.

smarastavā.

nihan kramaniṅ haśeva latri, hasūryya śevana kita rumuhun, kadi sadinā, huvusniṅ hasūryya śevana, mariṅ pamiyosan, haṅarәpakǝn pitā, yan tan hanāniṅ pitā, Ujuṅaniṅ pisaṅ glarәn, sucenā rumuhun, yan hananiṅ liṅga mās, salakā kuniṅ, pūjanǝn pratiṣṭa ri hujuṅaniṅ pisaṅ, makadi riṅ pitā, pūjanǝn riṅ kana, glarāna padmasana saprakāranya, təkaniṅ devā, pratiṣṭā, Utpǝtyakǝn bhaṭāra sakiṅ hrәddhaya, ma, Om̐ mam̐ Am̐ Um̐ namah, Idhǝp saṅ hyaṅ muṅgviṅ liṅga, pūjāni vijā caṇdhana, sahā sminiṅ majā, skār kunǝṅ, muvah sthityakna bhaṭāra riṅ liṅgā, yan hananiṅ liṅga mās, salakā, yen ta[18 r]n hana salakā, sariniṅ vaduri piṅhe, gavenǝn liṅgākarā, mantra sthiti, Om̐ Am̐ Um̐ mam̐ namah, pūjani rvaniṅ maja, mvaṅ sarva skar, caṇdhana, vija, sabhagyan pujāniṅ dhupa, dipā, ghaṇṭa, mvaṅ japā ganitri, sahā praṇa yama, saha sǝmbah, liṅanta Om̐ Om̐ liṅgā liṅgā dipatayei namah, haturana gadhakṣata, puṣpa, dhūpā dhipa, mvaṅ caru, rakā vovohan, sәḍah voh, liṅanta haṅaturakǝn, Om̐ Om̐ śiva ni vedyañca rūm dadami, Amrәtta deva caruvedādami, sa ba ta A I, nama śiva ya, A U mā, Om̐.pūjā, piṅ, 3, dukiṅ sore pūrvaka, tәṅah vәṅi, mehniṅ rahina, deniṅ āmūjā, tan kantun mantra, Om̐ Om̐ liṅgā ye namah, Om̐ sadāśivāṅliṅgā ya namah. mehniṅ rahina, Ulihakna sira riṅ anta hrәddhaya, puṇdharikā muvah, liṅanta, Om̐ Atma liṅggā ya namah, Om̐ Om̐ Am̐ mam̐ namah,

yekiṅ mantra pralīṇā. Om̐ śiva ya śiva liṅga ya,śiva sarvvo maheśvarah, nama śiva ya deva ya, saddha śi[18 v]va namostute.brahmā viṣṇviśvaro devah, sarvajñā parameśvara, Utpati sthiti linañcah, liṅgā deva namo namah. tuṅgal sthiti sarәpiṅ praliṇā.

yen arәp śīva rātri cǝṇdhǝk, liṅanta, Om̐ Om̐ liṅgā liṅgādipataye namah, Om̐ Om̐ Ātma liṅgā ya namah, sǝmbah duk sore, Om̐ Om̐ parama śiva liṅgā ya namah, sǝmbah tәṅah vәṅi, Om̐ Om̐ śunya liṅgā ya namah, sǝmbah meh rahina, sminiṅ maja pinūjakǝn, sthuti tuṅgal, Om̐ nama śiva ya, namo rudra ya, nispadā parvvatā ya , sahā sǝmbah sminiṅ majā kunaṅ.

lviriṅ bratayvakna riṅ tamah, tamah harane turū, yatika kavaśakna yva lupā, I kālanta mabrata, hayva juga kita haturu ri rahina, hila hilā, hilaṅ hulihta mabrata, Asiṅ brata hanisphala tan pantukā Asiṅ sinadya, mataṅyan kayatnakna, hayvā himan iman, Ikaṅ tapā brata hagə̄ṅ phalanya, vahya suka katәmu donya, Ikaṅ kayogiśvarān, kamokṣan phalanya, mataṅnyan hayo cumacadiṅ sira saṅ lumkasakǝn brata tapā, Ayva memeṅeniṅ vvaṅ abrata, Ila hilā liṅ saṅ hyaṅ.

§III.73 nihan pabratan, haji sariniṅ galuṅān, krama bantǝn ri saṅgar, bantǝn suci hadaṇdhanan, riṅ ibu dhṅǝn, padha mabuṅkul, riṅ toya abuṅkul, mantra paṅatǝr ā-tǝr bakti maṅavaṅi, ma, Om̐ jaya pravira subiṅ rāt, sugih tan pamaṅun gave, muvah hakaravaṅan, habaṅ rūpanira, sārәṅit gə̄ṅira, ya hiku sariniṅ galuṅan, pinakāsamtoniṅ hulun, siṅ tan vruh sariniṅ galuṅan,pinakā kavulaniṅ hulun, sabhūvana, satuṅkǝbiṅ rāt, siṅ haṅavruhi sariniṅ galuṅān, ya pinaka sanakiṅ hulun, pinakā samtoniṅ hulun, sasaṅoniṅ hulun, haṅavruhākǝn sarīniṅ galuṅan, salave lākṣa, salave kṭi, salave hiṅǝl, pinakā pasasaṅoniṅ hulun, katәmu maṅko, katәmu tǝmbe, lǝvih kātmu tǝmbe, mtu salākṣa sadinā, Om̐ sa ba ta A I, nama śiva ya, A U ma Om̐.

§III.74 nihan bratahañarin galuṅān, krama, yan kalaniṅ galuṅān, habantǝn sarimpǝn, saviji sovaṅ, hnahakna ri harәpiṅ saṅgar, kaṅ riṅ saṅgar, kadi kramaniṅ bantǝn kaṅ lagi lagi, kaṅ riṅ ību, kaṅ ri tәṅah, vuhāna burat vaṅi, lṅa vaṅi, mvaṅ bras, 2, catu, harttha, 225, pinūjā saparikrama, taṅābhakti, vusiṅ haṅabhakti, amaṅan sarimpǝn, ryuvusiṅ amaṅan sarimpǝn, amaṅan sakavaśa, pūjaniṅ amaṅan sarimpǝn, Om̐ paduka bhaṭārī sāriniṅ galuṅan, mānuṣanira kinavruhakǝn sāriniṅ galuṅan, haṅisǝp sariniṅ rahina, haṅisǝp sariniṅ vәṅi, haṅisǝp sariniṅ śrī sadanā, haṅisǝp sarva sarī, haṅisǝp sariniṅ rāt bhūvana kabeh, hulun vruhsariniṅ galuṅan, handadi ya bhujaṅgga lәvih, hakaḍaṅā ratu, suka sugih śarīraniṅ hulun, hanakāna keḍәp, aputu habuyut, tumus tumǝrus, təkaniṅ hanak putu buyutiṅ hulun, katəkana sapinakṣāniṅhulun, saṅ hyaṅ triyodaśa sakṣi, Anakṣeniṅ hulun, phalanya, siṅ karyyānta hanmu hayu, kinasihan deniṅ bhūṭā dṅǝn, mvaṅ jnǝk sahisiniṅ pomahan.

§III.75 hana bratasusukan, ṅa, riṅ pūrṇamaniṅ kapitu, piṅ, 7, sarahina, piṅ 7, savәṅi, amaṅan āṅinūm, haṅigə̄l, bhaṭāra kapitu maveh brata, pha, suka sugih, hanak amitra, dirgghāyuṣā, keḍәp kapituhu.

§III.76 hana brata dinulaṅ riṅ lek pituṅ lek samayanya, pha, kinasihaniṅ rāt.

§III.77 hana brata malaṅlek denya maṅan, denya ṅǝpǝl, pituṅ lek samayanya, pha, subhaga kinasihaniṅ histrī.

§III.78 hana brata mahucandrā, ṅa, sabran masocca yen masi phat, ṅūniveh buda Irәṅ, mvaṅ dite manis, ṅūniveh sari sarikna, saṅ hyaṅ maṇik badhe hyaṅnya, satahun tigaṅ lek ṣamayanya, pha, masih saṅ hyaṅ candrāditya, tan lamūr kkatonā hayu, mvaṅ pinicadhaṅ.

§III.79 hana brata ṅlintaṅ, ṅa, tan pamaṅan, yan tan mtu lintaṅ pipitu sanak, lama tәṅah śaśih, pha, sugih dlāha, turūpānta tan ākusut.

§III.80 hana brata, sore amaṅan vus āpasaṅ sande juga, brata tan pasuluh, ṅa, ya pinaka rūpā, [pinakārūpā], pinaka vuvusīṅ padha vvaṅ, pha, sīm sadyanta katəkan.

§III.81 hana brata tan pamaṅan dhavuh tlu, tan paṅinaṅ tan paṅinūm vvai, lamun huvusiṅ dhavuh tiga, vәnaṅ haṅinaṅ amaṅan āṅinūm, satahun divasanya, pha, sugih bhuvana, tur apkik kaṅ rūpā.

§III.82 hana brata, amaṅan naṅkǝn dhavuh tlu, amaṅan, haṅinūm, kavaśa haṅinaṅ, pha, suka sugih, sdhǝṅ ānom, hanulus riṅ niskalā.

§III.83 hana brata, ṅayu , ṅa, tan pamaṅan tatəkalaniṅ saṅeṅe kulon, mvaṅ sakihupiṅ hyaṅ prabhaṅkara, satahun samayanya, hyaṅ prabhaṅkāra hyaṅniṅ brata, pha, hevanā mamūkti, siddha sāprayojñananta .

§III.84 hana brata, amaṅan riṅ paturon, sdhǝṅ kumarañcaṅ sǝṅeṅe, pha, drәman halāki.

§III.85 hana brata haṅǝṅbaṅ sabran manis, sarva kǝmbhaṅ kiṅumpulākǝn, lavan huyah harәṅ, suruh pupucuk, yen amaṅan riṅ paturon, marәpiṅ ulon, yan amaṅan dhavuh pisan, pha, pkik hakeh ūlaṅunakǝna yen istri haṅulahakǝn , drәman halaki, kinasihan riṅ paturon, marәpiṅ hulon hyen amaṅan.

§III.86 hana brata hantara bakta, ṅa, amaṅan kala tṅaṅe, yaniṅ vәṅi sdhǝṅ sirәpiṅ voṅ, limaṅ lek lavasanya, pha, tisan kuras, suka gə̄ṅ de saṅ paṇḍita.

§III.87 hana brata, añjaya, ṅa, tan pamaṅan yan liṅsir, satahun pituṅ dinā lavasanya, saṅ hyaṅ krәtta bhuvana hyaṅniṅ brata, pha, krәtta kaṅ rāt, manuh kaṅ prәmana, siddhi kanisihan deniṅ hyaṅ, kineriṅan deniṅ sarva galak.

§III.88 hana brata nrus tuñjuṅ, ṅa, yanīm pūrṇamaniṅ ka pitu, hadyus, piṅ, 7, sarahina, piṅ, 7, savәṅi, yan paṅloṅ, piṅ, 14, haśeva latri, hacaru suci sadaṇdhanan, bhaṭāra guru hyaṅniṅ brattā, pha, savighnānta hilaṅ, tūr kinasihan deniṅ bhuṭā dhṅǝn, kinasihaniṅ tuhvan mvaṅ samanta janma.

§III.89 hana brata, nrus tuñjuṅ, ṅa, haturu haṅādǝg savәṅi, bhaṭāra śiva maveh brata, pha, śakti, sasarnya dadi rātū, sugih tan hilaṅ takonakna, magǝh deśa, nora voṅ siddhi gave.

§III.90 hana brata nrus tuñjuṅ, ṅa, ri taṅgal kapiṅ limaniṅ kapitu, hamati ghni, nhǝr tan kneṅ paṅan turu, sarahina, savәṅi, bhaṭāra hasih prāṇa hyaṅiṅ brata, pha, śakti, hamupu sariniṅ brata kabeh.

