Sutasoma: Digital Edition — After the edition by Soewito Santoso (1975)

śrī bajrajñāna śūnyātmaka parama sirānindya riṅ rāt viśeṣa,

līlā śuddhā pratiṣṭheṅ hṛdaya jayajayāṅkən mahāsvargaloka,

ekacchatreṅ śarīrāṅuripi sahananiṅ bhūr bhuvah svah prakīrṇa,

sākṣāt candrārka pūrṇādbhuta ri vijilirān saṅka riṅ boddhacitta .

siṅgih yan siddha yogīśvara vəkasira saṅ sātmya lāvan bhaṭāra,

sarvajñāmūrti śūnyāganal alit inucap muṣṭiniṅ dharmatattva,

saṅsiptān pet hulik riṅ hati sira səkuṅən yoga lāvan samādhi,

byakta lvir bhrāntacittāṅrasa rivarivayniṅ nirmalācintyarūpa.*

ndah yekān maṅkana śānti kinəñəp i tutur saṅ huvus siddha yogi,

pūjān riṅ jñāna śuddhāparimita śaraṇāniṅ mikət laṅvalaṅvan,

dūran ṅvaṅ siddha kavyāṅiduṅa hivaṅ apan tan vruh iṅ śāstra mātra,*

ṅhiṅ kevran deniṅ ambək ragaragan i manah saṅ kavī rājya śobha.

pūrva prastāvaniṅ parva racana ginəlar saṅka riṅ boddhakavya,

ṅūnī dvāpāra riṅ treta kṛtayuga siraṅ sarvadharmāṅgakāra,

tan len hyaṅ brahmaviṣṇvīśvara sira matəmah bhūpatī martyaloka,

maṅke prāptaṅ kali śrī jinapati manurun mātyanaṅ kālamūrkha.

sambandhan śrī mahāketu kurukula sirānakniraṅ koravāṅśa ,

devī prajñādharī kāsihira pinuji riṅ rāt putus riṅ kahayvan,

ṅkāneṅ rājyādhikeṅ hastina sinivi təkapniṅ mahāvīrasaṅgha ,*

sakvehkveh saṅ vatək bhūpati sira mararəm bhakti riṅ śrī narendra.

śobhaṅ rājyahaləp lvir smarabhavana ləyəp sarvadibyāprameya,

dvāranyārmarpat atyadbhuta kanaka murub lvir gunuṅ bahni muntab,

sə̄k raṅkaṅ mās maṇīndre* daləm ika kuməñar ratnasaṅghanya muñcar,

dīptāvā rātri denyan rahina sama hiḍəpniṅ vvaṅ iṅ jro kaḍatvan.

kintu* pvekaṅ sarāt durbala kinaraṇaniṅ daitya len rākṣasākveh,

kīrṇāglar sə̄k pənuh riṅ vana calanikanaṅ ratnakāṇḍādirājya,

krūrāmrəp kuvvamuṅpaṅ mamirurut anavan vanva sañcūrṇa denya; vrinvrin sakveh vatək bhāratakula karuhun saṅ tapasvī nagāgra.

nā hetu śrī narendrāṅutus i sahananiṅ vīrayodhādbhuteṅ praṅ,

mvaṅ saṅ yogīśvarāṅampəha ri pamanas iṅ daitya kālāgnitulya,

ndātan māntun* jugāṅhiṅ sutahaji karəṅə̄ bhasmyaniṅ śatru śakti,

maṅkā liṅ saṅ munīndrākirakira ri hajə̄ṅ śrī mahāketurāja.

varṇan saṅ śrī narendrādhipa sira maharəp mānaka mvaṅ sudevī,

hetunyan bodhicitt enulahulahira riṅ sthāna saṅ hyaṅ jinārca,

rəp prāptaṅ rātri* tistis marəṅi həniṅ ikaṅ jñāna candropamanya,

ṅkā ta śrī bodhisattvājar i gatinira yan sūnva saṅ śrī narendra.

tuṣṭāmbək śrī mahāketu manəmu paramānugraha hyaṅ jinendra,

śīghran ampəhniraṅ yoga vəkasan umijil śobha saṅkeṅ pahoman,

prāpta ṅkāne sudevī sira mavaravarah yan huvus labdhakārya,

byaktaṅ rāt svastha cūrṇaṅ kali hələm i vijil śrī mahāśākyasiṅhā.

ndan śīghraṅ kāla tandvāṅiḍam ika sira saṅ śrī mahārājapatnī,

harṣāmbək śrī narendrāṅarivuvuri manah saṅ səḍəṅ kesyan* amrat,

pūjāmantrāstuti mvaṅ sayusayut inivə̄ homayajñānukāri,

sakveh saṅ bhikṣukācārya nagara humiriṅ yoga saṅ śrī narendra.

ndah sakvehkvehnikaṅ strī daləm ika ruməṅə̄ garbhini śrī supatnī,

vṛddhaṅ lek śīghra molah vətəṅira matutur saṅ haneṅ garbha dibya,

liṇḍū taṅ bhūmi tejānaravata dumilah trus sakeṅ svargaloka,

hūṅhūṅniṅ devasaṅgheṅ laṅit ajayajayan sotaniṅ buddhajanma

atha ri səḍəṅ vatək hyaṅ ika yan pamūrṣita mamuṣpa riṅ* nāgara,

pramukha bhaṭāra śakra saha kinnarādhipa surarṣi devāṅganā ,

kṣaṇan umijil bhaṭāra jina śuddharūpa** kularājaputrādhika,

sukha ta manah narendra lumihat sireṅ anak apūrva riṅ kādbhuta.

api tuvi sarvapāpa ya vināśa bhasmi ri vijilnirānindita,

tumitis umuṅkut ārja mabənər bule valaka suṣṭa maryāhala,

kimuta tikaṅ vujil dadi magə̄ṅ tapas hirəṅ aneka roga kṣaya,

karaṇanikaṅ sarājya paḍa bhaktyaṅastuti ri jə̄ṅ narendrātmaja.

ṅuni-ṅuni saṅ vvaṅ adyah i daləm kapūhan i sirāmihat kasrəpan,

kakakaka len uveña matuluṅ paḍāṅdan i hajə̄ṅnirāṅde sukha,

hana sira vṛddha kilyanikəlīka rakvan inutus narendrādhipa ,

valinira tan kuraṅ capaṅ ikārja sampun arəpat samākveh marək*

tan varṇan ri lavasnirārəja manohara hinuniṅan iṅ vvaṅ iṅ puri,

sampun rakva gənəp pituṅ vulan ikaṅ dina təmu bañu saṅsayātuha,

khyātī śrī sutasoma nāmanira de nṛpati vinuvus iṅ jagat kabeh,

saṅke varṇanirāgave sukhanikaṅ bhuvana pinakamuṣṭiniṅ hiḍəp.

lvir riṅ svapna tuvuh nireṅgal aṅadəg laku* talayu kumāra sadṛśa,**

solah bhāvanireki cumbu pinacəhpacəh analuki hetuniṅ guyu,

saṅsiptān ri huvusnirāpupak agə̄ṅ tumaruṇa paripūrṇa suśrama,

hyaṅniṅ kiṅkin aṅiṇḍarat səmuni rūmnira vahu tumurun sakeṅ tavaṅ.

ndin ṅganya ṅvaṅ anəmva rājasuta rə̄ja kadi sira surūpa digjaya,

strīstrīṅ jro pura ləṅləṅ epu kasə̄kan smara lumihat i saṅ nṛpātmaja,

təkvan rakva vijña kadi tan hana siriṅanireṅ pralāpita,* baryan rātri** guritnireki viniveka rinasan amaṅun lare hati.

maṅkin tībra manahnya yan maṅən i raśminira pinakadevaniṅ puri,

prajñeṅ gīta vicakṣaṇānvam aguṇa vruh aṅinaki ri buddhiniṅ para,

śāstrajñādhika vṛddhacitta masih iṅ kasihan ika parārtha kevala,

sarvāstrādbhuta saṅka riṅ manah aneka tuhutuhu jinātmakeṅ praja.

yeka hetunikaṅ jagat paḍa subhakti malulut i sirāmbək uttama,

sāmantaprabhu* vīrayodha juga tan hana luput i manahnikeṅ** hati,

mvaṅ rakryan mapatih jayendra sira tan sipi manahira riṅ nṛpātmaja,

viprāgrānupamādiniṅ kuśala paṇḍita nagaran ayajña sasmṛti.

lumreṅ rāt subhagaṅ triloka kajanapriyanira katəkaṅ purāntara,

riṅ svargastha bhaṭāra śambhu para devagaṇa milu maṅastave sira,

ṅhiṅ tekaṅ surakanyakāsəmu vival mihat i manisireṅ svanāgara,

deniṅ buddhinirāgraheṅ madanatantra manalahasa riṅ səḍəṅ rimaṅ.

siṅgih yan jinamūrti śuddha kulavaṅśaja vəkavəka śāstrapāraga,

siṅhit riṅ bratayogamantra satuvuhnira satata subhakti riṅ guru,

śrī jñāneśvarabajra rakva guru saṅ prabhu gurunira saṅ nṛpātmaja,

nā hetunya tikaṅ kaṭuṅkajana tan dahat ahəli kasādhun uttama.

buddhi śrī naranātha maṅkin atələb sihira ri sira saṅ nṛpātmaja,

ṅhiṅ strīratna viśeṣa yogya pasuṅe sira mayugala rājaputrikā,

təkvan rakva sirekinastvakna bhūpati paṅucapire nareśvarī.

ṅkā saṅ nātha ta rakva maṅjuru* sumivya tumuta ri siraṅ vatək ratu.

ndan sakvehnira saṅ marək pramukha saṅ dvijavara rəṣi śeva sogata,

kapvānūt i vuvus narendra tuhu dharmakaraṇa magave jagaddhita,

śīghrāṅ dūta kinon lumakva marəke nṛpasuta sira mañjiṅeṅ puri,

sampun prāpta ri sanmukha nṛpati saṅ nṛpasuta tumuluy maṅañjali.

oṁ putraṅku bhaṭāra buddha kinabhaktyan ta pramāṇeṅhulun,

svastyastu prabhu dharmamūrtiṅ usirən tāṅrakṣa dharmasthiti,

āpan byakta hilaṅ gələhgələh ikaṅ rāt yan kitekāṇḍiri,

paṅliṅgan ri vijilta ṅūni magave tuṣṭāpramāṇeṅ jagat.

saṅsiptanya tuhanku rakva kita ratvānugrahaṅkvī kita,

sakveh saṅ paranātha yeka pinaṅən sāmanta yodha prabhu,

sambyāsomahaneki māstvakna donteṅ bhūmirājādhipa,

ṅkā rakryan mihate raranya pilihən ndan siṅ sayogyalapən.

təkvan rakva kiteki maṅgala viśeṣāmumpuni stry ahajə̄ṅ,

ratna mvaṅ maṇirāja pakṣi curiga ndan siṅ ləvih riṅ jagat,

maṅgəh dṛvyani saṅ narendra karuhun taṅ jivaniṅ rāt kabeh,

yapvan laṅghanavāda ḍaṇḍa niyata ṅvvaṅ yan prasaṅghe kita.

lāvan tan hana yuktyaniṅ kadi tuhankvaṅhiṅ mavinyosirən,

muktyaṅ saṅgama kāmatantra makadon putrātidharmottama,

riṅ bhogādhika padma ḍaṇḍa gəlarən taṅ buddhavījākṣara,

saṅ hyaṅ buddha vibāna supta ya gəṅən riṅ byūha kāmāndhaka.

yapvan maṅkana nitya denta* magave subhīkṣaṅ** jagat,

mvaṅ sakveh balayodha yeka varahən riṅ nītiśāstrān laku,

aṣṭam saṅ*** caturāśrameka tarinən riṅ pañcaśīlākrama,

vidyā mvaṅ brata len tapanya huniṅan de śrī narendrādhipa.

