Kuṭāra Mānava: Digital Critical Edition and Translation of an Old Javanese Penal Code

avignam astu.

§1 riṅ aṣṭaduṣṭa varahakəna. amateni voṅ tan padoṣa, akon amatenana voṅ tan padoṣa, aṅanini voṅ tan padoṣa, akəmbulan paṅan lavan duṣṭa, sapaduluran saparane lavan duṣṭa, amitra lavan duṣṭa, aveh gənah riṅ duṣṭa, atuluṅ duṣṭa, iku aṣṭaduṣṭa arane. riṅ aṣṭaduṣṭa kaṅ tətəlu adoṣa pati, kaṅ lilima adoṣa artha, katuturana deniṅ harəp vəruha patutuṅgalane, əndi ta kaṅ adoṣa pati. riṅ voṅ amateni voṅ tan padoṣa, doṣa pati. riṅ akon amatenana voṅ tan padoṣa, doṣa pati. riṅ anatoni voṅ tan padoṣa, doṣa pati. əndi ta kaṅ lilima adoṣa artha. sapaṅan lavan duṣṭa, samitra lavan duṣṭa, sapaduluran saparanelavan duṣṭa, aveh gənah riṅ duṣṭa, atuluṅ duṣṭa, iku ta kaṅ lilima paḍa adoṣa artha. nora vənaṅ doṣanana pati denira saṅ amava bhūmi. amateni voṅ tan padoṣa, akon amatenana voṅ tan padoṣa, anatoni voṅ tan padoṣa. duṣṭa tətəlu iku, yen sayakti sacihna, katəlu ḍəṇḍa pati, arane katəlu duṣṭa atoh avake, yan amalaku huripən iṅ saṅ amava bhūmi, katəlu ḍəṇḍanən pataṅ lakṣa vivijinən iṅ duṣṭa satuṅgal-satuṅgal kahilaṅane doṣane. anadene kaṅ sapaṅan lavan duṣṭa, sadulur lavan duṣṭa, amitra lavan duṣṭa, atuluṅ duṣṭa, aveh gənah riṅ duṣṭa, iku ta kalima paḍa ḍəṇḍanən, denira saṅ amava bhūmi, aṅroṅ lakṣa riṅ voṅ duṣṭa satuṅgal-satuṅgal yen huvus enak kasāpekṣān deniṅ sākṣi kaduṣṭane.

§2 manih yen hana voṅ alavas amitra lavan duṣṭa, aṅiṅ nora vəruh yen duṣṭa, dene dohe umahe, dohe deśane, kaṅ amitra iṅ iya, kaḍəṇḍaha pataṅ tali təluṅ atak denira saṅ amava bhūmi, saṅkane kaḍəṇḍa dene alavas amitra tur anəṅguh tan vəruh iṅ iya yen duṣṭa yen tan alavas dene amitra, tuhu-tuhu tan vəruh iṅ iya, yen duṣṭa, tan kaḍəṇḍaha denira saṅ amava bhūmi, apan tan alavas dene amitra, tur duruṅ vəruh yen duṣṭa, maṅkana rasa saṅ hyaṅ āgama.

§3 hana kavula vadon miṅgat sakiṅ gustine, iṅiṅgatakən deniṅ voṅ len, katəmu dene gustine, kaṅ aṅiṅgatakən kaḍəṇḍaha pataṅ lakṣa denira saṅ amava bhūmi. anadene hutaṅe voṅ vadon kaṅ iṅiṅgatakən ika, mulih anikəl saguṅiṅ hutaṅ mariṅ gustine voṅ vadon ika, tur palakonana pavadal-gave salavase miṅgat sakiṅ gustine, apan maliṅ araniṅ voṅ aṅiṅgatakən kavulaniṅ voṅ.

§4 hana kavulaniṅ voṅ den-kon ameta gave dene gustine, asiṅ sagavehane iṅupahan gavene deniṅ len, naṅkən olih upahan gustine amet, vəkasan mati kavula ika, pinaten deniṅ duṣṭa, yen duruṅ aveh upahan kaṅ aṅupah-upah, aveha upahan iṅ kaṅ aduve kavula, deniṅ patine kavulane, tan vənaṅ kaṅ aṅupah-upah, yan vicaranən.

§5 hana voṅ apəpəgatan alaki arabi, papat yaktiniṅ apəpəgatan, cihnane, sākṣi, aṅgəmpal pisis sadulur ujar iṅ laki, aveh bañu rahup, aveh vija bras, iku ta ləvih pinakacihna yaktiniṅ apəpəgatan, siddha atadin arane. yen nora hana yaktine papat iku, dudu tadin arane, duruṅ pəgat uga palaki-rabine, hana po voṅ vadon maṅkana, tan pacihna apəpəgatan, tumuli alaki riṅ len, kaṅ aṅalap, ḍəṇḍanən pataṅ lakṣa de saṅ amava bhūmi.

§6 hana voṅ aṅrusak titipan, yaktine, den-bhukti, den-aṅgo, den-salini rupa, tan pamit riṅ kaṅ adr̥ve titipan, ika ta vənaṅ aranana valat, tiṅkahe paḍa kalavan saṇḍa rinusak , saguṅiṅ paṅrəganiṅ titipan palakunən den-mulih anikəl, mariṅ kaṅ atitip, tur ḍəṇḍanən roṅ lakṣa denira saṅ amava bhūmi, kaliṅaniṅ aṅrusak titipan paḍa kalavan maliṅ.

§7 hana voṅ amateni kavulaniṅ voṅ tan padoṣa, vetniṅ sərəṅəne kaṅ amateni, kaṅ amateni amanahurana hutaṅe kaṅ den-pateni ika, mulih anikəl mariṅ kaṅ adr̥ve kavula, tur aveha paṅli- śava voluṅ untiṅ, ika kahilaṅane doṣane amateni. manih hana voṅ amateni voṅ tan padoṣa, dudu kavulaniṅ voṅ, savetniṅ sərəṅəne kaṅ amateni, yogya kaṅ amateni ḍəṇḍanən denira saṅ amava bhūmi, ḍəṇḍa pataṅ lakṣa, tur aveha paṅli- śava, mariṅ sanak-kadaṅ-varganiṅ mati, paṅli voluṅ tali.

§8 dr̥ve titipan , yen pinet denira saṅ amava bhūmi, yen coloṅən deniṅ maliṅ, yen bahakən deniṅ voṅ, yen katunona . yen keliya riṅ bañu, yen hilaṅa katahurag deniṅ guṅiṅ praṅ, tan vənaṅ ika palakunən dene kaṅ atitip, apan kapañcasadharana arane.

§9 riṅ voṅ ahutaṅ pari, yen tan amanahuri tumuli, yen livat sakiṅ limaṅ tahun, hiṅane anikəl piṅ lima, iku patəh-patəhe sakiṅ āgama.

§10 kavula vadon, yen miṅgat sakiṅ gustine, manih ana kavula lanaṅ miṅgat sakiṅ gustine, atəmu paḍa kavulaniṅ voṅ riṅ paṅiṅgatan, alaki-arabi paḍa miṅgat, alavas hana riṅ deśa len, akeh anake, hana lanaṅ hana vadon, vəkasan kaluruh dene gustine kaṅ adr̥ve kavula vadon, dene kaṅ adr̥ve kavula lanaṅ, anake dumən, mariṅ kaṅ adr̥ve kavula lanaṅ roṅ duman, mariṅ kaṅ adr̥ve kavula vadon saduman. yen mati kaṅ lanaṅ karuhun, kaṅ adr̥ve kavula vadon ameta pomah-omahe sasuhun, kavula vadon muliha mariṅ gustine manih. yen mati kaṅ vadon karuhun, kaṅ adr̥ve kavula lanaṅ ameta pomah-omahe sarəmbat, kavula lanaṅ muliha mariṅ gustine manih. sarəmbat sasuhun uga padumane, maṅkana ujariṅ saṅ hyaṅ śāstra.

§11 kavula vadon malər riṅ gustine, pinalaku deniṅ kavulaniṅ voṅ, yen palakunən deniṅ voṅ tan kakavula deniṅ voṅ, pinakarabine, vetiṅ harəpe riṅ kavula vadon ika, anutakən paṅavulaniṅ kavula vadon, sakehe anake, sadr̥vene, kaṅ adr̥ve kavula vadon uga viśeṣa, vənaṅ ameta .

§12 hana voṅ lanaṅ kavulaniṅ voṅ, arabi voṅ tan pahutaṅ, yen arabiha voṅ menak, huvus anak-anak ro, təlu, papat, lima. hanake, dr̥vene, kaṅ adr̥ve kavula lanaṅ viśeṣa, vənaṅ ameta, yen rabine voṅ menak, mon mati kavula lanaṅ ika, kaṅ vadon menak kadumana anake satuṅgal kevala, maṅkana dharmane sakiṅ āgama .

§13 riṅ voṅ atitip dr̥ve riṅ voṅ tan panak-anak, yen atitipa dr̥ve riṅ voṅ anəluh, duruṅ den-palaku titipane ika, kablət mati kaṅ den-titipi, nora kavaśa titipane ika yen den-palakuha, anumpak iṅ paṅ akiṅ araniṅ dr̥ve, yan maṅkana.

§14 riṅ voṅ atatavan lavan rarā, den-siṅidakən riṅ alas karakṣahane, yen katəmu deniṅ bapaniṅ rarā kaṅ anavanakən, yogya amatenana voṅ atuvane rarā ika, yen katəmu aroron-roron iṅ deśaha, yen iṅ rahinaha, yen iṅ vəṅiha, nora vənaṅ patenana deniṅ voṅ-atuvaniṅ rarā ika, kaṅ anavanakən ika, aṅiṅ dunuṅaniṅ atatavan ḍəṇḍanən roṅ lakṣa denira saṅ amava bhūmi.

§15 yen hana rare alit duruṅ bisa anambut gave aṅherṅher iṅ voṅ, ahutaṅ paṅan, bhaktadāsa arane, yen harəp luṅhāha sakiṅ gənahe aṅher, mahu bisa anambut gave luṅha karəpe, panahurane hutaṅ paṅan, voluṅ tali, riṅ kaṅ aṅiṅoni saṅkan alit ika, maṅkana śāsanane sakiṅ śāstra.

§16 yen hana voṅ añoloṅ parahuniṅ aparahu, dudu parahunira saṅ amava bhūmi, yen parahu sarūpane, kala rahina dene añoloṅ, ḍəṇḍanen salakṣa denira saṅ amava bhūmi, tur parahu kaṅ den-coloṅ ika muliha anikəl samulene rəgane.

§17 yen hana voṅ amalakekən rabiniṅ voṅ, aṅundaṅ-undaṅ iṅ tuṅgale sapakarāman, lavan kadaṅ-varganiṅ lanaṅ, kadaṅ-varganiṅ vadon, paḍa den-undaṅ, iku voṅ amaraṅ laraṅan arane, kaṅ amalakekən, ḍəṇḍa pataṅ lakṣa dene kaṅ adr̥ve rabi aṇḍəṇḍaha, kaṅ kinareh alaki-arabi, vənaṅ patenana karo ika, dene kaṅ adr̥ve rabi mula, yen amalaku iṅurip lanaṅe vadone, paḍa ka ḍəṇḍaha amataṅ lakṣa, manih undaṅ-undaṅane, sakehe kaṅ vəruh yen rabiniṅ voṅ kaṅ den-varaṅ ika, kaḍəṇḍaha roṅ lakṣa riṅ voṅ satuṅgal-satuṅgal, tan vəruh yen laraṅan kaṅ den-varaṅ ika, milu kondaṅ, ḍəṇḍa salakṣa riṅ voṅ satuṅgal-satuṅgal, voṅ kaṅ milu anambuṅ iṅ luṅguh, nora vəruh riṅ avadine kaḍəṇḍaha limaṅ tali riṅ voṅ satuṅgal-satuṅgal.

§18 hana ta voṅ-atuhaniṅ rarā, huvus anaṅgapi tukoniṅ aṅlalamar, samāpta payu, asaṅketa patəmune avavaraṅan, jajaka ika aṅanti sahujariṅ voṅ-atuhaniṅ rarā, təkan iṅ pasamaya, den-palakekən iṅ voṅ len, deniṅ bapaniṅ rarā, yen maṅkana, saguṅniṅ tukon, mulih anikəl, tur voṅ-atuhaniṅ rarā, kaḍəṇḍaha pataṅ lakṣa denira saṅ amava bhūmi.

§19 yen hana voṅ vadon elik iṅ lakine, vetniṅ tan parəpe, tukone mulihanikəl, amadal saṅgama arane.

§20 yen hana voṅ anunoni pari riṅ savahiṅ asavah , saguṅ-litiṅ pari mulihanikəl piṅlima mariṅ kaṅ adr̥ve pari, tur ḍəṇḍanən roṅ lakṣa denira saṅ amava bhūmi.

§21 riṅ aṣṭacorah maṅke varahakna , lakṣaṇa amamaliṅ, akon amamaliṅa , aveh paṅan iṅ maliṅ, aveh gənah iṅ maliṅ, samitra lavan maliṅ, atuduh saṅkaniṅ maliṅ oliha dalan, atuluṅ maliṅ, aniṅidakən maliṅ, iku aṣṭacorah arane. yogya ḍəṇḍanən denira saṅ amava bhūmi, yan hana maṅkanaha , hana po bapaniṅ maliṅ, ibuniṅ maliṅ, sānakiṅ maliṅ, kadaṅiṅ maliṅ , kabeh ika tan yogya ḍəṇḍanən denira saṅ amava bhūmi, yen tan milu amamaliṅ . riṅ voṅ lakṣaṇa lumaku maliṅ, akon amamaliṅa , aveh paṅan iṅ maliṅ, aveh gənah iṅ maliṅ, amitra maliṅ, anuduhakən saṅkaniṅ maliṅ vəruha, atuluṅ maliṅ, aniṅidakən maliṅ kavolu iku, yogya tibānana ḍəṇḍa denira saṅ amava bhūmi.

§22 riṅ voṅ lakṣaṇa maliṅ lavan akon amaliṅana, yen sacihna sayakti adoṣa pati iku karo denira saṅ amava bhūmi, anak-rabiniṅ maliṅ, lavan sadr̥veniṅ maliṅ, kapañjiṅ ginənahakən iṅ pavonira saṅ amava bhūmi, paknane dinol, vinevehakən denira saṅ amava bhūmi, kunəṅ anak-rabiniṅ akon amamaliṅa kari ḍəṇḍanən salakṣa denira saṅ amava bhūmi, yen paḍa akon amamaliṅa lavan anak rabine paḍa doṣanana pati denira saṅ amava bhūmi.

§23 riṅ voṅ aveh gənah iṅ maliṅ, lavan kaṅ aveh paṅan, yen sacihna sayakti, ḍəṇḍanən roṅ lakṣa denira saṅ amava bhūmi, den-anuṅgal-anuṅgal iṅ voṅ satuṅgal, anak-rabine tan ḍəṇḍanən ika. riṅ voṅ aniṅidakən maliṅ kalavan aṅrakṣa maliṅ, amuvus yen tan maliṅ, andohakən maliṅ, tur karuvan sacihna sayakti yen maliṅ, ḍəṇḍanən pataṅ lakṣa denira saṅ amava bhūmi. kaṅ aṅubuṅ iṅ maliṅ, vəruh yen hana maliṅ tur mənəṅ, apan pamitrane maliṅ ika, ḍəṇḍanən salakṣa denira saṅ amava bhūmi, doṣane vəruh yen maliṅ tur api tan vəruh tur pamalərana, māriya amitra maliṅ.

§24 kaṅ amamaliṅ yen kacaṇḍak patine anak-rabine, dr̥vene, ləmahe, petən denira saṅ amava bhūmi, yen hana kavulane lanaṅ vadon, tan petən denira saṅ amava bhūmi, luvarakəna sahutaṅe riṅ maliṅ ika.

§25 panəbusaniṅ maliṅ yen amalaku iṅurip, voluṅ tali riṅ voṅ satuṅgal-satuṅgal, maṅkana kaluvarane, ḍəṇḍa pataṅ lakṣa mariṅ saṅ amava bhūmi, paṅli-śava mariṅ kaṅ minaliṅan, saguṅiṅ dr̥ve iṅalap iṅ maliṅ mulih anikəl riṅ minaliṅan, maṅkana liṅiṅ āgama.

§26 yen hana deśa hana kampihan olih maliṅ, təṇḍasiṅ maliṅ, lavan pomah-omahe, anak -rabine aturakəna riṅ saṅ amava bhūmi, maṅkana yuktiniṅ laku, kunəṅ kadaṅ-varganiṅ maliṅ, yen tan milu amamaliṅ, tan yukti ika ḍəṇḍanən.

§27 voṅ aveh upakāra riṅ maliṅ, aveh mantraniṅ amamaliṅ, ya guruniṅ maliṅ arane, vulaṅun araniṅ voṅ maṅkana, ḍəṇḍanən nəm lakṣa de saṅ amava bhūmi.

§28 riṅ maliṅ yen sacihna sayakti, yen malayu, ruruhən patenana deniṅ voṅ rāma-deśa, yen rahinaha, yen vəṅiha, patenana uga, hana po mulat mənəṅ ikaṅ rāmadeśa tan harəp amatenana maliṅ, ḍəṇḍanən ikaṅ mulat mənəṅ pataṅ lakṣa denira saṅ amava bhūmi.

§29 riṅ voṅ amet upahan amateni voṅ tan padoṣa, mati kaṅ iṅupahakən deniṅ aṅalap upah, amalaku upahan, nora vinehan deniṅ aṅupahakən, dadi patukare aucapan, paḍa kasərəṅən kaṅ iṅupah lavan aṅupah, tan hana maṅgā salah saviji mənəṅa, aṅaṅgas tan vinehan ati arane, liṅ saṅ hyaṅ āgama, vəkasan kasapekṣan dene aṅalap upah dene aṅupahakən, apan aucapan baribin, karuhan yen amateni voṅ tan padoṣa iku paḍa corah arane ujariṅ śāstra, yen hana voṅ maṅkana, karo adoṣa pati denira saṅ amava bhūmi .

§30 riṅ voṅ ambək duṣṭa siṅ sahulahe hala, sagavene agave pāpa-pātakane avake, makādi maliṅ, luṅha sakiṅ gənahe, malayu saparane, ruruhən denira saṅ amava bhūmi, katəmu po ikaṅ voṅ maṅkana, patenana kayogyane denira saṅ amava bhūmi, sakehe kaṅ milu iṅ iya.

§31 riṅ voṅ ginənahan deniṅ duṣṭa, dahat arusuh makādi maliṅ, kayogyane patenana rumuhun kaṅ duṣṭa ḍahat arusuh ika , makādi maliṅ, kayogyaniṅ laku kaṅ gənahiṅ arusuh ika, sahanane dr̥vene rampasən ika denira saṅ harəp iṅ kr̥ta aṅrakṣa bhūminira .