§III.91 hana brata nrus tuñjuṅ, ṅa, madyus piṅ tiga savәṅi, piṅ pitu sarahinā, yan aturu sumaṇḍah, pha, vruh saguṇaniṅ voṅ kabeh, hapkik tan āna madhani, turr prajurit pinaka huluniṅ sajagat.

§III.92 hana brata, nrus tuñjuṅ, ṅa, hadyus piṅ tiga savәṅi, piṅ tiga sarahina, tan paturu gumuliṅ, sumandah vәnaṅ, satahun divasanya, pha, vruh satata guṇaniṅ voṅ kabeh, prajurit hapkik tanāna madani, pinakā huluniṅ sañjatā, savārṇnaniṅ bhūvana norana madā, sanuṣantarā kabeh tumiṅhal iṅ sira.

§III.93 hana brata, nrus tuñjuṅ, ṅa, madyus piṅ pitu sarahinā, piṅ pitu savәṅi, pha, listuhayu paripurṇna, kaṅgapiṅ ratu, kinasihan deniṅ saṅ paṇḍita.

§III.94 hana brata, nrus tuñjuṅ, ṅa, hadus, piṅ, 7, sarahina, mvaṅ riṅ vәṅi, hasisirih kita, naṅkǝn vulan aguṅ, pha, vruh tan āga saparipolahta, bhūvana geger tumon hiri kita.

§III.95 hana brata trisandya, ṅa, amaṅan tigaṅ kpǝl, sarahinā, tigaṅ tahun samayanya, pha, mantuk iṅ svarga bhaṭāra viṣṇu, sasarnya mañjanma riṅ listvayu paripurṇna, suka magə̄ṅ.

§III.96 hana brata, trisaddhya, ṅa, madyus piṅ tiga sarahina, mvaṅ riṅ vәṅi, vusiṅ hadyus hasusurā, masiphatā, pituṅ lek samayanya, pha, mulih mari kendran, sasarnya mandā di vvaṅ listvayu paripurṇna prajñan.

§III.97 hana brata, kraca dyus, ṅa, hadyusarahina vәṅi, lǝṅa siphatnya, pha, svarga mantuk riṅ kendrān, majanma vicakṣaṇa hanulus, tur anom apkik kalah āla.

§III.98 hana brata, amaṅan sarva mǝntah, bhaghavan haṅgaṣṭi hyaṅniṅ brata, pha, dadi deva, sasarnya dadi ratu, kinasihaniṅ hyaṅ, prajurit haṅalahakǝn [śatru] kabeh, norana madanāna, tan kna seha brata.

§III.99 hana brata hasuci lakṣaṇa, ṅa, tan pamaṅan hyan duruṅ ārarahup¸ halǝṅa, pha, hapkikerәṅan, saparipolihiṅ abrata, lәvǝsiṅ rambut, hasdhǝpiṅ paṅūcap, mvaṅ rūpā.

§III.100 hana brata, nuci lākṣaṇa, ṅa, amaṅan āhes karuhun, pha, kerәṅan saparipolahtā, alit arampiṅ, drәmman alaki.

§III.101 hana brata, mavastra śuddhamalā, mantranya, Om̐ śuddha pāpa, śuddha malā, 3, śuddha śuddha pinariśudā, śuddha śuddha pinarivastu. phalanya, hilaṅ malā patakā, pāpa kalesanta, samayanya kaṅ brata, tigaṅ daśa dinā, hanambut riṅ tīlǝm, hasalah riṅ tīlǝm, hasalah brata, sahā skar rvaniṅ śuddha malā, ptekakna rvanya, mañomponi petaṅan mantranyā.

§III.102 hana brata, yan taṅgal piṅ, 1, taṅgal piṅ, 2, taṅgal piṅ, 3, hakambǝn śudāmalā, havastra sacci, yan vus ālabahan, pha, rūpānta lañjar, hapkik paripurṇna, yan lanaṅ habrata, kalamar deniṅ histri, yan istri, kalamar deniṅ kakūṅ, handaka rūpā haraniṅ brata maṅkana.

§III.103 hana brata malahāra, ṅa, yan amaṅan maṅgis, dūryyan, sakalviriṅ vovohan, tigaṅ lek samayanya, pha, mantuk mariṅ svarga bhaṭāra guru, mvaṅ bhaṭāra saddhaśiva, sasarnya majanma riṅ vvaṅ sugih sujanā.

§III.104 hana brata ṅinaṅ suruh tmu ros, jambe taṅ vәnaṅ tampakiṅ ladiṅ, ginitik, suruh lǝmbaran, hapuh bubuk, pha, tguh tan pakmitan, tur kkeḍәp.

§III.105 hana brata, tan pamaṅan jambe tan sinigar deniṅ ladiṅ, phā, tan tǝtǝs deniṅ sarva laṇdhǝp, jaya ri yuddā tan kevǝhan.

§III.106 hana brata, maharen vatu, deniṅ ābrata , tlūṅ tahun, pha, tguh bujana kulit, tūr klar.

§III.107 hana brata, maṅan sakplǝl, lavasnya pituṅ vәṅi, pha, kinasihaniṅ rat kita.

§III.108 hana brata maṅan roṅ kpǝl, lamanyā pituṅ vәṅi, pha, guṇā tan kevǝhan.

§III.109 hana brata, maṅan tigaṅ kpǝl, tigaṅ vәṅi lavasnya, pha, kinasihan deniṅ rāt, himbuh himbuh tan paṅloṅ.

§III.110 hana brata tri samaya, ṅa, amaṅan sәga tigaṅ kpǝl, salek samayanya, saṅ hyaṅ tiga mavveh brata, pha, kinasihaniṅ paṇḍita, guṇa mantra siddhi.

§III.111 hana brata, tri samanā, ṅa, amaṅan tigaṅ kpǝl, sarahina, tigaṅ tahun samayanyā, pha, mantuk iṅ pada bhaṭāra viṣṇu, sasarnya maṅjanma riṅ vvaṅ lituhayu paripurṇna, suka magə̄ṅ.

§III.112 hana brata, Eka bakta, ṅa, amaṅan sakpǝl, pituṅ vәṅi samayanya, pha, prih meṅgal katәmu.

§III.113 hana brata, maṅan pituṅ kpǝl, pituṅ dinā lavasnya, ghaṇa katapākanya.

§III.114 hana brata, amaṅan ro vlas kǝpǝl, pha, siddha kārya, hamukti ṅaraniṅ brata maṅkana.

§III.115 hana brata, amaṅan kupat kǝpǝt, mevakā sarva suci, 3, vәṅi divasanya, haṅalakimadā , ṅa, saṅ hyaṅ Iśvara sira turun brata, ya minakārūpāsira, pinakāśvaraniṅ aṅiduṅ, manisiṅ panutukān, brahmāṇi hasuṅ rontal, pha, labdha vara riṅ rāt, makveh hasih iri kita.

§III.116 hana brata, amaṅan kupat kǝpǝl, tuṅgal hivaknya sarva succi, tigaṅ vәṅi divasanya, haṅali padā, ṅa, hyaṅ iśvara turun abrata, pha, ya pinaka rūpā, pinakāśvaraniṅ āṅiduṅ, manisiṅ paṅūcap.

§III.117 hana brata, amaṅan kupat kǝpǝl, pituṅ viji, amaṅan rahina, hesuk sore , tṅaṅ ṅve, titiga, sore, roro, Ivaknya hisiniṅ loh, salek lavasnya, pha, rinakṣa deniṅ ratu, kinasihan deniṅ [24v] voṅ suka tǝmbe.

§III.118 hana brata, amaṅan sakpǝl, tatəkalaniṅ tadhahan sapulukan, pituṅ vәṅi lavasan ika, pha, kinasihaniṅ rāt, mvaṅ jana nurāga, Ekaki ṅaraniṅ brata maṅkana.

§III.119 hana brata, haturū haṅadǝg, sabhāgya yen aṅeka paddha pisan, pituṅ vәṅi samayanyā, yen kita amaṅan sakpǝl sarahina, yan aṅinūm bañu sahlǝd, tәluṅ dinā, tәluṅ vәṅi samayanya, pha, sapocapan riṅ devā, byakta śakti tkeṅ kamokṣan.

§III.120 hana brata, maṅan rvaṅ kpǝl, pituṅ vәṅi lavasānya, guṇa mogha dhataṅ, tan kevuhan, phalanya, Anidra ṅaraniṅ brata maṅkana.

§III.121 hana brata maṅan ¬tigaṅ kpǝl, tri masā, tiga vәṅi lavasānya, pha, kinasihaniṅ rat, tri samaya ṅaraniṅ brata maṅkāna.

§III.122 hana brata, hamañca gǝmā, ṅa, amaṅan sәga limaṅ kpǝl sari sarī, limaṅ lek samayanya, pha, kinasihan deniṅ samanta janma, kaśruguṇa , kavīryavan, kāsubhagyān sugih siddhi mantra.

§III.123 hana brata, maṅan pituṅ kpǝl, saptā latri lavasanya, guṇamogha dhataṅ, sarva viṣā tan kataman kita, yeka phalanya, catūr mukā ṅaraniṅ brata maṅkana.

§III.124 hana brata, amaṅan pituṅ kpǝl, pataṅ lek samayanya, pha, hamūkti suka riṅ dlāha.

§III.125 hana brata, amaṅan saṅaṅ kpǝl, naṅkə̄n pūrṇama, mrәttiharā, ṅa, molihā tigaṅ kasaṅhā, pha, mantuk mariṅ svarga bhaṭāra Indrā, sasarnya mañjanma mariṅ vvaṅ listvayu paripurṇnā, sugih saṅkan rare.

§III.126 hana brata maṅan sadaśa kpǝl, tadhah pisan, sadaśa lek lavasanya, pha, salvirniṅ lara rogha tan tame kita, haṅadhavā ṅaraniṅ brata maṅkana.

§III.127 hana brata, haṅapitu, ṅa, amaṅan pituṅ kpǝl, moliha tigaṅ kapitu, pha, mantuk riṅ bhaṭāra brahmā, sasarnya majanma riṅ vvaṅ sugih saṅkan rare, listvayu paripurṇna.

§III.128 hana brata, naṅkǝn radite Umanis, amaṅan sǝga sakpǝl, [oliha] tluṅ radite Umanis, pha, tis manak ānak, trus tumus təkaniṅ ānak putu buyut, sukasugih tan kabañcana.

§III.129 hana bratañkul bañu, ṅa, kramanya, amaṅan sәga sakpǝl, sadina, beñjaṅanya rvaṅ kpǝl, puhanannya, 3, kpǝl, tlunanyā malabahan, ma, Om̐ niroghā, nirpāpa, nirmmāla, niṅ bape bu lukar mulih jati nityasā. amaṅan tan pahuyah, tan pahivak, kneṅ dyus kevalā, tan kneṅ lisah, tan kǝneṅ vdhak, tan paṅinūm tuvak, tan paṅinaṅ, tan paturu rahina, tan kabañcaran , pha, Ilaṅ salviriṅ larārogha.

§III.130 manih brata ñkul bañu, riṅ ckokiṅ taṅan paṅan sәga sakpǝl, toya sackokiṅ taṅan, tigaṅ dinā samayanya, sabagya, 5, dinā, ma, kbas valuya jati. pha, nirlāra vighna.

§III.131 hana bratañkul bañu, vadhah dadasar cmǝṅ, ma, Om̐ hana boloṅ tan pahudǝran, Ana boloṅ tan pamala, nirvighna nirtaṅis, Ōm̐ śrī srīya namah svāhā, Om̐ mam̐ ya namah svāhā. hamita ri saṅ āsәḍahan brata, ri saṅgar, ma, Om̐ mam̐ Iśvarāya namah .

§III.132 hana bratañkul bañu, ṅa, amaṅan sacalovakaniṅ taṅan, pituṅ vәṅi samayanya, nasi kalavan bañu, ma, Om̐ nirroghā, nirpāpa nirbapebu, lukǝṅ mulih jatinyasah, lukar sapāpaniṅ śarīra, mvaṅ pāpaniṅ bapebu.