āpan rakva haneki paṇḍita mahāduṣṭātisādhun katon,

muṅgv iṅ maṇḍala śiṣyasaṅgha vək i sə̄k strīstryārja makveh viku,

len taṅ strā rabiniṅ pravīra masurud saṅskāra bhaktiṅ sənəṅ,

tan luptān pinaranya lisya mavarah dharmātəmah saṅgama.

yekāṅde huyaṅ iṅ triloka magave saṅhāra hārohara,

siṅgih yan suta tattvaniṅ parama śiṣyāṅkən guru mvaṅ bapa,

traṅtraṅ vyoma hudan salah masa vətunyan sarvavījān vagu,

tistis taṅ daśadeśa duṣṭa malivər griṅ tan pakālāṅasut.

saṅksepanya duvəg tibāna vara ḍaṇḍā paṇḍya yan maṅkana,

sakvehkveh ika rampasən valatuṅən bvāṅən mareṅ sāgara,

svasthaṅ rāt palapanya śiṣyanika tan campur prasiddhāhayu,

dīrghyāyuh sira saṅ narendra tuhu yan bhūpālakāṅrakṣa rāt.

sājñā śrī naranātha dibya kahiḍəp lvir tīrtha śuddhoṣadhi,

siṅgih ṅganya purihniṅ ambək agave dharmātmajānindita,

niṣṭanyodaya śāstratattva juga tan maṅgəh təkapniṅhulun,

deniṅ buddhi kahīnapuṇyan akalis ri ṅvvaṅ sinaṅgah prabhu.

yan kāṅən rusit iṅ giṇāmava jagat tan vriṅ dayāṅenaka,

sə̄k riṅ vīrya mahāprabhāva sakalāvak hyaṅ jagatkāraṇa,

rājānugraha vigraheki magave bhaktyānikaṅ rāt kabeh,

strīratnādhika bhoga bhojana pənuh yekāmaṅun pātaka.

təkvan tan kavənaṅ sumiṅgahana sakvehniṅ mahādurjana,

stryānak mvaṅ kulavandhu yeka haməsən yāṅkən kaləṅkeṅ jagat,

yadyan rākṣasa daitya bhūta muburaṅ rāt deva tovyadbhuta,

maṅgəh śatru təkap saṅ aṅdiri ləhəṅ yan vīra śaktiṅ raṇa.

yapvan sor sipi kaśmalanyan inucap byaktāṅhət iṅ rorava,

rug* sakveh nikanaṅ svarājya kahavaṅ dharma pratiṣṭheṅ daṅū,**

śūrātyanta ri kāstavanyan atupis yan śatrunāśādbhuta ,***

hiṅsā pāpa nikeka tan dva rumavuh dūrāṅ**** kayogīśvaran.

saṅksepanya vuvus patik haji ri sojar śrī narendrādhipa,

ndātan səṅgahən alpadharma kuṭilāpraṅvaktra niśśāsana,

nantən tan hana len sakeṅ paramaśūnyārəmbaniṅ parvata,

jāti saṅgama vighna mārga karaṇa ndi nyaṅ panəmvaṅ hayu.

nāhan liṅ naranāthaputra mavuvus puh tvas narendrādhipa,

mvaṅ sakveh para vīrayodha ruməṅə̄ mvaṅ saṅ mahāśabdika,

tovin ṅganya padoməṅənməṅən i saṅgup śrī narendrātmaja,

deniṅ nvamnira siṅhit iṅ paramayogīndramunah vāhyaka.

ṅkā rakryan mapatih jayendra mavuvus marmāṅalap tvas rəsəp,

siṅgih liṅni tuhanku yogya pituhun de saṅ mahāpaṇḍita,

tan gyagyākna de nṛpātmaja manahniṅ sura roteṅ* tapa,

tolih ṅganya taṅis narendra katilar mvaṅ reṇa rakryan kari.

milvaṅ rāt makətər paḍānalahasonək mūrchitākveh maṅə̄,

astam taṅ balavīrayodha kapəgan puṅgəl manahnye hati,

tan hopən tikaṅ ambək iṅ vvaṅ i daləm strī kanyakāṅgə̄ṅ viṅit, āpan rakva narendraputra karəsəpnyāmūrva rāge tilam.

ndin ṅvaṅ tan lələhan* tumiṅhala ri rūmniṅ muṅsiraṅ parvata,

dhīrānvam prabhu cakravartitanayā dadyaparagyātəṅə̄,

cūrṇaṅ manmatharūpa yeka haməsen** nisroma mundyātmaka,

gə̄ṅniṅ vīrya viśeṣa rakva paḍəmən riṅ jñāna śāntasmṛti.

ratnānopama tāmrabandha mara rūm tāṅde panasniṅ hati,

candrārkādbhuta pūrṇa tapva ri səḍəṅniṅ megha kāmbvan riris,

śāstrajñādhika paṇḍiteṅ kujana bhūmyātyanta riṅ nisphala,

maṅkā kṣatriyajanma rājasuta yan muṅsyamriheṅ śūnyata.

tuvin rakva haneka dharma karəṅə̄ de saṅ mahābhikṣuka,

vṛddhyānak putu yogya yeka pasuṅeṅ mātāpitānindita ,

vidyāgocara kīrṇa śiṣya pasuṅeṅ ḍaṅ gurvanantākrama,

dharmādeśana śuddhalakṣaṇa tapānun dāna riṅ rāt kabeh.

Kayogya nika māsku rakva juga sakṣaṇa sumilihane nareśvara,

amuktyakna lābhaniṅ jaya mamṛddhyakna suta sutantra kottama,

huvus pva kavaśaṅ manah licin ikāpagəh atiśaya vṛddhya nirmala,

samaṅkana narendraputra musireṅ giri sumikəpa sandhiniṅ tapa.

kunəṅ phalanikeki tan pagavayambək analahasa duhkhhaniṅ jagat,

narendra sira līna sampun atuhā ndin asayuta ri saṅ nṛpātmaja,

hana pva ri taṅisnikaṅ stryanaka tovi tan ucapən avarṇa bañcana,

purīṣa həyəh iṅ padamvan ika tan kahatakna təkap maharddhika.

nā de jayendra mavuvus ri narendraputra, ḍaṅ hyaṅ mahosadhi purohita vijña mojar,

yogyeki rakva ri haturnya mahātibhāgya,

siṅgih purihniṅ atibhakti viśeṣa mantri.

lavan muvah təmah ikekin anindya sūkṣma,

tan saṅka riṅ marəna muṣṭi vara* munīndra,

nyaṅ sapta yoga gəlarənta sahendikanta,** byaktaṅ svacitta mapagəh təka riṅ nirātmya.

nyaṅ śūnya pājarana liṅta mareṅ vanādri,

ṅke rājya śūnya ta təmahnika merutulya,

riṅ śūnya nagara paḍanyan amukti pāpa,

yan tan vruh iṅ paramaśūnya śinūnyan iṅ vaṅ.

saṅsipta teki vuvus iṅ vaṅ i jə̄ṅ narārya,

tan vaṅ mavalkala jugeka pinaṇḍiteṅ rāt,

tan muṇḍirūpa tuvi tan si maliṅgamūrdha,

vāhyātma tovi kəta yan makamūrti saṅ hyaṅ.

yapvan viśeṣa ratu maṅgala teki pāpa,

yan paṇḍyarūpa juga maṅgəha taṅ kadibyan,

ḍo hayva maṅkana təkap naranāthaputra,

jñānātiśuddha paramārtha viśeṣa mūlya,

saṅ paṇḍitārya* nagarīkiṅ usāna tonən,

strīratna pājaran ireki mahātiramya,

līlāgagā matun i rūmniṅ akuṅ kalaṅvan,

lolyānaḍah** siran amukti sasesiniṅ ken.

pūjā samādhi rinəgəpnira dhīracitta,

ṅkāne təṅah miṅiṅ arūm alurus* sugandha,

mantranya ta pva rəṅih iṅ kakənan smarāmrat,

susv arja lepana yayan tuməmuṅ kasiddhyan.

nā liṅ dvijendra sahaśāstra sahopadeśa,

saṅ śrī narendrasuta sārjava yatna mojar,

vruh ṅvaṅ mateka yan asiṅ ṅgvananiṅ mayoga,

yan paṇḍiteṅ* manah acintya viśeṣa riṅ rāt.

ṅhiṅ durlabheki saṅ anəmva sireṅ svarājya,

saṅ nisprayojana yayan sira kepvan ambək,

deniṅ byamoha ri kaśaktin iṅ indriyārtha,

rāgādi yeka magave sasar iṅ kamokṣaṇ.

kakhyāti riṅ giri ya toṅgvananiṅ mayoga,

mon kṣetra* sindhu vana durga bhayan** karəsrəs,

riṅ śūnyamārga tuvi yogyaṅ anuṅ ya dūra,

saṅkeṅ kaḍatvan usirən paramottameka.

nahan vuvusnira tatan kavənaṅ vinighnan,

śrī hastinendra kalavan naranāthapatnī,*

kədvā marabyakna liṅnira rakva maṅke,

pūjān sireṅ nagara de para vīrasaṅgha .

ndan riṅ samantara surupnira saṅ hyaṅ arka,

sampun lugas ri papupul naranātha riṅ jro,

saṅ śrī narendrasuta śīghra təkeṅ svaveśma,

mvaṅ vīra sena humiriṅ paḍa dibyarūpa.

tistis māsa pilih tabəh pat i kəjəpniṅ akəmit i siraṅ narendratanaya,

mampəh śabdanikaṅ garantuṅ alaṅə̄ ləṅəṅ asəpi manahnikaṅ sanagara,

ṅhiṅ rūmniṅ jaya ghaṇṭighaṇṭa karəṅə̄ mavurahan i* pikandəl iṅ pura humuṅ,

deniṅ kvehnira saṅ mahottama humastvajayajaya ri hayva saṅ narapati.

ndan saṅ śrī Sutasoma teki sira tan mrəm umaṅəni tuvuhnireki sivinən,

kevran deni manahnirā kahrət i bhuktya ni paṅavasaniṅ punarbhava gati, āpan tan hana len sakeṅ tapa jugā hulahakna təkap mahajana sadā,

pə̄ṅniṅ yoganirāśrayekana səḍəṅ havananiṅ umusir nirātmaka hələm.

nāhan hetunireki śīghran umijil məgat i lulut ireṅ yayah bibi sinər,

sampun prāpta sireṅ paṅastryanan* ikaṅ bala hinalivatan paḍāmrəm aturu,

sakvehniṅ gupurāṅdadak məṅa tatan vinəṅakən i təkap narendratanaya,

deniṅ jñāna viśeṣa tan hana vənaṅ humavərana** ri muṣṭiniṅ tvas inamər.

byātītan ri vijilnirāṅidul adoh kadi lakuniṅ anūkṣmakən hurip anis,

prāpteṅ deśa ri piṅgir iṅ pura mavāṅ śaśadhara ri samīpaniṅ pasavahan,

varṇan śrī naranātha mepu kapəgan sira ri hilaṅ i saṅ narendratanaya,

tan tṛṣṇe phalaniṅ prabhūttama nimittaniṅ aṅənəs i pamrəm iṅ balagaṇa.

sampun rakva pinet sireṅ nagara siṅ saparan ira ri* ṅūni nora katəmu,

yekā hetunikaṅ sarājya manaṅis kadi kapəjahan atri** riṅ*** pura humuṅ,

mūrchā śrī nṛpatīśvarī kapati tan vənaṅ anahən i tībraniṅ lara kinə̄l,

tandvodāni sirāṅliṅ asrət i vuvusnirān aṅurayanīrṇakən hati təñuh.

ahānaku tuhanku hāh sipi lalista bapa tan avəlas maṅaryakən,

haṅisyani matāku tan bəsur amakpak apitutur i sandhiniṅ naya,

ndi kūṅgvan i culuhculuhta tulusāsiha hiḍəpa ri saṅ nareśvara,

gumantya sivin iṅ jagat kita paṅə̄bananiṅ aśaraṇe svanāgara.

ujarku kinəñəpku yeka mamaṅun gə̄ṅ i sukha ni manah nareśvara,

marāṅrəs i manismanista saphalānulus asəmu bhaṭāra manmatha,

lalu pva ri tuhanta sūkṣma ri kəjəpniṅ akəmit umareṅ tapovana,

sumādhya ri katəmvan iṅ paramaśūnya tan aharəp i vīrya saṅ prabhu.

syapānuṅ usirənku rakva makajīvita ri vuyuṅa* saṅ nareśvara,

pilih tan agəgə̄h laraṅku yadiyan rva təluṅ anak akārya riṅ puri,

kita pva juga tan hanāṅuvuhi tan sapinalapala ri ṅhulun təmən,

uḍū ləhəṅa tāku matya supadin** kita tan umuliheṅ*** svanāgara.

nahan taṅis iraṅ narendradayitā makin amuhara* luhniṅ aṅrəṅə̄,

narendra kamatəṅgəṅən siran aṅepvan uməkəh apa tan vriṅ enaka,

ri ṅūni sira tan sakeṅ imaniman manahnira ri nareśvarātmaja,

nirāvaraṇa yoga sandhi paramārtha karaṇaniṅ anəmvakən sukha.

rikaṅ kṣaṇa bhaṭāra buddha sakalānurun i sira madadyaṅ ātmaja,

tinūt ni paṅiḍam narendramahiṣī ri vijiliran apūrva riṅ jagat,

valiṅnira mateki tuhva palarən saphala sivinən iṅ svanāgara,

balik pva magave viyoga pakabañcana sumək i manah nareśvara.