§32 yen hana voṅ adoṣa riṅ sira saṅ amava bhūmi, hana ta voṅ tan paveh patihane kaṅ adoṣa riṅ sira ika, vet iṅ sihe riṅ iya, yen aguṅ pavehe sukha riṅ voṅ kaṅ adoṣa riṅ saṅ amava bhūmi ika, mundur saṅ rumakṣa amet ayuhaniṅ bhūminira den-avara, saṅkane vuruṅa mati voṅ kaṅ arusuh ika, yen hana voṅ maṅkana, yogya ilokna kapatihaniṅ arusuh, duṣṭa makādi maliṅ, ambahak, ambaranaṅ, ambegal, amlagandaṅ, aṅalap laraṅaniṅ alaraṅan, amateni voṅ tan padoṣa, aṅupasi, anəluh, ya iku sarvarusuh arane, yen sacihna sayakti, maṅkana liṅira saṅ paṇḍita saṅ pəgat iṅ aji kuṭāra mānava, saṅ vəruh riṅ hala-hayu, saṅ vəruh riṅ marganiṅ pāpa lavan marganiṅ anəmu svarga. yen hana voṅ aṅiloni arusuh, apihalaṅ aṅavara riṅ śabda kevala, ḍəṇḍan ika roṅ lakṣa denira saṅ amava bhūmi, kaṅ apihalaṅ śabda iku voṅ amaṅikətakən sukhaniṅ vaṅke arane.

§33 riṅ voṅ ahulah sāhasa ucapən maṅke. hana voṅ sāhasa, aklar dene kavānine, aṅadekən akeh vargane, aṅadekən dene sugih, saṅkane tan hana den-keriṅi, avuru dene kinavden iṅ sama-samane, aməraṅ pagəriṅ apagər, nora den-pet olihe aməraṅ pagər ika, yen maṅkana ḍəṇḍa limaṅ tali, den-pet pagər ika ḍəṇḍa salakṣa, bhaṅga tur anaṅtaṅ ḍəṇḍa roṅ lakṣa ḍəṇḍane katur iṅ saṅ amava bhūmi.

§34 voṅ anutuh iṅ kayu siluṅluṅ, sakiṅ tan vəruhe, nora den-pet, ḍəṇḍa roṅ tali, yen ora vəruh tur den-alap olihe anutuh ḍəṇḍa pataṅ tali; yen hana voṅ amaduṅ kayu siluṅluṅ, akāraṇa sakiṅ valat, samulene rəgane kayu siluṅluṅ den-ulihakəna anikəl piṅro, tur kaḍəṇḍaha roṅ lakṣa denira saṅ amava bhūmi, yen hana voṅ amaduṅ kayu-kayuniṅ len, akāraṇa sāhasa, ḍəṇḍa pataṅ tali.

§35 yen sāhasa amalat kbo-sa- piniṅ len, ḍəṇḍa roṅ lakṣa, sāhasa amalat voṅ iṅ len, ḍəṇḍa roṅ lakṣa, ḍəṇḍa kahatur iṅ saṅ amava bhūmi, ulih-ulihaniṅ kbo -sapi, salvire kaṅ den-valat, makādi yen voṅ, mulih anikəl piṅro mariṅ kaṅ adr̥ve.

§36 yen hana voṅ sāhasa riṅ dr̥veniṅ voṅ, tur akāraṇa kasr̥ṅən dene amalat, dr̥ve kaṅ den -sāhasa mulih anikəl piṅro, samuleniṅ vinalat, mariṅ kaṅ adr̥ve, kaṅ amalat ḍəṇḍa roṅ lakṣa katur iṅ saṅ amava bhūmi, doṣane kaṅ amalat lobha.

§37 voṅ amalat dr̥veniṅ len, sakalviraniṅ dr̥ve den-valatkara iṅ voṅ, akārana ambək tan sareh, pinəṅiṅ laṅgana, akas tan ahiḍəp ujar iṅ apamalər, yen hana voṅ maṅkana yogya patenana denira saṅ amava bhūmi, yen iṅ vəṅi kālane amet, yen harəp ahuripa dəṇḍa pataṅ lakṣa, kahatur iṅ saṅ amava bhūmi, deniṅ dr̥ve kaṅ den-valat mulih anikəl piṅro mariṅ kaṅ adr̥ve kaṅ den-sāhasa.

§38 yen hanā voṅ sāhasa aṅrusak āvaraṇa, babataniṅ umahiṅ voṅ, aṅrusak lavaṅ, ḍəṇḍa limaṅ tali denira saṅ amava bhūmi, tur kaṅ den-rusak, muliha sampurṇa den-kaya duk iṅ kuna.

§39 voṅ amraṅ āvaraṇa sakiṅ sr̥ṅəne, tur anaṅtaṅ, yen rahina kāla, ḍəṇḍa pataṅ lakṣa, yen vəṅi kālane, doṣapati denira saṅ amava bhūmi paḍakna lavan maliṅ ika, maṅkana riṅ amraṅ lavaṅiṅ len sakiṅ sr̥ṅəne, tur anaṅtaṅ, yen rahina ḍəṇḍa pataṅ lakṣa, yen vəṅi kāla, patenana denira saṅ amava bhūmi, maliṅ ika, liṅniṅ āgama.

§40 hana ta voṅ amraṅ kayu- kayuniṅ len nora amit iṅ kaṅ adr̥ve kayu, daṇḍa pataṅ tali denira saṅ amava bhūmi; yen vəṅi kāla, pati doṣane denira saṅ amava bhūmi, kayu kaṅ den-praṅ mulih anikəl samūlene.

§41 riṅ ḍəṇḍaniṅ voṅ anāhasa- valat iṅ dr̥veniṅ adr̥ve ika gavenira saṅ amava bhūmi, sasḍəṅ iṅ ḍəṇḍa anuta guṅ-litiṅ doṣa, aguṅ doṣa aguṅ ḍəṇḍa, alit doṣa alit ḍəṇḍa, donira saṅ amava bhūmi aṅənakən ḍəṇḍa, patəhaniṅ buddhiniṅ voṅ, hayo hana analasar iṅ ambək, hayo lumaku amuraṅ-muraṅ dalan, anuta sapatəh-patəh saṅ prabhu riṅ kr̥ta-rahayuhaniṅ bhūmi, apan iṅ ambək rahayu atmahan rahayu, amava mariṅ svarga phalane, maṅkana riṅ ulah hala atəmah hala amava mariṅ pātaka pinakaphalane.

§42 patuṅgal-tuṅgalaniṅ ḍəṇḍa aguṅ alit iki, kaṅ sakiṅ āgama viniji-viji, samas, ḍomas, roṅ tali, pataṅ tali, salakṣa, roṅ lakṣa, pataṅ lakṣa, sakəṭi nəm lakṣa, denprayatna ta denira saṅ amava bhūmi amaruṅgoken ḍəṇḍa guṅ litiṅ ḍəṇḍa, hayo salah-paruṅgu, hayo andoṣani voṅ tan padoṣa, hayo tan panḍəṇḍa riṅ voṅ sudoṣa, hayo haṅənəṅakən iṅ ahulah-salah, maṅkana dharmanira saṅ amava bhūmi, yan harəp rahayuhaniṅ bhūminira.

§43 yen hana voṅ sapakṣa ambəciki pomahan, kubon, taman, kakalen, savah, talāga, bəbəṅan, sivakan, sakalviraniṅ kaṅ den-bəciki tur dudu dr̥vene, dudu pakone kaṅ adr̥ve, yen hana voṅ maṅkana, tan vehana lābha kaṅ ambəciki ika dene kaṅ adr̥ve, den-bhukti po olihe ambəciki ika, palakunen ika dene kaṅ adr̥ve, aja kaparihnəṅ, tur kaḍəṇḍaha roṅ lakṣa denira saṅ amava bhūmi.

§44 voṅ amit ahulah savah, vəkasan tan iṅulah hnəṅ ikaṅ savah, tagihən bhukti, amumuluhi adəg iṅ bhukti pari saguṅiṅ olihiṅ savah, ḍəṇḍa paḍa lavan loṅloṅiṅ bhukti denira saṅ amava bhūmi.

§45 riṅ voṅ añoloṅ sarvavija bubuṅkilan, sarvaphala, yen vəṅi kālane, doṣa pati de saṅ prabhu. yen rahina kālane, tikəlakəna piṅtlu.

§46 riṅ voṅ aṇḍampul rahina, ḍəṇḍa tikəlakəna piṅtlu saholihe aṇḍampul.

§47 riṅ añoloṅ sajəṅ riṅ tuyuhan, riṅ kumbha, siṅ savaḍahane, ḍəṇḍa pataṅ tali, tur ikaṅ sajəṅ mulih anikəl piṅro.

§48 riṅ voṅ anavu sivakan riṅ vəṅi doṣa pati de saṅ amava bhūmi, hayo hinurip.

§49 voṅ añoloṅ ayam, sr̥gala, celeṅ, yen rahina, ḍəṇḍa pataṅ tali, kaṅ den-coloṅ mulih anikəl piṅro, yen vəṅi kālane añoloṅ, doṣa pati de saṅ prabhu.

§50 riṅ voṅ añoloṅ ayam iṅ kuruṅan, riṅ caṅcaṅan, ḍəṇḍa roṅ lakṣa denira saṅ amava bhūmi.

§51 yen hana voṅ añoloṅ mahāpaśu arane kbo sapi, ḍəṇḍa roṅ lakṣa de saṅ amava bhūmi. yen añoloṅ madhyapaśu arane vəḍus, bañak, bebek, ḍəṇḍa salakṣa, yen añoloṅ kṣudrapaśu arane celeṅ, camra, ayam sa-iṅon-iṅonaniṅ voṅ tani, ḍəṇḍaniṅ añoloṅ limaṅ tali, ḍəṇḍa kahatur riṅ saṅ amava bhūmi, ulih-ulihan sakehe kaṅ den-coloṅ mulih-anikəl piṅro, yen den-coloṅ vəṅi doṣa pati de saṅ amava bhūmi .

§52 voṅ añoloṅ dr̥ve, tan katon dene ambhukti, təgəse, aṅləpit savah, sakalviraniṅ bhukti, den-ləpit, aṅlali-lali gagaḍuhan, salviriṅ gagaḍuhan, vəkasan karuruh kasapekṣan deniṅ voṅ akeh, maliṅ riṅ voṅ moṅkono arane, patenana denira saṅ amava bhūmi. maṅkana ujariṅ śāstra.

§53 hana dr̥ve -niṅ voṅ cinoloṅ deniṅ maliṅ, cidraniṅ maliṅ, den-gənahakən iṅ umahiṅ voṅ len deniṅ maliṅ, kālaniṅ vəṅi, nora vəruh kaṅ adr̥ve umah yen tinibān-tibān, yen tan pavaraha riṅ rāmadeśa, riṅ tataṅga, tan pasaduva, tan amivruhakna riṅ voṅ akeh, sarūpa-varṇane kaṅ cinoloṅ iṅ maliṅ ika, doṣa sadoṣaniṅ katibān vulu-vulu, kaṅ tinibān-tibān, kabəcikane aprasaduva, aveha pivruh iṅ akeh, yen tan aveh pivruh ḍəṇḍa roṅ lakṣa kahatur iṅ saṅ amava bhūmi, tan vənaṅ yen patenana, apan tan maliṅ arane.

§54 hana voṅ atitip, yen asasaṇḍaha, hana manih voṅ len atitip, yen asasaṇḍaha kunəṅ, paḍa ta rupane titipan ika, tuṅgal varṇane, korup iṅ pasaṇḍan, riṅ patitipan, tan ḍəṇḍanən ika denira saṅ amava bhūmi, yen tan amakṣakən aṅalap tur muliha dr̥vene mula ika kaṅ korup.

§55 voṅ aṅalap dr̥ve, tuṅgal sagənah lavan dr̥veniṅ voṅ len, tan abənər dene aṅulihakən, kaṅ gənahe ika, huvus vəruh, yen dudu dr̥vene, den-taṅgapi uga, apan ləvih rūpa ləvih varṇa dr̥veniṅ len ika, dene arəpe, tumon iṅ abəcik təka den-alap, riṅ voṅ maṅkana ḍəṇḍanən roṅ lakṣa de saṅ amava bhūmi, tur ikaṅ ikaṅ dr̥ve mulih anikəl piṅro.

§56 kavulanira saṅ ratu, mantri ya, yen ulahniṅ duṣṭa. den-lakokən makādi ulahe ātatāyi muvah aṅulahakən corah, aṅiloni maliṅ gavene, yen hana kavulaniṅ ratu maṅkana, yen hana kavulaniṅ mantri maṅkana, yen pinaten deniṅ voṅ, tan vənaṅ yen vicaranən kapatine, apan doṣaniṅ duṣṭa, doṣaniṅ ātatāyi, doṣaniṅ maliṅ, katəlu iku, doṣa pati, āgamane denira saṅ amava bhūmi.

§57 yen hana voṅ apasilih sañjata riṅ voṅ duṣṭa, siṅ amateni voṅ olihe, savarṇaniṅ lalaṇḍəp, tumuli gənahe amateni voṅ, mati voṅ kaṅ den-pateni ika, yen atatuva kasakitan deniṅ duṣṭa, kaṅ apasəlaṅ sañjata riṅ duṣṭa ika, ḍəṇḍanən roṅ lakṣa denira saṅ amava bhūmi.

§58 riṅ voṅ arorovaṅ duṣṭa, vəruh yen duṣṭa tur den-voṅi, kavr̥tta riṅ deśa paradeśa, kaṅ arorovaṅ duṣṭa, ḍəṇḍanən pataṅ lakṣa denira saṅ amava bhūmi, yen tan vəruh yen duṣṭa, tan ḍəṇḍanən ika de saṅ prabhu.

§59 riṅ voṅ anuduk, anumbak, anulup, sakalviriṅ sañjata, aṅənani avak iṅ para, yen iṅ gigir taṅan, suku ḍəṇḍa salakṣa, yen madhya tatune yen anuduk gulu śirah ḍəṇḍa roṅ lakṣa, yen uttama tatune iku, ḍəṇḍa mariṅ saṅ amava bhūmi.

§60 riṅ voṅ anuduk amukul iṅ kayu, aṅgitik iṅ vatu, ḍəṇḍa limaṅ tali denira saṅ amava bhūmi iku yen tan patiha lara-tatune, yen amrəp, aṅgocoh riṅ taṅan, ḍəṇḍa satak, yen paḍa rorovaṅe sabran dina aməṅ-aməṅ.

§61 riṅ voṅ vadon amukul anuduk iṅ kayu riṅ marune, aṅgitik iṅ vatu, ambaṇḍəm, tan pakārana, yen kaṅ den-gitik den-baṇḍəm uttama tatune, tikəl, muñcar, kaṅ aṅgitik, yen ambaṇḍəma, ḍəṇḍa roṅ lakṣa denira saṅ amava bhūmi. yen mati kaṅ den-gitik ika, patenana kaṅ aṅgitik denira saṅ amava bhūmi. voṅ vadon anuduk iṅ marune riṅ kris, pəḍaṅ, tumbak, salviriṅ lalaṇḍəp den-sudukakən, uttama tatune kaṅ den-suduk, doṣa pati kaṅ anuduk denira saṅ amava bhūmi, maṅkana ujariṅ śāsananira bhagavān bhr̥gu.

§62 riṅ voṅ sāhasa amraṅ anuduk, yen kataton kaṅ den-suduk den-praṅ, aveha patiba jampi, riṅ kaṅ sinuduk ika sasḍəṅe pavehe ahiṅana savarase tatune, tur kaḍəṇḍaha roṅ lakṣa denira saṅ amava bhūmi, kabeh sahanane, kaṅ aṅrovaṅi aṅadokən iṅ anuduk, ḍəṇḍa kahatur iṅ saṅ amava bhūmi.

§63 rare duruṅ vəruh riṅ halahayu, yen kuraṅ sakiṅ sapuluh tahun vayahe, yen hana ulahe dudu, tan yogya ḍəṇḍanən denira saṅ amava bhumi, mvaṅ saṅ amava deśa.

§64 riṅ voṅ kapraṅ, tan minaha dene pinraṅ, sakiṅ tan vəruhe kaṅ aməraṅ halahipene kaṅ kapəraṅ, yen ora atatu, yen ora alara, tan kaḍəṇḍaha kaṅ aməraṅ, atatu po kaṅ kapəraṅ, kaṅ aməraṅ aveha patuku tamba saukure varasiṅ tatu, tur kaṅ aməraṅ kaḍəṇḍaha limaṅ atus denira saṅ amava bhūmi.

§65 riṅ voṅ abuburu riṅ laraṅan, yen olih, ḍəṇḍa voluṅ tali riṅ voṅ satuṅgal-satuṅgal, vivijinən denira saṅ amava bhūmi, tur ikaṅ buron tikəlakəna mulih roro riṅ satuṅgal-satuṅgal. yen tan polih ḍəṇḍā pataṅ tali riṅ voṅ satuṅgal-satuṅgal. maṅkana śāsananiṅ abuburu riṅ laraṅaniṅ alaraṅan, ujar bhagavān bhr̥gu.

§66 vaṅke ginənah deniṅ duṣṭa amateni voṅ, riṅ deśaniṅ adeśa, kālaniṅ vəṅi, nora vəruh kaṅ adr̥ve ləmah ḍəṇḍan ikaṅ adr̥ve ləmah, yen mulat mənəṅ dene kasalahan vaṅke yen kavəṅen ikaṅ vaṅke ḍəṇḍane roṅ lakṣa denira saṅ amava bhūmi, sapakaramane milu kaḍəṇḍa, arane katəmu vaṅke kabunan. kunəṅ yen tuhu tan vəruh riṅ kaṅ amateni tur asadu riṅ deśa pakaraman, riṅ tataṅga deśa təpi siriṅ, makādi asadu riṅ pamañcan, tan ahələt vəṅi, tan doṣanana denira saṅ amava bhūmi. yen ahələtan vəṅi pasadune, doṣa, maṅkana dharmane. yadyastun aprasaduva, yen hana vruh jəjəpe, yen paṅavak deśa amateni voṅ mati ika, doṣa ikaṅ deśa denira saṅ amava bhūmi.

§67 riṅ śava yen kanin deniṅ sañjata tampake, haneṅ alas, riṅ śavah, riṅ kubon, riṅ təgal, riṅ marga sənət, riṅ marga guṅ, riṅ luvaṅ, riṅ bəbəṅan, riṅ piṅgiriṅ loh, makādi riṅ bañjar yen kasapekṣana kaṅ amateni, yen tan kasapekṣanana, haṅiṅ aprasaduha uga voṅ deśa. vruh riṅ kaṅ amateni, nora aṅarani akārana aṅubuṅi duṣṭa, ḍəṇḍa pataṅ lakṣa. mulat mənəṅ tumon iṅ vaṅke, tan aprasaduha riṅ kaṅ yogya sadonana, ḍəṇḍa roṅ lakṣa, doṣaniṅ mulat mənəṅ trapakəna denira saṅ amava bhumi

§68 riṅ voṅ paḍa səṅite, paḍa galake, paḍa vanine, paḍa laṇḍəpe krise tumbake, atukar, paḍa panuḍuke, yen mati salaḥ tuṅgal, kaṅ kari ahurip, tan ḍəṇḍanən ikaṅ kari denira saṅ amava bhumi, krodha-virodha arane liṅniṅ āgama. yen hana voṅ anapih voṅ atukar paḍa vānine kasuduk deniṅ krisiṅ atukar, yen katumbaka, siṅ sañjata oliha riṅ ananapih, tan ucapən ika denira saṅ amava bhūmi, apan amukti duhkaniṅ ananapih arane.