§III.133 hana brata ñkul bañu, mañjiṅ limā, ṅa, puluṅ kaṅ sәkul, 1, Inumi bañu, 1, malih hamuluṅ sәkul, 1, hinūmi bañu, piṅ tlu hiṅane, raris amaṅan, sakarәpiṅ amaṅan vәnaṅ, vusaniṅ amaṅan, ṅinūm bañu, raris ākmuh havajik, haṅinaṅ, mari vtǝṅi voṅ, samaṅkana huga kramanya, saglǝmiṅ abrata, Utama lavasnya satahun, ma, Om̐ hana boloṅ tan pamala, hana boloṅ tan paUndǝrān, nirvighna nirttaṅis nirrogā, nirUpādravā, niṅ mala malinā, pha, hilaṅ sarva malāniṅ śarīranta, kinasihan deniṅ saṅ prabhu, mvaṅ deva sih iri kita.

§III.134 hana brata ñkul bañu, ma, saṅ drәmba moha, maṅana riṅ pasar, saṅ kāla ṅadhaṅ, sira maṅana riṅ dalan guṅ, saṅ kāla katuṅ, sira maṅanā riṅ pajagalan, vusanirā amaṅan, muliha mariṅ rāga valunaniṅ hulun, rovaṅaniṅ hulun makaryyā hayu, Om̐ siddhir astu.

§III.135 hana brata tan paṅinūm bañu, tatkalaniṅ amaṅān, yan kaśrәdhǝp , hatlasan pisan kita maṅan pituṅ lek ṣamayanyā, pha, tan āsǝrәt kaṅ sinadyanta, mogha mrih iri kita.

§III.136 hana brata tan paṅinūm bañu, satahun divasanyā, pha, śakti, hyaṅ pādma hyaṅniṅ brata.

§III.137 hana brata amaṅan havadhah godoṅ, sinaṅga riṅ taṅan kiva, tan pavuvuh, pha, kinasihan deniṅ rāt, vkasan tan paṅinūm bañu, saglǝmiṅ abrata, siddha sadyā phalanya.

§III.138 hana brata amaṅan tan pembuh, pituṅ tahun samayanyā, pha, bhoga gə̄ṅ təka.

§III.139 Hana brata, tan dadyā tambǝh, pituṅ vәṅi lavasānya, medā prājja siddha kārya phalanya, Aniraṅ ṅaraniṅbrata maṅkana.

§III.140 hana brata tan pavuvuh, tan paṅinūm bañu, lamun sāmpun āṅinaṅ, haṅinūm bañu vәnaṅ, saglǝmiṅ habrata, pha, prajurit kita.

§III.141 hana brata amaṅanā ron, sinaṅgā tan patdha tan pavuvuh, tigaṅ vәṅi lavasnya, pādma raṅkǝp, ṅa, saṅ hyaṅ capuriṅ rāt sira turun ābrata, pinakāgulu jariji suku, tәhәr kinasihaniṅ rāt.

§III.142 hana brata amaṅan tan pavuvuh, pituṅ vәṅi lavasnya, siddha kārya, kinasihaniṅ rāt phalanya.

§III.143 hana brata amaṅan papā davun, sinaṅga riṅ taṅan kiva, tan patdha tan patambǝh, hyaṅ hekṣasaṇā turun abrata, pha, kinasihaniṅ rāt.

§III.144 hana brata tan dady atambǝh, pituṅ vәṅi lavasanyā, meda prajjā siddha kārya phalanyā, Anira ṅāraniṅ brata maṅkana.

§III.145 hana brata, yan amaṅan tan patdhā tan patambǝh, pha, tan paśatru kita riṅ niṣkalā.

§III.146 hana brata mona, ṅa, yan amaṅan tan paṅūcap, tigaṅ tahūn samayānya, bhaṭāra rudra hyaṅnya, ma, Om̐ rudrāya namah . pamit, pha, kinatvaṅan deniṅ jagat, siddha saprayojñānanta.

§III.147 hana brata, maṅan amona, tan paṅinum bañu, vusiṅ amaṅān haṅinūm bañu, haṅūcapaknā, pha, tan knā gǝgǝriṅə̄n, viśeṣā riṅ bhūmi, keḍәp kapintuhu, pituṅ śaśih divasanya.

§III.148 hana brata, munarakā, tan paṅūcap lamun amaṅan, tluṅ tahun samayanya, bhaṭāra rūdra hyaṅniṅ brata, pha, ginañjar deniṅ hyaṅ kabeh, guṇa təka.

§III.149 hana brata, muna maṅan. muna nap. muna muris. muna susur muna bhaṣmā. muna napuh. muna ṅisiṅ.

kunaṅ mulihiṅ munā,

[149.1] muna maṅan, pha, vicakṣaṇā dirgghā yuṣā kita.

[149.2] munanap, pha, kinasihan deniṅ rāt, prabhu vikū.

[149.3] muna bhasma, pha, mantuk iṅ bhaṭārī rātrī, sasarnya majanma riṅ vikū śakti.

[149.4] muna napuh, pha, kinasihaniṅ paṇḍita, mvaṅ deva prabhu, rahayu riṅ pañjanmanta.

[149.5] muna ṅisiṅ, pha, prih meṅgal katәmu, bahu siṣya kita.

[149.6] muna sisig, pha, jaya kāryanta, prabha kiteṅ kamokṣan.

[149.7] muna muris, pha, siddha kāryanta, pinrihta muna təka.

§III.150 hana brata, pañca mukā, ṅa, naṅkǝn kalivon hamona sasore, haṅraṅkus brata kabeh, pha, hamaṅgih suka magə̄ṅ, majanma riṅ sugih sәkul hamukti saṅkan rare, keḍәp deniṅ rāt kabeh.

§III.151 hana brata ṅunir, ṅa, yan amaṅan sәkul kinunirān, lavasnya saglǝmiṅ ābrata, bhaṭāra mahādeva hyaṅnya, pha, mulih mariṅ svarga bhaṭāra mahādeva, sasarnya mañjanma riṅ dam puvavaṅ, sugih dana hulun, labdha vara ri sa ṅ āhulun.

§III.152 hana brata amaṅan kuñit, makālalab, Amanah kañcana, ṅa, pha, sugih hmās.

§III.153 hana brata, haṅuniṅ, ṅa, sәkul kuniṅ juga pinaṅan, yan tan maṅkana, kunir juga makalalab, pituṅ ta [28 v] hun samayanya, bhaṭārī ratih hyaṅiṅ brata, pha, mantuk iṅ svarga bhaṭāra mahādeva, sasarnya mañjanma riṅ dam puvavaṅ śakti.

§III.154 hana brata ṅuniṅ, ṅa, kunir paṅan rumuhun, salek lavasnya, ma, Om̐ niryyāya namah svāhā.

§III.155 hana brata, hambhīma, ṅa, yan amaṅan mevakā Uyah, satahun tigaṅ lek divasanya, bhaṭāra Iśvara hyaṅnya, ma, Om̐ mam̐ Iśvarāya namah, pamit, pha, siṅ pinrih meṅgal katәmu, kinasihan de saṅ pāndhita, mvaṅ deva bhūtha sih īri kita.

§III.156 hana brata mbhima, ṅa, yan taṅgal, piṅ 12, riṅ kapitu, hamatihāra, pha, suka vrәddhi, tūr sidi mantra, jayeṅ śatru, keḍәp kapintuhu deniṅ rat, hamupu saprajjāniṅ voṅ kabeh.

§III.157 hana brata hambhīma, ṅa, yan amaṅan mevakā Uyah, putihiṅ taluh, bhaṅ pṭak, pa, amaṅan ktan bāṅ, bavaṅ bāṅ, pva, amaṅan sәga kuniṅ, mevaka kuniṅiṅ taluh, va, amaṅan ktan hirṅ, mevakā bakulā, ka, amaṅanā sәga hamañca varṇnā, mevekā salvirnya, pha, sugih mās salakā, mvaṅ vsi.

§III.158 hana brata mona turu sumaṇḍah, tigaṅ lek samayanya, bhaṭāra viṣṇu hyaṅnya, ma, Om̐ um̐ um̐ viṣṇu ve namah, pha, labdha vara kita, mandi sakcapta.

§III.159 hana brata turu sumandyah, ṅa, salek lavasnya, bhaṭāra sambhu maveh brata, pha, hapkikevanan tajā kulā.

§III.160 hana brata, humbhakarṇna, ṅa, yan aturu, miriṅ satahun, roṅ tahun samayanya, devantara hyaṅnya, ma, Om̐ devantarāya namah, pamit, pha, putra vrәddhi, pamtik vәnaṅ vәnaṅ madasih samā vrәddhi.

§III.161 hana brata, kumavaśa, ṅa, pituṅ kulǝm tan knā riṅ turu rahina vәṅi, pha, viryyavan siddha sakāryanta, tan pamaṅgih kevǝh.

§III.162 hana brata, niṅibu, ṅa, amaṅan sarva hibu, pataṅ lek divaśānya, pha, mulih riṅ [svarga] bhaṭāra rudra, sasarnya majanma riṅ kulā !saṅ kumbhakarṇnā, haturu tan paṅlihan, rahinā vәṅi tur a [29v] ṅūpavaśā, pha, keḍәp saparipolahta.!

§III.163 hana brata, tan pamaṅan tan paturū, saṅ hyaṅ tan kaviśeṣā hyaṅnya, pha, svarga titisnya.

§III.164 hana brata, lәvih turu, ṅa, tan trәṣṇeṅ paṅān, bhaṭārī keśavā hyaṅiṅ brata, pha, mantuk riṅ svarga bhaṭāraśiva, majanma ri kula putra, luputiṅ lara vighnā, subhaga hanulus.

§III.165 hana brata, mopavaśā pituṅ ratrī, hatәhәr tan kneṅ turu rahina vәṅi, bhaṭāra śīvā hyaṅiṅbrata, ma, Om̐ nāma śivāya, pamit, pha, viyyavan , [pha,] sakāryanta siddā, tәhәr siddhi.

§III.166 hana brata hambhira, ṅa, yan amaṅan mevakā Uyah kevalā, satahun tigaṅ lek samayanya, pha, prih meṅgal katәmu, deva bhūtha sih iri kita.

§III.167 hana brata aṅlavar, ṅa, tan pamaṅaniṅ uyahan, satahun divasanya, bhaṭāra saṅkara hyaṅnya, pha, mulih riṅ kendran, sasarnya majanma riṅ listvayu prajña kita.

§III.168 hana brata, ṅlavar, ṅa, tan pamaṅan huyah, pat vulan ptaṅ vәṅi samayanya, bhaṭāra saṅkara hyaṅnya, pha, mantuk mariṅ kendran, sasarnya majanma listu hayu paripurṇnā.

§III.169 hana brata, aṅupavāsa, ṅa, lamunāmaṅān haṅgugut huyah ārәṅ rumuhun, 3, tavun divasanya, bhaṭārī gaṅgā hyaṅniṅ brata, ma, Om̐ gaṅgāya nama svāhā, pha, saparipolahta kinerәṅan deniṅ jagat.

§III.170 hana brata, maṅan tumpǝṅ hivak huyah harәṅ, bhaṭāra Iśvara hyaṅnya, ya pinakarūpā, pinakāśvaraniṅ kiduṅ caritta, pha, manisiṅ panutukan.

§III.171 hana brata, amaṅan kǝmbhaṅ, naṅkǝn, U, hivak huyah ārәṅ, vusiṅ amaṅan, haṅinaṅ suruh pupucuk, haṅliṅggā kǝmbaṅ, ṅa, pha, suka sugih, rūpā haheṅ.

§III.172 hana brata, amaṅan tan pahuyah, pituṅ vәṅi samayanya, pha, śaktinta dhataṅ, tәhәr kinatvaṅān deniṅ hyaṅ.