hanāmbək ira tan katəmva ni hanaknira savəṅi kalih vəṅi prihən,

pitovi kəta tan kapaṅgiha dasaṅ vəṅi livata kunaṅ sakerika,

ndatan* taləra riṅ svarājya musiraṅ girivana pinakeṣṭiniṅ hiḍəp,

sadenya pəjahāku liṅnira ri tan katəmunira nareśvarātmaja.

səḍəṅ nṛpati śokaduhkhhita ḍatəṅ sahanahananikaṅ balādhika,

sahānakəbi mañjiṅ iṅ pura muvah ratu sira bhakti maṅlavad,

lavan saṅ ativṛddha paṇḍita mahottama makamukha saṅ dvijeśvara,

sahojar ira vedaśāstra karəṅə̄ paṅimurimur ire nareśvara.

narendra huniṅan pataṅgəh i bhujaṅga haji marək i saṅ narādhipa,

muvah nṛpavadhū sireki juga tan dahat anahən i tībraniṅ lara,

apan purih ikaṅ dadinya mavimohita sukha tinəmunya tan luput,

ivəh təmən ikaṅ sada sukha ginə̄ṅnya matəmahana duhkhhiteṅ jagat.

kaliṅan ika hayva saṅ prabhu vimohita malara ri tan sih iṅ vidhi,

tatan taṅis ikaṅ vənaṅ lumipure nṛpati tuməkanaṅ prayojana,

bhaṭāra hana riṅ svacitta ya pəhən tumuduhakna muṣṭiniṅ hiḍəp,

sireki śaraṇāśrayanta sira kāraṇaniṅ anəmu duhkha len sukha.

nahan liṅ ira saṅ dvijendra sukha saṅ nṛpati tutur i rodhaniṅ manah,

hilaṅ pətəṅ ikaṅ tvas āsəmu kadi candra suminaṅ ava sampun iṅ javuh,

ikaṅ bala sumamburat paḍa huvus maṅulati ri siraṅ nṛpātmaja,

narendra hana riṅ pahoman ika tan caritakna lavan mahārddhika.

ndan saṅ śrī naranāthaputra caritan sira təka ri hujuṅnikaṅ vukir,

līlātūt hiriṅ iṅ gəgərgəgər aṅuṅkuli pasavahan iṅ ləbakləbak,

gəroṅgəroṅ roṅ prəḍuṅ iṅ juraṅ guinuruh atri bañunika sakeṅ ruhur vukir,

syoksyuk śabdanikaṅ tahən kapavanan kadi pasurak i śabdaniṅ tasik.

vanvākveh kuvu sīma* śūnya kapara patani jamur i piṅgir iṅ havan,

sənjaṅsənjaṅ ikan pinañcuran avarṇa kabuyutan i saṇḍiṅ iṅ pəkən,

strīstry akveh madulurdulur rara vulañjar ika paḍa maṅaṅsu riṅ ləbuh,

len tekaṅ marahup hanādyus asivo siṅ ulah ika paḍāvudāvudā.

kubvankubvan ikārəṇə̄b pakis avor kajakajaran i tīraniṅ juraṅ,

duryan vulvan aneka maṅgis anəḍəṅ pucaṅ arəja rinambatan sərəh,

aryan haṇḍuru riṅ gəgər gubug i saṇḍiṅ ika liniput iṅ pisaṅ gaḍiṅ,

baṇṭyaṅnyātri kəneṅ vilantih anusup kidaṅ ika malayu lavan vijuṅ.

pakṣinyāvurahan haneṅ paṅ arəbut vvahan anəḍəṅ i piṅgir iṅ havan,

cukcak caṅkiluṅan parañjaṅan ikāniruniru vuvus iṅ rəjit səpah,

kīrṇaṅ pakṣi garantuṅ iṅ paṅ alaṅə̄ ləṅəṅ asəmu kinaṅsyaṅ iṅ həpiṅ,

mraknyeñjuh maṅigel maniṅtiṅ aṅasin kadi maṅayap i piṅgir iṅ juraṅ.

lor vetanya təgaltəgal hapahapā paṅabətan* ika śūnya nismara,

kṣetrāgə̄ṅ kahiriṅ kidul vadara pə̄ṅ kayunika kasine lavan rukəm,

sə̄k tekaṅ kunapāgəlar hana hañar hana ləvas ahaməṅ səḍəṅ basah,

śvanyātryāvurahan vaneh ya marəbut cəṅəl alayu maṅīraken vəhaṅ.

ḍaṅḍaṅnyālivəran paḍātri mihat iṅ śava makətəkan iṅ ləbakləbak,

romanyādəl akət lavan śirah avor ḍukut akiṅ usuṅan haneṅ paḍu,*

len tekaṅ tahulan kapāla** matumaṅ garagasan i samīpaniṅ havan,

dodot vukən anahən kasampir i pagərnya kurakura gaḍaṅgaḍaṅ janur.

nyagrodhāsəlur iṅ ləmah kəpuh agə̄ṅ karamayan amilət təkeṅ ruhur,

sak raṅkaṅnyan amarpatāpaḍu vitāna ri təṅah ikanārja kokiran,

byātītan ri surup hyaṅ arka nṛpaputra sira ḍatəṅ arāryan iṅ yaśa,

ṅkān mañjiṅ sira riṅ paṅarcaṇan aṅarcaṇa ri saṅ atirūpa bheravī.

pūjān solah ireki śūnya rinəgəpnira ri huvusirān paṅañjali,

dhyāyi śrī varabodhisattva śinarīrakənira saha yoga dhāraka,

rəp prāptaṅ kiraṇe ruhur saka ri keśaniran asəmu mṛtyubhāsvara,

sampunyedərana pintige hulunireki hilaṅ i vadanā nṛpātmaja.

kāla śrī hastinendrātmaja səḍəṅ umənəb tiṅkah iṅ bāyu lumrā,

enak tāmbəknire tan hana rasa ni parokniṅ tiga jñāna śūnya,

umvas taṅ sveda saṅke rahinira tumibeṅ bhūmi lindvātighora,

ait śrī vidyutkarālī sira mijil i harəp saṅ səḍəṅ sūkṣmarūpa.

ghoraṅ varṇāhirəṅ dvādaśamukha dumilah sə̄ṅnikaṅ netra rakta,

daṅṣṭra rvāgātitīkṣṇāṅriṅiriṅi* masavit kāga kṛṣṇābhimāna,

keśāvyaṅ bāṅ kapālādbhuta səkar ira riṅ karṇa tulya dvicandra,

malvālaṇḍuṅ təḍuṅ iṅ vətəṅ akavaca moṅ carmma siṅhāṅgarūpa.

sarvāstrānekavarṇākrama ri taṅanirekaṅ daśāstra prakāra,

cāpa mvaṅ nāgapāśā kṛtala muśala len bajra cakrānivārya,

pūrvaṅ haste təṅən śobhita mamava kapālāputih śaṅkhatulya,

sumsum rah len vudukniṅ vvaṅ isinika kivāmuṣṭi khaḍgātitīkṣṇa.

tindak lvir parvatolah təka masiḍəkuṅ iṅ bhūmi bhaktyāpraṇamya,

ṅkāneṅ jə̄ṅ śrī narendrātmaja majar i təmahniṅ mahāyoga siddhi,

bhoh bhoh bhoh he kitaṅ sādhaka parama təmən tekuṅ ambəkta dibya,

siṅgih yan buddhamūrtyārəs i kaparagan iṅ bhāvacakrāprameya.*

he vruh matāku kita yan jinamūrti sākṣāt,

anvam suśīla jitacakṣu hanindyamantra,

ṣaḍvargaśatru matakut kəta* denta śīrṇa ,

len taṅ trivighna malayū paḍa sapta bhasma .

sakvehnya tan hana vənaṅ mihateṅ guṇanta,

brahmāvihāra catureki ya paṅlaganta,

metryāpagəh karuṇa tan surud iṅ svacitta,

śūreṅ manah mudita śīghra təkaṅ upeksa.

riṅ sūkṣma yoga kəlit iṅ paramārtha buddha,

vruh tan sakeṅ vasita te kita tan viśeṣa,

bhedanya tuṅgal ika tan hana mātra* denta,

gəmpuṅ kabeh ndi kari yan luputaṅ** kamokṣaṇ.

ndah kantənanya* sipi tuṣṭa nikiṅ bhaṭāra,

sobhāgya harṣa ri təkapta mamūrti saṅ hyaṅ,

svedāmbujāstu paṅaranta muvah ya maṅke,

sambandha ** denta liṅaniṅ paraloka təmbe.

nihan hana mateki dibya paṅanugrahaṅkve kita,

mahāhṛdayadhāraṇīki paṅaranya mantrādhika,

putusniṅ atiśakti vighna mala sarvaśatrum hilaṅ,

niroga nirupadravaṅ jana phalanya siddhyottama.*

tuvin ri səḍəṅanta dhīra mahaseṅ śmaśānālaya ,

nirāgraha maliṅgiheṅ kunapa lot madevāśraya,

samaṅkana kitān pamūrchitaknaṅ mahānugraha,

avās ri təkaniṅ prayojana sasādhya saṅ sādhaka.

apan vruh aku yan kitāharəp atiṅgalaṅ nāgara,

sumādhya ri katəmvaniṅ paramabodhisattvām laku,

sumeru girirāja rakvaṅ usirənta dibyottama,

nda yeka patapan bhaṭāra guru siddha yogīśvara.

nahan liṅira saṅ hyaṅ adbhuta maveh varānugraha,

visarjana sire kamantyan i huvusnirāṅakṣama,

narendrasuta somya mampeh ikanaṅ manah nirmala,

rikāmalih i yoga supta vəkasan ravuh taṅ dinā.

byatīta ri vijilnireki ri huvusnirāṅañjali,

təkeṅ yava matuṇḍa mārga ri samīpaniṅ parvata,

juraṅjuraṅ alas gunuṅ kalivatan tubanyābaruṅ,

kayunya vək i sə̄k pətuṅnya dumudul maniñjo paruṅ.

dharmāgə̄ṅ kālasan ika katəmu,

prāsādākveh pukah ikana rubuh,

vimba hyaṅ durmukhapati kaguliṅ,

ṅkāne sorniṅ gupura kasiharəp.

lor hyaṅ viṣṇvarca masemu mabhutəṅ,

krūraṅ aṅgā kṣaṇa taru tumuvuh,

dvārādhyakṣanya* paḍa kasulayah,

lvir daityāṅlah təkapira riṅ ayun.

tunvantunvan galagah ika kidul,

kagyat tekaṅ mṛga katunu məsat,

centən mvaṅ siṅha* ika makamukha,

muṅsī groṅ priṅganiṅ acala ləṅut.

taṅheh yan varṇan isinikaṅ alas,

truhtruh saṅ hyaṅ saha gərəh anitir,

śīghrādrəs taṅ javuh asəmu pinə̄h,

prodbhūtaṅ māruta parəṅ aṅasut.

yekāṅhə̄b śrī nṛpasuta sakarəṅ,

ṅkāne govok i kayunika magə̄ṅ,

bar pət tekaṅ riris ahəli padaṅ,

śīghrādan śrī nṛpasuta lumaris.

makveh taṅ parvata vana kahavan,

len tekaṅ pājaran inusinira,

sampun saptaṅ dina sira lumaku,

koṅaṅ tekaṅ giripati parana.

honyādbhuta hiriṅ ika ramya taṅ patapan ārja masəmu siluman,

ṅkāne harəp i ḍukuh ikān pahoman atiśobhita kagirigiri,

tumpaṅ pitu vuvuṅ ika meru bhāsvara pucaknya maṇimaya lumə̄ṅ,

dīptāsəmu havanani saṅ makahyaṅan umuṅsira paramapada.

sə̄k sarvakusuma hana handvaṅ arja masamīpa vulakan alaṅə̄,

jaṅgāṅalaya ri tətəniṅ mahāntən ika kāṅinan aṅavayavay,

kadyāvarah i ləṅəṅ ikaṅ tapovana paṅubvanan ika ri hisor,

kīrṇaṅ mamaṅuyu ri ləbakləbaknya maṅalulv asunika karəṅə̄.

śīghrāṇ ḍatəṅ ta sira riṅ patapan suramya,

sakveh maharṣi sama harṣaja tuṣṭacitta,

hyunhyun tumiṅhal i rarasnira dibyarūpa,

prāptāṅənəs kadi mure kəḍap iṅ tumiṅhal.

ṅkāne vitiṅ bhujagapuṣpa siran paṅanti,

līlāṅuṅaṅ juraṅ i sor ləṅit aprameya,

ndan saṅ ṛṣipravara keśava labdhayoga,

yatnān paśānti vihikan ri siraṅ narārya.