§69 riṅ voṅ atukar, tan aṅavaśakən patukare, kasoran dene lāvane riṅ vəkasan, malayu aṅuṅsi umah, den-tut dene lāvane atukar, mati kaṅ malayu ika, yen kaṅ anut amburu matiha, salahtuṅgala mati, tan vicaranən kaṅ amateni.

§70 riṅ voṅ atukar arukət, paḍa vānine, malayu salah tuṅgal anut təka riṅ umahe , mati salah tuṅgal, tan səṅgunən aṅamuk ikaṅ amateni, atukar uga arane.

§71 riṅ atukar kalaniṅ vəṅi, amateni pinaten, sḍəṅe atukar iṅ vəṅi ika, amateni śatru arane, kaliṅaniṅ atukar vəṅi, yen huvus sapih, tan yogya amalenana patukare manih tka riṅ rahina, apan yen ambakalana atukar manih riṅ rahina, tan pakāraṇa manih, tur amateni, paḍakəna lavan aṅamuk, yogya patihane kaṅ anutugakən tukar ika denira saṅ amava bhūmi, kaliṅane riṅ atukar yen huvus sapih kambəṅan deniṅ rahina, kambəṅan deniṅ vəṅi, tan kavaśa yen ambakalana patukare manih, maṅkana śabdaniṅ āgama.

§72 tiṅkahiṅ apihutaṅ ucapən iṅsun maṅke, śāsaṇane, hayo təka apihutaṅ, adusākaramasa rumuhun, ararahupa, aradina śarīra reh iṅ apihutaṅ, vus iṅ abəbrəsih, amətonana riṅ amalaku ahutaṅa, paṅgavakəna mas, pisis, salaka, sakarəpe kaṅ ahutaṅ vehakna, kālaniṅ apihutaṅ hayo salah dina, riṅ soma, riṅ vr̥haspati, tur den prayatna deniṅ apihutaṅ tulisakəna araniṅ ahutaṅ, təkan iṅ deśane, bañjare, tulisən riṅ harəp iṅ ahutaṅ, lāvan guṅe hutaṅe, tulisakəna tahune, māsa tithine, taṅgal paṅloṅe, saptavārane, pañcavārane, ṣaḍvārane, lāvan vukune, makādi guṅe hutaṅe, təkaniṅ putrane, den saha sākṣi, pinakādi cirine kaṅ ahutaṅ, lekhya arane riṅ ciri, iku surat pavitan arane.

§73 riṅ ahutaṅ aveh putra kalāntara, naṅkən tahun, riṅ apihutaṅ, vəkasan ora aveh kalāntara putra, kaṅ ahutaṅ ika, tagihən anikəl piṅro uga panahurane.

§74 riṅ apihutaṅ norana surat pihutaṅ, tan hana sākṣi, tan hana bhukti kalāntara sabran vulan, sabran tahun, hilaṅ ikaṅ pihutaṅ yen maṅkana. riṅ apihutaṅ aṅgəgəmana yaktiniṅ apihutaṅ tətəlu. paran ta yaktine? sakiṅ sākṣi yaktiniṅ apihutaṅ, sakiṅ tulis yaktiniṅ apihutaṅ sakiṅ bhukti putra kalāntara yaktiniṅ apihutaṅ. sākṣi alah deniṅ pasusuratan, pasusuratan alaḥ deniṅ bhukti, patəṅərane yen ahutaṅ, yakti tətəlu iku uga gəgəmana deniṅ apihutaṅ, yen tan hana yakti tətəlu iku, liñok araniṅ apihutaṅ maṅkana, apan yakti tətəlu iku vənaṅ panagihakəna deniṅ apihutaṅ tumus iṅ anak putu, pihutaṅ tuhu yen hana pramāṇa traya arane iku.

§75 riṅ voṅ apihutaṅ aṅləvihi panagihe putra paṅalāntara, kaduk pamete putra, duruṅ təkan iṅ pasaṅketa tumuli anagih, lobha araniṅ apihutaṅ maṅkana. riṅ voṅ apihutaṅ tan panut saujariṅ āgama, tan sareh panagihe, tan sareh dene amumutrakən, atmahan kavlas-asih, yen tan panut dharmaniṅ apihutaṅ, tan vuruṅ anəmu upadravaniṅ hyaṅ, kaliṅane sagavehane den-anut dalan guṅ-aguṅ.

§76 tiṅkahiṅ voṅ aṅalap dr̥veniṅ voṅ, sakiṅ tan yukti pamete, iṅətakəna riṅ sajəroniṅ nəm vulan, hilaṅ ikaṅ dr̥ve pinet iṅ tan yukti, manih yen tan hilaṅ iṅ nəm vulan, iṅətakəna, vkase riṅ nəm tahun hilaṅ təkan iṅ pavitane kaṅ aṅalap iṅ tan yukti. kaliṅane haja amet pisis, akāraṇa sakiṅ tan yukti, ila-ila tmən sakiṅ ujar iṅ śāstra.

§77 yen hana voṅ apəpəgatan alaki arabi, yen salah-tuṅgal mati kaṅ apəpəgatan ika, anake amanahurana hutaṅe kaṅ apəpəgatan ika, kaṅ apihutaṅ haja mənəṅ, pəgatane hutaṅe kaṅ mati ika, iku dharmane.

§78 yen hana voṅ pgat anak-anak, vet iṅ bapa-ibune tan parəp anak-anak iṅ iya, tan panut iṅ ambək ahayu anake ika, aveha yakti riṅ rāma-deśa, riṅ bañjar, aveha vijā manih aveha bañu dus lāvan isuh-isuh, təpuṅ tavar, saha sākṣi, den sacihna sayakti pəgat, mariṅ anak-anak iṅ iya, ikaṅ anak ika, yan huvus maṅkana, tan paṅalap dr̥veniṅ bapa-ibu, tan tagihən hutaṅiṅ bapa-ibu deniṅ apihutaṅ.

§79 riṅ hutaṅ tan tumus təka riṅ anak, hutaṅ totovan, hutaṅ iṅ anavuṅ, hutaṅ sajəṅ, hutaṅ paṅan riṅ paṅululuṅan, hutaṅ ḍəṇḍa, hutaṅ śeṣaniṅ tukon, mati kaṅ ahutaṅ, tan yogya katagih anake deniṅ apihutaṅ duk hana kaṅ ahutaṅ uga palakunən den-pgat.

§80 riṅ hutaṅ tumus mariṅ anak, hutaṅ puputran, hutaṅ seseban, hutaṅ mañjiṅ anuṅgu, hutaṅ gənah iṅ aṅəntasakən voṅ atuva, hutaṅ deniṅ andharma voṅ atuva, kabeh ika kapanahurana deniṅ anak, tan kavaśa yen tan sahurən iṅ anak-putu, kramane.

§81 riṅ voṅ huvus amanahuri hutaṅ, səbitən ikaṅ pasusuratan, riṅ arəp iṅ ahutaṅ, dene kaṅ apihutaṅ, makādi yen hana sākṣi, kahuvusan iṅ hutaṅ phalane.

§82 riṅ voṅ apihutaṅ, yen atəguh sareh iṅ dharmaniṅ apihutaṅ, agave vr̥ddhiniṅ mas, pirak, ujariṅ aji, iku lābhane.

§83 riṅ anahur hutaṅ nora den-səbit pasusuratane riṅ arəp iṅ ahutaṅ, dene kaṅ apihutaṅ, sahuvuse anahur, yen hana maṅkana, saguṅe panahure kaṅ ahutaṅ ika, saṅ viśeṣa riṅ bhūmi, vənaṅ ameta pihutaṅe voṅ ika, tur ḍahutən pasusuratane riṅ kaṅ apihutaṅ, vehakəna riṅ kaṅ ahutaṅ de saṅ amava bhumi, doṣane tan ahiḍəp iṅ dharmaśāsananiṅ apihutaṅ.

§84 riṅ voṅ apihutaṅ aṅalap iṅ dr̥veniṅ ahutaṅ, yen paḍa guṅiṅ pihutaṅ lāvan guṅe, kaṅ den-alap, huvus pgat iṅ pihutaṅ yen maṅkana, pasusuratane ulihakəna mariṅ kaṅ ahutaṅ, maṅkana lakṣananiṅ apihutaṅ. yen aguṅ dr̥veniṅ ahutaṅ den-alap deniṅ apihutaṅ, amalekna saləvihe sakiṅ pihutaṅe ika, yen kaṅ ahutaṅ amalakuha sakiṅ paṅaləvihe hutaṅe ika riṅ apihutaṅ, tan paveh po sapaṅləvih iṅ hutaṅ, kaṅ apihutaṅ ḍəṇḍanən roṅ lakṣa denira saṅ viśeṣa riṅ bhumi, tur ḍahutən saguṅ iṅ dr̥ve kaṅ den-alap ika, ulihakəna riṅ kaṅ ahutaṅ sapaṅləvihiṅ dr̥ve, sabənəriṅ hutaṅ alapən denira saṅ adr̥ve bhumi, lāvan pasusuratane ulihakəna mariṅ kaṅ ahutaṅ, pgat tan pahutaṅ arane ika, apan huvus iṅalap denira saṅ amava bhumi.

§85 riṅ anak-rabiniṅ ahutaṅ, yen rovaṅe lanaṅ, vadon, salah-tuṅgal kahaṇḍəga deniṅ apihutaṅ, yen dudu trape paṅaṇḍəge, akāraṇa valat, riṅ hutaṅ maṅkana pgat tan panahurana deniṅ ahutaṅ. tur kaṅ iṅaṇḍəg muliha, tan aveha panahur hutaṅ.

§86 riṅ voṅ aṅaṅasi hutaṅ, tagihən anikəl piṅro, hana manih kaṅ sakiṅ āgama vaneh, yen satus vit dadi pataṅ atus, yen sevu vit dadi pataṅ tali, sakehane maṅkana uga, kaliṅane saṅkane tinagih anikəl piṅpat, pinakaḍəṇḍane duk tinikəlakən piṅpat iku. hana manih voṅ ananagih tan papihutaṅ, tikəlakəna piṅro sapanagihe, sahuvuse kalah ahucapan, tur ḍəṇḍanən den kaya kaṅ aṅaṅasi hutaṅ ika, yen satus panagihe, dadi pataṅ atus, yen sevu panagihe dadi pataṅ tali, saguṅe panagihe valikakəna piṅpat denira saṅ amava bhumi, ḍəṇḍaniṅ anagih tan papihutaṅ maṅkana.

§87 riṅ voṅ ahutaṅ kbo sapi, vəvənaṅ, anahura anikəl piṅro kaṅ ahutaṅ yen təluṅ tahun lavase, yen ahutaṅ kbo sapi huvus iṅajen samulene rəgane, hana riṅ pasusuratan paṅrəgane patik-vənaṅ iṅutaṅ ika, paḍa kalāvan ahutaṅ pisis, manahurana anikəl piṅro saguṅiṅ paṅrəgane, yen təka riṅ pataṅ tahun.

§88 voṅ aṅandəlakən tan palayuhaniṅ ahutaṅ, tur malayu kaṅ ahutaṅ, yen matiha kunəṅ, amanahurana sakavit kaṅ aṅandəlakən, tan katagiha anikəl deniṅ apihutaṅ, yen mati kaṅ aṅandəlakən, tan tumusa mariṅ anak-putuniṅ aṅandəlakən, yen aṅandəlakən katəmuhaniṅ pisis, mati kaṅ ahutaṅ, yen malayuha, kaṅ aṅandəlakən anahura saguṅiṅ hutaṅ, tkan iṅ putra paṅalāntara, yen alavas tan panahur, tikəlakəna piṅro saguṅiṅ hutaṅ, tur tumusa riṅ anakiṅ aṅandəlakən ikaṅ hutaṅ.

§89 riṅ kavulaniṅ voṅ yen lanaṅ, yen vadon, kinon anarimaha pisis, olihiṅ ahutaṅ, deniṅ gustine, dudu yen aranana aṅandəlakən ika, tan katagiha riṅ kavula lanaṅ vadon anarima pisis ika, yen vadvaha kunəṅ, apan kevala kinonkon jati kavula, mula konkonan gavene.

§90 riṅ voṅ ahutaṅ pari, yen ora kapanahuran tumuli, tikəlakəna piṅlima gumuluṅa naṅkən tahun, hiṅane mariṅ anikəl limaṅ tahun.

§91 voṅ asaṇḍa vənaṅ-vənaṅ kbo sapi, amətəṅ riṅ pasaṇḍan, anakiṅ kbo sapi, kahalapa dene kaṅ asasaṇḍa, nora vənaṅ kaṅ isiniṅ sasaṇḍan alapən deniṅ anaṇḍa, apan anakiṅ sasaṇḍan tan petən deniṅ anaṇḍa, kevala pagave uga pakolih iṅ voṅ anaṇḍa, maṅkana pagehiṅ saṇḍaniṅ āgama riṅ rat kabeh, tutən deniṅ loka.

§92 riṅ voṅ atitip vəvənaṅ, kbo sapi ādine, lāvan salviriṅ dr̥ve, mas ratna ādine, manih yen sasaṇḍan, hilaṅ po deniṅ tinitipan, yen hilaṅ deniṅ anaṇḍa, tan milu dr̥veniṅ anaṇḍa hilaṅ, kevala kaṅ titipan lāvan sasaṇḍan hilaṅ, yen maṅkana kaṅ titipan lāvan sasaṇḍan, həlenana deniṅ tinitipan lāvan deniṅ anaṇḍa, samuleniṅ dr̥ve hilaṅ ika.

§93 hana ta titipan lāvan sasaṇḍan, yen iṅalap denira saṅ ratu, saṅ viśeṣa amava bhūmi deśa, cinoloṅ deniṅ maliṅ, manih yen katunon , keli riṅ bañu, kabaranaṅ deniṅ corah lāvan duṣṭa, yen maṅkana ta nora yogya həlenana kaṅ titipan lāvan sasaṇḍan.

§94 hana ta voṅ aṇḍahut saṇḍa, tan panahur putra kalāntara, tan anavur pavitaniṅ panaṇḍa, kevala harəp tan panəbus sasaṇḍan, iku ta doṣane, vit pisis mulih anikəl mariṅ kaṅ anaṇḍa, manih rəganana ikaṅ saṇḍa, samuleniṅ saṇḍa, lāvan ituṅən guṅiṅ putra kalāntara, iku ta saguṅiṅ pisis huvus iṅituṅ kehe kabeh, pinakaḍəṇḍāniṅ amalat saṇḍa denira saṅ amava bhūmi, maṅkana riṅ voṅ ananaṇḍa huvus tinəbus, nora aṅudalakən sasaṇḍan, samulene kaṅ sinaṇḍākən ika dəṇḍāne denira saṅ amava bhumi, lāvan saguṅiṅ putra kalāntara mariṅ ḍəṇḍa , saṇḍa mulih anikəl sarəgane mariṅ kaṅ asasaṇḍa, kaliṅane paḍa doṣaniṅ aṇḍahut saṇḍa tan arəp anahura hutaṅ, lāvan voṅ anaṇḍa huvus animbali pisis saguṅiṅ hutaṅ tkaniṅ putra kalāntara, tur nora aṅudalakən saṇḍa, karo iku adoṣa denira saṅ amava bhumi.

§95 hana po tiṅkahiṅ titipan, yen sasaṇḍan kunəṅ, maləra uga riṅ gənahe, den-abəcik deniṅ asimpən, den-prayatna kaṅ anaṇḍa, nora dadi vicara vkase, pradenipun, yan kadeśabhaṅgabhaya riṅ sasaṇḍan hilaṅ, kadeśabhaṅgabhaya arane, rusakiṅ deśa deniṅ papəraṅira saṅ ratu paḍa ratu.

§96 tiṅkahiṅ adol atuku ucapən maṅke, riṅ voṅ atuku dr̥veniṅ voṅ, yen kəbo-sapi, salviriṅ vənaṅ-vənaṅ, huvus den-pisisi deniṅ atuku, duruṅ den-alap, lagi malər iṅ kaṅ adol, nora den-pet tumuli dene kaṅ atuku, vəkasan mati kaṅ vənaṅ-vənaṅ, yen hilaṅa kunəṅ, tan yogya palakunən ikaṅ pisis patuku ika, deniṅ atuku. kapaten tukon arane ujariṅ aji, yen den-alap sakiṅ prakaśa valat ikaṅ patuku deniṅ atuku, yen ahucapan, kalahakəna kaṅ atuku, pisis den-ulihakəna anikəl mariṅ kaṅ adol.

§97 riṅ dr̥ve huvus dinol, malər hana riṅ adol kaṅ tinuku ika, lagi duruṅ katimbalan deniṅ atuku, vəkasan cinoloṅ deniṅ maliṅ, iṅalap deniṅ ratu kaṅ dinol ika, ika tatan palakunən deniṅ atuku riṅ kaṅ adol, bənəre paḍa kelaṅan, muliha satəṅah pisis iṅ atuku, yen tan ahiḍəp karo, kaṅ atuku kalāvan kaṅ adol, paḍa laṅgana riṅ śāsana, yen salah saviji rika tan ahiḍəp, ḍəṇḍanən siṅ tan ahiḍəp iṅ agama, yen karo tan ahiḍəp, ḍəṇḍanən karo, doṣa roṅ lakṣa denira saṅ amava bhumi, tur alapən pisise patuku ika.

§98 riṅ voṅ asaṇḍa vəvənaṅ, makādi ajaran, sakehiṅ asuku papat, lāvan asuku roro makādi bañak, yen lagi anom, duruṅ hana gavene, yen maṅkana kaṅ anaṇḍakən aveha kalāntara saputraniṅ pisis, kunəṅ yen asaṇḍa kavula lanaṅ vadon, duruṅ bisa nambut gave, kaṅ anaṇḍakən aveha paṅan sapaha riṅ satahun, knana leler arane, iya iku saṇḍa tinitipakən.

§99 riṅ voṅ anaṇḍakən paṅaṅgo, vastra ləvih, yen livat sakiṅ limaṅ tahun , lələb, tan palakunən deniṅ anaṇḍakən.

§100 yen voṅ anaṇḍakən bhūmine, salavasane tan lələb, apan dr̥ve saṅ prabhu ləmah ika, maləra uga riṅ kaṅ anaṇḍa.

§101 riṅ voṅ anaṇḍakən kavula lanaṅ vadon, yen livat sakiṅ sadaśa tahun lavase, lələb, paḍakna lavan dinol ika, yen harəp anəbusa kaṅ asasaṇḍa, vənaṅ tan vehakəna deniṅ anaṇḍa, yen miṅgata manih kaṅ sinaṇḍakən ika, sahuvuse lələb, matiha kunəṅ, nora yogya tagihən kaṅ asasaṇḍa.

§102 riṅ voṅ aṅaṅgo dr̥ve titipan, yen tan amit riṅ kaṅ atitip, titipan ika mulih anikəl piṅro tur kaḍəṇḍaha roṅ lakṣa denira saṅ amava bhūmi, yen huvus amit, tan doṣanana, kevala muliha ikaṅ patuvava mariṅ atitip .