§III.173 hana brata, amaṅan arasotih, ṅa, hadahar uyāh ārәṅ minakā vulam, lama pituṅ dinā, ranini padukā bhaṭārī śarasoti hyaṅniṅ brata, pha, prajñan.

§III.174 nihan krәtta maśa, ṅa, hayuni ṅhulun, sakārya hayu, makadi vatǝk habrata, nūt āvarah,

śaśih ka, 1, taṅ, piṅ, 10, saṅ hyaṅ vira kusuma devatanya, bratanya, hayva maṅan sarva buṅkah, pha, sugih hanom bhrәman āvǝvka ta sira.

śaśih, 2, taṅ, piṅ, 7, saṅ hyaṅ jaya kusuma devatanya, bratanya hayva maṅan sapi, pha, luputeṅ tuju tluh tarañjanā, drәman āhiven iven.

śaśih, 3, taṅ, piṅ, 9, saṅ hyaṅnakā devatanya, bratanya, hayva maṅan bavi, pha, tan katampǝkan griṅ āguṅ.

śaśih, 4, taṅ, piṅ, 15, saṅ hyaṅ āsmarā devatanya, bratanya, hayva maṅan sarva roṇḍon, pha, dadi siṅ tinandur.

śaśih, 5, paṅloṅ, piṅ, 15, saṅ hyaṅ mahādeva devatanya, bratanya, hayva sǝhǝk yan aṅūcap, hayva nǝṅbaṅ boñcah, [31r] pha, drәman āvǝvkā.

śaśih, 6, taṅ, piṅ, 8, saṅ hyaṅ atanu devatanya, bratanya, hayva haṅinǝp, riṅ paluluṅhan, pha, sugih tan kelaṅ elaṅān.

śaśih, 7, taṅ, piṅ, 13, saṅ hyaṅ manasijā devatanya, bratanya, haṅrakā, pha, sugih keḍәp kapaṅgih siṅ giṇa harṣa.

śaśih, 8, taṅ, piṅ, 2, saṅ hyaṅ hanaṅgarā devatanya, bratanya, hayva amaṅan paṭik vǝnaṅ suku phat, pha, sugih patik vǝnaṅ.

śaśih, 9, taṅ, piṅ, 6, saṅ hyaṅ ravī devatanya, bratanya, hayva maṅan hasu, pha, hapkik raspati prajurit.

śaśih, 10, taṅ, piṅ, 4, saṅ hyaṅ brahmā devatanya, bratanyā, hayva maṅanān dǝlәṅ riṅ luhur, pha, kinasihaniṅ hyaṅ, mvaṅ voṅ mule hakeh āsih iri kita.

śaśih, jyeṣṭā, taṅ, piṅ, 5, saṅ hyaṅ leka jayā devatanya, bratanya, haṅlampar ānanapu, pha, keḍәp mandi sakcaptā.

śaśih, saddhā, taṅ, piṅ, 1, saṅ hyaṅ pisodharī deva tanya, bratanya, hayva turu lavan istri, pha, keḍәpāhomah omah.

Iyā ṅitaṅ kariṅ vulan, krәtta maśa haranya, den asthiti sira, keṅə̄takna yva lupa.

§III.175 hana brata, saninigrahā, ṅa, tan mamati haghni ri kālaniṅ tumpǝk kalivon[,] kramanyā ta mumujā, hananapuh eṅ saṅgar, tamvitā nǝmbahā ri bhaṭāra śīvaditya, lviriṅ caru riṅ saṅgar, Anapunar, Arih, rәmbaṅ, tambo lagu hakah haraka, phalā, kambaṅ vaṅi, burat vaṅi, lṅa vaṅī, sdhǝṅan Ikṣu, dhipā, dhūpa, den asaṅkǝp, devadarvi nasab, vijā, dhupa, Ika kahatur i bhaṭāra, ma, Om̐ namo bhagavatye vaśūdeva ya, sarva tuṣṭān, dadāsime, Om̐ śrī gurubhyo namah, devacarundādasimahātrәpti svāhā.

tlas ta ṅavaṅiha ta kita, ma, Om̐ sūryya putra ya namah . samaṅkana taṅ brata lkasaknā, hayva ta pramadā riṅ brata, kunaṅ yan kalaṅan āgriṅ, sakalviraniṅ āṅalaṅana, pinakāvuruṅaniṅ brata, hayva pinakṣakǝn ikāṅ brata, kaliṅanya mvitana juga muvah, kunaṅ yan tan kalaṅanā, hanulus rahayu, pakṣakna hikā, pha, riṅ dlāhanta dadi ratu suka vaya katәmu, pinakāśraya deniṅ padhanta ratu, keḍәp kapintuhu deniṅ rat kabeh.

Iti sanibrata, kayatnakna de saṅ met hayu, ndan ikā hayva malәtuh Ikaṅ āmbǝk, mataṅyan ikā hayvā miṣya buddhi, tātkalanta maṅanakǝn brata, Apan yan tan karakṣa Ikaṅ brata denta, maṅdadyakǝn vighnaniṅ śarirā, yan Enak denta rumakṣa sarīra, makājñana buddhi mahottamā, malilaṅāhniṅ niravarāṇa, tan paglǝglǝh , tan karaktan karṇna sulā, mvaṅ rajah tamah, Ika ta maṅdadyakǝn svarga magə̄ṅ, ṅūniveh jñāna viśeṣā, vruha ri kramanira sovaṅ sovaṅ.

§III.176 hana brata sabran manis, ṅa, tan pamaṅan tampakiṅ āpuy, rvaṅ vulan samayanya, sabran pahiṅ tan pamaṅan tampakiṅ aghni, rvaṅ vulan samayanya, sabran pon tan padus tan palәṅhā, tan pararavup, tan pakәkmuh, rvaṅ vulan samayanya, sabran vage, tan paturu gumuliṅ, rvaṅ vulan samayānya, sabran kalivon, tan paṅūcap ūcap, rvaṅ vulan samayanya, pha, ginañjar deniṅ vatǝk devata kabeh, norana nūkrәttani, tan ilaṅ takonaknā, drәventa tǝmbe.

§III.177 nihan haji pabrata, yaniṅ taṅgal piṅ lima, hanuju kalivon, paṅūpāvaśa , Esuknya riṅ manis, amaṅan kupat pāṇdhava, 5, Ivaknya kacaṅ, pha, dukiṅ halit duruṅ ānmu, yan vus āgə̄ṅ hamaṅgih suka sugih haguṅ dunya. pa, amaṅan kupat syāṅ anti, 9, Ivaknya komak, pha, tinuṅgu deniṅ rāma reṇā, haṅantos haputu habuyut, kinadhama deniṅ bapebu, kapti ni hulun. pva, amaṅan kupat sidayu, 7, Ivaknya sudhaṅ, pha, haṅāpti listvayu, halit ārampiṅ aṅlәlǝnte, tan āmadhani, suka sugih drәmman baṅkit, pinarәkan pinakāpahulunaniṅ marū . va, amaṅan kupat sih tan pәgat, 4, Ivaknya taluh, pha, haṅapti suka sugih, drәmman sidi baṅkit, keḍәpiṅ alaki, tan kavaśa lakinta haṅluṅhani, pinūji deniṅ matva, tanāna ṅesǝmi. ka, handha kupat gnǝp, 8, Ivaknya raraśmen , pha, haṅapti suka sugih haguṅ viryya, hañjǝnǝṅ hardda nareśvarī, keḍәp āṅūcap. Esūk riṅ manis, handha kupat siddha luṅguh, 10, Ivaknya dagiṅ loh, sagarā dhanū, halas sāvah, dagiṅ pomahan, [phalanya], haṅāptisukā sugih haguṅ viryya, kinajrihan deniṅ śatru, kinadamā deniṅ balā mvaṅ varga, pinarәkan deniṅ bāla sabran, tan ivaṅ deniṅ bāla, sami vatra tan āna ṅsal, sidi mandi tan paṅūcap, rәmrәm Ikaṅ vvaṅ kabeh, riṅ panaṅkilan, tinaṅkiliṅ bāla sakiṅ doh, habahan təka sakiṅ tanāna, sabran sabran, yan vadon sinivi deniṅ maru, tan āna madhani, sadera ṅrehaknā, vrәddhi putra, kinajrihan deniṅ santanā, virryya bhukti, hembah mañabuh, himbuh himbuh tan paṅloṅ. sāmi dānūr dahā.

§III.178 hana brata nuṅku rāt, ṅa, kā, handumā . U, hamadhūharā, pva , hambayuhāra, pva, hatoyahara, va, haghnihāra, purṇnamā, tīlәm, hamatihāra, piṅ rvanakā, [ṅa], pha, hamupu si brata kabeh.

§III.179 hana brata, mañcadara, ṅa, manis amaṅan sәga putih, pahiṅ hamāṅan ktan bāṅ, pvan amaṅan sәga kuniṅ, vage amaṅan ktan īrәṅ, kalivon amaṅan ktan hamañca vārṇna. vetan amaṅan hantǝlu putihnya, kidul surā, kulon hantǝlu kuniṅ, lor bakakul, riṅ tәṅah śarasi bāṅ hāti, pha, suka sugih.

§III.180 hana brata, hanūt sāpta vara, ṅa, ra, hasisirih, 5, ra. ca, hasisirih, 4, ca. A, asisirih, 3, A. bu, hasisirih, 7, bu. vrә, hasisirih, 8, vrә. śu, hasisirih, 6, śu. śa, hasisirih, 9, śa. pha, suka sugih, vәnaṅ sakama kama.

§III.181 hana brata, amaṅan sәkul āṅgi sarahup, sinaṅga ri taṅan kiva, tan patdha tan patambǝh, tigaṅ vәṅi samayanya, saṅ hyaṅ siddhi rākṣa sira turunābrata, huṅgvānira riṅ rāt, pha, tdhunaniṅ drәman hagave hayu, tan kapjahan vka kita, trus tumus tkeṅ vkā vet bet.

§III.182 hana brata, maṅan sәkul saravup, sinaṅga ri taṅan kiva, tan patәdha tan patambǝh, lalab kevala, 3, vәṅi lavasnya, kārya hana putra, ṅa, saṅ hyaṅ sandi rāṣa sira turun abrata, huṅgvanira riṅ śarīra, riṅ rahasya, kәdhukaniṅ dūmānā gave hayu, kveh putra kveh vvaṅ vlas āsih iri kita.

§III.183 hana brata, amaṅan sinaṅga ri taṅan kiva, saivaknya, sagәlǝmiṅ abrata, pakṣa hidhǝp, ṅa, saṅ hyaṅ kuverā hyaṅnya, ya pinaka rūpa, pinaka kulit, pinaka halis, [phalanya,] siddhiniṅ vvaṅ abәcik i pambǝkan.

§III.184 hana brata, amaṅan sәkul, pituṅ lek divasanyā, pha, akveh mahyun iri kita, hanvā ṅaraniṅ brata maṅkana.

§III.185 hana brata, maṅan sәga kevala, sagәlǝmiṅ abrata, hyaṅ puravāt sira turun abrata, pha, sucāra vruh ri kaliṅanya.

§III.186 hana brata, amaṅan sәga putih, riṅ taṅgal hapisan, saṅ hyaṅ prasiddha turunā brata, satahun samayanya, pha, kinasihaniṅ rāt, haṅliraṅ ṅaraniṅ brata maṅkana.

§III.187 hana brata, amaṅan sәga balaka, sagәlǝmiṅ abrata, saṅ hyaṅ paravan hyaṅnya, pha, vruhiṅ ācarā kaliṅanya.

§III.188 hana brata, maṅan sәga putih, 5, puluṅ, kәtan baṅ, 5, kәtan jnar, 5, tri dhatū brata, 5, mañcavara, saṅ hyaṅ padmā rāṣa tumurun ābrata, pinkā socca, bāyu śabda Idhǝp, sugih tan hina sāhambǝk phalanya.

§III.189 hana brata, añәkul haṅgi, ulam pahi, laṅa tәṅah lek, ranini paduka bhaṭārī Uma hyaṅniṅ brata, pha, vavanon vastu[,] kinarmakәniṅ akeh.