ḍū bhāgya saṅ prabhusutādhika bhāratāṅśa,

sākṣāt tan iṅ rāt i hiḍəpkv i ḍatəṅta maṅko,

pintən purihnya phalaniṅ varayoga siddhi,

maṅke təkanta sakala hyaṅ anantabuddha.

hetunya maṅkana maharddhika harṣani ṅvaṅ,

yan ton narārya niyataṅ giribhūmi śuddha,

ṅhiṅ saṅgha ta ṅhulun i denta təkā svadeha,

duhkhottama pravalaniṅ mara nissahāya.

rakryan tuhanku mapa hetuniṅ osahāmbək,

tan dharmaniṅ kadi kitān jənəkeṅ* vanādri,

prihtān nayolah anuṅ enaka riṅ svarājya,

byaktā prasutva tinəmunta jayeṅ triloka.

təkvan prabhavani tuvuhta mahāmṛteṅ rat,

śāstrajña śakti guṇamānta suśīlabuddhi,

tan len gumantya ri narendra jagatpramāṇa,

sampun suvarddhana vuvus prabhu Hastinendra.

saṅsipta teki varahən ṅvaṅ i duhkha rakryan,

paṅgil vənaṅ malapane sukət iṅ svacitta,

yadyan haneki kavivalta ri jə̄ṅ narendra,

nyā maṅhulun majar ataṅgva marən virodha.

nā liṅ maharṣi sumahur naranāthaputra,

tan saṅka riṅ hana vimohitaniṅ śarīra,

tan duhkhabhāra tuvi tan tuna sih narendra,

icchā svabhāva masurāśraya doniṅ ambək.

ndanda* muvah karaṇaniṅ svikarāvilāsa,

hyunhyun ruməṅvakən i ramyanikaṅ vanādri,

tan lupta teki ri ḍatəṅ suta saṅ maharṣi,

svargopamāmuvuhi saṅ muni devatulya.

doniṅ* pramoda hananiṅ bala milva maṅko,

rəskvī gatinya tuhanārusuheṅ tapasvī,

dadyāprabhāṅsa ta lavan giṇa buddhi śānta,

tan yuktiniṅ marək i jə̄ṅnira paṇḍitārya.**

kaliṅanyan toh* hayva manalahasāmbək munivara,

ri doniṅ prāptānis layat atilar iṅ** bhṛtya sahana,

amintaṅ dibyānugrahanira kabehteky aṅantəra,

mare ry agraniṅ parvata mahas alīlāməṅaməṅan.

nahan liṅ śrī bhūpālakatanaya sukhāmbək yativara,

rikā sakveh saṅ paṇḍita masəgəh iṅ saṅ* nṛpasuta,

pənuh taṅ bhojānindya haraka taləs vvainya sumaji,

sale puntī duryan panasa paṅinum vvai saha səḍah.

ndatan varṇan tiṅkahnira vəṅi təkāṅ aṇḍa* sumaput,

samaṅka śrī rājeśvarasuta məgil keśava sira,

təhər mojar rakvāpti vihikana riṅ meruvivara,

rikāṅ ənah śrī gaurīpati sira mamaṅguh kasutapan.

kunaṅ saṅ paṇḍyānūt sakaharəpirānindita təmən,

taṅeh yan varṇan riṅ kṣaṇa maguliṅ iṅ bvat halusira,

bhaviṣyāmrəm kālih sira kalalu maseñjiṅ avuṅu,

mirir taṅ bāyvātis muni manuk ikeṅ vvahan* arəbut.

dināvāṅ* rāt teja hyaṅ aruṇa sumunviṅ girivana,

kidaṅnyāmaṅsul riṅ gəgər avurahan və̄knya malayū,

byatītādan saṅ śrī nṛpasuta muvah saṅ yativara,

samāgyātūt lambuṅniṅ acala tumūt tan sah aṅiriṅ.

tadanantareki ri larisnira ləṅəṅ aməgatməgat gunuṅ,

hana pājaran katəmu śūnya masəpi ri samīpaniṅ paruṅ,

mavalantagāraṅ* aputih śikharanika kayunya kāṅinan,

kuməlabkəlab kadi kəlabni tapih iṅ amarāṅganāṅlayaṅ.

kusumāṅjrah iṅ natar aṅuṅkuli juraṅ alaṅə̄ kadīṅ tulis,

bhramarāṅrəṅ iṅ gaḍuṅ avarṇa manələhi siraṅ nṛpātmaja,

karuhun munīndra saṅ akahyaṅatiki sahaharṣagorava ,

bhagavān sumitra panəlahnira guruvana pakṣa sogata.

vacanārya paṇḍita sabhāgya sira mihat i saṅ nṛpātmaja,

syapa teki liṅnira ri saṅ para ṛṣi sama masraṅādulur,*

sipi harṣa ni ṅhulun i denira parama surūpa digjaya,

paramārtha sūkṣma maśarīra mətu ri səḍəṅ iṅ nirātmaka.

ṛṣi keśavāvasita sārjava mavarah i saṅ mahāmuni,

sutasoma sajñanira bhūpatisuta suta hastineśvara,

kavivān i dharmaśaraṇāguṇa paramahitādiśāstravān,

sakaleśvarāmbəkira tan hana siriṅan ireṅ jagaddhita.

ya ta hetu saṅ prabhu mamarvata gəṅ i sih ireṅ nṛpātmaja,

taya len gumantya ri sirān tribhuvanapati katvaṅ iṅ jagat,

apitovi śākyamuni maṅdadi ri sira viśeṣa devata,

subhageki ṅūni ri vijilnira para sura bhaktyamūrchita.

kunaṅ karana saṅ narendrasuta yan layat aṅənəs i himbaṅiṅ vukir,

marāməṅaməṅ iṅ tapovana sinādhya vihikana* ri saṅ mahāmuni,

muvah pinakamuṣṭiniṅ tvas aharəp vruh ri śikharaniṅ mahāgiri,

prayojana nimittaniṅ svatanu tan kahavarana madevatāśraya.

nahan liṅira keśavājar i gatī nṛpasuta mahas aṅjajah laṅə̄,

siraṅ viku sumitra garjita mavākta* madhura ri siraṅ nṛpātmaja,

tuhanku bapa devaśṛddha ri hiḍəpkvi təkani tanayaṅkv ikiṅ vukir,

ri denta kurunāthavaṅśa putu liṅku kita saka ri saṅ nareśvarī.

sambandha saṅ śrī ravibhoja riṅ daṅu,

rvānaknira saṅ subalāgraja prabhu,

mvaṅ saṅ jayatsena pamuṅsu ya ṅhulun,

saṅkan raray* paṇḍitavṛttilakṣaṇa.

yekan* tinūtniṅ vanavāsabhikṣuka,

rākaṅku bhūpāla ri līnaniṅ bapa,

mānak rva sikyānakəbi lavan jalu,

saṅ candrasiṅhātuha puruṣottama.

prajñādharī stri pamuṅśu dugsiṅi,

kālap təkap hastinarājabhūpati,

yekā pakebuṅ nṛpaputra tan vaneh,

saṅ candrasiṅhāṅadəg iṅ svanāgara.

sampun pəjah maṅkana ratva riṅ puri,

rogi pva* deniṅ viṣa durjanāṅlare,

ndān ātmaja śrī naranātha bhūpati,

khyātīṅ sarāt saṅ daśabāhu śaktimān.

vvantən vəkas saṅ daśabāhu kanyakā,

dyah candravatyārəja nāma putrikā,

yogyān savāve kita bhaktya riṅ jinəm,

pan vvaṅ sanak saṅ nṛpaputra tan madoh.

nāhan vuvus saṅ yati riṅ nṛpātmaja,

tuṣṭottamāmbək sutasoma garjita,

yekān sirānəmbah i jə̄ṅ munīśvara,

somyātutur bhaktinirān makavvitan.

malvī sirāminta ri sihni saṅ kaki,

aptyā ruməṅva prabhu dhātrajādhika,

doniṅ mahāvīra jagatparāśraya,

śaktyādbhutāgə̄ṅ daśabāhu riṅ laga.

oṁ saṅ narendrātmaja mājara ṅhulun,

tiṅkahnikaṅ dhātrasutendra digjaya,

śrī candrasiṅhā tiki ṅūni pūrvaka,

nāpatya duhkhan sira sah sakeṅ pura.

saṅ revatī strīnira satya subrata,

rovaṅniraṅ luṅha musir vanāntara,

putrārja pinrihnira dhīra riṅ raṇa,

sūkṣmā tadin rājya ri tan vruh iṅ bala.

prāpteṅ vukir pañcapatīrthan uttama,

dhyāyī sire madhyanika ndātan bəsur,

akveh mahābañcana tan sinaṅśaya,

vvil bhūta jə̄ṅ mastaka rodra kātara.

kīrṇaṅ kavaṇḍāṅidəri nareśvara,

sthīrān pagəh buddhinirān mamet hayu,

aig* rəp turun hyaṅ vidhi ghora gə̄ṅ galak,

sarvāstra yekan daśabāhurūpaka.

śīghrān təkānambut i saṅ nareśvara,

lvir kadyaṅulvā naranātha tar vihaṅ,

śrī revatī glāna kavəs mihat sira,

yekānaṅis makrak aminta jīvana.

vəkasan atiki saṅ hyaṅ somyāvəlas ri narapati,

rika tumuluya śabdāstvāsūnvā kamu subala,

tuvin atiśaya riṅ rāt śaktīṅ praṅ jaya suyaśa,

liṅ ira təhər amūkṣān tuṣṭāmbək bhuvanapati.

karaṇaniran umantuk riṅ rājyāmagəh i pura,

rahina vəṅi maṅekadhyāyī hyaṅ smara pinupul,

dumadak amahi rəsrəs rəsrəs śrī nṛpamahiṣī,

tan arən avədi kāṅən rūpa hyaṅ vidhi kasusu.

ri paṅidamira maṅkin tan māryāsəmu gigirən,

lalu divaśa mijil taṅ rārayādbhuta tan ahajə̄ṅ,

kagirigiri daśabāhvānak śrī nṛpamahiṣī,

pravala kadi vijil* hyaṅ durvaktran saka riṅ ibu.

salihatira sudevī riṅ putrāgila* malayu,

sahanahananikaṅ strī kapvārəs mihat i sira,

nṛpati sira mənəṅ tan pojar majəṅər i hati,

manəsəl i gatiniṅ tan tiṅkahniṅ mapatutana.**

irika nṛpati motus riṅ vīrāṅañutaṅ anak,

labuhən i tələṅ iṅ lod vetniṅ tan sukha mihata,*

vahu ta sira sinambut ləs mūkṣāmarəṅi kəḍap,

ri valuyira hilaṅ taṅ hastākveh smara sadṛśa.**

sahapatər adulur mvaṅ liṇḍū gə̄ṅ prabhavanira,

kusuma ravuh ikā saṅkeṅ byomāṅibəki pura,

suravacana humuṅ brahmājānindita karəṅə̄,

tinut iṅaranirān saṅ brahmājān pinagəhakən.

atha ri hilaṅ ikaṅ rūpādbhute nṛpatisuta,

paḍa ta sukhanikaṅ vvaṅ sakvehniṅ marək i sira,

pramukha narapati mvaṅ śrī devyādisukhagiraṅ,

mihat iṅ anak apūrva lvir svapnopama kahiḍəp.

ri tuhanira magə̄ṅ tan luptekan jaya riṅ ayun,

magadhapatī kalavān śryavaṅgādhipa matakut,

dadi ta mulih ikā saṅ kāśīndre surabhavana,

kumalilir ika maṅkin vṛddhyaṅ śaktyaparimita.

tuvin atiśaya bhakti jə̄ṅ śrī hastinanagara,

dəlitikiṅ anak iṅ de rāma śrī nṛpatisuta,

satata pinakamukhyāntyān iṅ pārthiva manuku,

məjahi sahananiṅ daityāmukvūk manəki vana.

nahan ikana vuvus saṅ paṇḍyārūm ri nṛpasuta,

tumalatah i kaśaktin kāśīndrātiśaya dahat,

muvah ika nṛpaputrāminte jə̄ṅ paramamuni,

majarakna ri* saṅkanyaṅ śatrv aṅrusuhi jagat.

apan atiśaya śaktīṅ praṅ sakveh para nṛpati,

ndya kari maḍana vūk saṅ kāśīndra hari sakala,

makin aṅibəki tekaṅ yakṣa lvīr alun aṅasut,

jumahatakən i sakvehniṅ rājyopama banava.

nahan vuvus nṛpaputra riṅ kaki,

om liṅnira mpuṅku ri saṅ nṛpātmaja,

sakveh maharṣīki susākṣi kottama,

yatnān ruməṅve savuvus ra saṅhulun.