§103 riṅ voṅ amalaku aṅrakṣa dr̥veniṅ voṅ, yen vəvənaṅa, hilaṅ po dene aṅrakṣa dr̥ve, yen matiha kunəṅ, aṅəlenana kaṅ amalaku aṅrakṣa ika, samuleniṅ dr̥ve hilaṅ ika, bhaṅga paṅucapiṅ amalaku aṅrakṣa, tan harəp aṅalaha, mulihanikəl piṅro dr̥ve den-rakṣa ika, iku kramane.

§104 riṅ voṅ ahutaṅ tan paputra, yen təka riṅ nəm tahun lavase, anahura anikəl piṅro, iku kramane.

§105 riṅ voṅ ahutaṅ añoloṅ surat pavitaniṅ apihutaṅ, dene lobhane kaṅ ahutaṅ, nora harəp anahura hutaṅ, maliṅ patra arane, añoloṅ rontal esi, ḍəṇḍa pataṅ lakṣa denira saṅ amava bhūmi, tur saguṅiṅ hutaṅ mulihanikəl mariṅ kaṅ apihutaṅ, kahilaṅane doṣane.

§106 riṅ voṅ huvus anahur hutaṅ, pəgat sahutaṅe, surat pavitan duruṅ kasəbit deniṅ apihutaṅ, duruṅ vinehakən rontale riṅ kaṅ ahutaṅ, akeh vəruh, yen huvus anahur hutaṅ, makādi aṅandəlakən iṅ ahutaṅ hana, sāri-sāri pinalaku pasusuratanipun tan den-vətokən, hana anəṅguh kamaliṅan, vaneh anəṅguh katunu riṅ api, riṅ voṅ maṅkana iya aniṅidakən patra arane, vkasan mati kaṅ apihutaṅ, manih ta riṅ vuri mətu pasusuratan ika, pinanagihakən deniṅ anakiṅ apihutaṅ, yen hana voṅ anagih moṅkono, ḍəṇḍanən pataṅ lakṣa denira saṅ amava bhūmi, tur saguṅe panagihe valikna tagihən anikəl piṅro, vehakəna mariṅ kaṅ ahutaṅ, təkan iṅ pasusuratane ḍahutən, maṅkana doṣaniṅ anagih piṇḍo.

§107 riṅ voṅ ahutaṅ tan arəp anahura, katəmu deniṅ apihutaṅ, tagihən upaśamanən iṅ manis iṅ ujar təmbehan, kapiṇḍo upayanən vətuhaniṅ hutaṅ, kapiṅtlu taṅtaṅən ahucapan, kapiṅpat bañcananən sisilihana, kapiṅlima iridakəna konən anuṅgonana saguṅiṅ pisis.

§108 riṅ apihutaṅ, tumuli sāhasa aṅuṅkuṅ riṅ ahutaṅ, anakiṅ kinuṅkuṅ vadon rinusak hinalan deniṅ apihutaṅ, akāraṇa arəpe riṅ voṅ vadon ika, yen hana maṅkana, aṅrusak ratna arane, ḍəṇḍanən denira saṅ amava bhumi, voluṅ lakṣa, tur aveha tukon, nəm tali tikəlakəna piṅtlu, maṅkana śāsanane liṅ bhagavān bhr̥gu.

§109 riṅ voṅ apihutaṅ tan pasusuratan, akeh voṅ vəruh yen tan pasusuratan, vəkasan amanagihakən amətokən pasusuratan, lobha araniṅ voṅ apihutaṅ moṅkono, agave tan kapəgataniṅ surat, ḍəṇḍanən pataṅ lakṣa denira saṅ amava bhumi, saguṅe panagihe valikna tagihən anikəl piṅro, vehakəna riṅ kaṅ tinagih.

§110 riṅ surat pavitan, rusak deniṅ bubuk, deniṅ əṅət, yen hilaṅa, yen katunona, haṅəlenana surat kaṅ ahutaṅ.

§111 tukon iṅ rara ucapən maṅke, riṅ rara vinehan dr̥ve, mapakəna pinakatukone, vəkasan alaki riṅ len, vet iṅ rəpe riṅ lanaṅ len ika, bapaniṅ rara mənəṅ, makādi yen amamaṅantenakna, iya amaraṅ laraṅan arane, salviraniṅ tukon iṅ aṅlamar karuhun, mulih anikəl piṅro, tur bapaniṅ rara ḍəṇḍanən pataṅ lakṣa denira saṅ amava bhumi, amadal tukon arane, kunəṅ ikaṅ alaki-rabi kalih ika doṣanya pataṅ lakṣa kaṅ strī-laki vivijinən denira saṅ prabhu

§112 riṅ voṅ aveh tukon iṅ rarā, vəkasan mati rarā kaṅ tinuku ika, tan amaṅsula tukon ikaṅ rarā mati, apan kapatyan vəlyan arane.

§113 riṅ rarā vuruṅ patəmune duk sḍəṅe sapaturon, vuruṅ deniṅ lanaṅe kamalan, paran ta larane makavənaṅ vuruṅ iṅ patəmu kumiṅ, tan kavaśa riṅ saṅgama, dudu lanaṅ, vuḍug riṅ vətəṅ, riṅ pupu, riṅ bobokoṅ, tan katon iṅ jaba larane, ayan, buyan, iku ta vənaṅ pamadalakəna deniṅ rarā, riṅ rarā maṅkana amaṅsulakəna tukon nora anikəl.

§114 riṅ anaṇḍa kəbo sapi, yen anak-anak iṅ pasaṇḍan, kaṅ anaṇḍakən ameta anake, yen duruṅ livat sakiṅ tluṅ tahun hiṅane.

§115 riṅ saṇḍa saviji, den-saṇḍakən iṅ voṅ roro dene kaṅ anaṇḍakən, siṅ rumuhun anaṇḍa ameta saṇḍa iku vənaṅ, kaṅ anaṇḍakən ḍəṇḍanən roṅ lakṣa denira saṅ amava bhūmi.

§116 voṅ anaṇḍakən savah sapəcal, sumaṇḍa riṅ voṅ roro, barəṅ dene anaṇḍa, paḍa lavase, siṅ amukti rumuhun siddhakna pamuktine, kaṅ anaṇḍakən kaḍəṇḍaha roṅ lakṣa denira saṅ amava bhūmi.

§117 riṅ sasaṇḍan vavaḍaḥ, tambaga ādine, yen livat sakiṅ roṅ tahun lələb ika.

§118 yen hana kavula lanaṅ, vadon sinaṇḍākən dene gustine, añoloṅ dr̥vene kaṅ anaṇḍa, sakiṅ luvene, yan livat sakiṅ haji satus, pañoloṅe riṅ dr̥veniṅ anaṇḍa, yogya patihane, voṅ sinaṇḍākən ika, dene kaṅ anaṇḍa, iku voṅ anaṇḍākən corah arane, kaṅ anaṇḍākən anahura hutaṅe sasaṇḍan ika, apurik kaṅ anaṇḍākən ika, patine kavulane yen lanaṅa, vadona, sasaṇḍan ika, dadi vyavahāra, vinicara kaṅ anaṇḍa, ahucapan, yogya doṣanana pati kaṅ anaṇḍākən denira saṅ prabhu, apan asaṇḍa maliṅ, makādi yen añoloṅa dr̥veniṅ anaṇḍa riṅ kālaniṅ vəṅi, patenana uga āgamane, yen alah dene abaribinan.

§119 riṅ saṇḍa cinoloṅ iṅ maliṅ riṅ pasimpənan, yen alapən deniṅ ratu, paḍa kelaṅan āgamane.

§120 saṇḍa kavula lanaṅ, yen vadona, mun kalivat sakiṅ limaṅ tahun, lələb, paḍa lavan dinol, kaṅ sakiṅ kuṭarāgama iki, yen sakiṅ mānava sadaśa tahun, lələb.

§121 saṇḍa kbo-sapi, yen livat sakiṅ tluṅ tahun lələb, paḍa lavan dinol, kaṅ sakiṅ kuṭarāgama iki, kaṅ sakiṅ mānavāgama limaṅ tahun lələbe, salah tuṅgala tutən, dudu aranana aṅadeni , apan paḍa sakiṅ āgama riṅ kr̥tayuga, riṅ mānavaśāstra, mahāraja manu aṅajarakən, mahuniṅ hana voṅ samāna, sira sākṣāt bhaṭāra viṣṇu, riṅ kuṭaraśāstra, bhagavān bhr̥gu aṅajarakən, samaṅka traitāyuga, sira sākṣāt bhaṭāra viṣṇu, tinut denira bhagavān rāma paraśu, bhagavān rāma paraśu tinut deniṅ rāt kabeh, dudu ginave maṅko, sipat sakiṅ śāstra mulaniṅ mula.

§122 riṅ dr̥ve mas pinakādi, kinonkonakən iṅ apaṇḍe mas pahayunən, yen kaṅ bakal kinon gavenən bhūṣaṇa, paḍa kalāvan dodot kinon radinana riṅ amalaṇṭən , iṅalap deniṅ ratu, iṅalap deniṅ maliṅ, katunon, sakalviraniṅ kinonkonakən, aṅəlenana kaṅ kinonkon, yen sambarana pepeka dene aṅrakṣa dr̥ve, muliha sarəgane kaṅ hilaṅ, yen yatna dene aṅrakṣa dr̥ve, abcik dene asimpən, tan paṅlenana, maṅkana dharmane.

§123 riṅ voṅ aveveh dr̥ve riṅ anak-mantune, duk sḍəṅe mahu aomah-omah, yen mati kaṅ vadon, alapən dene lakine dr̥ve ika, yen mati kaṅ lanaṅ alapən dene rabine dr̥ve ika, tan vənaṅ alapən deniṅ aveveh manih, yen huvus avor pomah-omahe, hiṅaniṅ avor alaki-arabi rovlas tahun.

§124 riṅ rarā vinehan dr̥ve deniṅ bapa, dene sihe riṅ iya, vəkasan alaki rarā ika, tan alavas palakine, vəkasan mati rarā ika, sadr̥vene kaṅ den-gava alaki ika muliha mariṅ bapa-ibuniṅ rarā, apan duruṅ avor palaki-rabine, maṅkana manih sadr̥veniṅ lanaṅ muliha mariṅ lanaṅ, maṅkana dharmane.

§125 yen hana voṅ elik iṅ mantune, tumuli anake den-pisahakən alaki-arabi, deniṅ tukon iṅ lanaṅ mulih anikəl piṅro, tur aṅulihakəna pasəsəmbah, sadulure riṅ kuna, vastra, sabuk, siñjaṅ, aṅsulakəna mariṅ mantu tan kinarepan, patuku-susu tan muliha.

§126 riṅ rarā mahu vinaraṅ, duruṅ sapaturon lāvan lakine, vet iṅ tan arəpe riṅ jajaka ika, tukon iṅ rarā mulih anikəl piṅro, amadal saṅgama arane, voṅ vadon maṅkana.

§127 riṅ voṅ elik iṅ anake, dene doṣane voṅ-atuvane vadon asor kavoṅane siṅ doṣahaniṅ voṅ-atuvane vadon ika, yen mati voṅ-atuvane lanaṅ, vənaṅ ikaṅ anak kinelikan ameta dr̥ve kaliliraniṅ bapa, putra anumpak arane, paḍā dum-dumane lavan anak kaṅ kinasihan ika, makādi yen kavalonakəna, tur kavalone nora anak-anak, anak kinelikan ika uga aṅalapa dr̥vene rarāmane lanaṅ kabeh.

§128 riṅ kavula lanaṅ vadon mati, sadr̥vehane gustine uga ameta siṅ dr̥vene, tan vənaṅ petən iṅ voṅ len, yen hana voṅ ahutaṅ iṅ kavula mati ika, anahura riṅ gustine.

§129 riṅ voṅ aṅaku kavulaniṅ akavula, liñok paṅakune, aṅhoho kavula arane, kaṅ aṅaku-aku, vənaṅ tagihən sapaṅajiniṅ voṅ kaṅ den-aku.

§130 riṅ voṅ aṅaku sanak riṅ voṅ vadon, kahapusan iṅ voṅ vadon kaharəpe, avəkasan makarabine voṅ vadon kaṅ den-aku kadaṅ ika, akāraṇa den-valat, yen hana voṅ maṅkana, patenana doṣane denira saṅ amava bhūmi.

§131 ulah iṅ voṅ den-prayatna aṅrakṣa anak-rabine, den-prayatna aṅrakṣa kavulane lanaṅ vadon, yen aulah salah ikaṅ rabi, anak, kavula lanaṅ vadon, pamalərana uga, apan agave doṣaniṅ śarira, yen tan pamalərana ulahe dudu ika, hana po dene tan ahiḍəp vinalərakən, riṅ rabi, anak, lāvan kavula, təmbuṅən ta riṅ priṅ, savilah, yen iṅ kakayuha, avake gitikən, yen gigire, sukune, manih tan ahiḍəp, talenana hayo asiṅsət, sarahina hiṅane, uvakna, yen kavula maṅkana, yan riṅ anak, rabi, hayo tinalen, tan yogya ika, hana po deniṅ anəmbaṅ anak-rabi, muvah kavula, aja tinəmbuṅ śirahe, apan iṅ śarīra, tan hana kadi uttamāṅga ləvih təmən, yen anəmbuṅ śirahiṅ voṅ, ḍəṇḍa roṅ lakṣa denira saṅ amava bhūmi, yen śirah atatu denyānəmbuṅ, yen tatune tan patiha jəro, ḍəṇḍa salakṣa denira saṅ amava bhūmi, yen emu aṅəmu gətih, ḍəṇḍa limaṅ tali denira saṅ amava bhūmi, riṅ anəmbuṅ śirah ika.

§132 riṅ voṅ aṅaku bhūmi, liñok paṅakune, ḍəṇḍa sakəṭi nəm lakṣa, denira saṅ amava bhūmi, aṅaku-aku kadaṅ arane.

§133 riṅ tan aveh miluhābhūmi riṅ kadaṅe, ḍəṇḍa sakəṭi nəm lakṣa, denira saṅ amava bhūmi, atulak kadaṅ-varga araniṅ voṅ maṅkana.

§134 ḍəṇḍaniṅ paradāra ucapən maṅke, paradāra arane rabiniṅ voṅ len, voṅ aṅgaməli rabiniṅ arabi, sira saṅ prabhu riṅ kuna-kuna agave ḍəṇḍa, anuta sasḍəṅiṅ doṣa, guṅiṅ ḍəṇḍa roṅ lakṣa mariṅ adr̥ve rabi, patukune hurip kaṅ aṅgaməli, yen strī uttama, riṅ ḍəṇḍa salakṣa strī madhyama ika, riṅ ḍəṇḍa limaṅ tali strī kaniṣṭa ika, dudu saṅ prabhu aṅalap ḍəṇḍa ika, kaṅ adr̥ve rabi viśeṣa riṅ ḍəṇḍa, yen harəp pisis, kunəṅ duk sḍəṅe aṅgaməli karuhan dene kaṅ arabi, vənaṅ patihaniṅ aṅgaməli.

§135 voṅ amuṅpaṅ rabiniṅ arabi, den-tut mariṅ gənah iṅ voṅ vadon ika, vetniṅ rəpe kaṅ amuṅpaṅ, doṣaniṅ voṅ amuṅpaṅ doṣa pati denira saṅ amava bhūmi.

§136 riṅ voṅ mariṅ paturoniṅ rabiniṅ arabi, karəpe aṅalonana, ḍəṇḍa roṅ lakṣa, yen luput ikaṅ rabiniṅ arabi den-aloni, ḍəṇḍa mariṅ kaṅ adr̥ve rabi, patukune hurip kaṅ harəp aṅalonana, yen kəna dene aṅaloni, ḍəṇḍa pati dene kaṅ adr̥ve rabi.

§137 riṅ voṅ aṅgaməli rabiniṅ arabi, tur aṅaloni pisan, hana kaṅ akon aṅalonana, riṅ umahiṅ voṅ kaṅ akon, gənahe aṅaloni, kaṅ adr̥ve umah suka gənah iṅ aṅaloni, ḍəṇḍanən kaṅ adr̥ve umah, roṅ lakṣa, denira saṅ amava bhūmi, kaṅ aṅaloni doṣa pati riṅ lakine voṅ vadon kaṅ iṅalonan ika, yen sakiṅ mānava iki, yen sakiṅ kuṭara, kaṅ aṅaloni doṣa pati, yen harəp ahuripa, ḍəṇḍa pataṅ lakṣa, kaṅ akon tur aṅadyani aṅalonana riṅ umahe, ḍəṇḍa pataṅ lakṣa denira saṅ amava bhūmi.

§138 riṅ voṅ anilih paṅaṅgo riṅ rabiniṅ arabi riṅ aspi dene anilih, vəkasan kavr̥tta riṅ voṅ akeh, kaṅ anilih ḍəṇḍa roṅ lakṣa, dene kaṅ adr̥ve rabi.

§139 riṅ voṅ aṅucap-ucap lāvan rabiniṅ arabi riṅ asəpi, harəp ahutaṅa ujare, ḍəṇḍanən salakṣa, mantaṅe riṅ voṅ hayo aṅucap-ucap lāvan rabiniṅ arabi, laraṅaniṅ alaraṅan riṅ asəpi, apan evəh riṅ smara pinamaləran, yadyan saṅ paṇḍita tuvi, hayo sira sapocapan lāvan strī riṅ asəpi, apan iṅ samuhaniṅ indriya, śakti dahat, evuh lināvan, halaniṅ tan rumakṣa riṅ indriya, hilaṅ ikaṅ kapaṇḍitan, yan linumbar maṅkana liṅ saṅ hyaṅ āgama.

§140 riṅ voṅ vadon aṅiriṅakən rarā, den-atərakən mariṅ umahiṅ jajaka, manih hana voṅ vadon aveh gənah deniṅ jajaka lāvan rarā atəmu tan sareh, saṅkane aveh gənah ika den-upah-upahi deniṅ jajaka lāvan rarā ika, ika ta kaṅ aṅatərakən rarā, kaṅ aveh gənah, karo voṅ vadon ika , ḍəṇḍanən pataṅ evu, denira saṅ amava bhūmi, kahilaṅane doṣane.

§141 riṅ voṅ aṅgaməli rarā, aṅajak atatavan, amamanis iṅ ujar, aṅajak mariṅ aspi, momah-omahan arane, ḍəṇḍanən pataṅ tali, denira saṅ amava bhūmi, yen hana voṅ maṅkana.

§142 riṅ voṅ atukar lāvan rabiniṅ arabi, akeh voṅ vəruh patukare, riṅ voṅ lanaṅ maṅkana, strīsaṅgrahana arane, ḍəṇḍa roṅ lakṣa mariṅ adr̥ve rabi, riṅ voṅ atukar lāvan rarā cili, ḍəṇḍa roṅ lakṣa mariṅ saṅ adr̥ve bhūmi.