§III.190 hana brata, amaṅan sәkul āṅgi, anaṅgap, 7, pur, si[35r]ra saṅ hyaṅ viśeṣā tumuruna brata, pha, ginañjaran śakti lima, vadon viṣṇu anәmu, tan ahalavas tur prajñan, vicakṣaṇa, suka sugih riṅ dlāha.

§III.191 hana brata, amaṅan sәkul pañca varṇa, aren tiniṅkah cakra tinañcǝban vrәtti, denta maṅan maṅkana tatkāla kalivon, añakra bhuvana, ṅa, saṅ hyaṅśivatma sira turuna brata, ya pinakarūpa, pinakayuṣa, pinakalaku, dadi vvaṅ aṅuripi jagat, suka sugih vәnaṅ pinakasariniṅ jagat, riṅ niṣkāla.

§III.192 hana brata jaga varṇa, ṅa, amaṅan sәkul, balañan[,] pituṅ vәṅi samayanya, pha, keḍәp deniṅ rāt, prajñan vicakṣaṇa, bisāgamǝl aṅiduṅ, viryavan.

§III.193 hana brata, yan amaṅan hanǝmbah sәkul, pituṅ rātri divasanya, pha, kinasiha[35v]niṅ hyaṅ, śrī cittamaṇi ṅaraniṅ brata maṅkana.

§III.194 hana brata naṅga sәkul, tinumpaṅan vrәtti, yan pәjah ikaṅ vrәtti, pavusan kita pamaṅān, pituṅ vәṅi lavasanya, salviriṅ hagata tan tame kita, aṅañcaṅ ṅaraniṅ brata maṅkana.

§III.195 hana brata, yan amaṅan tinañcǝban vrәtti[,] vulan, saṅ hyaṅ anuṅkǝbi jagat hyaṅnya, ya minakārūpā hayu apәkik, [pha], riṅ dadi vvaṅ suka sugih, vәnaṅ amatūt jagat riṅ niṣkala.

§III.196 hana brata, amaṅan tinañcǝban tuṅgul, tiniṅkah bhīma, hyaṅ maṇik teja, ṅa, saṅ hyaṅ paṅirut jagat turunābrata, ya pinakarūpa, pinakalaku, pinakateja, [pha,] aśrī iṅiriṅ sañjata, sakṣat kǝmbaṅ tinuṅgulan, śakti aṅrәbahakǝn jagat riṅ niṣkala.

§III.197 hana brata, avrәtti, ṅa, yan amaṅan tinañcǝban vrәtti, pәjah taṅ vrәtti, havusān amaṅan, sapta rātri divasanya, pha, sarva rogha tan tumameṅ śarīranta.

§III.198 hana brata, aṅǝmbaṅ, ṅa, lamun a [36r]maṅan kǝmbaṅ rumuhun, tigaṅ tahun tigaṅ lek divaṣanya, bhaṭāra Iśvara hyaṅnya, pha, deva sih iri kita.

§III.199 hana brata, ṅǝmbaṅ, ṅa, tan luṅha yan kaparan tamu, bhaṭāra viśeṣā maveh brata, pha, sugih tan ilaṅ takonakәna , amaṅgih deśa norana voṅ siddhi gave.

§III.200 hana brata hajātukar, ṅa, amaṅan asaṇdhiṅ pulava kǝmbaṅ, salek lavasnya, bhaṭāra guru maveh brata, pha, akarma alaki anom, tur kinasihaniṅ paṇḍita.

§III.201 hana brata, maṅan kǝmbaṅ naṅkǝṅ manis, hyaṅ maṇisumila haraniṅ brata, saṅ hyaṅ asmara hyaṅnya, ya pinakarūpa, aśrī sumilah, pasamuhaniṅ akeh riṅ niṣkala.

§III.202 hana brata, yan amaṅan, tinumpaṅan kǝmbaṅ campaka, saṅ hyaṅ maṇik pudhak haraniṅ brata, hyaṅ vidakā turunābrata, ya minakarūpa, apәkik anulus, [pha] tumitis iṅ menak, ring dadi vvaṅ, suka sugih, vicakṣaṇa riṅ niṣkala.

§III.203 hana brata, maṅan lalab luṅluṅan, mvaṅ kinǝmbaṅakǝn, 2, saṅ hyaṅ maṇik arṣana hyaṅnya, bhaṭāra bāyu sira turunābrata, ya minakarūpa , pinakaurip[,] pinakarambut, pinakalǝye , pinakaidhǝp, pinakagulu, pinakasindhuvā, pinakalimbeyan, [pha] riṅ dadi vvaṅ, sukā sugih, ambǝk ahәniṅ, akǝmbaṅ avə̄h riṅ niṣkala.

§III.204 hana brata, amaṅan lalab balaka, sambǝl sinamohva , mantra patala, ṅa, hyaṅ baśūki turunābrata, ya pinakarūpa, pinakālit, pinakadalamakaniṅ suku, pinakatahulan, pinakakәliṅ, [pha,] riṅ dadi vvaṅ, suka sugih, lәmah sīma, kinapeṅin deniṅ voṅ riṅ niṣkala.

§III.205 hana brata, yan amaṅan tinumpaṅan vīja, saṅ hyaṅ vira kusuma, ṅa, hyaṅ jayaniṅ rāt turunābrata, ya minakarūpa, pinakajәnǝṅ, pinakapamulu, śakti aheṅ rūpanta, [pha,] riṅ dadi vvaṅ, suka sugih, rāja drәvve, mās pirak, putra putri riṅ niṣkala.

§III.206 hana brata, yan amaṅan tinumpaṅan sәkar vaṅi vaṅi, saṅ hyaṅ mūrvva gaṇḍa vaṅi haraniṅ brata, saṅ hyaṅ maṇik sumirit hyaṅniṅ brata, ya pinakarūpa , pinakakulit, pinakahambu, [pha] riṅ dadi vvaṅ, mrәbuk arūm, anǝrus tkeṅ kadaton riṅ niṣkala.

§III.207 hana brata, yan amaṅan sәkar śrigaḍiṅ, saṅ hyaṅ maṇik śrī danti hyaṅniṅ brata, ya pinakarūpa, pinakagugusi, pinakahuntu, [pha] aśri sakeṅ huntunta, suka sugih, !saṅ hyaṅ vidayaka sira turunābrata, pinakarūpa, apәkik anulus, tumitisiṅ menak, prakavi vicakṣaṇa riṅ niṣkala!.

§III.208 hana brata, yan amaṅan alamak sukǝt, puṣpani smrәti, ṅa, bhaṭāra smara hyaṅnya, ya pinakālas, [pha,] nәhәr kinasihaniṅ bapebu.

§III.209 hana brata, amaṅan alamak patra, amūrti prāṇa, ṅa, saṅ hyaṅ pagər gunuṅ sira turunābrata, ya pinakahuntu, [pha,] dirgha yuṣa, pәjah tan pahavan kadga.

§III.210 hana brata, [amaṅan] aren roṇḍon, pituṅ vulan pituṅ vәṅi divasanya, bhaṭāra mahīśvara hyaṅnya, pha, mulih mariṅ bhaṭāra mahiśvara, sasvarga sira, sasarnya majanma riṅ juru baṣa, labdhavara ri san ahulun.

§III.211 hana brata, amaṅan aren upih, pinuluṅ kuyupakәna , pha, sugih dodot, mvaṅ siñjaṅ.

§III.213 hana brata, [amaṅan] haren pampat, kvehnya, 73, aṇḍaniṅ janur, iṅaṅge, pha, suka sugih, apәkik halus havakta, jarijinta lәmǝs.

§III.214 hana brata, sarvagata, ṅa, yan amaṅan tan pahupa, pataṅ lek pataṅ vәṅi samayanya, pha, prajñan vicakṣaṇa, bisa gamәl aṅiduṅ, vāk bhajra siddhi mantra, jayeṅ śatru kedhәp deniṅ rāt, suka sugih saṅkan rare.

§III.215 hana brata, asiṅ ṅaranya, !pisan amaṅan kinaṅ!, yan amaṅan sumәlapāṅinaṅ, nәhәr tan pahupa, salek lavasnya, bhaṭārī Uma hyaṅniṅ brata, ma, Om̐ yanā Devî nama svāhā, !ahes!, pha, suka sugih hamǝpǝki kadhaton.

§III.216 hana brata, saṅgga ṅinaṅ, ṅa, satahun salek lavasnya, pha, drәman malakya rabi, ratu asih, ahes, ma, Om̐ braśri vastuya nama svāhā.

§III.217 hana brata, asihaniṅ layon, ṅa, aṅinaṅ tan pambuñcal sәpah, tigaṅ tavun samayanya, sahiṅ sәpah kinampelakǝn, bhinaṣmi, Iki pitutūrnya, ma, Om̐ bhaṭāra mati, ahurip mani amoriṅ megha, tumitis dadi sarvvendah, pinakabuktini ṅhulun, sa ba ta A I namā śiva ya.

§III.218 hana brata, asihaniṅ layon, ṅa, aṅinaṅ tan pambuñcal sәpah, tigaṅ tavun samayanya, sahiṅ sәpah kinampelakǝn, bhinaṣmi, Iki pitutūrnya, ma, Om̐ bhaṭāra mati, ahurip mani amoriṅ megha, tumitis dadi sarvvendah, pinakabuktini ṅhulun, sa ba ta A I namā śiva ya.

§III.219 hana brata, yan amaṅan asaṇḍiṅ dhūpa dhamar, saṅ hyaṅ maṇik teja, ṅa, hyaṅ maṇik muntab sira turunā brata, ya pinakarūpa, pinakateja, śakti mahabhāra, [pha,] riṅ dadi vvaṅ, abhrā murub sumilah, aheṅ jәrih kaṅ rāt denta.

§III.220 hana brata, adahar pucaṅ tәṅah vәlah, vulamaniṅ pahi, ranini paduka bhaṭārī anuṅkurāt hyaṅniṅ brata, pha, abәcik kaṅ jariji.

§III.221 hana brata, damar aguṅ ṅaranya, tan pamaṅan kasurupan saṅ hyaṅ sūryya, savarṣa lamanya, kaṅ pinaṅan, yuyukan, bavaṅ huṅkul, tarasi, sasivi, rarakā malo , caṅkuk sarvan vinuṅkul, prutāmuradaṅan, pha, kacakṣu riṅ sarva rusit, luputiṅ sarva śāstra, tan maṅhel vinuruknya, tumusiṅ hajī, aṅlariṅ kevuh, bhaṭāra śiva hyaṅniṅ brata.

§III.222 hana brata, pasaṅ sande, ṅa, tan pamaṅan kasurupan saṅeṅe, pha, apaḍaṅ kaṅ hati, yan asisinahu eṅgal bisa.

§III.223 hana brata, tan pamaṅan riṅ pūrṇamaniṅ kadaśa, antuk tigaṅ pūrṅamaniṅ kadaśa, pha, svarga sakala katәmu, mañjanma riṅ ratu, paripūrṇānurāga riṅ rāt.

§III.224 hana brata, mūrṅama sadā, ṅa, pūrṇama tan pamaṅan tәkaniṅ paṅloṅ apisan tilǝm tәkaniṅ taṅgal apisan, pha, sugih manәrus, katәkan sapinakṣanira riṅ bhūmi, saṅ prajuritiṅ bhūmi hyaṅniṅ brata.

§III.225 hana brata akasukhan, ṅa, riṅ pūrṅamaniṅ kapitu, piṅ, 7, sarahina, piṅ, 7, sa[39r]vәṅi, amaṅan aṅinum, aṅigǝl, bhaṭāra kapitu maveh brata, pha, suka sugih, anak amitra, dīrgha yuṣa, keḍәp kapintuhu.