ṅūnin huvus saṅ prabhu pāṇḍaveśvara,

mantuk mareṅ svarga maluy nirātmaka,

sakvehniraṅ bhūpati devamūrtika,

miśreṅ tayārəs lakuniṅ kalin təka.

ndātan dva yekā* hana rākṣasādhipa,

dom vulvacarmā vəsi mūrtiniṅ kali,

riṅ gə̄ṅ ruhur** tulya sumeru bhāsvara,

krūrādbhutānāma si śūciloma ya.

mohāmunah siṅ sahaneṅ jagattraya,

devādi janmoraga sattva kāsihan,

naṣṭāpunah denya təkapnya gə̄ṅ galak,

sākṣāt bhaṭāreśvara kālarūpaka.

nā hetu saṅ śrī jinarājadevata,

kapvātəmah rājasutāvəlas iṅ jagat,

khyātīṅ sarāt śryagrakumāra sajñika,

śīghrāṅlagekaṅ danujātibhīṣaṇa.

sor taṅ mahārākṣasa deniraṅ raṇa,

ginəlutnirekā sira tan sah iṅ ḍaḍa,

gambhīra makral sira tan vənaṅ sinah,

lvir parvatendra bvatirān paniṇḍihi.

glānaṅ mahārākṣasa tan vənaṅ miṅər,

de śrī narendrātmaja śakti digjaya,

hetunya tībrālək aminta jīvana,

bhyaktyātiśāntārəs i jə̄ṅ mahājina.

lāvan muvah śabdanikaṅ mahāsura,

bhoh ndyāku hetunta nimittaniṅ jaya, āpan rare tan masaniṅ mahottama,

śaktyādhika ndin hana deva sātmya ya.

nā liṅnya mānārjanamūrti digjaya,

krūrādbhuteṅ rāt karaṇaṅku śaktimān,

nyaṅ bhūr bhuvah svah kavənaṅ ya cūrṇitan,

ndyānuṅ muvah yāmagutaṅkvi riṅ raṇa.

ṅkā tekanaṅ yakṣa maminta sihnira,

mahyun vruhe saṅ pinakeṣṭya pālaga,

tan dadya liṅ saṅ jinamūrti durlabha,

yan tona deniṅ hati mūrkha hiṅsaka.

hetunya mary adhika hiṅsakojjvala,

maṅgəh ri somyānikanaṅ karākṣasan,

hyunhyun manah śrī jinamūrti taṅgapa,

śīghrān sirojar vara dharmadeśanā .

samaṅkana təvəknikān matapa riṅ giri suməkuṅ i muṣṭiniṅ hiḍəp,

nirāgraha ri śaktiniṅ trimala ṣaḍripu paḍəm ika denya riṅ manah,

gənəp dvidaśa pañcavarṣa ri lavasnikan umulahakən kaśāntikān,

pəjah ta ya muvah narendrasuta mantuk iṅ amara jinendra sātmaka.

ikaṅ asura* śūciloma matəmah sudaśasuta suḍaṇḍa nāma ya,

prabhūttama ri ratnakāṇḍa phalaniṅ tapa tinəmunika ndātan vuruṅ,

pənuh sahananiṅ pravīra bala pārthiva gaṇa paḍa śakti sādara,

suvarṇa rajatādiratna riṅ kaḍatvan ika** kadi janārdanālaya.

anindyaguṇa śakti riṅ brata suśīla satuvuh ika* rāja bhūpati,

sudhīra ri kalakvan iṅ japa samādhi taman alupa riṅ jinasmṛti,

ya kāraṇa bhaṭāra rudra manurun manurun iri siraṅ nareśvara,

prahāsana ri kīrti saṅ paramabuddha ri gatinika śāntikātmaka.

sirāṅarani saṅ jayāntaka ri saṅ prabhu sinivi ri ratnakāṇḍaka,

vimāna pakavāhananya* ya pasuṅnira kadi sihireṅ dhaneśvara,

bhaṭāra tuvi tan hanāməjahaneriyan apituvi yan** nareśvara,

muvah liṅira rudramūrti sakaleṅ raṇa pamuput ikaṅ anugraha.

təlas pva phalaniṅ tapenulahakən mahəli manah i saṅ mahāsura,

hilaṅ sihira riṅ jagat mari vəlasnya riṅ anəmu viyoga kāsihan,

təhər madəg ikaṅ kasiṅhan atighora paṅasih i bhaṭāra śaṅkara,

ya hetunikanaṅ jagat girigirin sahananika təkeṅ kadevatan.

kunaṅ kəta ri ṅūni mūlanika yan prabhu nara makarūpa rākṣasa,

haneka jurubhojakārya mabaṅun jaṅan aṅinakane nareśvara,

amogha ta hilaṅ lavəhlavəhikān hinahal iṅ asu sūkarottama,

mijil ta ya mamet pahəlyanāmukaṅ kunapa jana təlas miniśrakən .

haturnya ri narendra tan dva təka maṅrahati pamatəkiṅ* karākṣasan,

usāna riṅ usāna tapvan amaṅan jaṅan atiśaya bhukti ṣaḍrasa,

nimittanika yan matakvan i lavəhlavəh ika riṅ akārya tan bəsur,

nyameki pəjahanya yan matura madva karaṇanika jāti tan salah.

ya hetunika yan təhər mutus akon akəlakəlana māṅsa maṅkana,

muvah sinagaleki śakta tinutiṅ prakaśita puruṣāda sājñika,

nimittanika yan kinon milaga de sahanahananikaṅ vvaṅ iṅ puri,

təlas karuhunāmbək iṅ bala samūha para ratu makon gumiṇḍala.

ya kāraṇanikān mareṅ vana ri lambuṅ iṅ acala sumeru parvata,

makin ta ya mabhairavān maṅan ikaṅ nara makaratuniṅ mahāsura,

arəs sahananiṅ vatək ratu kabeh sakaparək i pamiṅgir iṅ vana,

teñuh tvas ika yan rinampas inaməs təkap i balanikaṅ jayāntaka.

para ratu saṅ haneṅ pura ri ratnakāṇḍa ṅūniveh tikaṅ balagaṇa,

girigirin epu tan vriṅ ulahārəs iṅ sudaśaputra śakti riṅ ayun,

tuhutuhu rudramūrti maśarīra riṅ raṇa pasuṅ bhaṭāra karaṇa,

karaṇanika praṇāmya ya makon umantuka ri saṅ mahāsurapati.

kraman umulih ya śīghra təka riṅ svarājya sahavīrarākṣasabala,

makin atighora yan siniviniṅ mahāsura para prabhūttama marək,

kuməl akətər kavəs rasanikaṅ triloka təkap iṅ balāpratihata,

titir anəḍək kadevatan amūk surāpsarabalānavan suravadhū.*

ya taṅ umarānaput para sabhūmi bhārata musuh yayah nṛpasuta,

ndi karika yan vənaṅ təlasa de vatək ratu makādi dhātratanaya,

pituvi bhaṭāra viṣṇu parananta tan vənaṅ ikaṅ durātmakaripu,

ri hananikaṅ narendra naramāṅsa pāvak i titahnikaṅ kaliyuga.

ṅhiṅ atiki saṅ nare rasuta rakva saṅ pinalar iṅ samantabhuvana,

maḍəmana duhkhaniṅ jagat aṅuṅsya dharma yaśa kīrti riṅ pabharatan,

apan iṅ usānajanma kitaṅ agrasesuka ṅaranta vīra suyaśa,

svabhava kitān pamatyan i kamūrkhaniṅ kalana śūciloma vəkasan.

ika si jayāntaka pva təmah iṅ mahāsura si śūciloma tumuvuh,

kita sutasoma rakva ya təmah bhaṭāra sugateki tan dva maṅiku,

kaliṅan ikā tayeka juga lena saṅka ri kitāmrihaṅ ripu kula,

təlas ulih iṅ samādhi japamantra saṅ parama paṇḍitārya sulabha.

nā liṅ munivara sumahur narendrasuta vādhaka riṅ ujar arūm,

ḍū maṅkana kaki ya nimittani ṅhulun umuṅsir iṅ alas aləyəp,

rəsniṅ kinirakira kinon gumantya sivin iṅ bhuvana sukhatara,

bhūpālaka giṇa ya təkap narendra muharātaṅis analahasa.

vetniṅ kajugulan umatək kahīnaniṅ amūrti tan karaṇanikā,

dūrān vənaṅa śaraṇaniṅ jagat ṅuni-ṅunin vihikana* malaga,

āpan saṅ inabhimata ratvanindya varaṇāṣṭaguṇanira hana,

siṅhākṛti tuhutuhu siṅhabhūpati jagatpati paṅaran ira.**

ndātan hananika viparīta yan vənaṅa bhūpati jaya vijaya,

ṅhiṅ rakva vanagamana muṇḍyaṅ enaka ri saṅ putu paramamuni,

denyan mamuṅarana gəgər manambuṅana liṅgihira saṅ atapa,

mvaṅ deniṅ apəniṅan iṅ adri rakva makire patapana karəsəp.

nahan vacananira ri saṅ munīndra jəṅər epu maṅətəki hati,

oṁ saṅ nṛpasuta bapa hayva maṅkana jagat kasihana rumuhun, āpan niyata hilaṅ ikaṅ triloka təkap iṅ sudaśasutaripu,

yan tan kita məjahana ratvaniṅ bhuvanaṅ uṅsirən iṅ aśaraṇa.

sampun pva kakavaśa təkapta bhūpati jagat parahita suyaśa,

yekān musira kita riṅ adri śūnya larisāmanaruka patapan,

bhāgyān mapagəha makapājaran ləyəpikaṅ svanagara lalunən, āpan sama karaṇaniṅ adbhutānəmu viśeṣa gatini kavuvus.

śrī dharmasuta sira ri ṅūni pāṇḍutanayāgraja saphala tirun,

sākṣāt tuhatuha nṛpaputra bhāratakulāṅgəh ira ta suyaśa,

saṅkan raray atiki sirān jagatpati munīndra matəṅət iṅ ulah,

siddhārtha manəmu paramārthikeṅ nagara pajaran ira karəṅə̄.

ndātan kənanika kita ratva māsku kaharəpkv iki tulusakna,

riṅ sāmaja maḍaḍa haləpnya rakva ranu padma mamahi kalaṅə̄n,

rakryan buṅah i kəñar iṅ indu śīla paramāṅajəṅ iṅ anakbi,

aśvābharaṇanika ya śīghra riṅ gṛha sadotsava maṅulapakən.

vetnyā karaṇa maṅajəṅ iṅ nadī mithuna haṅsan amuvuhi laṅə̄,

paṇḍyādhika makahaləp iṅ sabhā kula suputra maṅinaki riya,

lokatraya ravi pakabhūṣaṇanya suməṅ iṅ laṅit aṅaḍahaḍa,

rājyottama maṅaləpi bhūmimaṇḍala təkeṅ balagaṇa mabiṅar.

ndan sira saṅ kṣinatriya tatan hana kahaləpirān jugenaka,

bheda sakeṅ nṛpaty ahulunaṅ bhuvana sivinən iṅ* jagat kabeh,

loka parāśrayeṅ guṇa sudhīra nipuṇa ri karakṣan iṅ jagat,

dharma viśeṣa tan panasareṅ aji salaku nirātidigjaya.

pāpa kapāpa tan dva tumuvuh pva liṅanira putuṅku riṅ prabhu,

dūran ikaṅ kaśāntikan i deniran aməjahi vighnaniṅ jagat,

siṅgih ujarta yogya ta lamun balapati caraṇanta digjaya,

ṅhiṅ juga hayva lakṣaṇa kitāmagəhakna tikaṅ jinasmṛti.

maṅkana denirāvacana dharma pitutur i siraṅ nṛpātmaja,

mvaṅ sira saṅ vatək ṛṣi kabeh prasama sira maṅastvakən vuvus,

saṅ nṛpaputra tan vavarəṅə̄ sira ri pamidi saṅ mahayati,

ṅhiṅ parameṣṭhibuddha kinənəpnira tulusa Mahāyānabrata.

səḍəṅ kepvan saṅ paṇḍita sira təkap saṅ nṛpasuta,

bəlah taṅ bhūmi ṅke harəpira maṅaṅ teja dumilah,

bhaṭārī saṅ hyaṅniṅ kṣiti sira mijil bhāsvara katon,

caturhastānindyābharaṇamukha sākṣāt śaśadhara.

rikān prāptānəmbah sira məkul i jə̄ṅ bhāratakula,

gəyuh tan śobhāṅluh malara ruməṅə̄ reh nṛpasuta,

ahā saṅ śrī śāstrātmaka lihat i bhaktiṅkv iri kita,

praṇāmyātaṅgəh donta yadi jənəkeṅ kanana sabhā.

ri tan somyanteṅ bhūmi sahana muvah riṅ kadi kami,

avās taṅ rāt syuh durbala ri pamatəkniṅ kaliyuga,

mahī nirvījekaṅ rasa nirasa taṅ nīca sulabha,

narendrāthelik* riṅ parahita mahādharma viśata.