§143 śāsananiṅ alaki-arabi, yen luṅhā apaparan, mintar alayar, sapuluh tahun hiṅane lavase luṅhā, mintar aṅulati pisis riṅ deśāntara, pataṅ tahun hiṅane lavase luṅhā, mintar aṅaji sarvaśāstra, nəm tahun lavase luṅhā, hana ta voṅ luṅhā atiṅgal rabine, tan alayar, tan aṅulati pisis, makadon dadiya pomah-omah, tan luṅhā aṅaji sarvaśāstra, yen hana voṅ maṅkana, rabine aṅantiha pataṅ tahun, yan livat sakiṅ pataṅ tahun, vənaṅ alakiha riṅ len, liṅiṅ mānavaśāstra maṅkana yan iṅ kuṭaraśāstra, tluṅ tahun, vənaṅ alakiha riṅ len, lakine purvaka tan vənaṅ yen andoṣanana, ujar iṅ āgama, pinisahakən iṅ hyaṅ arane

§144 riṅ voṅ aṇḍahut savi, anəbit paṅubhaya, yen duruṅ pəgat iṅ vicara, ḍəṇḍa pataṅ tali, aməraṅ savi sakiṅ agalak, tur anaṅtaṅ, ḍəṇḍa roṅ lakṣa, denira saṅ amava bhūmi.

§145 riṅ voṅ asḍahan vəvənaṅ sakiṅ gusti, lvire, paksi, camra, celeṅ, bañak, vəḍus, kəbo, sapi, pagave yen mati, yen hilaṅa, dene aləṅe sinəḍah-səḍahan, aṅlenana pisis voluṅ tali sanuṅgal-nuṅgal, sakvehiṅ mati lavan hilaṅ, maṅkana śāsanane, nora vəruh duk səḍəṅe hilaṅ, nora vəruh duk səḍəṅe mati, gagaḍuhane, ḍəṇḍanən limaṅ tali, vəruh tur nora vavarah, ḍəṇḍa salakṣa, yen aṅkara ujare, ḍəṇḍa roṅ lakṣa, yen aniṅidakən tur den-paṅani kaṅ vənaṅ-vənaṅ, patenana denira saṅ adr̥ve vənaṅ-vənaṅ, makādi sira saṅ amava bhūmi kaṅ adr̥ve.

§146 riṅ voṅ asəḍahan kbo sapi, yen aləṅe paṅrakṣane, ḍəṇḍa salakṣa, paṅrəga riṅ satuṅgal-satuṅgal voluṅ tali, yen yen sakiṅ sahasa paravaśaniṅ asəḍahan, ḍəṇḍanən roṅ lakṣa, denira saṅ amava bhūmi.

§147 riṅ kəbo agalak aniṅhat voṅ rva tlu pat, iku kəbo aṅamuk arane, vənaṅ rəbutən dagiṅe yen huvus mati, yen hana kəbo atavan-tatu, pəgat sakiṅ pamugərane, yen pinugər kinəluhan, yan aməgat tatali, aniṅhat ika, dudu aranana aṅamuk, yen hana andalih aṅamuk iriya, kəbo sapi maṅkana rəbutən dagiṅe, kəbo sapi mulih anikəl piṅro, tuvi yan tan paniṅhat kbo sapi ika tur pinaten, mulih anikəl uga, kaṅ amateni ḍəṇḍanən roṅ lakṣa, denira saṅ adr̥ve bhūmi.

§148 yen hana kbo sapi paṅirid, ajaran, gajah, salviraniṅ paməṅ-aməṅan saṅ prabhu, aveh suka riṅ sira , dene guṇane, rupane, varṇane, tuhu-tuhuniṅ rājadr̥ve, ika ta yen cinoloṅ iṅ voṅ, pinaten deniṅ voṅ, tan kəna hiṅanana rəgane, ḍəṇḍane kaṅ amateni, kaṅ añoloṅ, hiṅan denira saṅ prabhu riṅ kaṅ amateni lavan kaṅ añoloṅ, apan sira viśeṣa amava bhūmi, vənaṅ sakarəpira, arane sakiṅ śāstra svāmī doṣaprada, aṅhiṅ, yen sira harəp aṇḍəṇḍa riṅ pisis, tutug iṅ ḍəṇḍa tan hana manih, sakəṭi nəm lakṣa, tan hana aṅləvihi manih guṅiṅ ḍəṇḍa, yen sakiṅ āgamaśāstra, riṅ ḍəṇḍa yan aṅləvihi sakiṅ sakəṭi nəm lakṣa, hila-hila, tan ulahanira saṅ amava rāt aṅləvihana, yen anut ujar iṅ śāstra kuṭara-mānava.

§149 riṅ voṅ adoṣa, mati, duruṅ ta katkan dinoṣan, tan tumusa doṣane riṅ anake.

§150 riṅ voṅ aṅhəbaṅ-həbaṅ , asaṅgup aveha pisis, dadi pasusuratan, huvus prasiddha gavene, duruṅ aveh paṅhəbaṅ-həbaṅ, māti kaṅ aṅhəbaṅ-həbaṅ , nora vənaṅ tumusa təkeṅ anake .

§151 riṅ voṅ ahutaṅ tan paveh kalāntara putra mariṅ apihutaṅ , anikəl piṅro uga hutaṅe, savuse anikəl piṅro, tan hana panahure , riṅ voṅ maṅkana anutakəna hutaṅe , dadi kavula, alavas dene anutakən dadi kavula, tan kavaśa dene anambut- gave niṅ pr̥dana , vəkasan miṅgat sakiṅ gustine, katəmu manih deniṅ pr̥dana , aveha pavadal-gave salavase tan aṅlakoni gave niṅ pr̥dana , vəkasan mati riṅ sukuniṅ gusti, anake anahura hutaṅ anikəl piṅro .

§152 riṅ kavula lanaṅ vadon, anak-anak iṅ daganiṅ gusti, yen iṅ paradeśaha agənahe, sagənahane anak-anak, iku anak vəsi arane, anakiṅ kavula satuhuk aṅavula, liṅ saṅ paṇḍita, asevakaha riṅ anakiṅ tuhan uga, kramane. riṅ kavula lanaṅ vadon anak vəsi, aṅalapa hutaṅ sahutaṅe rāmane lanaṅ vadon aməpəka, atuṅgalana, den-paḍa padum-dumane, maṅkana dharmane.

§153 riṅ kavula lanaṅ vadon miṅgat sakiṅ gustine, kaṅ lanaṅ miṅgat sakiṅ gustine , kaṅ vadon miṅgat sakiṅ gustine, atəmu riṅ paṅiṅgatane, vəkasan anak-anak, kaṅ lanaṅ katəmu deniṅ kaṅ adr̥ve kavula lanaṅ, kaṅ vadon katəmu dene kaṅ adr̥ve kavula vadon, katəmu riṅ deśa len, kaṅ adr̥ve kavula lanaṅ ameta anake lanaṅ, kaṅ adr̥ve kavula vadon ameta anake vadon . yen karuhun mati kavula lanaṅ ika, kaṅ adr̥ve kavula lanaṅ ameta sadr̥vene sarəmbat, kavula vadon ika muliha mariṅ kaṅ adr̥ve kavula vadon . yen kavula vadon ika mati, kaṅ adr̥ve kavula vadon aṅalapa dr̥vene sasuhun, kavula lanaṅ muliha mariṅ kaṅ adr̥ve kavula lanaṅ, maṅkana dharmane.

§154 riṅ kavula lanaṅ vadon tuṅgal gənahe aṅavula, miṅgat sakiṅ gustine, alavas dene luṅhā, aṅher iṅ deśa len, alapən sadr̥vene, vəvənaṅe, anake, dene kaṅ adr̥ve kavula, vadalana gave salavase miṅgat, kaṅ lanaṅ pavadal gave satus riṅ sadina, kaṅ vadon pavadal gave save riṅ sadina, maṅkana liṅ saṅ paṇḍita.

§155 riṅ voṅ arabi riṅ kavulane, anak-anak kavula ika, anake nora milu riṅ hutaṅe kavula vadon ika, nora milu dr̥veniṅ bapa, yen tan anak-anak po voṅ lanaṅ ika lavan rabine sasāmane voṅ menak ika, anakiṅ dāsih vənaṅ aṅalilirana sadr̥veniṅ lanaṅ menak, anahurana hutaṅ manih anakiṅ kavula dasih ika, maṅkana dharmane.

§156 riṅ voṅ anəbus kavulaniṅ akavula, vəruh yen kavulaniṅ voṅ, aṅhiṅ saṅkane anəbus tan pavarah iṅ kaṅ adr̥ve rovaṅ, dene sugih pisis, sakiṅ aklar dene akeh rovaṅe, aṅkara buddhine, saṅkane vāni anəbus kavulaniṅ voṅ, pisis panəbuse ika, tibā riṅ luvaṅ arane, hilaṅ sinilih mahakən, kavula kaṅ den-təbus alapən deniṅ adr̥ve rovaṅ purvaka .

§157 voṅ aṅivat rovaṅiṅ arovaṅ, katəmu riṅ havan, riṅ paṅaṅson, riṅ tgal, akāraṇa cidra, valātkara paṅivate ika, akāraṇa bañcana, katəmu dene kaṅ adr̥ve voṅ, kaṅ aṅivat ika, patenana yogyane denira saṅ amava bhūmi, maṅkana śāsana sakiṅ śāstra.

§158 riṅ arabi kavulaniṅ voṅ, anak-anak kavula ika lavan voṅ sugih, yen voṅ menaka, anake lavan kavulaniṅ voṅ ika, riṅ dum-duman, saduman, anak lavan rabi tmən tluṅ duman, maṅkana dharmane. yen ora anakiṅ rabi, mati voṅ lanaṅ kaṅ aṅalap kavulaniṅ voṅ ika, rabine papaḍane kaṅ norānak-anak ika kari, paḍanən dum-dumaniṅ balu tan panak ika, lavan anakiṅ kavulaniṅ voṅ ika, yen mati balu tan panak ika, anak kaṅ sakiṅ kavulaniṅ voṅ ika aṅalap dr̥veniṅ voṅ vadon baluniṅ bapa, nora vənaṅ, yen petən deniṅ kadaṅ vargane balu ika kaṅ tan panak, maṅkana dharmane.

§159 riṅ kavulaniṅ voṅ lanaṅ vadon lagi rare, duruṅ bisa anambut gave, den-alap den-itik-itik iṅ voṅ len, harəp huripane rare lanaṅ lavan rare vadon ika, yen tan enak ubaya kalavan kaṅ adr̥ve kavula riṅ rare ika, kaṅ aṅitik-itik , vənaṅ nora veḥana təbusan, aveh biluluk iṅ dudu celeṅe arane.

§160 voṅ amalaku pamadal gave riṅ kavulane lanaṅ vadon, , tur kavulane ika huvus anahur hutaṅ riṅ avake, vus māri dadi kavulane, aṅiṅ dene murkhane, saṅkane amalaku pavadal gave, sāhasa amalat, amaleni gave pgat arane, vənaṅ ḍəṇḍanən roṅ lakṣa denira saṅ amava bhūmi.

§161 riṅ voṅ akeh sanake, paḍa anuṅgoni hutaṅe, voṅ-atuvane lanaṅ vadon paḍa mati, kari paḍa akəmbulan susuratan, anakiṅ mati, yen anuṅguha karəpe sanake kabeh, dudu hutaṅ sakiṅ voṅ-atuva, paḍa akəmbulan pavitan hutaṅ-hutaṅan, tan sah sakiṅ gustine, anuhu paṅavulane, mati salah tuṅgal sanake riṅ panuṅgon, kaṅ mati ika anuhun hutaṅ arane, aṅloṅana pavitan sadumdumane, , yen tan mati miṅgat salah tuṅgal mariṅ paradeśa, maləra saguṅiṅ hutaṅe, tan aṅloṅa pavitan, dumən iṅ sanake sakehe kaṅ kari, yen mati riṅ panuṅgon aṅloṅa riṅ rontal pavitan uga hutaṅe sadumdumaniṅ mati .

§162 riṅ kavula lanaṅ, vadon, linəbarakən hutaṅe deniṅ bapa, vəkasan pinet iṅalap deniṅ anakiṅ aṅləbarakən, tan ahiḍəp iṅ varah-varahiṅ bapa, ḍəṇḍanən pataṅ lakṣa denira saṅ amava bhūmi, anakiṅ aṅləbarakən kaṅ tan ahiḍəp ujariṅ voṅ-atuhane ika.

§163 riṅ kavula miṅgat pisan balaka, katəmu arabi voṅ tan pahutaṅ, manih arabi voṅ menak iṅ parane miṅgat iṅ kana, ahomah-omah, katkan sugih, riṅ kavula maṅkana, vənaṅ anəbusa avake, lavan anake sapatutiṅ pisis panəbusane riṅ gustine, tan evuhana, yen sḍəṅ panəbuse avake lavan anake, yen huvus anahur hutaṅ riṅ kavula, tan kavaśa yen petən manih deniṅ gusti, pati-huripe tan kasiddhi-gaveha, manih tkaniṅ anak putune buyute, hana ta voṅ amalat anakiṅ kavula huvus anahur hutaṅ, pgat mariṅ kavulane, den-viśeṣa den-iridakna, kaṅ amalat kaḍəṇḍaha roṅ lakṣa denira saṅ amava bhūmi, maliṅ kavula arane riṅ voṅ moṅkono .

§164 riṅ kavula vadon miṅgat sakiṅ gustine, alaki voṅ tan pahutaṅ, yen alakiya voṅ menak avake, anake, dr̥vene, vənaṅ-vənaṅe, patəlunən deniṅ adum, kaṅ roṅ duman den-peta dene kaṅ aṅalap dāsih ika, saduman alapən deniṅ gustiniṅ kavula vadon ika, maṅkana anake, iku dharmane.

§165 riṅ voṅ amarani kavulane vadon, den-sahasa den-valat, anaṅis kavulane ika nora harəp, kəna dene amarani, malayu riṅ rahina, aṅuṅsi kadaṅ-vargane, voṅ-atuhane makādi, hilaṅa hutaṅiṅ kavula vadon ika, makadoṣane hilaṅa dāsihe, tan kaḍəṇḍaha ika denira saṅ amava bhūmi. riṅ voṅ amarani kavula dāsih, yen paḍa karəpe lavan gustine, atəmu, tan asahura hutaṅ iṅ kavula dāsih maṅkana, pan sahutaṅane dadi tukone, anakiṅ amarani dāsih tan vənaṅ anagiha hutaṅiṅ kavula ika, vəkasan kavula dāsih kaṅ pinaran ika luṅhā, alaki riṅ len, dene harəpe anak-anaka, riṅ kavula dāsih maṅkana, anahura hutaṅe anikəl piṅro, riṅ gusti kaṅ amarani ika, tur kaṅ aṅalap kaḍəṇḍaha pataṅ lakṣa dene gustine kavula ika.

§166 riṅ kavula tavan təbusane, yen harəp asahura voluṅ tali, patuku huripe, maṅkana śāsana riṅ dvāpara, tiṅkahiṅ tavan.

§167 hutaṅiṅ kavula ahutaṅ paṅan, tan kavaśa nambut gave, sapaha riṅ satahune, iṅ hiṅan limaṅ tahun tan bisa riṅ gave, piṇḍaniṅ hutaṅ riṅ limaṅ tahun, voluṅ tali, panahuraniṅ hutaṅ iṅ gusti.

§168 riṅ kavula vadon parəkanira saṅ ləvih, yen pinakarabi deniṅ voṅ jaba tan pamit, sakiṅ tambuhe kaṅ aṅalap, rəgane voluṅ evu, ḍəṇḍane roṅ lakṣa, kaluvaraniṅ doṣane kaṅ aṅalap, yen vəruh adoṣa pati kaṅ aṅalap, arabi kavulaniṅ ratu, yen tan amit, sakiṅ tan vruhe, voṅ vadon lagi duruṅ kadaləm, paḍa karəpe kaṅ lanaṅ lan kaṅ vadon, saṅkane atəmu, kaṅ aṅalap kaḍəṇḍaha pataṅ lakṣa, rəganiṅ kavulanira roṅ lakṣa, kaluvaraniṅ doṣane aṅalap, voṅ arabi dāsih parəkanira saṅ prabhu kaṅ huvus mañjiṅ iṅ daləm, sakiṅ tan vruhe aṅalap, paḍa karəpe lanaṅ lavan vadon, saṅkane atəmu, kaṅ aṅalap, ḍəṇḍanən voluṅ lakṣa, rəganiṅ kavulanira parəkan roṅ lakṣa, yen sakiṅ vəruhe valat, doṣa pati de saṅ prabhu, aṅlaṅkahi karaṅ-ulu arane. hana po kavula parəkanira saṅ ləvih, makādi parəkanira saṅ prabhu, huvus katapak denira, aṅhiṅ malər mañjiṅ mətu gavene, kavaśa mariṅ kadaṅ-vargane, mariṅ bapa-ibune, ika ta yen alapən iṅ voṅ, yen tan vəruha, yen vruha kaṅ aṅalap, doṣa pati uga.

§169 mulaniṅ dadi kavula varahakəna maṅke, kavula olih iṅ anavan, dvajahr̥ta arane, riṅ kavula duk mətu sakiṅ umahe gustine, gr̥haja arane, aṅavula deniṅ ḍəṇḍa, ḍəṇḍadāsa arane, aṅavula deniṅ paṅan, bhaktadāsa arane, iku ta kapat śāsanane, maləra riṅ gustine aṅulahakəna saulahiṅ kavula, anake kabeh ta ulunakəna anak vəsi.

§170 riṅ voṅ amateni voṅ vadon tan padoṣa, hutaṅe mulih anikəl piṅro, tur kaṅ amateni aveha patukuśava pataṅ tali.

§171 riṅ voṅ vadon adol avake, tan den-dol dene lakine, den-kavulākən dene kaṅ atuku, voṅ atuku iku kaḍəṇḍaha pataṅ lakṣa, voṅ vadon ḍahutən, agave maliṅ strī arane, riṅ voṅ adol rabine, vəkasan pinakarabine voṅ atuku, tan doṣaha kaṅ atuku.

§172 riṅ kavula lanaṅ vadon, huvus asahur hutaṅ riṅ gusti, den-palakoni vilaṅ gave den-valat dene gustine lavas, kaṅ amalaku vilaṅ gave kaḍəṇḍaha pataṅ lakṣa denira saṅ amava bhūmi, tur olihe amalaku vilaṅ gave mulih anikəl, maliṅ gave arane voṅ maṅkana.

§173 riṅ voṅ anulisakən araniṅ voṅ, riṅ dodotiṅ voṅ mati, riṅ laruṅane kunəṅ, manih dodot arupa anak-anakan, yen anak-anakan gələpuṅ, saharane den-tulisakən, den-pəṇḍəm iṅ səma, den-gənahakən riṅ ruhuriṅ kakayon, riṅ ləmah saṅar, riṅ catuspatha, yen hana voṅ maṅkana, agələh anəluh arane, manih riṅ voṅ anulisakən araniṅ voṅ riṅ baluṅ, riṅ kapāla, den-vor iṅ arəṅ lavan gətih lavan trikaṭuka, den-pəṇḍəm iṅ tuban, riṅ pamaṅgahan, iku agələh anəluh arane, riṅ voṅ yen ahulah moṅkono, patenana denira saṅ amava bhūmi, yen sacihna sayakti, təkaniṅ anak putune, bapa ibune, sakehe kabeh hayo hana kari riṅ loka, done rahayuhaniṅ bhuvana, kunəṅ sarvadr̥vene kabeh alapən denira saṅ amava bhūmi, kaṅ hana riṅ gənahe, yen hana riṅ deśa adoh riṅ deśa len, hayo pinet denira, anak putuniṅ anəluh agələh patenana uga de saṅ prabhu, apan anut pagavene bapa-ibune, kunəṅ dr̥vene kabeh kaṅ voṅ agələh ika, kaṅ haneṅ paradeśa, alapən denira saṅ prabhu, saṅ viśeṣa riṅ deśa len ika, əṅgone atitip amtokna saguṅe titipane.