§III.226 hana brata, mәnǝr ri taṅgal, piṅ, 3, maṅan kuñit, mūrṇama sadā, ṅa, saṅ hyaṅ trisandhi hyaṅniṅ brata, papalihan bhaṭāra mahādeva, ya pinakarūpa, pinakapamulu, mvaṅ kavicakṣaṇan, [pha,] tan kaluputan . taṅgal, piṅ, 4, amaṅan kәtan irәṅ, amukti labdha, ṅa, saṅ hyaṅ cadu śakti hyaṅniṅ brata, papalihan bhaṭāra viṣṇu, ya pinakarupa, pinakarambut, [pha,] siddhaniṅ ṅvaṅ, anvargakǝn bapebu. taṅ, piṅ, 5, […] amañcavara śakti, ṅa, saṅ hyaṅ pañcavara hyaṅniṅ brata, papalihan bhaṭāra śiva, ya pinakarūpa, pinaka Idhǝp, pinakatǝndhas [pha,] siddhaniṅ ṅvaṅ sugih tan kaharṣa .

§III.227 hana brata maṅan raka, pūrṇama limaṅ raka, sira saṅ hyaṅ patūt sih tumurunābrata, pha, ginañjaran śakti lima, pinakarāma, pinakalalako[39v]n suka sugih tan panambut kārya.

§III.228 hana brata, mūrṇama tilәm, ṅa, maṅupavaśa[,] aṅraka kunǝṅ, [pha] utaṅiṅ atvanta, kәna sinahur[,] polihnya sakarәpta.

§III.229 hana brata, ṅraka naṅkǝn kalivon, patra, ṅa, hyaṅ taruṇa turunābrata, [ya] pinakarūpa, [pha] siddhaniṅ vaṅ sugih lәmah śima.

§III.230 hana brata, maṅan sarva phala, talǝs huvi vahvahan pisaṅ kunaṅ, pituṅ vәṅi lavasnya, kasubhagan kinaharṣan deniṅ istri phalanya, Abhoh kayu ṅaraniṅ brata maṅkana.

§III.231 hana brata, maṅan phala gantuṅ, davun sinabraṅ, ṅa, pha, prajurit.

§III.232 hana brata, maṅan sarva buṅkah, sagәlǝmiṅ abrata, saṅ hyaṅ viśeṣa hyaṅniṅ brata, suka sugih, puṣṭaka lǝṅǝn phalanya.

§III.233 hana brata, amaṅan sarva phala, sapta rātri lavasnya, pha, kinasihaniṅ strī, yaniṅ strī kinasihaniṅ kakuṅ.

§III.234 hana brata, amaṅan tur ambaṅkit, bhaṭārī keḍәp hyaṅniṅ brata, ṅgonaniṅ amimiti, riṅ pavon, punaṅ kininaṅ sәḍah sapon den tuvuh, lalamak lampuyaṅ, tan pamaṅan tan paṅinaṅ, yan tan panggugut lampuyaṅ, pha, vavadon tan pagigilutan, keḍәp malaki.

§III.235 hana brata, amaṅan katambat tigaṅ bulih, naṅkǝn kalivon, tan pamaṅan paran paran, pituṅ kalivon samayanya, pha, apәkik tur lǝmǝsiṅ rambut.

§III.236 hana brata, ambhūmi lәpa, ṅa, amaṅan jaṅaniṅ lǝlǝpa kabeh, salek lavasnya, bhaṭāra Iśvara maveh brata, pha, kinasihaniṅ svami, keḍәp alaki, kinasihaniṅ hyaṅ.

§III.237 hana brata, amaṅana mimba, salek lavasnya, pha, athāravit.

§III.238 hana brata, sarva tatā, ṅa, amaṅan luṅggahiṅ gaṇḍa rusa kәliṅ, mvaṅ campaka garus, bhaṭāra śambhu hyaṅnya, pha, mulih[,] riṅ svarga bhaṭāra guru, mvaṅ riṅ bhaṭāra śiva.

§III.239 hana brata, vījāharā, ṅa, amaṅan vīja rumuhun, saha pucukiṅ gaṇḍa rusa, pucukiṅ alaṅ-alaṅ, pha, prajñan kita, sihaniṅ istrī.

§III.240 hana brata, maṅan sarva luṅgah luṅgahan, pucukiṅ dukut [40v] lәpas, pucukiṅ alaṅ-alaṅ, tuñjuṅ, vija tәluṅ jumput, sapta rātri pituṅ dina lavasanya, siddha kārya saphalanya, Amūrva ṅaraniṅ brata maṅkana.

§III.241 hana brata ṅantavali, ṅa, amaṅan hantavali, pañjaṅnya salǝṅkat madhya, pituṅ tumpǝk kalivon patәlasanya, mirica pituṅ viji, ligundi pituṅ muñcuk, pha, salara vighna hilaṅ donya, sojarira keḍәp, !...! katәmu maṅke mvaṅ dlāha.

§III.242 hana brata nirambu, ṅa, tan pamaṅan sarva binumbon, satahun lavasnya, pha, mulih mariṅ svarga bhaṭāra rūdra, sasarnya majanma ri listvayu, apәkik prajurit.

§III.243 hana brata, amaṅan kәtan baṅ[,] pituṅ vәṅi, hirәṅ pituṅ vәṅi, ivaknya sarva śuci, arariṅ śakti, ṅa, bhagavān paraśara hyaṅniṅ brata, pha, akadaṅ voṅ pәkik.

§III.244 hana brata, maṅan kәtan[,] ya taṅkǝp , voṅ tuṅgal tuṅgal riṅ kalivon, 7, hǝmbanya phala, sahaṅ, mәñan, aṅgara kaśih amaṅan, 7, alaṇdhyan, sira saṅ hyaṅ asihiṅ prāṇa turunābrata, ginañjaran śakti lima, pha, suka sugih, sapatinya vәnaṅ.

§III.245 hana brata, anila, ṅa, amaṅan kәtan hirәṅ, satahun samayanya, pha, mantuk iṅ svarga bhaṭāra viṣṇu, sasarnya majanma riṅ mantrī.

§III.246 hana brata, murāṇa, ṅa, amaṅan ñahñah lan gula tәbu, lamanya tigaṅ dina, pha, tan kataman siṅ saparanta.

§III.247 Hana brata, maṅan tan dady akarvan, pituṅ lek lavasnya, suka magə̄ṅ phalanya, eka patra ṅaraniṅ brata maṅkana.

§III.248 hana brata, tan kapadan, ṅa, yan amaṅan tan pakǝmbulan, aduluran pañcamuna, sahuripnya riṅ amaṅan, alalab roṇḍon, mvaṅ kǝmbhaṅ, uttamaniṅ brata kabeh, pha, tan kapadan viśeṣa, maṅkana polahira saṅ viku tәmǝn tәmǝn.

§III.249 hana brata, amaṅan tan pakǝmbulan, pәtaṅ tahun samayanya, pha, mantuk riṅ svarga bhaṭāra rudra, sasarnya mañjanma riṅ kulaputra, kaḍaṅ haji subhaga.

§III.250 hana brata, aṅajum , ṅa, amaṅan riṅ va[41v]ton salek lavasnya, bhaṭāra mahādeva maveh brata, pha, tәka atuduhiṅ paliṅgihan, keḍәp tәka ruruṅeniṅ voṅ.

§III.251 hana brata, amutәriṅ paṅkon, ṅa, amaṅan pinaṅku, salek lavasnya, bhaṭāra mahādeva maveh brata, pha, kinasihan deniṅ bapa ibu, malakya rabi, sasarnya dadi bhujaṅga lәvih.

§III.252 hana brata, amaṅan [ri] ryaghūrṇita, pituṅ lek samayanya, pha, siddhi mantra, listvayu paripūrṇa.

§III.253 hana brata, naṅkə̄nāra, ṅa, yan amaṅan aṅagǝm jinah, 7, salek samayanya, saṅ hyaṅ rūdra hyaṅniṅ brata, pha, akәlar tan kәneṅ śrī kita.

§III.254 hana brata, asaṇḍiṅ jinah keteṅ, salek lavasnya, bhaṭāra Indra maveh brata, pha, prajña prakavi, Aṣṭa kośala, sasarnya dadi patih sugih.

§III.255 hana brata, maṅan aṅadut, satavun lavasnya, pha, sugih siddhi mandi, vāk bhajra subhaga.

§III.256 hana brata, amaṅan kupat pāṇḍava, 3, paṅanǝn esuk, 1, paṅanǝn tәṅah ṅve, 1, paṅanǝn sore, 1, pha, rinakṣa deniṅ rāt, kinasavitan deniṅ sama janma, hajana livavaktayanya, tan pamuruṅ polihnya.

§III.257 hana brata, maṅan kupat, mevaka sarva śukla, tәluṅ vәṅi divasanya, bhaṭāra Iśvara hyaṅniṅ brata, pha[,] biṣa ṅiduṅ, abәcikiṅ ulon, manisiṅ panutukan, mvaṅ kinasihaniṅ voṅ.

§III.258 hana brata, adahar lәpǝt, lama tәṅah vulan, ranini kundaṅ kasih hyaṅniṅ brata, pha, arampiṅ.

§III.259 hana brata, naḍah tumpəṅ, sahasta pañjaṅnya, śūnya ivaknya uyah arәṅ kevala, anarasvatī, ṅa, saṅ hyaṅ pitu tan palavan hyaṅniṅ brata, ya pinakaprajña, sih malakya rabi, siddhaniṅ vaṅ sugih tan surud, mvaṅ pradaṇānuṅku rāt.

§III.270 hana brata, maṅan tumpəṅ, lavasnya tәṅah śaśih, lamun tan kavaśa, pituṅ dina, ranini paduka bhaṭārī hyaṅniṅ brata, pha, abәcik kaṅ gulu.

§III.272 hana brata, adva savәguṅ, bhaṭāra rūdra maveh brata, pha, sugih rumbe.

§III.273 hana brata, asi[42v]dakǝp sarahina, bhaṭāra saṅkara maveh brata, pha kinasihaniṅ voṅ.

§III.274 hana brata, lumaku savәṅi sarahina, pha, dadi deva guru, sasarnya dadi viku bahu siṣya, apәkik rūpa, teja tiniṅhalan, sugih saṅkan rare, sugih tus tumus.

§III.275 hana brata, amәlәṅ tutuk sarahina vәṅi, pur, saṅ hyaṅ anәmu jagat sira turunābrata, pha, ginañjaran śakti lima, pinakarāma, pinakalalakon vadon, listvayu, prajñan, lanaṅ vicakṣaṇa, sukha sugih, maṅke kalavan tǝmbe.

§III.276 hana brata ṅālamuñə̄ṅ, ṅa, saṅ hyaṅ lәbur jagat sira turunābrata, ginañjaran śakti lima, voṅ tuṅgal sakvehiṅ sira abrata, ya pinakarūpa, pinakalakon, vastu rahayu, lanaṅ vadon suka sugih drәman keḍәp.

§III.277 hana brata, ṅalacakra, ṅa, sira saṅ hyaṅ viśeṣa riṅ bhuvana, sira turunābrata, ginañjarān śakti tigaṅ rakṣa , sakvehaniṅ abrata, pha, suka sugih, prajñan vicakṣaṇa, lanaṅ vadon.

§III.278 hana brata, mañca vaśa gina, ṅa, tan paṅlavaniṅ vadon aṅucap, naṅkǝn manis, yan vadon tan paṅucapiṅ kakuṅ, tan paṅinaṅ suruhiṅ apvan, lǝlǝmbaran vәnaṅ, pituṅ lek samayanya, pha, tinūtiṅ mās, salviriṅ drәventa tǝmbe.

§III.279 hana brata, kukusaniṅ śarīra, ṅa, tan pamaṅan suku pat, lavasnya sakavaśahaniṅ abrata, saṅ hyaṅ cadu śakti sira turunābrata, ya pinakarūpa, pinakavaṅkoṅ, siddhaniṅ vvaṅ muṣṭika, keh avәlas, rovaṅ asih iri kita, aṅraṅkus brata.