tumūt sakveh saṅ paṇḍita paramaviprādikaluṣa,

ndātan maṅgəh vidyākramanira tuna jñāna vimala,

viśīrṇaṅ strī drohī priya suta pitā dveṣa lumari,

hanekaṅ dharma sthāna kuṭi kavanan tan hana mulat.*

daridrākveh dātāsugih akuməd atyanta kasihan,

dhirāyuh taṅ pāpī tuna hurip ikaṅ buddhi kuśala,

kulīnādāśālpaṅ kujana ratu siṅ māna sinivi,

pratiṅkahniṅ rāt yan kaliyuga sukhāmbək diyadiyu.

ya tāṅde kleśaṅkun rasa bubulan aṅgaṅ kṣititala,

təkapniṅ mūrkhātyanta kujana mahānāraka rasa,

kasəṅkvan deniṅ rākṣasa sudaśaputraprabhu ta ya,

alah bvatniṅ saptāṇḍa girigaṇa denyādbhuta təmən.

tuvin meh prāptāṅekajaladhi* təmahniṅ tribhuvana,

vināśaṅ rāt noraṅ daśadiśi mamə̄ṅ tan patuduhan,

bhaṭāra hyaṅ śrī buddha śiva vinayācintya kahiḍəp,

təkapniṅ gālaknyādbhuta danuja nā maṅdadi ta ya.

maṅkā ta təmahan ikanaṅ jagat yadi kitān maləməha sivinən, āpan taya huməjahane kaśaktin ikanaṅ sudaśasutaripu,

yāvat kaliyuga jinamūrti saṅ prabhu vənaṅ tribhuvanaśaraṇa,

tāvat salah ika niyataṅ sarāt manemu duhkha haruhara sadā.

liṅ śrī kṣititala ri* huvusnirān praṇata mūkṣa mamarəṅi kəḍap,

svapnopama ri hiḍəpiraṅ munīndra sama harṣaja mihat i sira,

kapvānut i savuvusiraṅ mahīdhara ləves hayunira pituhun,** sākṣāt vvayulih*** iṅ amutər tasik təkapirāmṛta ri yativara.

ndan śrī bhūpatiputra tan vavarəṅə̄ tiṅkah bhaṭārī kṣiti,

māyābañcana rakva liṅnira təkapniṅ buddhi nissaṅśaya,

yekāṅde lara saṅ maputra karuhun sakvehni saṅ paṇḍita,

saṅkeṅ vəlasnira riṅ triloka muharaṅ luh maryavān* riṅ vijaṅ.

vvantən teki muvah maharṣi mavuvus sodāhaṅan riṅ manah,

he śrī bhūpatiputra hayva kəta maṅkāmbəkta mūḍheṅ jagat,

nicchā śāsana saṅ narārya yadiyan luṅhāmriheṅ śūnyata,

tīrthāmet viṣa sadṛśanta* viphalaṅ svargā madadyaṅ kavah.

āpan rakva tuvuhta yekan inusir saṅ vṛddhavṛddheṅ tapa,

riṅ rūpādhika vāni śaktiguṇamān janmottamānindita,

maṅgəh rakva tumirv i rūmta saphalāntukniṅ kayogīśvaran,

toh ndyānuṅ palarənta pan kita təmahniṅ yoga sānusmṛti.

saṅsiptanya tuhanku nora phalaniṅ gə̄ṅ sūkṣma muṅgv iṅ vana,

de saṅ kṣatriyajanma vīra taruṇātaṅgvan viśeṣeṅ* jagat,

vvaṅ mūḍhādhama kevalaṅhat iṅ ujar nistṛṣṇa dhīreṅ brata,

byaktāvās kabaliknya yan lamulamun śīghra təkaṅ pātaka.

nāhan teki vuvusnirāsəmu pacəh sakvehni rovaṅnira,

mitra ṅganya təkapnirekana mahāprānarṣi rakvāvuvus,

hāh dūrān hana mātraniṅhulun ike mvaṅ saṅ munīndrādhipa,

śraddhānūta rikaṅ prayojana hade tan dharma saṅ paṇḍita.

siṅgih yan sira sasar kapətəṅan deniṅ manah saṅśaya,

lagyāgəgvan ikaṅ sukhābhyudaya kāṣṭeśvarya lābhātupis,

yan miśrā kalavan bhaṭāra kəta yan śakrādi tapvan harəp,

ṅhiṅ saṅ hyaṅ paramārtha buddha kinənəp saṅ siddha yogīśvara.

liṅtekin viphalaṅ tapenulahakən de saṅ mahākṣatriya,

mon hyaṅ mon vara kinnarendra suranāthādinya tan vādakan,

tonən hyaṅ parameṣṭhi rudra matapeṅ mervādiparvatālama,

hyaṅniṅ hyaṅ suraniṅ sureka matapā* ndyānuṅ pinet denira,

kalīṅan ika tan haneki halaniṅ tumutakən i manah munīśvara,

kalīṅan ika saṅ narendrasuta mānuṣa sinaput i śaktiniṅ tamah,

bhaṭāra tuvi nora lena saka riṅ tapa vinaṅun ireṅ trikāyika,

haneka malihaṅ pinetnira turuṅ katəmu tinəmuniṅ tutur hiḍəp.

avās kita rike* manah saṅ anəmu krama tinəmuni saṅ huvus licin,

sirānəmunəmu ndatan paṅaku yan katəmu rusit i sandhiniṅ hiḍəp,

taṅeh yan ucapən kavāstvanira** riṅ tribhuvana riṅ apan kapaṅgiha,

prasiddhaṅ atiśūnya mārga kinənəp nṛpasuta tinut iṅ manah ləṅə̄ṅ.

kitāvacana* buddhi mūḍha ri sirān balik ika kita mūḍha kaśmala,** pitovi sira buddhamūrti riṅ apan sira kavatəka riṅ punarbhava,

hana pva gatiniṅ hulun sama mamākṣa*** sira sivinən iṅ jagat kabeh,

takutkv i ruganiṅ triloka ri huvusnira maluyeṅ tapovana.

nahan liṅira dharmamūrti tətəs iṅ kahuvusan i sinādhya saṅ viku,

muvah sahana saṅ munīndra sama māstvakən i vuvusirātipaṇḍita,

kunaṅ rasika saṅ śinabdan apa tan sahur asəmu viraṅ muṅismuṅis,

nimittanira yan milag kadi rare cala katəṅər i duhkhaniṅ manah.

samantara ḍatəṅ tikaṅ surasa bhojana haraka bhinukti tan kuraṅ,

kilaṅ brəm ika śukla rakva panəgəh munivara ri siraṅ nṛpātmaja,

byatīta* ri huvusnirānaḍah anindya sukha sira təkap munīśvara,

narendrasuta kapva mamvit i munīndra kahənəṅan i denirān laku.

nda śīghra ri ləpasnirān pramukha keśava dumulur i saṅ nṛpātmaja,

taluntalun i pārśvaniṅ vukir aneka kayu rəbah i piṅgiriṅ havan,

pətuṅpətuṅ i salvaṅ iṅ gəgər avor i vuluh ika rumambayiṅ paruṅ,

guhāpəṅuṅ ika daləmnya pilih uṅgvan i macan ika ghora gə̄ṅ galak.

kidulnnya hana tīrtha nirmala sake ruhur i pucak ikaṅ gunuṅ magə̄ṅ,

təḍunya gumuruh təkeṅ juraṅ avarṇa gərəh i pasurakniṅ ampuhan,

i sornya dəṅən arja saṅgar avavar janur akiṅ asamīpa kahyaṅan,

pilih makapamūrchitan təkap i saṅ kavi hana səsəran tanah tikəl.

narendrasuta yeka tan dva marahup sira vəkasan asūryasevana,* təlas kahalivat** larisnira sakerika saha ṛṣisaṅgha maṅdulur,

juraṅjuraṅ arəs haneki vaṭavṛkṣa kəpuh agəṅ arambayan matə̄b,

paranti paran iṅ mahakalana duṣṭa mamatimati sattva riṅ vana.

rikā pravara keśavājar i narendrasuta ri hananiṅ mahāsura,

gajendramukha śūcilomasuta tattvanika paṅavak iṅ kalīn* təkā,

avaknya kadi parvatāgəṅ aruhur** matanika ravitulya yāpaḍaṅ,

galaknya kadi kālarudra mihat iṅ bhuvana ri səḍəṅ iṅ prakampita.

nimittanika yañcaturbhuja baṅun paśupatisuta riṅ praṅ adbhuta,

gaṇañjaya sirāṅanugrahani ṅūni ri patapan ikaṅ himālaya,

tinūtnya maṅaran si durmukha təkapnira karaṇanikojjvaleṅ raṇa,

bhaṭāra tuvi tan vənaṅ məjahaneriya pamuput ikaṅ hanugraha.

ya hetunika yan vənaṅ mamati sesiniṅ acala mṛgādibhakṣaṇa,

təkeṅ jaladhi mīna durbala təlas pəsut ika rinaməs lavan mumul,

muvah sahana saṅ tapasvi karikā saka sasiki cinidra riṅ vəṅi,

arəs girigirin sahimbaṅ ikanaṅ giri təkapni ṅarenikaṅ vukir.

kalīṅan ika hayva māskun amənər manalajuṅ irikaṅ kəpuh magə̄ṅ,

mahābhaya təmən yadin kita kaciryana təkap ikanaṅ mahāsura,

nihan tutən ikaṅ havan manəṅən iṅ gəgər i ləpit ikaṅ gunuṅ kidul,

rikan tuməḍuneṅ* juraṅ pravala tan kahavarana sinādhyaniṅ manah.

siraṅ nṛpatiputra mogha vihaṅākral i pasayutirārya paṇḍita,

kasattvikanireṅ jagat tumuvuhārdha təka mavəlas iṅ kamāṅsaka,

nimittanira yan harəp vruha rikaṅ gajamukhamaya* vighnaniṅ jagat,

malar sira vənaṅ tumaṅgəhana tan dahatanika** makārya duryaśa.

ya hetu saṅ śrī naranāthaputra,

parah tikaṅ vṛkṣa lavan maharṣi,

katon tikaṅ bāluṅ amarvatāgə̄ṅ,

kapāla* śelanya paraṅnya danta.

dukāla lātānya ḍukutnya roma,

vədiṅvədiṅ vastra rujit sukətnya,

haturnikaṅ sattva jana prakīrṇa,

pəjah təkapniṅ gajavaktra mūrkha.

byatīta lampahnira śīghrāgāmi,

təkerikan gadgada durmukhāhya,

mələd maṅilvākrak asindhughoṣa,

prakopa yar ton naranāthaputra.

aho syape koṅ nara dibyarūpa,

təkery aku mvaṅ ṛṣi śuddhavarṇa,

ləvəs ri tan vruhmu rikaṅ parāna,

lugeṅ urip parvata laṅghana ṅke.

ndya teku kāryanyu dumeh para ṅke,

mṛgendra khāgādhipa deva tovi,

tamantameṅ* adri sukhasvabhāva,

təkapku jīva kṣaya riṅ vanādri.

lavan syapeki pva ṅaranmu riṅ rāt,

pilih mahākinnara devarāja,

sake haləptādhika dibyarūpa,

smarāmarānuṅ pinakopamanta.

bhaṭāra viṣṇu pva kunaṅ liṅanku,

kiteky amūrti hyaṅ anaṅga duṣṭa,

prayojanāṅadva gəṅiṅ kaśaktin,

ulah pva dehādbhuta cakrapāṇi.

trivikramānuṅ makapāṅadanta,

taṅan catur mevvivu saṅkhya ghora,

śirah susun sapta matumpatumpaṅ,

aneka sevu lvirikaṅ matakveh.

ikā ta rūpanta lavan guṇanta,

tahā* ṅhulun sora təkapmu riṅ praṅ,

yadin kamu hyaṅ suranātha maṅko,

hilaṅ tikaṅ bajra vibajra de ṅku.

nahan vuvusniṅ gajavaktra rodra,

narendraputrādbhuta sārjavājar,

tatan surendrāku tatan hari hyaṅ,

mahājana kṣatriya bhāratāṅśa.