§174 yen hana voṅ aṅulahakən gave, sahos sakiṅ tiṅkahiṅ agələh, kasukahane avake done, saṅkane śatrune mari asəṅit iṅ avake, abalik avəkasan asih, saṅkaniṅ voṅ akeh asih, makadi sihaniṅ mitra, mitrānuraga arane, paran ta ulahe, anulisakən araniṅ voṅ riṅ tambaga, den-pajokən iṅ kayu, riṅ kabuyutan, riṅ saraṅan, anulisakən araniṅ voṅ iṅ kayu, anampəki vijā kuniṅ, riṅ voṅ maṅkana yen karuvan, ḍəṇḍa voluṅ tali denira saṅ amava bhūmi.

§175 voṅ aveh pinaṅan, lavan aveh inum-inuman, mati kaṅ den-vehi, dene kaṅ den-paṅan, den-inum ika, kaṅ aveh ḍəṇḍa pataṅ lakṣa denira saṅ prabhu, avuru po kaṅ vinehan, mati tiba riṅ api, tiba riṅ bañu, mati deniṅ lalaṇḍəp riṅ alas, riṅ ləbuh, riṅ dalan, yan maṅkana tan vicaranən de saṅ amava bhūmi.

§176 riṅ voṅ kəḍi, vəkasan arabi paḍa karəpe lavan voṅ vadon alaki-arabi, patenana de saṅ prabhu, prakāśakəna denira.

§177 voṅ kḍi, riṅ maliṅ, riṅ ātatāyi, yen sacihna sayakti, patenana huga denira saṅ adr̥ve bhūmi, yen hana aṅavara, anuṅkulakən ikaṅ kinon amatenana, patihaniṅ kḍi, maliṅ, ātatāyi, ḍəṇḍanən pataṅ lakṣa denira saṅ amava bhūmi, yen huvus ḍinəṇḍa kaṅ aṅavara riṅ amateni kḍi harabi, lavan riṅ atatayi, patenana denira.

§178 riṅ voṅ andalih anəluh riṅ voṅ tan panəluh, aṅever-everakən iṅ pakehaniṅ voṅ, tur tan sacihna sayakti, ḍəṇḍaniṅ avr̥tta tur nora atut, amataṅ lakṣa riṅ voṅ satuṅgal-satuṅgal , denira saṅ amava bhūmi.

§179 riṅ voṅ andalih ātatāyi riṅ nora ātatāyi riṅ voṅ andalih maliṅ riṅ nora maliṅ, liñok pandalihe, ḍəṇḍanən roṅ lakṣa denira saṅ amava bhūmi, anduvilatək arane, riṅ voṅ andalih aṅaloni rabiniṅ voṅ, yen liñok pandalihe, ḍəṇḍa salakṣa denira saṅ amava bhūmi, anduvisantən arane.

§180 riṅ voṅ ləvih pinaten deniṅ voṅ dinalih anəluh, tur liñok pandalihe, anuli añcorah pasusuratan, apan hana hutaṅe, harəp tan panahurane hutaṅe, saṅkane aṅāraṇa andalih anəluh, iku voṅ amati pahutaṅan arane, ḍəṇḍanən voluṅ lakṣa denira saṅ amava bhūmi, tur anahura hutaṅe mulih anikəl, ḍəṇḍane amataṅ lakṣa riṅ voṅ satuṅgal-satuṅgal.

§181 riṅ voṅ ātatāyi lavan voṅ abhicāra, manih maliṅ, yen paḍa sacihna sayakti, patenana denira saṅ amava bhūmi, den-tanpaśeṣa, tkaniṅ anak putune, prakāśakna riṅ loka, hayo hiṅurip denira saṅ amava bhūmi, yen malayu luput deniṅ kaṅ kinon amatenana, tan mənəṅa saṅ amava bhūmi, yen aṅuṅsi riṅ deśa paradeśa denira, katəmu patenana huga, buron arane riṅ voṅ maṅkana.

§182 riṅ voṅ avarah riṅ saṅ ləvih, yen hana siṅ pelag, yen dr̥ve, vəvənaṅ, yen hana vovohan, ratnādi, voṅ vadon ləvih, vəkasan tan təmən, tan karuhan gənahe, iku voṅ aveh rāga tan pesi arane, riṅ voṅ maṅkana varah tan tuhu ḍəṇḍa salakṣa denira saṅ ləvih, kahilaṅane manahe muḍa.

§183 riṅ voṅ səḍəṅ doṣane, iṅaṅkatakən mariṅ pamaṅgahan, yen hanārəp ahuripa, anəbusa voluṅ tali, patuku alas arane.

§184 voṅ aṅaku dr̥veniṅ adr̥ve, liñok paṅakune, sahos rupane, dr̥veniṅ len ika lavan dr̥vene, iku aṅhoho dr̥ve arane, ḍəṇḍanən kaṅ aṅaku-aku, samulene dr̥ve kaṅ den-aku ḍəṇḍahane haji-hajinən rəgane de saṅ amava bhūmi aṅalap, tur dr̥ve kaṅ den-aku mulih anikəl piṅro.

§185 riṅ camra hañokot manuk riṅ kuruṅan, anahut ayam iṅ caṅcaṅan, riṅ kuruṅan, tan tinəmbaṅ ikaṅ camra deniṅ adr̥ve, kevala mənəṅ uga, ḍəṇḍanən nəm tali samas kaṅ adr̥ve camra de saṅ amava bhūmi, yen anəmbaṅ iṅ camrane tan patya, ḍəṇḍanən sapaṅrahupaniṅ ayam, yen tan anahut iṅ kuruṅan iṅ caṅcaṅan, patenana uga camrane.

§186 riṅ kəbo sapi amaṅan sarva vija pari ādine, ikətən ikaṅ kəbo sapi deniṅ adr̥ve savah, yen hilaṅ kaṅ kəbo sapi, matiha kunəṅ, kaṅ aṅikət aṅəlenana saguṅ-lit iṅ rəganiṅ kəbo sapi, yen agəriṅ aveha patuku tamba, kaṅ adr̥ve kbo sapi, aṅəlenana saloṅloṅane kaṅ rusak kaṅ pinaṅan ika anikəla piṅro, yen tan anəbus tumuli kaṅ adr̥ve kəbo sapi, kavṅena, aveha pamilaṅ dina sahiṅane, tan panəbus, maṅkana śāsananiṅ loka, yen kaṅ adr̥ve kəbo sapi aṅalap sakiṅ asəpi, tan panəbus iṅ paṅikətan, kaṅ aṅikət nora vəruh duk den-pet, kaṅ adr̥ve kəbo sapi ḍəṇḍanən roṅ tali denira saṅ adr̥ve bhūmi, tur anəbus anikəl piṅro, yen den-coloṅ vəṅi kaṅ iketan kəbo sapine riṅ adr̥ve, maliṅ arane.

§187 riṅ kəbo sapi agalak riṅ pamaṅanane, haneṅ paguyaṅe, riṅ pahubane, yen hana voṅ mara riṅ gənahe kbo sapine, den-siṅhat kaṅ mara ika, den-gapok kunəṅ, dudu haranana aṅamuk kəbo sapi ika, tan yogya patenana riṅ kəbo sapi agalak, yen pinaran gənahe, manih yen aṅhel pinagavahakən, aniṅhat iṅ amagavehakən, aniṅhat iṅ aṅhon, yen aṅhel sakiṅ savah, dudu haṅamuk iku harane, hayo pinaten deniṅ loka yen maṅkana.

§188 riṅ kəbo sapi hasiṅhat, atukar iṅ alas, riṅ təgal, riṅ ləmah, nora vəruh kaṅ aṅon, yen matiha kaṅ kbo sapi salah viji, yen tikəla kunəṅ, tan təmpahakna riṅ kaṅ adr̥ve kbo sapi aniṅhat, yen hana kbo sapi iṅon, asiṅhat paḍa kbo sapi iṅon nora ginərek deniṅ aṅon, tan den-sapih, yen mati kasiṅhat, tikəla kunəṅ, petən kaṅ aniṅhat, deniṅ adr̥ve kbo sapi mati tikəl kasiṅhat, yen atatu salah tuṅgal, kaṅ adr̥ve kbo sapi tan patatu tur aṅlarani aniṅhat, aveha patuku tamba riṅ kaṅ kasiṅhat.

§189 riṅ kbo sapi agalak asiṅhat iṅ voṅ tan pakāraṇa, aṅamuk ika arane, yen hana kbo sapi maṅkana, rəbutən tumbakən deniṅ voṅ akeh, halapən dagiṅe kbo sapi ika, tan vicaranən deniṅ adr̥ve kbo sapi. riṅ sapi sinəṅguh aṅamuk, yen kboha kunəṅ, kaṅ den-səṅguh aṅamuk deniṅ voṅ, tumuli pinaten, dinalih aniṅhat, yen liñok ujare kaṅ amateni, apan dene arəp iṅ dagiṅ saṅkane hamateni, kbo sapi kaṅ den-pateni ika, mulih anikəl piṇḍo, mariṅ kaṅ adr̥ve, tur kaḍəṇḍaha roṅ lakṣa denira saṅ amava bhūmi.

§190 riṅ voṅ amaduṅ kayu, aṅrubuhi voṅ, riṅ voṅ aṅgugutuk olih voṅ, yen upacāra kagutuk , yen tan den-maha, amajarakən halahipene kaṅ kagutuk ika, lavan kaṅ karubuhan kayu, yen mati kbo sapi, salviriṅ upacāra kaṅ karubuhan kayu, kaṅ kagutuk, aṅlenana samuleniṅ upacāra kaṅ mati, rəganana, sarəgane aṅlenana satṅah mariṅ kaṅ adr̥ve, apan tan den-maha dene aṅrubuhi, dene aṅgutuk ika, maṅkana śāsananiṅ loka. apan iṅ upacāra mūḍha nora vəruh iṅ sukaduka, yen aṅlarani upacāra karubuhan kayu, kagutuk, makādi voṅ, aveha patuku tamba kaṅ aṅrubuhi lavan aṅgutuk ika, ahiṅana savarase, tur kaḍəṇḍaha limaṅ tali denira saṅ amava bhūmi, kaluvarane pagavene lara taṅane, yen mati voṅ kaṅ karubuhan kayu ika, kaṅ kagutuk ika, kaṅ aṅrubuhi, kaṅ aṅgutuk aveha pakuramas, lavan patəpuṅ tavar, isuh-isuh mariṅ kadaṅ-varganiṅ mati, yen gustine kunəṅ, pakambaligine lavan pakuramas, roṅ tali, maṅkana śāsanane, kunəṅ yen tan ahiḍəp liṅ iṅ āgama, kaṅ aṅrubuhi ika lavan aṅgutuk, pāpane paḍa lavan ātatāyi riṅ pātaka, yen anaṅtaṅ ababaribinan, kalah dene ahucapan, kaṅ mati mulih anikəl piṅro, ḍəṇḍa pataṅ lakṣa, paḍakna lavan amateni akāraṇa kasr̥ṅən, amaha kaliṅane, yen tan alara kaṅ karubuhan, lavan kagutuk, tan aveha patuku tamba, tan kaḍəṇḍaha.

§191 riṅ ahomah-omah, yen tan aveh papasan valagara riṅ deśa, tan siddha pomah-omahe. voṅ alaki-rabi, yen tan asrah papasan valagara riṅ deśa, manih riṅ sira saṅ prabhu, ḍəṇḍa voluṅ tali denira saṅ amava bhūmi, yan riṅ strī uttama voluṅ tali, yan iṅ strī madhya pataṅ tali, yan riṅ strī kaniṣṭha sevu nəm atus, yen tinagih deniṅ deśa tan asrah, maṅkana doṣane.

§192 riṅ rarā huvus vinehan tukon deniṅ jajaka, asaṅketa māsaniṅ dina rahayu patətəmone, duruṅ təka riṅ pasamayaniṅ bapaniṅ rarā, pinuṅpaṅ deniṅ jajaka kaṅ vus asraḥ tukon ika, paḍakna lavan amurugul, apan tan paṅantekən pasaṅketa, maṅkana śāsanane, tukone tan pagave, parahilaṅən, petən deniṅ bapaniṅ rarā , jajaka ika, ḍəṇḍanən pataṅ lakṣa denira saṅ amava bhūmi, maṅkana pavarah bhagavān bhārgava.

§193 riṅ voṅ ahomah-omah, alavas atəmu anak-anak rarā, bapa uga viśeṣa riṅ anake, rarāma vadon nora viśeṣa riṅ anake, yen den-palakekən deniṅ rarāmane vadon rarā ika, tan pakoniṅ bapa, vənaṅ voṅ atuha lanaṅ amasahakəna palakine rarā ika, yen dudu karəpe mantu, rarāmane vadon manih rarā ika, amalekna tukon riṅ jajaka tan kinarəpan deniṅ bapaniṅ rarā.

§194 riṅ voṅ aṅgaməli rarā, anaṅis akrak rarā ginaməlan ika, akeh vəruh yogya gavenən sākṣi, pinakacihnane hana, patenana kaṅ aṅgaməli denira saṅ amava bhūmi.

§195 riṅ voṅ ahomah-omah, tan panak-anak, mati salah tuṅgal, yen mati vadone, kaṅ lanaṅ ameta dr̥vene roṅ duman, yen mati lanaṅe, kaṅ vadon aṅalapa dr̥vene saduman, siṅ mati rumuhun alapən dr̥vene denira saṅ amava bhūmi, yen mati karo, sira huga hameta pomah-omahe kabeh .

§196 riṅ voṅ alaki-arabi, olih amrih-mrih, arok pomah-omahe, gagavane, duk mahu matəmu sovaṅ-sovaṅ, iku nora vənaṅ yen aroka, yen duruṅ gənəp limaṅ tahun, yen gənəp limaṅ tahun patəmune, arok pomah-omahe, sakalviriṅ dr̥vene, samaṅkanane siddha avor ika, maṅkana liṅ saṅ paṇḍita.

§197 riṅ voṅ ahomah-omah, arabi saviji, vəkasan akeh anake, mati rarāmane lanaṅ, anak lanaṅ kaṅ atuha, aṅalapa siṅ dr̥vene ləvih karuhun, uddhāra arane sakiṅ āgama, sasḍəṅe paṅalape, yen aguṅ pomah-omah, den-aguṅ paṅalape riṅ paṅaləvih, yen alit pomah-omah, den-alit paṅalape riṅ paṅaləvih, lviriṅ uddhāra, satahil, roṅ tahil, tluṅ tahil, pataṅ tahil, hiku ta hanuta sayogyaniṅ dr̥ve dinum, saṇḍəgiṅ hiṅan, riṅ voṅ pomah-omah paralimanən deniṅ anak kaṅ atuha, riṅ mas limaṅ tahil, pinakapaṅaṅgo deniṅ rarāma, paḍa ləvih rupane, varṇane, kaṅ pataṅ duman alapən iṅ sanak-atuha, kaṅ saduman dumən papak riṅ sanak anom kabehan, dr̥ve kabeh maṅkana uga, riṅ pañcoddhāra tan yogya, hayo aṅalap dr̥ve limaṅ duman, sanak kabeh saduman den-kəmbuli, hiṅane alapən pataṅ duman uga, paṅaləvihe sakiṅ sanak kabeh iṅaranan caturuddhāra, hayo pañcoddhāra, yen sanak atuha aṅaṅgo caturuddhāra, anəmu kadīrghāyuṣan ika.

§198 riṅ voṅ aṅalap balu-baluniṅ pakaraman, balu-baluniṅ voṅ den-piḍara, ḍəṇḍa voluṅ tali denira saṅ amava bhūmi.

§199 riṅ voṅ arabi anak kavalon, ḍəṇḍa pataṅ lakṣa denira saṅ amava bhūmi, hanasar-nasar arane, tan panut gave riṅ voṅ maṅkana.

§200 riṅ voṅ tan panak-anak, anilih dr̥ve mati kaṅ anilih kaṅ adr̥ve, kahilaṅan iṅ dr̥vene arane .

§201 dr̥veniṅ tan panak-anak, yen mati, saṅ prabhu sira aṅalap.

§202 riṅ voṅ tan panak-anak , aṅoṣaḍa riṅ paradeśa, mati riṅ parane, dr̥vene alapən denira saṅ amava bhūmi , dr̥ve kaləbu riṅ sumur arane.

§203 yen saṅ paṇḍita mati tan panak-anak, sadr̥venira tan alapən denira saṅ amava bhūmi, apan devadr̥vyātmaka .

§204 riṅ voṅ aṅaṅasi hutaṅ, riṅ voṅ anagih tan papihutaṅ karo riṅ voṅ maṅkana tan vəruh iṅ dharma arane, yen tan hana harəp kalaha salah tuṅgal, konən adevāgamaha denira saṅ amava bhūmi, yen kəna riṅ devāgama, konən anahura hutaṅe, mulih anikəl piṇḍo, riṅ voṅ anagih tan papihutaṅ mulihanikəl piṅro sapanagihe, tur ḍəṇḍanən denira saṅ amava bhūmi, saguṅiṅ panagihe mulihanikəl piṅro, paḍa uga rehe lavan aṅaṅasi hutaṅ, panikəle, ḍəṇḍanən den-paḍa denira saṅ prabhu andoṣani riṅ voṅ maṅkana .

§205 riṅ dr̥vya bhinukti deniṅ len, riṅ saṇḍiṅiṅ kaṅ adr̥ve, tur mənəṅ tumon iṅ dr̥vene bhinukti riṅ voṅ len, yen akara daśa tahun lavase dr̥vene den-bhukti riṅ voṅ len, hilaṅ ikaṅ dr̥ve yan maṅkana, prasiddha dr̥veniṅ sari-sari ambhukti, amalakuha haji sapisis pisan kevala, kaṅ adr̥ve mula, tan yogya vehana, kadaśavarṣa arane.

§206 kaṅ tan vənaṅ hilaṅa, sasaṇḍan ləmah, dr̥veniṅ rare, dr̥ve titipaniṅ voṅ vadon, dr̥venira saṅ ratu, dr̥venira saṅ vatək aṅaji, salavasane tan hilaṅ, nora kəna riṅ kadaśavarṣa ika.

§207 kaṅ yogya titipana dr̥veniṅ voṅ, lvire voṅ aruhur kavaṅśane, voṅ rahayu lakune, voṅ vəruh riṅ dharma, voṅ satya riṅ ujar, voṅ mahapavitra, voṅ sugih tan harəp, guhaniṅ titip dr̥ve, liṅ saṅ paṇḍita.

§208 riṅ dr̥ve tinitipakən, kamaliṅan, keli riṅ bañu, katunon, pinet denira saṅ amava bhūmi, binaranaṅ iṅ corah, nora vənaṅ aṅlenana kaṅ tinitipan, kaṅ atitip tan malakuha.