§III.280 hana brata, tan pamaṅan bavi, hyaṅ manasija hyaṅnya, pituṅ tavun samayanya, pha, luputiṅ gәriṅ aguṅ, tur kinasihan deniṅ jagat.

§III.281 hana brata, tan pamaṅan śrәgāla, pha, rūpanta tan akusut.

§III.282 hana brata, tan pamaṅan ayam, pituṅ lek samayanya, pha, tan pamaṅgih marū.

§III.283 hana brata, tan pamaṅan ayam, satahun samayanya, pha, tan panәmu marū, tur drәman.

§III.284 hana brata, akәrisa, ṅa, tan pamaṅan yan tan pasisig rumuhun, sari sarī, bhaṭārī śvari hyaṅniṅ brata, satahun sayamanya, pha, prajña, tavitan labdha mās kita.

§III.285 hana brata ñandiṅ dhadhap, lama tigaṅ dina, tan pamaṅan, bhaṭāra śiva hyaṅnya, pha, svarga lәvih dinuṅkapnya, subhaga kita, kula putra atәhǝr viśeṣa, bahudhǝṇdha ñakra vrәtti.

§III.286 hana brata, ṅapitu, ṅa, naṅkǝn dvadaśi śukla pakṣaniṅ kapitu, aṅupavaśa, bhaṭāra bhīma hyaṅnya, ma, Om̐ bam̐ bhīmā ya namah, pamit, pha, viryavan kapintuhu deniṅ rāt, sugih mās pirak, hulun putra vrәddhi, siddha sakāryanta.

§III.287 hana brata, ṅrәspati, ṅa, kramanyānaṅkǝn vrәspati ṅupavaśa, pha, listuhayu kita, siṅ kāryanta hayu.

§III.288 hana brata, tan pamaṅan pituṅ rātri, pha, viryavan siddha sakāryanta.

§III.289 hana brata, ṅupavaśa, sacandra samayanya, riṅ ka sapuluh, pha, kapituhu deniṅ rāt, mās pirak tәka vrәddhi, kinasihan deniṅ paṇḍita.

§III.290 hana brata, yan tәkaniṅ vәton, tan pamaṅan sarvvāmbǝkan, pha, antuka omah omah, tan surud dharmmanya, bhaṭā[44r]ra rudra hyaṅnya.

§III.291 hana brata tan pamaṅan sarvvāmbǝkan, pva, ka, pha, keḍәp deniṅ rāt.

§III.292 hana brata, amiraṅ, ṅa, tan pamaṅan sarva prāṇa prāṇi, satahun tigaṅ lek samayanya, bhaṭārī pabyavara hyaṅniṅ brata, pha, siṅ prih meṅgal katәmu, deva sih iri kita.

§III.294 hana brata, yan amaṅan asaṇḍiṅ puṣpa liṅga, aṅliga prāṇa, ṅa, hyaṅ aṅgaṣṭi sira turunābrata, pha, keḍәpiṅ rāt, tur rūpanta muntab, śakti prajurit mahābhara, yan dadi vvaṅ abhra murub, tan kasoran rūpanta, dirggha yuṣa paripūrṇna, puruṣa viśeṣa.

§III.295 hana brata, aṅliṅga pәraṅ, ṅa, yan amaṅan asaṇḍiṅ duhuṅ, bhaṭāra rūdra hyaṅiṅ brata, pha, Akveh vvaṅ tumaṅgalaṅ asih iri kita.

§III.296 hana brata, aṅubi, ṅa, amaṅan aṅinum bañu rumuhun, huvusiṅ amaṅan, tan vәnaṅ aṅucap lavan voṅ, pha, akәlar, suka sugih, tan kǝna gәriṅ, tan sasar kapintuhu deniṅ rāt.

§III.297 hana brata, maṅan tan pembuh, tan paṅinum bañu, pha, śakti kiteṅ ri niṣkala, lavasnya sagәlǝmiṅ abrata, saṅ hyaṅ dura dasih hyaṅnya, tatkālaniṅ abrata, tan paturviṅ rahina, [pha,] apaḍaṅ riṅ rūpa, apaḍaṅ kaṅ ati, kinasihaniṅ rat.

§III.298 hana brata, ñәkul bañu, [ṅa,] tan pamaṅan sәga sadina, tan paturviṅ rahina vәṅi, aṅayapakǝn tәkeṅ polihnya, añjanma hayu, ma, rāga śūnya mahiśi taya, amaṅan sәga satatak, siniratiṅ toya añar, pamit, vus mapamit, madahar, sakantunanya, hayva mañapuhaṅ.

§III.299 hana brata ñәkul bañu, mañjiṅ lima ṅaranya, kavaśa amaṅan suruh, maṅan sәkul inumi toya, sәga sakәpǝl tinatak ri lәpa lәpaniṅ taṅan, vәnaṅ inumi bañu sabran sore, lavasiṅ abrata, satavun, yan kavaśa, mokṣa salviriṅ lara, vighnaniṅ śarīra Ilaṅ donya.

§III.300 hana brata, tan paṅinum vvai, tatkāla savuku galuṅan, Aṅhiṅ tāmaṅan antiga binǝṅdhǝm, harәpiṅ dhәṅǝn, sambi aṅadǝg tәṅaṅ ṅve tatkāla guṅe, Arddhaṇa bhaṭāra mrәtyu, phalanya kәdhuk timbul, tutug tumuvuh, puruṣa viśeṣa, śakti vani, kineriṅan deniṅ jagat, labdha vara gragaluṅān.

§III.301 hana brata, aṅambaṅ, ṅa, yan amaṅan kinambaṅakәn riṅ bañu, satavun samayanya, bhaṭāra viṣṇu maveh brata, pha, mañjanma riṅ kaḍaṅ ajī, sugih vәsi, tūr keḍәp kavi prajurit.

§IV nyan ta saṅ citta varaṇā, umarah [ri] saṅ vala kula, mūla tattvaniṅ dadi kabeh, pahenak paṅrәṅə̄nta, mūlabhoktaniṅ kanirāśrayan, mvaṅ kābhyudayan, bhāvanya mvaṅ lakṣaṇanya, pūrvanya mvaṅ vәkasnya, maṅkana liṅ saṅ vala kula, nǝmbah hulun, Om̐ viku satakvan[,] tānaku, kita pva siksa ṅaran ika, duga-duga tumakvan, vuvus maṅkana, rәṅə̄n siptan i ṅhulun. pūrvaṃ śrī puruṣānte, varānugraha makanya, saṅ rojyam, narāsakane, Ayavaṃ vidyaṃ prajayaṃ. maṅkana pariñciniṅ cipta, kaliṅanya, pūrva haraniṅ mimitan, tripuruṣa haraniṅ brahmā viṣṇu Iśvara, vara ṅaraniṅ amiddhi , anugraha haraniṅ panuṅsuṅ , manoka ṅaraniṅ devata, saroja [45v] ṅaraniṅ manūtra, nara ṅaraniṅ mānuṣa, sakāla ṅaraniṅ samaṅke, yaśa ṅaraniṅ kirti, vidyā ṅaraniṅ hajī, aprayadha ṅaraniṅ pūjā, kaliṅanya, bhaṭāra sira magave pratapa riṅ vana giri, maṅaṣkāra bhaṭāra, bhaṭārī, Atitah kasukan amragat trәṣṇā, anusupi vanavāsa, maṅǝnakǝn tapa, manaṅsāra rāga, tinūt deniṅ manūṣa maṅke, atapa abrata, ayoga asamadhī, ayajña dāna kīrti, maṅhanakǝn brata apayapanya, Ulandriya, rumәgǝp pañcendriya, tuṅgalakәna riṅ tri sandhyā, piṇdhakǝn riṅ kaparāmarthan, vaḍahana yoga, sahabana samadhi, tindihana brata, tuṅgunǝniṅ dāna kīrti, laṅlaṅana riṅ āgama, pagǝrana pupūjān sasapon, lavaṅana saṅgarma, ugǝr ugǝrana sadā, inǝbana tuhu, tindihana kañciṅanā parāmartha, yeka ulahaniṅ saṅ tumaki-taki kābhyudayan, kābhyudayan ṅaranya, kavibhavan, kavibhavan ṅaranya, bandha savita, bandha savita ṅaranya, kasugihan kula rūpa, śakti vani, nirogha nirvighna , cakṣyah lavajjanā, subrata dīrgha yuṣa yovaṇa aveta urip, maṅkana phalaniṅ brata yan inabhyāsa, ya kābhyudayan de saṅ surupa, maṅkana liṅ saṅ citta varaṇa, riṅ saṅ vala kula. nambah hulun, mapa riṅ kanirāśrayan, mәne pukulun, mәne kami varah iri kita, lakoni siptaṅku riṅ lagi rumuhun, sājña pukulun, vurukәniṅ brata pukulun, pariñcinya, mvaṅ phalanya, A U ma.

§III.302 hana brata, tan pamaṅan tan paturu, bratanira saṅ hyaṅ vәkasniṅ kavi viśeṣa. pha, svarga lәvih, titisnya añakravartti, subhaga anulus, anurāga riṅ rāt, katәkan sapinakṣanira riṅ bhūmi, dinuluriṅ āyu, śakti vani mahābhāra.

§III.303 hana brata, ambhairava pakṣa, siṅ pinaṅan, tuhun tan trәṣṇeṅ turu, bhaṭāra pavakānugrahani, mvaṅ devata, [pha,] bhūta gandharva masih, janmanya puruṣa viśeṣa, subhaga hanulus, ajrih kaṅ sarva galak.

§III.304 hana brata, tan paṅgilani sarva tinaḍah, sambarana , ṅa, pha, viryavan siddha sugih saṅkan rare.

§III.305 hana brata, ṅarәṅ, ṅa, amaṅan harәṅ rumuhun[,] bhaṭārī gaṅga hyaṅniṅ brata, ma, Om̐ gaṅgā ya namah, salek samayanya, pha, apәkik kerәṅan deniṅ jagat.

§III.306 hana brata, yan amaṅan maivak harәṅ tumpə̄r, pәtaṅ tavun samayanya, pha, keḍәp riṅ samanta janma, kinasihaniṅ rāt, keḍәpiṅ arabi anak anak.

§III.307 hana brata, maṅan apisan, pituṅ lek pituṅ vәṅi samayanya, pha, kinasihaniṅ rāt.

§III.308 hana brata nitīkrama, ṅa, amaṅan sadina sapisan, saṅ hyaṅ smara hyaṅniṅ brata, pha, siṅ prih meṅgal katәmu, dirghyuṣa.

§III.309 nahan brata, maṅan piṅ saptami, pituṅ lek samayanya, kinasihaniṅ rāt phalanya.

§III.310 hana brata, ambhūmi amasar bhuvana, ṅa, pha, sugih lәmah sīma.

§III.311 hana brata, maṅaniṅ lәmah, pituṅ śaśih lavasnya, kinasihaniṅ rāt phalanya, bhūmi ṅaraniṅ brata maṅkana.

§III.312 hana brata, mañcavara, ṅa, U, marәp maṅetan amaṅan, pa, marәp kidul amaṅan. pva, marәp aṅulon. va, marәp aṅalor amaṅan. ka, siṅ harәpira maṅan, duluranya lalab kabeh, mvaṅ kǝmbaṅ hanūt kadi varṇaniṅ sәga, pañcavarṇa, putih kuniṅ abaṅ Irәṅ, riṅ teṅah pañcavarṇa, deva rata hyaṅnya, pha, mantuk iṅ svarga pada bhaṭāra śiva, !pamit!, ma, Om̐ Om̐ śrī jagat guru paduke bhyo namah. sasarnya mañjanma rata añakravr̥tti, tan kapadhān.