ṅhulun suta śrī nṛpa hastinendra,

prakāśa sajñā sutasoma riṅ rāt,

mareṅ girīśṛṅga sinādhya tan len,

girīndrarājeki ginə̄ṅkv iṅ ambək.

kunəṅ nimittaṅku təkeṅ kita ṅke,

ndatan takut matya* kabhuktya denta,** mahāyaśārtheki sudharma pinrih,

sudharma dharmohuta riṅ mahiṅsa.

apan mahāpātakaṅ arddha hiṅsa,

tiniṇḍa riṅ rāt para sādhu melik,

madoh sakeṅ śūnyapadān paratra,* sasar mareṅ gomukhatāmra ** təmbe.

sahasravarṣa pva kitān hana ṅkā,

tinūt təkapniṅ yamabhṛtyayodha,

ndātan mati tan mahurip gatinya,

saranta gə̄ṅ duhkha sadālare tvas.

ya teka pamratniṅ akārya hiṅsa,

rajah tamah tan surud iṅ svacitta,

hilaṅ tikaṅ sattva təkapnikāṅdoh,

hilaṅnikā śīghra təkeṅ aveci.

tumūt mareṅ* ṣaḍripu śatru riṅ jro,

trivighna pañcendriya mogha darpa,

sudhīra māmah vukir iṅ śarīra,

ri tan hanāniṅ mahasattva bhasma.

ndah yeka rakva magave laraniṅ triloka,

siddhātəmah tanu gajendramukhādipāpa,

bhinneka* rakva kalavan gaṇarājadeva,

icchā svabhāvanira yan gajavaktrarūpa.

lāvan jagatśaraṇa hetuniṅ āsyacūrṇa,

daityādirāja pəjaheki təkap bhaṭāra,

sūkṣmātisūkṣmamaya śakti mahāprabhāva,

sotniṅ viśeṣa vinuvus smaradagdaputra *

tan maṅka teka kita kevala durmukhāhya,

tapvan maveh sukhanikaṅ bhuvanāprameya,

lobhavərə̄ kavigaran kadi hastisattva,

dūrān vənaṅ śaraṇaniṅ bhuvanāṇḍarāja.

vvantən pva hetuniṅ anindya caturbhujeṅ praṅ,

tan sih bhaṭāra juga kevala pātakāgə̄ṅ,

hāh yogya tiṅgalaknaṅ gajavaktrarūpa,

rūpanta teka tinut iṅ pati tan tinaṅgəl.

hetunya maṅkana haneki viśeṣa nātha,

brahmāja rakva panəlahnira dhātraputra,

rākaṅku parṇahira teki jagatpraṇamya,

ghorānivārya daśabāhu səḍəṅnikaṅ praṅ.

bhraṣṭaṅ vatək kalaṇa denira riṅ raṇāṅga,

daityādi rākṣasa pəjah sahananya bhasma,

yekān takutkv i kita yan vruha saṅ narendra,

byaktān ri duhkhanira pan kita buddhimūrkha.

ndah kantənanya paṅucapkv i gajendravaktra,

sattvādicitta rəgəpən pva mahāviśeṣa,

krodhanta patyana tamahta ya dohakənta,

kāruṇyabuddhi gavayən tulakanta mṛtyu.

yapvan vihaṅeku* virodha manahta maṅke,

hiṅsākuru pravala deni kaduryaśanta,

byaktaṅ svajīva matupis guṇa śaktimaṇḍa,

de śrī narendra sakaleśvara bhūmipāla.

nāhan vuvus nṛpasutāmuji saṅ narārya,

marmānumodana ri saṅ gajavaktrarūpa,

durvaktra heva ya təkap naranāthaputra,

iṣṭanya cañcala baṅun gajavaktra rudra.

dhik hāh kamuṅ nṛpasutādhama bhāratāṅśa,

bhaṅgābhimāna juga tan tuhu sādhu dibya,* jambat vuvusmu parachidra mahāviveka,

liṣyamu duṣṭa kuhakāmutuṅ iṅ kadi ṅvaṅ.

ndin vīrarāja vənaṅ adbhuta matyanāku,

brahmārṣi viṣṇu ya kavəs suranātha kumyus,

hiṅanya saṅ prabhu kakanyu si dhātraputra,

hāh dūra rodra mihateki təkapku riṅ praṅ.

nā liṅnyān matəmah trivikrama magə̄ṅ taṅ rūpa ghorāhirəṅ,

krūrāṅganya caturbhujāṅavaśakən* yān mūrti saṅ hyaṅ gaṇa,

sātus teka gaḍiṅnikāriṅiriṅi lvir mṛtyu sākṣāt murub,

nāgendropama tulyaniṅ tulalay adbhūtā ta medhālaṅu.

muntab tejanikāgni kātara sakeṅ kumbhātirodrān kutug,

mvaṅ saṅkeṅ mata sūryavimba dumilah mvaṅ bāyubajrāṅasut,

syuh bhasmyaṅ vanavṛkṣasattva katunu lvir parvatāgnyujjvala,

uṣṇaṅ svarga təkapnya durbala* salah dhyānaṅ vatək devata.

tindak lvir bubulaṅ mahītala bəlah kombak vvay iṅ sāgara,

kālembaṅ kapalumbalumba mavərə̄ joṅ phalvarājān karəm,

meṅguṅ taṅ Imavan prakampa kadahut buṅkahnikaṅ Mandara,

gambhlraṅuluvuṅ katon natar ikaṅ nagendra mavrəg ta ya.

ghorghoraṅ giri revatekana rubuh glānaṅ trilokākṣaya,

deniṅ krodhanikaṅ gajendramukha śabdātryaṅalun garvita, āyāy kṣatriya pāpa duṣṭa lihatekiṅ hastivaktrādbhuta,

yadyan bhūmi sabhūrbhuvahsvah uyəṅən byaktātəmah sāgara.

saṅsiptan laku pet kakanyu kətikaṅ śaktīṅ jagat kottama,

mvaṅ rāmanyu si hastinendra pinaṅən sakvehnikaṅ bhūpati,

akvikyāmapageṅ raṇātakəra gə̄ṅniṅ krodha hārohara,

dhik tan durmukharūpa tāku yadiyan tan bhraṣṭa deṅkv iṅ raṇa.

nojar saṅ gaṇamūrti śīghra sumahur śrī hastinendrātmaja,

ai tandaṅ kamu koṅ prakopa vinarah riṅ dharmaśāstrottama,

jambat ṅvaṅ musirāśrayānuruhanaṅ* sāmantayodha prabhu,

bhoh pembuh śatakoṭi** hastivadanākun tan surud*** siṅ raṇa.

liṅ śrī bhūpatiputra tan dvan umasə̄ taṅ durmukhāhyābhutəṅ,

sarvāstrādbhuta saṅka riṅ taṅan anekān śīghra sampun ləpas,* ndātan pamyati saṅ narendrasuta kagyat saṅ para ṛṣy aṅiriṅ,

ṅkāne** dura vanān paṅanti ri sirārəs riṅ varāstraāṅavur.

krodhekaṅ gajavaktra sambut ikanaṅ bhūh parvatāgrāśila,

aṇḍəmyādbhuta bhasmibhūta ri harəp śrī bhūmināthātmaja,

sakvehniṅ vara sañjatātryasasaran lvir larvalarveṅ apuy,

deniṅ jñāna viśeṣa sandhi patulak bvatniṅ mahārorava.

maṅkin krodha bhaṭāra durmukha təkapniṅ parvatāstrān hilaṅ,

yekā hetunirātikāptya mususaṅ trailokya* bhūmi syuhən,

prodbhūteṅ luṅayan lumuṅ ya maṅavil vitniṅ kṣiti maviyat,** makrak saṅ para deva ghūrṇa lumihat mohūt i saṅ hyaṅ gaṇa.

lāvan saṅ sutasoma pinrih inivə̄ de saṅ vatək devatā,

jñānānuṅ pamisārja rodra tuturən liṅ hyaṅ surendrāvuvus,

nāhan hetunirekacitta humənəṅ boddhyagrimudrāpagəh,

pohniṅ sattva mijil taṅ astrabhiduran saṅkeṅ svacittādbhuta.

pūrṇaṅ teja baṅun śaśāṅka ri taṅan śrī hastinendrātmaja,

tempuhnye* ḍaḍa saṅ gajendramukha gək gər ghora tan pamyati,

saṅkeṅ drəsnya savaṅ girīndra ḍumavuh puh tvasnikaṅ rākṣasa,

glānāṅlah juga tar vənaṅ malap ikaṅ bajra bvat aṅliṇḍihi.

tan saṅkeṅ gəṅ iṅ astra hetunika yan rasa pəjaha vimūrcha kāsihan,

sampun tattva bhaṭāra rakva viṣāṇāmṛta pavarah i saṅ munīśvara,

sor tekaṅ visa denireṅ kujana tīrtha təmahanira riṅ mahārddhika,

yekā hetunikaṅ* gajendramukha tan papaḍa təkap i tībraniṅ lara.

təkvan hyaṅ gaṇa rakva sah sira sakeṅ asura matutur iṅ kaśāntikan,

deniṅ jñāna viśeṣa śakti rumakut ri vuyuṅ ira rikaṅ jagat kabeh,

lavan vruh sira yan narendrasuta buddhasakala magave jagaddhita,

nāhan hetunirān mulih saha lavan surapati sahadevatāṅdulur.

ndan saṅ kāri vimohitāhənək apəg anaṅis* alara maminta jīvana,

ai saṅ śrī sutasoma piṇḍa hapa tāku matəlasana hiṅsakojjvala,

māna krodha kaṭuṅka tan huniṅanən tilarakna ri sattvaniṅ hati,

saṅkā yan laraniṅ manah bhidura dhāraṇa pəjah i lalista riṅ hulun.

yekā hetunirān vavaṅ malap ikaṅ bhidura maluyi śuddhaniṅ manah,

śīghrānəmbah* ikaṅ gajendramukha bhaktya śikhara** ri ləbūni jə̄ṅnira,

paṇḍyāgurva ri saṅ narendrasuta liṅnika mamaha sukhe nṛpātmaja,

yogābhyāsa rikaṅ girīndra tumute salakunira mahāyānabrata.

ndan sakvehnira saṅ ṛṣi pramukha keśava ḍatəṅ i siraṅ nṛpātmaja,

kapvāṅastuti dibya saṅ nṛpatiputra sakala jinamūrti riṅ sarāt,

tan varṇan ri huvusnireki nṛpaputra mamisiki ri saṅ mahāsura,

jñānānusmṛtiśāsaneki pavarahnira ya sapavarahniṅ āgama.

byātītan ri huvusnirāmisiki saṅ gajamukha ri katattvan iṅ dadi,

lampah śrī nṛpaputra yeka caritan sira lumaku lavan munīśvara,

ndan saṅ sāmajavaktra tan sah aṅiriṅ ri sira manusup iṅ vanāntara,

groṅ durgārəs ikaṅ kalakvan i ləpitləpit i siluk ikaṅ gunuṅ midər.

kañcit rakva haneki nāgapati kādbhuta təka sakiṅ agraparvata,

ṅākṅāk śabda nikāharəp mamaṅane nṛpasuta dinunuṅnya gə̄ṅ galak,

yatnekaṅ gajavaktra yāṅalaṅakən tanu pinuliṅan* iṅ mahābhaya,

ghoraṅ haṅga saparvatāgra binəbədniṅ uraga giri mandaropama.

krūrekān manahut manəmbur i mukhendriya gajamukha śuddha niścala,

bāyvagnyardhana yeka pasaṅən ya guməsəṅana nāgabandhana,

he saṅ durmukha hayva maṅkana vuvus nṛpasuta kalavan munīśvara,

tan dadyaṅ muni bauddhapakṣa satatāmatimati makabuddhi maṅkana.