§209 riṅ voṅ tinitipan, yen mati kaṅ atitip tan pakaki, tan panini, tan pabapa, tan pababu, tan panak-anak, tan pakaponakan, tan ana vvaṅ sanak amisan, amiṅro, iku iṅaran pratyantara kabeh tan hana, tan ulihakəna riṅ dr̥vya patitip, deniṅ tinitipan, yen mati kaṅ tinitipan, nora hilaṅ ikaṅ dr̥veniṅ pratyantara, apan lagi ahurip kaṅ atitip tan panak-anak ika, vehən dr̥ve patitip ika, deniṅ anakiṅ tinitipan riṅ pratyantara iṅ kana, tan saṅkr̥tana denira saṅ amava bhūmi dene hanakiṅ tinitipan aṅulihaknən titipan, tan ucapən kadaṅ-varganiṅ tinitipan, tan vənaṅ tan paṅulihakəna titipan.

§210 riṅ amalaku dr̥ve titipan tan vinehakən deniṅ voṅ kaṅ tinitipan, hana manih voṅ apakṣa amalaku titipan, tur tan atitip karo riṅ voṅ maṅkana, corah arane, konən adevāgamaha de saṅ prabhu, devāgama arane acora, yen duk atitip lavan tinitipan tan pasākṣi kaṅ susākṣi, yen kəna riṅ devāgama pasore, mulih anikəl piṅro sapaṅakune riṅ dr̥ve ika, maṅkana manih, ḍəṇḍane saguṅiṅ ulih-ulihane dr̥vene ika denira saṅ amava bhūmi.

§211 riṅ titipan katiṅgal, akāraṇa deniṅ deśa rusak binahak iṅ voṅ, geger deniṅ ratu apraṅ paḍa ratu, hiṅalap iṅ maliṅ, katunon, keli riṅ bañu, tan paṅəlenana kaṅ tinitipan, yen maṅkana, pan kapañcasādhāraṇa arane, liṅira saṅ paṇḍita vruh iṅ āgama.

§212 riṅ voṅ anilih dr̥veniṅ voṅ cinolikan iṅalap deniṅ maliṅ, aṅəlenana samuleniṅ dr̥ve ika kaṅ anilih, aleṅe araniṅ anilih maṅkana.

§213 riṅ rarā viśeṣa kavoṅane, huvus vinehan tukon deniṅ jajaka, tumuli jajaka ika aṅucap aṅuṅsi dharma, lavan aṅucap aṅulati arthā, atiṅgal tukon jajaka ika, liñok ujariṅ jajaka ika, makādi yen saṅ dvija, kapaten iṅ dharma arane, tiniṇḍa riṅ rarā yen maṅkana, deniṅ tukon petən deniṅ rarā ika uga, tan muliha mariṅ kaṅ adr̥ve panuku, strīdhana arane sakiṅ āgama.

§214 riṅ rarā huvus vinehan paṅlaraṅ deniṅ jajaka, akeh voṅ vəruh yen kalivat sakiṅ limaṅ vulan lavase paṅlaraṅ ika, nora vənaṅ udalən manih, ikaṅ paṅlaraṅ deniṅ jajaka, vulañjar araniṅ rarā liṅ iṅ loka, vənaṅ rarā ika vehakna riṅ len dene rāmane.

§215 riṅ rarā huvus vinehan tukon deniṅ jajaka, vəkasan mati jajaka ika, yen hana arine lanaṅ jajaka ika, vənaṅ vehakəna riṅ arine ika devarahara arane, karəpana ika deniṅ vərə-vərəh ariniṅ mati, vərə-vərəh arane jajaka.

§216 riṅ atuku aveh pamañjər, kaṅ aveh pamañjər nora təka riṅ pasaṅketane, kaṅ den-tuku vənaṅ hayo vehana, tur pamañjəre hilaṅa, riṅ tutukon hana doṣane, hana hala pinakavadane, tan den-varahakən dene kaṅ adol, kaṅ tinuku maṅsul, pisis panuku mulih anikəl piṅro.

§217 riṅ voṅ añjuraṅ ləmahiṅ aləmah, aṅurugi talaga, rava, sivakan, sumur, tan pakoniṅ adr̥ve, ḍəṇḍanən roṅ lakṣa denira saṅ amava bhūmi, kaṅ rinusak pahayunən manih.

§218 riṅ voṅ amiḍik pomahan, talaga, rava, savah, kali, bəbəṅan, taman, təgal, ḍəṇḍane salakṣa denira saṅ amava bhūmi, yen sakiṅ tan-vruhe, ḍəṇḍane pataṅ tali, kaṅ den-piḍik muliha kadi duk alavas, yen hana bhuktine, tagihən teluṅ pañaraṅ yen alavas.

§219 riṅ voṅ kasərəṅən aṅuman-uman iṅ voṅ len, aṅavakən malaniṅ avak, aṅavatakən śirah, paṅan, laku, solah, kajanman, kavoṅan, aṅavatakən kagunan, aji, riṅ voṅ maṅkana vākpāruṣya arane.

§220 riṅ pāruṣya ucapən maṅke, riṅ kṣatriya aṅuman-uman brāhmaṇa, ḍəṇḍanən saṅ kṣatriya roṅ tali, yen vaiśya aṅuman-uman iṅ saṅ brāhmaṇa, ḍəṇḍanən ikaṅ vaiśya limaṅ tali, vaiśya arane voṅ tani, śūdra aṅuman-uman iṅ saṅ brāhmaṇa, doṣaniṅ śudra doṣa pati, patyanana riṅ voṅ adagaṅ aṅuman-uman iṅ saṅ brāhmaṇa de saṅ prabhu, saṅ brāhmaṇa yen aṅuman-uman iṅ saṅ kṣatriya, ḍəṇḍanən saṅ brāhmaṇa sevu, saṅ brāhmaṇa aṅuman-uman iṅ voṅ tani, ḍəṇḍanən saṅ brāhmaṇa limaṅ atus, brāhmaṇa aṅuman-uman iṅ voṅ adagaṅ, saṅ brāhmaṇa ḍəṇḍanən satak save, .

§221 riṅ voṅ aṅuman-uman paḍa kula-kavoṅane, kaṅ aṅuman-uman ḍəṇḍanən satak salave, maṅkana ajar iṅ śāstra.

§222 yen saṅ kṣatriya aṅuman-uman iṅ voṅ tani, ḍəṇḍaniṅ saṅ kṣatriya sevu, riṅ voṅ tani aṅuman-uman iṅ bot dagaṅ, ḍəṇḍaniṅ voṅ tani sevu, ḍəṇḍaniṅ voṅ tani aṅuman-uman iṅ kṣatriya, ḍəṇḍanən ikaṅ voṅ tani roṅ evu.

§223 riṅ bot dagaṅ aṅuman-uman iṅ kṣatriya, ḍəṇḍaniṅ bot dagaṅ limaṅ tali, riṅ voṅ tani iṅuman-uman deniṅ bot dagaṅ, ḍəṇḍaniṅ bot dagaṅ roṅ tali .

§224 riṅ voṅ nīca caṇḍālajanma aṅuman-uman iṅ saṅ brāhmaṇa, riṅ saṅ paṇḍita, patenana kaṅ voṅ nīca caṇḍāla de saṅ amava bhūmi.

§225 ḍəṇḍapāruṣya ucapən maṅke, riṅ voṅ amukul, anuduk iṅ kayu, aṅgitik iṅ vatu hambaṇḍəm iṅ vatu, aṅlarani, aṅəmu gətih, atatuha kunəṅ, anugəlakən, anikəlakən baluṅ, makādi yen amatenana sarvasato, yen voṅ ādine, araniṅ ulah vivijinən, salah tuṅgal ika ḍəṇḍapāruṣya arane, liṅ saṅ paṇḍita, maṅkana riṅ voṅ amraṅ iṅ sañjata, anuduk ādine, aṅgitik iṅ vatu, riṅ viṅkā, amukul iṅ kayu, riṅ baluṅ, anaṇḍat guluniṅ len iṅ tatali, aniləpakən iṅ bañu, anampel, amərəp, aṅgarut, anəpak, andədəl, aṅgocoh, aṅgapuk, anahut amok, amləciṅ, aṅidoni, anirati umbəl, ilu aṅəṅəmoni, anampəki kəkəmahan, anampəki ririgən, aṅgutuk iṅ tahi, aṅantəpakən iṅ tahi, anuṇḍuṅakən iṅ patunahaniṅ celeṅ, iku pratyekaniṅḍəṇḍapāruṣya.

§226 riṅ bot dagaṅ aṅlarani riṅ brāhmaṇa, asādhana taṅan, suku, caṅkəm, śirah, ḍaḍa, gigir, bāhu, plat, silit iku ta sādhanane pāruṣya riṅ samajanma, yan iṅ janma ləvih kaṅ den-pāruṣyani, siṅ sādhanane añjamalani, tugelana de saṅ prabhū, maṅkana liṅ bhaṭāra manu riṅ śāsana.

§227 riṅ śūdra, makādi riṅ cāṇḍālajati, aṅrəṅgut śirah saṅ brāhmaṇa, tugəlana taṅane denira saṅ prabhu, yen andədəl iṅ suku, ikaṅ cāṇḍāla śūdra tugəlana sukune denira saṅ prabhu.

§228 riṅ cāṇḍāla śūdra aṅluṅguhi kaluṅguhanira saṅ brāhmaṇa, ikaṅ cāṇḍāla śūdra praṅən vaṅkiṅ-vaṅkiṅnya denira saṅ prabhu.

§229 ikaṅ caṇḍala śūdra aṅəntuti riṅ saṅ brāhmaṇa, tugəlana silite de saṅ prabhū, riṅ śūdra caṇḍala aṅidoni, anampəki kəkəmahan, aṅəṅəmoni, akaraṇa galake ikaṅ śūdra caṇḍala tugəlana lambene, karo i sor iṅ ruhur, denira saṅ prabhū , yen iṅ śūdra cāṇḍāla aṅuyuhi riṅ saṅ brāhmaṇa, ikaṅ cāṇḍāla śūdra tugəlana plate, yen ikaṅ cāṇḍāla śūdra hamivir kupiṅ, amijit iruṅ, amumuṇḍak, aṅgutuk iṅ tai, añjəṅkaṅakən, aṅantəpakən iṅ tai, anirati tai, ikaṅ śūdra cāṇḍāla tugəlana taṅane, yen ikaṅ śūdra cāṇḍāla aṅisiṅi riṅ saṅ brāhmaṇa, duləkən iṅ vsi abaṅ silite, yen amləciṅ, tugəlana plate lavan taṅane denira saṅ prabhū.

§230 yen hana voṅ pāruṣya akāraṇa kakayu, vatu dene aṅlarani, patik-iven, makādi yen aṅlarani voṅ, sasḍəṅniṅ duhkhane kaṅ den-larani, pinatut lavan guṅ lit iṅ ḍəṇḍa denira saṅ adr̥ve bhūmi amrayogakən ḍəṇḍa, yen ora pati halara dene amraṅ, amukul, aṅgutuk, den-alit ḍəṇḍane, limaṅ atus, yen madhyama kanin ḍəṇḍa sevu, yen uttama kanin təka riṅ baluṅ makādi yen tikəl, ḍəṇḍa roṅ lakṣa, yen abaṅ kulite emu, aṅəmu gətih, ḍəṇḍa roṅ tali, tur kaṅ voṅ pāruṣya aveha patiba jampi, patuku tamba, hiṅana savarase tatu kaṅ den-pāruṣyani.

§231 riṅ voṅ aṅrəməkakən dr̥veniṅ voṅ, anikəlakən, aṅgəmpalakən, hanəbitakən, anigarakən, akāraṇa tivase, tan vəruhe dene aṅgutuk, amukul, amraṅ dr̥veniṅ para kaṅ rusak ika, kaṅ kagutuk, kagitik, kapraṅ ika mulih anikəl piṅro, aṅlenana sasukan iṅ adr̥ve den-mulih kayeṅ kuna, maṅkana ḍəṇḍane denira saṅ amava bhūmi, guṅ iṅ ḍəṇḍa den-paḍa lavan əlen-əlen kaṅ rinusak anikəl.

§232 riṅ voṅ anuṅgaṅ paḍati, yen anuṅgaṅa jaran kunəṅ, sakalviraniṅ tutuṅgaṅan kaṅ den-tuṅgaṅi, aṅgəpok aṅidəki voṅ, yen mati voṅ ika kaṅ den-gəpok, den-idəki ika, kaṅ anuṅgaṅ, yen kaṅ asarathi kunəṅ, ḍəṇḍanən roṅ lakṣa denira saṅ amava bhūmi, tur aveha pamidāra voluṅ tali, riṅ kaṅ adr̥ve rovaṅ, yen iṅ kadaṅ-varganiṅ mati, gənahaniṅ aveh.

§233 yen aṅidəki sapi, yen aṅidəki ajaran, yen uṣṭra, mati den-idəki ika, kaṅ asarathi ḍəṇḍanən salakṣa, tur aṅəlenana sarəgane, samajanane kaṅ mati ika.

§234 yen alit sapi kaṅ mati ika, yen ajarana, yen uṣṭraha, ḍəṇḍaniṅ asarathi pataṅ tali, aṅidəki ayam, bebek, kaṅ linumbar tan cinaṅcaṅ, ḍəṇḍa limaṅ atus, aṅidəki ayam iṅ bobotoh, riṅ caṅcaṅan, riṅ kuruṅan, ḍəṇḍa satali.

§235 aṅidəki vḍus vivi, vḍus padu, bañak, ḍəṇḍaniṅ asarathi roṅ tali, yen aṅidəki camra, celeṅ, ḍəṇḍa pataṅ tali, tur aṅəlenana samajana rəgane kaṅ kedəkanika.

§236 riṅ rabi, anak, kavula lanaṅ, kavula vadon, sanak kunəṅ, yan śiṣya, saudara ika arane kabeh, yen adoṣa, salah saviji katəkana doṣa, təmbaṅən iṅ priṅ savilah, yen təmbaṅen iṅ tatali kunəṅ kaṅ tinəmbuṅ gigire, ləṅəne, pupune, bobokoṅe, hayo tinəmbuṅ śirahe, yan tinəmbuṅ śirahe kaṅ adoṣa salah saviji, dene gənahe adoṣa, ḍəṇḍanən roṅ lakṣa denira saṅ amava bhūmi.

§237 riṅ voṅ añoloṅ ivak iṅ tambak, manih yen laraṅana, ḍəṇḍaniṅ añoloṅ voluṅ tali denira saṅ amava bhūmi, yen akeh kaṅ añoloṅ vivijinen amoluṅ tali riṅ voṅ satuṅgal-tuṅgal, tur ivak kaṅ deñ-coloṅ mulih anikəl piṅro, yen vəṅi kāla dene añoloṅ patenana uga doṣane.

§238 riṅ voṅ añoloṅ pari, yen ləvih sakiṅ sapuluh tənah olihe añoloṅ patenana denira saṅ amava bhūmi, yen sapuluh tənah, yen kuraṅ sakiṅ sapuluh tənah dene añoloṅ pari, tikəlakəna piṅsavlas, ḍəṇḍane mariṅ saṅ amava bhūmi, pari kaṅ den-coloṅ mulih anikəl piṅro mariṅ kaṅ adr̥ve pari cinoloṅ, yen vəṅi māsane añoloṅ patenana uga denira saṅ amava bhūmi.

§239 riṅ voṅ añoloṅ kəmbaṅ, añoloṅ pari yen akəḍik olihe añoloṅ, bobotana, savərate bobote tikəlakəna piṅsavlas, riṅ añoloṅ gaṅan, kunir, təmu, gamoṅan, añoloṅ priṅ, añoloṅ odod-ododan, bubuṅkahan, akəḍik olihe añoloṅ, tan mule pañoloṅe, ḍəṇḍanən satak denira saṅ amava bhūmi, tur olihe añoloṅ ika, mulih anikəl mariṅ kaṅ cinoloṅan.

§240 riṅ voṅ añoloṅ mās, yen salakaha, manih añoloṅ ratna, yen añoloṅ dodot, yen ləvih sakiṅ haji satus, doṣa pati kaṅ añoloṅ denira saṅ amava bhūmi, yen ləvih sakiṅ aji save, dr̥ve kaṅ den-coloṅ ika, tugəlana taṅane kaṅ añoloṅ denira saṅ adr̥ve bhūmi, yen kuraṅ sakiṅ haji save, kaṅ den-coloṅ dr̥ve ika, tikəlakəna piṅsavlas, samuleniṅ dr̥ve kaṅ den-coloṅ ika ḍəṇḍane denira saṅ amava bhūmi, tur olihe añoloṅ tikelakəna piṅro mariṅ kaṅ adr̥ve kaṅ cinoloṅan.

§241 riṅ voṅ añoloṅ sajəṅ, riṅ umah, añoloṅ səkul, añoloṅ kəkəlan, añoloṅ ivak məntah rateṅ, añoloṅ manuk, añoloṅ miñak, añoloṅ ləṅa, añoloṅ madhu, pəhan, malam, pulut, lavan añoloṅ vut, gagaraṅan, kuvuk, laṇḍak yen haneṅ umah den-coloṅ, akāraṇa harəpe riṅ iya, manih añoloṅ anam-anaman , priṅ, makādi raga, kicir yen lagi riṅ umah, añoloṅ guci, piṅgan , paṅkon, sakehiṅ vavaḍaḥ vijil pañjunan, kəṇḍi kunəṅ, añoloṅ uyah, tarasi, asəm, vrak, jruk, sahananiṅ raragi haneṅ umah, manih añoloṅ bhasma, avu, arəṅ ika, kaṅ den-coloṅ salah tuṅgala, makādi bras iṅ pasimpənan den-coloṅ, kaṅ añoloṅ, ḍəṇḍanən samulene rəgane kaṅ den-coloṅ ika tikəlakəna piṇḍo, tur kaṅ den-coloṅ mulih anikəl mariṅ kaṅ adr̥ve, ḍəṇḍa anikəl piṅro sarəgane mariṅ saṅ amava bhūmi.

§242 riṅ voṅ aṅivat voṅ abəcik, aṅivat voṅ vadon ləvih, añoloṅ ratna ləvih, patenana kaṅ añoloṅ ika denira saṅ amava bhūmi.

§243 yen hana voṅ añoloṅ kbo sapi, paṅiridira saṅ ləvih, makādi paṅiridira saṅ amava bhūmi, yen añoloṅ guguluṅiṅ paḍati, kaṅ añoloṅ tugəlana sukune satəṅah denira saṅ amava bhūmi.

§244 riṅ voṅ sāhasa aṅrusak gr̥hanira saṅ ləvih, aṅrusak dunuṅanira saṅ ləvih, aṅrusak titiṅkahanira saṅ amava bhūmi, aṅrusak gənahiṅ sañjata, aṅrusak kabuyutan, amalat gajah, amalat ajaran, ratha, paṅiridira saṅ amava bhūmi den-valat iṅ voṅ, ika ta kaṅ amalat patenana denira saṅ amava bhūmi, tan rasanana, yen arəp ahuripa kaṅ amalat ika, yen iṅapura denira saṅ amava bhūmi, ḍəṇḍanən ika sakəṭi lima, doṣaniṅ voṅ maṅkana.