§III.313 hana brata, mañca vara dalәm, ṅa, kramanya, amaṅan uyah kevala, amaṅan sәkul kevala, salek tәluṅ dina samayanya, vus maṅkana, ulam kevala, vus maṅkana, toya kevala, vus maṅkana, aṅinaṅ kevala, vus maṅkana lavasnya, kәneṅ paṅan, tan kәneṅ turu, samaṅkana lavasnya, saṅ hyaṅ vәkasiṅ anuṅku rāt hyaṅnya ikaṅ brata, tan upir upir sukanta, mantuk riṅ svargan bhaṭāra dharma, janmanya suka maṅan aṅaṅgur, tan aṅhel panambut gave, suka sugih tan pasaṅkan, kaṅ vvaṅ masih deva bikṣuka, muleh iri kita.

§III.314 hana brata, luhuriṅ kayu, ṅa, tigaṅ lek samayanya, pha, vrәddhi putra, tur keḍәp siṅ paṅucap.

§III.315 hana brata, aturu luhuriṅ kayu, salek divasanya, pha, śakti kasiddhyan kapaṅguh.

§III.316 hana brata, aṅalasa, ṅa, asaṅidaniṅ alas savәguṅ, tan papasa deniṅ voṅ, ṅuniveh sarva sato, asǝp, pha, prajurit riṅ paravu, aṅuṅgahana bahanya, va, harәṅ prajurit riṅ darāt luṅguhana vatu, [devatanya] saṅ buddha subrata, sasarnya dam puvavaṅ riṅ paravu, sugih savah, tur sugih paravu.

§III.317 hana brata, ṅraka sabran tilәm mvaṅ pūrṇama, sarva putus, ṅa, saṅ hyaṅ silih asih maveh brata, pha, tinuṅgviṅ rāma reṇa, suka sugih prih avak, tur tan paṅubiṅ voṅ atuha.

§III.318 hana brata, maṅan gǝḍaṅ tan kinulitan, tәluṅ vәṅi samayanya, saṅ hyaṅ murṣita hyaṅniṅ brata, pha, apәkik, yen istri mǝṅgǝpiṅ pahyunan, abәcikiṅ buddhi, vruhiṅ kaliṅanya, pituturiṅ bapebu.

§III.319 hana brata, maṅan tuhuṅ pitpit rumuhun, saṅ hyaṅ maṇik muñcar, ṅaraniṅ brata, saṅ hyaṅ maṇik aṅuñci pǝpǝt sira turunābrata, pinakabaghā, pinakarūpa, paṅadǝganiṅ vavadon, pinakalistvayu, [pha] drәman manis ta kita, lindihǝn voṅ apәkik, drәman anak anak, aputu riṅ niṣkala.

§III.320 hana brata, ṅgilir kacaṅ, ṅa, kramanya, aṅuvāsa savәguṅ, amaṅan savәguṅ, hyaṅ prajā sadā hyaṅniṅ brata, pha, mantuk riṅ svargan bhaṭāra Iśvara, sasarnya mañjanma suka sugih, lәvih anulus, yan lanaṅ puruṣa kula pratyakṣa anurāga kita, sugih pisis riṅ dlāha, yan istri samaṅkana.

§III.321 hana brata, yan amaṅan sinaren kasumba, saṅ hyaṅ maṇik pari rāja, ṅa, hyaṅ maṇik teja bhūmi turunābrata, ya pinakarūpa, pinakarah-dagiṅ, pinakahati, [pha,] riṅ dadi vvaṅ, suka sugih, listvayu, sәkar analum, akǝmbaṅ avoh riṅ niṣkala.

§III.322 hana brata, maṅan sәkul sapuluṅ, saṅ hyaṅ maṇik tampa, ṅaraniṅ brata, saṅ hyaṅ maṇḍala hyaṅniṅ brata, ya pinakarūpa, pinakakukusaniṅ śarīra, [pha,] asǝsǝkan kanakāguṅ, kalavan alit, aśrī asambaṅ jarijya, siddhaniṅ vvaṅ suka sugih, tan pәgat sādhana, mvaṅ mās maṇik, kinanti jagat kinanti japa kita riṅ dlāha.

§III.323 hana brata, maṅān sәkul putih kuniṅ, aṅkǝn kalivon, humārәp purvva, mevaka bhīra, paṅan pisan saṅaṅ kalivon divasanya, Uttamā saṅaṅ vulan, bhaṭāra śiva hyaṅniṅ brata, papalihan hyaṅ antadeva, ya pinakarūpa, pinakasamūha, pinakadirgha yuṣa, yan lanaṅ pinakapәkikan, pinakapolah, pinakararas, yan vadon pinakakahayon pinakapolah , pinakahibon, pha, mulihiṅ svarga bhaṭāra śiva, sasarnya mañjanma riṅ prabhu añakravarti, viku, bhujaṅga, śeva sogata, sugih malǝṅkә riṅ mās pirak, sarva sosoca, rare, hulun, kәbo sapi, mrәgādi, vrәddhi putra, tinuṅgviṅ bapebu, kaki nini, ma, Om̐ hram̐ hrim̐ sah parāmaśivāditya ya namah, ahyas.

§III.324 hana brata, amiśe[49r]ṣa, ṅa, yan amaṅan tan pahupa, anlasana sәkul, yan vus kinurәn kurәn, ma, Atma tuturakәna mariṅ bhaṭāra viśeṣa, umuṅguh riṅ vindu nadha, sakāla niṣkāla, viśeṣa bhaṭāra baja, maty aturu, maty aluṅguh, maty aṅadǝg, lәsālәyǝp, pavak tan paśarīra sakāla niṣkāla.

§III.325 hana brata, nūtakǝn saśila bhaṭāra gaṇa, amuṣpa gaṇa, ṅa, yan amaṅan sәga nǝm kǝpǝl, sarahina, tiṅkahiṅ amaṅan, śīla gaṇā, nǝm vulan samayanya, pha, mantuk iṅ bhaṭāra guru, sasarnya mañjanma riṅ viku Ijo, śakti dūra darśana, sojar ira keḍǝp.

§III.326 hana brata, maṅan sәga sinaṅga ri taṅan kiva, tan patәdha tan patambǝh, tan apilih ivaknya, Apan mayoni, ṅa, hyaṅ siddhi narasiṅha turunābrata, ya pinakarūpa, pinakalaku , [pha,] siddhaniṅ vaṅ anambadani śabda, sihniṅ rāt, ma, Om̐ Om̐ siddhi kāraṇāya namah svāhā, yan ahyas.

§III.327 hana brata, jaṅga varṇa, ṅa, amaṅan [49v] sәga balaka, pituṅ dina lavasnya mābhyāsa, pha, keḍәp savuvusta deniṅ rāt, prajñan vicakṣaṇa, biṣa gamǝl aṅiduṅ.

§III.328 hana brata, jaga śatru, ṅa, saṅ hyaṅ saptanala hyaṅniṅ brata, kramanya, taṅgal pisan piṅ ro tәmu taṅgal piṅ pitu, lamun huvus sumurup vulan juga kita vәnaṅ aturu, livat saṅkeṅ taṅgal piṅ pitu, sakarәptāturu, maṅkāneṅ krәṣṇa pakṣa, lamun mәtu vulan juga kita turu, livat saṅke rika, sakarәpta turu, pha, riṅ dadi vvaṅ sugih, tan hana nuskr̥ta , riṅ niṣkāla.

§III.329 hana brata, mūrāba, ṅa, maṅlәkasa taṅgaliṅ kapat mabrata, maṅana purāṇa, kǝmbaṅ nāgasāri, kulalaṭa, malabahaniṅ pūrṇama , polihnyāpәkik hayu tan pasiriṅ, ma, Om̐ smarāya namah, yan ahyas.

§III.330 hana brata, taṅgal piṅ savlas, Atikukus, ṅa, phalanya virya, drәman anulus.

§III.331 hana brata, maṅan aronāron, ulam kalapa binakar, lima vәlas dina divasanya, saṅ hyaṅ viśeṣa hyaṅ[50r]niṅ brata, pha, abәcik kaṅ hulon.

§III.332 hana brata, amaṅan tan paron, pituṅ lek divasanya, pha, siddhakārya, jaya patra ṅaraniṅ brata maṅkana.

§III.333 hana brata, ṅavaśakәn sakvehiṅ brata, pha, mantuk iṅ svarga bhaṭāra Umapati, [pha,] janmanya prabhu añakravartti, viku śakti bahu sikṣa, labdha vara subhaga.

§III.334 hana brata, kadi rare, tan kinatәṅǝtakәn, pha, tan pavali valyañjanma kita, sasarnya dadi ratu.

§III.335 nihan brata, amati agni, asisirih, 3, dina, tan pamaṅan sakalvirnya, tutug 3, dina, alabahan, tur tīrthanana, pha, hilaṅ pāpa kleṣaniṅ śarīra.

§III.336 hana brata, amaṅan sǝsǝdhǝp rumuhun, pituṅ tavun divasanya, bhaṭārī vastu hyaṅniṅ brata, pha, keḍәpiṅ rāt.

§III.337 hana brata, maṅan mevak uyah harәṅ, pha, keḍәp riṅ rāt, kineriṅan deniṅ bhuvana, kinajrihaniṅ śatru.

§III.338 Ana brata, mamaṅan catur varṇa, limaṅ vәṅi lavasanya, prajña śakti phalanika, tәhǝr kinasihaniṅ rāt, Apurvva kita, sakabdhu ṅaraniṅ brata maṅkana.

§III.339 hana brata maṅan riyana, 5, tәluṅ lek lavasnya, pha, halus jarijinta, niromanira.

§III.340 hana brata, ṅantara, ṅa, maṅan tṅaṅ ve , tәṅah vәṅi, tigaṅ lek lavasnya mabhyāsa, pha, śakti saturasta, suka magə̄ṅ.

§III.341 hana brata, maṅan pituṅ kәpǝl, sadina, pituṅ rahina samayanya, mabrata, catur ṅaraniṅ brata, [pha] riṅ dadi vvaṅ sarva vәsi tan tumamāhi śariranta, riṅ niṣkāla.

§III.342 hana brata, yan amaṅan tan paluṅguh, saṅ hyaṅ hayu maveh brata, saṅ hyaṅ laku laku haraniṅ brata, ya pinakarūpa hayu raspati, [pha] suka riṅ lakunta, lәbur tampakta aśri iṅiriṅan, deniṅ pavoṅan, siddhaniṅ vvaṅ suka sugih, amūkti sāriniṅ kaḍaton, kita riṅ dlāha.

§III.343 hana brata, amadhapa, ṅa, amaṅan riṅ paṅkon, malamak patra, saṅ hyaṅ sūkṣma maveh brata, phalanya sapolahta pantǝs, tan pәgat sihniṅ malakya rabi, salek samayanya, ma, Om̐ sūkṣmāya namah, pamit.

§III.344 hana brata, tan pamaṅan sarvāmbǝkan, naṅkǝn pon, mvaṅ kalivon, pha, keḍәpiṅ rāt.

§III.345 hana brata, yan amaṅan aṅilo riṅ pahesan, naṅkǝn pūrṇama, satavun divasanya, pha, mañjanma riṅ kabayan buyut sugih.

§III.346 nihan aji rambut, amaṅan sәga hirәṅ, naṅkǝn caturthi, śukla pakṣa, ma, hulun aṅaji rambut, tan abaṅ, tan ana raṅraṅ, tan ana putih, sәlǝm abuluniṅ gagak, adava, alambas, atәtәl, ṅkon rambutin hulun, katәmu maṅko, lәvih kaṅ tǝmbe hulun aṅaji rambut, vastu hulun aṅaji rambut, Om̐ sa ba ta A I namā śivāya.

§III.347 hana brata, mona mūjā, pha, deva masih iri kita.

§III.348 hana brata, mona, ṅa, yan aṅisiṅ, yan ahuyuh, yan adyus, yan alәlәṅa, yan abasahan, yan lumaku, pituṅ lek samayanya, bhaṭāra śiva maveh brata, sasarnya sugih duve, sugih vәka, tur keḍәp, mañjanma riṅ mantrī.

I śaka, 1722. Vai, ka, vrә, vara mrakih, praṭipadā riṅ śukla pakṣa, Asuji maśa, rah, 2, tǝṅgǝk, 2. I rika divasanya, pūrṇna linikhita.