§245 riṅ guru, riṅ rare, riṅ voṅ atuva vayahe, riṅ brāhmaṇa, riṅ voṅ vatək aṅaji, kunəṅ sakalviraniṅ kaṅ sinəṅguh paṇḍita deniṅ loka, yen ātatāyi, sacihna sayakti ulahe, paran ta kaṅ iṅaran ātatāyi, voṅ anunoni umah iṅ voṅ, makādi anunoni umahira saṅ amava bhūmi , riṅ voṅ aṅupasi sasamane voṅ, riṅ voṅ anəluh sasamane voṅ, riṅ voṅ aṅamuk , amiśunakən saṅ amava bhūmi, riṅ voṅ amurugul, kaṅ nəm iku tan yogya huripən denira saṅ amava bhūmi, tan rasanana patine, yen sacihna sadoṣa, yen sira amateni voṅ ātatāyi ika, tan kataman pāpapātaka sira, maṅkana kapagəhanira riṅ dharmanira saṅ amava bhūmi.

§246 riṅ voṅ aṅgaməli rabiniṅ arabi, tugəlana taṅane kaṅ aṅgaməli ika denira saṅ amava bhūmi, iku ḍəṇḍane, tur cihnanana tuṇḍuṅən sakiṅ deśanira, iku tətəṅəre, yen aṅgaməli rabiniṅ voṅ.

§247 riṅ voṅ aṅucap-ucap lavan rabiniṅ arabi, riṅ śunya, riṅ taman, riṅ alas, riṅ kali, sagənahane aṅucap-ucap uga kikivan uga hana səmune hala mariṅ voṅ vadon ika, naṅiṅ tan kalavanan deniṅ vadon, voṅ vadon ika tan istri rabiniṅ arabi, tan kapiṅhit, kaṅ anəmoni guyu, aṅujivati, strīsaṅgrahaṇa arane, ḍəṇḍanən kaṅ anəmoni guyu ika limaṅ tali, saṅkane akḍik ḍəṇḍane, rehiṅ voṅ vadon tan kapiṅhit, dudu laraṅaniṅ uttamajanma.

§248 riṅ voṅ aṅucap-ucap lavan rabiniṅ voṅ tumuli kapiṅhit dene lakine voṅ uttama-janma, iku strīsaṅgrahaṇa arane.

§249 yen aṅucap-ucap kaparaṅguhan iṅ asəpi, aṅhiṅ dene araraṣan ika, tan akāraṇa sakiṅ harəp iṅ voṅ vadon ika, tan asəmu paṅucap-ucap iṅ basaja, kevala sakiṅ tan vəruhe riṅ laku, riṅ voṅ maṅkana ḍəṇḍanən limaṅ tali, doṣane strīsaṅgrahaṇa kaliṅane riṅ voṅ lanaṅ lavan voṅ vadon, yen ujar iṅ śāstra, tan vənaṅ yen asapocapana riṅ asəpi, lavan rabiniṅ arabi, yen rabihaniṅ sanak, rabihaniṅ paman, uva kunəṅ, rabihaniṅ anak-mantu sakalviraniṅ stri laraṅan, tan yogya rovaṅaniṅ sapocapan riṅ asəpi, tan ulahanira saṅ vəruh iṅ saṅ hyaṅ āgama, apan maṅkana dharmaniṅ dadi janma eṅət iṅ krama.

§250 riṅ voṅ amahugi rabiniṅ arabi, lavan amahugi laraṅaniṅ alaraṅan, amahugiha riṅ kavula dāsihnira saṅ ləvih, makādi kavulanira saṅ amava bhūmi, amahugi pinahugi deniṅ voṅ vadon, akāraṇa paḍa karəpe, kaṅ denpahugekən burat, kəmbaṅ, suvəṅ, ali-ali, ladiṅ panunuratan, paṅririṅgitan, dodot, bhūṣaṇa, sapavevehiṅ amahugi uga pavevehe kaṅ lanaṅ, manih pavevehe kaṅ vadon ika, katəmu asisivo lavan voṅ vadon riṅ asəpi, makādi yen aṅguguṇanana, iku strīsaṅgrahaṇa arane, ḍəṇḍa pati doṣane, maṅkana liṅ saṅ paṇḍita.

§251 riṅ voṅ abəcik kula kajātine, iṅuṅgahan deniṅ rarā, tan doṣanana kaṅ iṅuṅgahan ika, denira saṅ amava bhūmi . riṅ voṅ asor kajātine, sor kulane, iṅuṅgahan iṅ rarā menak kajātine, pisahakəna rarā ika lavan kaṅ den-uṅgahi, huvus apisah, takonana denira voṅ-atuvane rarā ika, yen dudu karəpe mantu voṅ lanaṅ sor kulane ika, patenana voṅ lanaṅ ika denira, rarā ika ulihakəna mariṅ rarāmane manih, yen paḍa karəpe rarā ika lavan rarāmane lanaṅ, voṅ lanaṅ kasor kulane ika, aveha tukon mariṅ bapaniṅ rarā ika, javi kapatəh arane.

§252 riṅ voṅ vadon amamaraṅ , akon alakiha riṅ mitrane vadon, lavan hana voṅ vadon sapadaluran lavan voṅ vadon luṅhā atatavan iṅiṅgatakən deniṅ voṅ lanaṅ, manih hana voṅ vadon aveh dunuṅan iṅ voṅ luṅhā, riṅ voṅ vadon maṅkana, katəlu iku ḍəṇḍanən pataṅ tali denira saṅ amava bhūmi.

§253 riṅ voṅ muṅgah mariṅ paturoniṅ apaturon, tan pakone kaṅ adr̥ve umah , nora amet dr̥ve, kevala muṅgah, yen vəṅi kālane, ḍəṇḍanən roṅ lakṣa denira saṅ amava bhūmi, yen rahina kālane muṅgah ḍəṇḍa limaṅ tali , yen asiṅidan hana den- kavədeni , ḍəṇḍa saṅaṅ tali təluṅ atak, yen təka sakiṅ tan-vəruhe ḍəṇḍa nəm tali samās, yen amarani sakiṅ agalake, tur anaṅtaṅ, tan aṅunus kəris, ḍəṇḍa salakṣa, aṅunus kəris, tur aməraṅ saka, vaton, galar , ḍəṇḍa roṅ lakṣa denira saṅ amava bhūmi, yen dadi vicāra riṅ mañjiṅ iṅ umah maṅkana doṣane, yen kaṅ adr̥ve umah tan harəp amicāraha riṅ mañjiṅ iṅ umahiṅ aumah, tur aṅunus kəris sākṣaṇa vənaṅ patihane dene kaṅ adr̥ve umah, tan vicaranən .

§254 riṅ voṅ tinambaṅ deniṅ lakine, kaṅ lanaṅ luṅhā amet dharma, atakitaki, ulahayu, antinən dene kaṅ vadon voluṅ tahun, yen luṅhā aṅaji amet śāstra antəkna nəm tahun, yen luṅhā adagaṅ, alayar, amet artha, antekna sapuluh tahun, yen luṅhā arabi antekna təluṅ tahun, yen ora akikirim kaṅ lanaṅ riṅ rabine ika, vənaṅ alakiya riṅ len . riṅ voṅ vadon tinambaṅ dene lakine kaṅ lanaṅ apaparan anduradeśa, antinən pataṅ tahun dene voṅ vadon ika, nora təka pataṅ tahun, vənaṅ kaṅ vadon alakiya riṅ len.

§255 riṅ voṅ vadon alaki riṅ len, yen kaṅ lanaṅ mula hilaṅ, māti riṅ parane kunəṅ, karuṅu lumaku viku, kumiṅ tan kavaśa riṅ saṅgama, makādi vuḍug larane, yen maṅkana tiṅkahiṅ voṅ lanaṅ ika, kaṅ vadon vənaṅ alakiya riṅ len.

§256 riṅ voṅ lanaṅ yen edan-edanən, yen agriṅ aṅgirih larane, yen ayan larane, kumiṅ tan lanaṅ vəkasan elik kaṅ vadon, antinən təluṅ tahun, voṅ lanaṅ ika dene rabine, konən aṅulatana tamba, yen tan varas iṅ tluṅ tahun kaṅ lanaṅ ika, tan doṣanana voṅ vadon ika, yen alakiya riṅ len, sapanukune tan muliha mariṅ voṅ lanaṅ ika, aṅanti səminiṅ paṅ akiṅ arane.

§257 riṅ voṅ vadon elik iṅ lakine, antinən satahun dene lakine, yen malər elik riṅ satahun voṅ vadon ika, amaṅsulakəna tukon anikəla piṇḍo, hamañcal turon arane.

§258 yen saṅ brāhmaṇa sira harabi papat, sahos kavoṅane rabinira papat, harabi pada kavoṅanira, sira saṅ brāhmaṇi, manih arabi kṣatriya kula, manih arabi voṅ tani vadana, manih arabi voṅ adagaṅ pr̥ḍana, ika ta rabinira papat, paḍa anak-anak saviji sovaṅ, vəkasan saṅ brāhmaṇa kaṅ arabi papat mati sira, hatiṅgal anak papat, arthanira saṅ brāhmaṇa sakəṭi dinum pinarapat, tiṅkahiṅ dum-duman vuvusən maṅke, hanakiṅ rabinira saṅ brāhmaṇa lavan brahmaṇi, kaduman pataṅ lakṣa, hanakira saṅ brāhmaṇa lavan kṣatriya kula, kaduman təluṅ lakṣa, hanakira saṅ brāhmaṇa lavan thanivadanakula, kaduman roṅ lakṣa, hanakira saṅ brāhmaṇa lavan adagaṅ strībaṇijakula, kaduman salakṣa, maṅkana ta reh iṅ dum-dumaniṅ saṅ brāhmaṇa yen arabi catur janma, apan iṅ kula kavoṅan tan hana hamaḍani kulaniṅ saṅ brāhmaṇa, sira uttamakula , kunaṅ yen saṅ brāhmaṇa anak-anak lavan jajamahan sor janmane voṅ atuvane vadon, anak saṅ brāhmaṇa ika, dumana savəlasan uga, tan vehana sapadumaniṅ kaṅ mətu sakiṅ brāhmaṇi, sakiṅ kṣatriya, sakiṅ voṅ tani, sakiṅ adagaṅ, tan paḍakna, maṅkana dharmaniṅ sarat kabeh .

§259 hana ta vətuniṅ anak rovəlas ucapən maṅke, liṅ bhaṭāra manu mavarah riṅ janma kabeh, iṅətakna sapatiṅ ambatgave, nənəm kehiṅ anak, vehana dr̥ve kaliliran, kaṅ nənəmaniṅ anak tan vehana dr̥ve kaliliran, paran ta patuṅgal-tuṅgalane, anakiṅ rabi saka rarehan duk paḍa jajaka rara, olihiṅ ramā-reṇa amaraṅ, rabi kapiṅroniṅ ahomah-omah, vuvus alakiha tuvi, ṅaṅiṅ tan hana pocapane hala, tan pavada, tur kinon alakiha deniṅ rāma-reṇane, anak pavevehiṅ sanak, kadaṅ-varga, anak pinalaku anakiṅ voṅ len, anak olihiṅ rabi abibisan, kinon deniṅ laki, saṅkane anak-anak, anakiṅ voṅ len den-buñcal pinupu-pupu iṅaku anak, iku kaṅ nənəm vənaṅ ameta dr̥ve kaliliran. əndi ta kaṅ nənəmane nora vənaṅ ameta dr̥ve kaliliran, anak səḍəṅiṅ rarā tan kasapekṣan kaṅ pinakabapa, anak cacaruban akeh anḍuha, anak olihiṅ atuku, anakiṅ voṅ vadon apəpəgatan lavan lakine tumuli alaki riṅ len, mahu kavoran voṅ vadon ika, mati lakine kapiṇḍo, tan alavas mulih riṅ lakine mula anutugadən dadihani rara ika, anakiṅ voṅ len amalaku iṅaku anak, anakiṅ kavula sor kavoṅane iṅaku anak.

§260 yen anak paveveh, lavan anakiṅ voṅ len ginave anak, vehana satəṅah dum-dumane, tan milu kaduman bhuminiṅ aṅaku anak, yenora hana anak təmən, vənaṅ ikaṅ anak paveveh, anakiṅ len ginave anak, aṅalapa siṅ sadr̥veniṅ aṅaku anak.

§261 riṅ dr̥ve vinevehakən iṅ rabine deniṅ lakine, manih riṅ anak vinehan dr̥ve deniṅ bapa, duk lagi huripe kasapekṣan deniṅ anak-rabi jivadana iku arane, riṅ dr̥ve maṅkana, tan vənaṅ udalən deniṅ para sanak, kaṅ mətu sakiṅ rabi len , kaṅ vinehan jivadana, uga viśeṣa riṅ dr̥ve paveveh ika.

§262 tiṅkahiṅ putra niṅ pisis, varahakəna patutuṅgalan iṅ arane, kāyavr̥ddhi, voṅ amutrani aṅlakokən gave abot adaṅan, kālavr̥ddhi voṅ ahutaṅ haməmətoni naṅkən vulan, kāritā vr̥ddhi voṅ ahutaṅ tinuduhan gave, cakravr̥ddhi voṅ ahutaṅ anikəl aṅguluṅ putrane, papat kehiṅ kalantara putraniṅ pirak, maṅkana yen ujar iṅ śāstra.

§263 tiṅkahiṅ putraniṅ pisis, aputra naṅkən vulan hiṅane, riṅ pisis sevu aputraha roṅ daśa, tluṅ daśa, pataṅ daśa, limaṅ daśa, maṅkana putraniṅ pisis , riṅ sevu naṅkən vulan, deniṅ pradana amutrakəna pisis, anuta varṇaniṅ voṅ ahutaṅ, katuturakna ika.

§264 kāyikāvr̥ddhi, kālikāvr̥ddhi, kāritāvr̥ddhi, cakravr̥ddhi, ləvih ika, śikhavr̥ddhi, aputra pipilan, bhogavr̥ddhi, aputra paṅan, haṅupaya siṅ enak, vinehakən iṅ gənahe ahutaṅ, salviraniṅ putra, tan aṅəloṅa pavitan.

§265 maṅkana manih riṅ hutaṅ pisis, panikəle piṅro uga, dodot anikəl piṅtəlu uga, yan ahutaṅ pari anikəl piṅlima uga, yan ahutaṅ kombala, ahutaṅ tutuṅgaṅan, ahutaṅ guci, yen riṅ nəm tahun tan panahur, anikəl piṅlima uga, maṅkana kramane, yen anut śāsananiṅ ahutaṅ.

§266 kunəṅ yen ahutaṅ ajaran vadon, kəbo vadon, sapi vadon, yen təka riṅ teluṅ tahun, tuṅgal muliha roro, iku kramane.

§267 riṅ bhukten, pucaṅ tirisan, baḍeg, savalan, vovohan, sakalviriṅ vovohan, yen olihiṅ amiśeṣa bhukti, bhukti kinavaśakən iṅ len, sakiṅ kəlare, kaṅ adr̥ve bhukti viniśeṣa ika ta kaṅ aṅgaḍuhi surat pikukuh, akeh sākṣine duk vinehan piyagəm dene kaṅ aveh, aṅhiṅ kinavaśakən dene kaṅ amiśeṣa bhukti ika, sakiṅ tan kavaśaniṅ kaṅ adr̥ve bhukti, den-dahut tan kadahut, aṅhiṅ malər anali-nali, ika ta arane bhukti tan śakti, dene kaṅ amiśeṣa ambhukti, arane bhukti tan yukti liṅniṅ śāstra maṅkana.

§268 apan iṅ bhūmi bhinukti deniṅ len kinavruhan deniṅ adr̥ve bhūmi, riṅ roṅ puluh tahun lavase bhinukti deniṅ para, mənəṅ tan paṅucap kaṅ adr̥ve bhūmi, yan maṅkana hilaṅ dr̥vene bhumine, maṅkana hilaṅ bhukti pavevehira saṅ vatək dāna, bhuktinən deniṅ voṅ len, akaraṇa sakiṅ valate, hilaṅ pavehira saṅ aveh, yadyapin ikā riṅ mas tuvi, vinalat iṅ para, sakiṅ vədine amalakuha riṅ mas kaṅ den-valat deniṅ voṅ ika, mənəṅ tan paṅucap kaṅ adr̥ve, riṅ sadaśa tahun lavase, hilaṅ riṅ mas maṅkana.

§269 yen hana dr̥ve sarūpavarṇaniṅ dr̥ve, den-tiṅgalakən dene kaṅ adr̥ve, rakṣanən denira saṅ adr̥ve bhūmi rumuhun, lavasira aṅrakṣaha təluṅ tahun, yen təka kaṅ adr̥ve riṅ təluṅ tahun, vehakəna dr̥vene , yen livata sakiṅ təluṅ tahun, petən denira saṅ amava bhūmi, apan dr̥vyanira ika.

§270 manih tiṅkahiṅ kavula, saṅkane dadi kavula, aṅavula dene katavan, aṅavula deniṅ paṅan, aṅavula duk mahu mətu sakiṅ rarāmane vadon mətu riṅ umahe gustine, kavula olihiṅ atuku, kavula paveveh iṅ voṅ, kavula kaliliran sakiṅ rarāma lanaṅ vadon, aṅavula dene kaḍəṇḍa, pipitu saṅkaniṅ dadi kavulaniṅ voṅ, riṅ kavula maṅkana ta kabeh, yen harəp saha sakiṅ gustine, anəbusā hutaṅ rumuhun.

§271 kunəṅ riṅ voṅ ahutaṅ sakiṅ paṅane, yen tan alavas dene aṅavula, hanahura samulene kaṅ den-paṅan salavase tan kavaśa anambut gavene gustine.

§272 riṅ voṅ amarāśraya aṅher bhūminiṅ abhūmi, deśaniṅ adeśa, aṅavula⟨EdJ: 93⟩ kinavulakən tan harəp, viniddhi kinonkon deniṅ gusti deniṅ lobhaniṅ amarāśraya, gustine ḍəṇḍanən salakṣa, denira saṅ amava bhūmi.

§273 riṅ voṅ adol kavula tan yogya dolən, tan kaharəpe dinol, den-viśeṣa dene kaṅ adol, ḍəṇḍanən salakṣa kaṅ adol denira saṅ amava bhūmi.

§274 riṅ voṅ anambani nora vəruh riṅ oṣadha, nora vəruh riṅ mantra prayoga, tan vəruh tatvaniṅ lara, aṅalap ta ya paṅhəbaṅ-həbaṅ riṅ voṅ agəriṅ ika, riṅ voṅ maṅkana paḍakəna lavan maliṅ, liñok riṅ voṅ anambani maṅkana, yen anambani upacāra tan varas avəkasan mati, ḍəṇḍanən pataṅ tali təluṅ atak, yen anambani voṅ tan varas anuli mati, ḍəṇḍa salakṣa, yen anambani riṅ saṅ brāhmaṇa, tan varas anuli mati, ḍəṇḍa roṅ lakṣa denira saṅ amava bhūmi, yen mati kaṅ den- tambani, vənaṅ patenana kaṅ anambani ika, denira saṅ amava bhūmi, maṅkana pagəhiṅ dharma, śāsananiṅ samavarṇa .

§275 nihan lviriṅ voṅ yogya gavenən sākṣi, voṅ agave gr̥ha, sugih mas pirak voṅ akeh anake, voṅ pagəh sugih riṅ tani, voṅ vruh riṅ dharma, vidagḍa riṅ aji śāstrāgama, voṅ vruh iṅ ala-hayuniṅ śīla yukti .