āpan rakva bhaṭāra sira sattva karuṇa sahaneṅ jagattraya,

yadyan śatru təkapnireki juga tan pinəjahan ika* kevala həniṅ,

jñānāveśa minuṣṭi rakva makaśastra** pasukakən i cittaniṅ musuh,

byaktaṅ krodha mamūrti sattva manukūla təkapiṅ atipaṇḍiteṅ manah.

yekā rakva tinūtniraṅ sugatapakṣa satata magave jagaddhita,

ton ṅūnī ṅvaṅ gə̄ṅta rudrasakaleṅ guṇa mahəli kaśāntan uttama,

maṅkā teki kabuddhya saṅ gajamukhāṅlavanaṅ uraga śakti digjaya,

sambyan rakva parīkṣanən gati jinasmaraṇa karaṇaniṅ jayeṅ raṇa.

nāhan liṅ jinamūrti durmukha rikātutur i sapavəkasnireṅ* daṅū,

sampun rakva ləpas manahnya yugapat mamarəṅi ri manah nṛpātmaja,

kapvārok mapisan təkeṅ bhujaga padma hṛdaya sira jīvahāraka,

glānaṅ nāga vimūrcha kesəp anibeṅ kṣiti malupa ri dagdhaniṅ hati.

vəkasan ta* yāṅlilir i sampun ika mahəli citta sattvika,

aharəp subhaktya ri gajendramukha liṅika dharmamūrtika,

gajavaktra śīghra matulak tumuduhakən i saṅ nṛpātmaja,

sira teki saṅ humuripī kita sakala viśeṣa paṇḍita.

ya tinūtnya yan praṇata bhakti ri suku jinamūrti sādara ,

gajavaktra harṣaja mihat milu musapi ləbūni jə̄ṅnira,

karuhun maharṣi paḍa mastuti ri sira təkapnya śāntika,

kavəṅan turnon ri kamahātmyanira tuhu bhaṭāra riṅ jagat.

avivakṣiteki laku saṅ nṛpasuta vuvusən kathākna,

təka riṅ juraṅ mayukaparvata kayu vək i sək nirantara,

paṅikāvilət lumalay iṅ havan amuhara saṅhub iṅ vukir,

matəmah pətəṅ ri təkaniṅ limut amaḍəmi tīkṣṇaniṅ ravi.

gunuṅ adbhutāsəmu mahāsura katəmu ri madhyaniṅ vana,

matutuk guhālva masiyuṅ kəpuh aruhur aṅanti riṅ gəgər,

mata tulya bhāskara śilāputih akalaṅan iṅ gunuṅ midər,

masavit latāgəṅ aṅurambat i paraṅanikaṅ mahāgiri.

baḍamanya megha ri ruhur luṅayanika kuvuṅkuvuṅ pəluk,

saha bāyubajra kumusuh kadi lakunika* rodra gə̄ṅ galak,

vəkasan mirirmirirakən kusuma teki ri jə̄ṅ nṛpātmaja,

kadi səmbahanya tumūtaṅiriṅa kadi gajendravaktra ya.

i təpinya sumbər umijil məsat asəmu ririsnya kāṅinan,

bana sattvarāja ri samīpanika vahu mijil sakeṅ guhā,

maharəp mamuktya ri vəkanya dinəmak ika mepu kāsihan,

makədalkədal manaṅis ahyun umura ya gupay katiṇḍihan.

nṛpaputra tan dva lumihat sira tumuluy aśabda vākpaṭu,

mṛganātha he bibi huvus juga hilahila hayva maṅkana,

tuvi tan vaneh vəka təkapta tan iku* makamāṅsabhakṣaka,

putus iṅ kaduryaśan ikuṅ pati niyata təkaṅ upadrava.

tuvi nora pāpa kadi pāpaniṅ anak atiduṣṭa riṅ yayah,

gurutalpeki ya paḍanya niyata təka riṅ yamālaya,

ndan alah kapāpanika karva təkap i laku saṅ mṛgādhipa,

ṅka suhaśra koṭi kəta pāpanika ya pavarahniṅ āgama.

kalavan ta yeka hana dharmavacana sutakīrtya riṅ jagat,

talagādikūpa surayajña janayaśa kasor təkapnika,

apa yan vənaṅ gumavayaṅ kriya saguṇaniṅ ātmajottama,

karuhun kasaṅkalan ikaṅ bapa bibi ya ləpas nirātmaka.

iti nā vuvus nṛpatiputran umuhuti rikaṅ mṛgādhipa,

mṛgasiṅha yatna sumahur i vacananira saṅ nṛpātmaja,

vruh ike ṅhulun ri guṇa doṣaniṅ inucapakənta yogyana,

ṅhiṅ ateki mogha kavahan lapa karaṇaniṅ iṅsakātmaja.

akire vaneh ṅvaṅ iki tan hana kavənaṅ ikiṅ mṛgeṅ vana,

pramukhaṅ kənas kapi lutuṅ vijuṅ ika sama durbalālayu,

ṅūniveh ta saṅ tapa kavəs girigirin i kamūrtiniṅ hulun,

karaṇaṅku yan suta subhojana ri pamatək iṅ hilālapa.

śubhavākya maṅkana rikā nṛpasuta saha lūh nirantara,

siliḍirya* rakva kaharəpnira matalaṅa jīva sakṣaṇa,

taḍahənya tan** svaṅa lamun mahuripa vəkani mṛgādhipa,

paramārtha dharmaṅ usirən karuṇā ri laraniṅ nirāśraya.

nāhan liṅ saṅ narendrātmaja paramasukhāmbəknikaṅ sattvanātha,

tan dvodanyāṅhuvakən vəkanika malajəṅ muṅsir iṅ deśa durga, āmhām yan ton siraṅ bhāratakula paməpəgniṅ vayah yovanānvam,

hetunyār aṅsə̄* yan garjita madəg i harəp śrī mahārājaputra.

prodbhūtaṅ hakṣi mūlyar siyuṅ ika maluṅid katarāṅapnikālva,

karvaṅ hastātitīkṣṇāriṅiriṅi rumakut ry aṅga saṅ nāthaputra,

mumbul saṅkeṅ jajādrəs gətihira cinucup denikaṅ sattvanātha,

glānāṅlah citta nirvāṇa * ya rinəgepirān mantukeṅ buddhaloka.

ndan saṅ hastīndravaktra mvaṅ uraga kalavan keśava glānacitta,

kepvan deniṅ manah tan vənaṅ asayut i saṅ śrī mahārājaputra, āpan sampun purih saṅ kumavaśakən ikaṅ bodhisattvopadeśa,* tulyekāmbəknirānuṅ pəjaha mahuripāṅhiṅ yaśāvṛddhi mūlya.

byātītan līna saṅ śrī jinakula pinaṅan denikaṅ sattvanātha,

liṇḍū taṅ bhūmi tan kram hyaṅ aruṇa malara lvirnirāṅdoh maṅulvan,

tan śobhaṅ byoma kadyāṅəmu taṅis i təḍuhniṅ ghanāsaṅhub aṅluh,

gəntərnyāsambasambat kilat asəmu kəḍapniṅ təñuh katīkṣṇan.

lāvan saṅ sattvanāthāsəmu kahuvan* i pəjah śrī mahārājaputra,

deniṅ rah kesəp ardhāmṛta mamarəgi garbhāmaṅun śāntacitta ,

maṅkin kaṅən varah saṅ munivara sira yan rājasunvānivārya,

hetunyan bhakti tan sah manaṅis iri dagan saṅ mahānāthaputra.

hāhāh he bhūmināthātmaja pahurip atah saṅ mahābodhisattva,

tiṅhalte duhkhaniṅ kaśmala mamati tuhanta nyatāḍaṇḍa doṣa,

āpan byaktekanaṅ pāpa tumuvuh asəvə̄ vəltik iṅ mānakarma,

lud ṅvaṅ sattvātimūḍhācəmər aku riṅ apan tan təkeṅ roravāṅga.

saṅsiptan piṇḍaha pvaṅhulun atəlasana dveṣa riṅ putradharma,

maryāṅgə̄ṅ krodha maryāṅapakaṅapaka riṅ saṅ mahāpaṇḍitāgra,*

yapvan saṅke lalis saṅ nṛpatanaya təhər matya tan labdhajīvan,

milva ṅvaṅ līna vetniṅ taya maṅinakaneṅ hiṅsakā buddhi pāpa.

nā liṅ mṛgendrāvacane nṛpātmaja,

ndan dūra rakvāhuripāṅ huvus pəjah,

sattvendra yekāmrih aminta patyana,

de hastivaktroraga mukhya saṅ ṛṣi.

ndan saṅ śinabdan sira teki laṅghana ,

puh tvasnirān kevala duhkhitānaṅis,

sattvendra dhīrāptya tumārjanaṅ tanu,

dīptaṅ nakāṅhiṅ pvaṅ iniṣṭi pālaga.

ndah hyaṅ surendrādhipa riṅ surālaya,

prāpteki tan dvohuti saṅ mṛgeśvara,

bhoh he kitaṅ moṅ bibi hayva maṅkana,

nyātāku hetvanyāhurip* nṛpātmaja.

maṅkā ta vākśabdaniraṅ surādhipa,

dhyāyī kṣaṇa śrī nṛpaputra maṅlilir,

buddhasmṛti pvaṅ vinibhajya riṅ śava,

mvaṅ pañcabāyvardhana saṅkaniṅ hurip.

pūrṇaṅ śarīreki muvah kadīṅ daṅū,

lvir supta polahnira tekyamār baṅun,

ṅka taṅ macan bhakti ri jə̄ṅ nṛpātmaja,

mvaṅ hastivaktroraga tuṣṭa saṅ ṛṣi.

ndan śrī narendrātmaja mepu suṅkava,*

maṅke ri jīvānira de śatakratu,

lvir dāna riṅ vah dhana ratna kāñcana.

tambosadhīṅ aṅga sulakṣaṇottama.**

āpan tikaṅ vvaṅ matakut ya riṅ pati,

lūd tar vruh iṅ mārga viśeṣaṅ uṅsirən,

tṛṣṇeṅ hanak mvaṅ putu patnikāṅlare,

yogyan huripnyān tuluṅən surādhipa.

ṅvaṅ teki dūrān hana mātra tolihən,

tyāgeṅ hurip dharma viśeṣa mūlya ya,

niṣkāraṇolah suranātha riṅ hulun,

gə̄ṅ bañcanāmbək tunadharma kevala.

nāhan vuvus saṅ nṛpaputra maṅkana,

ai śrī narendrātmaja liṅ surādhipa,

sihteṅ mahāsattva jagaddhitenapi,

donkv āmalaṅ ri prakṛtinta yan pəjah.

ṅūnī pəjahteki təkap mṛgeśvara,

vəlasterikaṅ moṅ suta seṣṭiniṅ hati,

līnanta yeka mṛganātha matya* ya,** patyanya nirdon karuṇanta riṅ jagat.

jīvānta maṅke paramārtha riṅ sarat,

jīvānikaṅ sattva mahāsukheṅ manah,

yāvat pəjah saṅ nṛpaputra riṅ vana,

tāvat pəjah taṅ mṛgasattva tan kasah.

saṅkṣepanya ya hetuniṅ vavaṅ anindya humuripi kita,

tan saṅkeṅ vara bañcanāṅalaṅi dontan umaluya jinā,

dharmānūta ri sihta riṅ sakalasattva ya karaṇa təmən,

astam jīvananiṅ jagat ri təkaniṅ bhuvana haruhara.

liṅ saṅ hyaṅ suranātha riṅ kṣaṇa milag sira tatan ucapən,

somyāmbək sutasoma deni paṅucapniran aməlasakən,

mvaṅ sakvehnira saṅ ṛṣi pramukha keśava ta paḍa sukha,

durvaktroraga sattvanātha karuhun rəna ri Surapati.

sattvendroraga tika mukhya hastivaktra,

bhaktyāṅañjali ri siraṅ narendraputra,

kapvāminta vinarah iṅ mahopadeśa,

dvārānuṅ tutən iṅ acintya śūnyamārga.

āpan kveh i manah i saṅ mahātiyogi,

vvantən nirmalabhava mokṣakān ginə̄ṅ tvas,

len taṅ tyāga pəjah anuṅ ya teṣṭadharma,

paṅliṅgan nṛpasuta naṣṭa maṅkya mūlya.

saṅsiptan ləvih ikanaṅ paratramārga,

saṅkeṅ mokṣaka ri hiḍəp patik narārya,

ḍū bhāgyādhika paṅucapta sādhu riṅ rat,

ādya ṅvaṅ majara masākṣya saṅ ṛṣīndra.*

siṅgih liṅta paramamokṣa mārgadibya,

deniṅ rāt kunaṅ ika saṅ mahātividvan,

tan mokṣāṅga juga viśeṣa dharma mārga,

matyāsiṅ saparāganiṅ kabodhisattvan.

pə̄hniṅ śāstra təkap i saṅ viśeṣa sādhu,

yadyan pāləha sukha yan parārtha donya,

durlakṣmyāthava sugiheki tan vikalpa,

mon matyāhuripa lamun jagaddhitārtha.

ṅhiṅ tekaṅ paramanirasrayeki goṅen,

riṅ jñānadhika vəkas iṅ mahāviśeṣa,

tan svargabyudaya kitan* paṅekacitta,

yekaṅde sasar ikanaṅ paratramārga.

toh ndyānuṅ vivitan ike liṅanta maṅko,

vidyādi krama ginəlar təkap bhaṭāra,

dharmādharma tuvuh ikeṅ samastabhūmi,

mati mvaṅ mahurip aneka sṛṣṭiniṅ vvaṅ.

pūjā yoga japa samādhi dāna puṇya,

len tekaṅ brata śucipakṣa bhairavātva,

salvirnyaṅ* aśubha śubha pravṛtti riṅ** rāt,

jñānāveśa milu tumūt punarbhaveka.

kunaṅ saṅ vvaṅ niśśreyasa sira tatan siddhi riṅ ulah,

ndātan pūjā tan yoga rinəgəpirānisbhava sadā,

luput saṅkeṅ bhavakrama pati hurip tan paṅavara,

apan sākṣāt saṅkan paran ika sirācintyabhavana.

sirekādṛvya jñāna tiga hurip iṅ bhūmi sahana,

baṅun phalveṅ vvay tan milu bañu sireṅ duhkha sukha len,

guṇanekālit tan ləga masək iṅ alvādbhuta təmən,

agə̄ṅ tan mopək mañjiṅ iṅ ahət ikā sūkṣma sumilib.

kaliṅhanyevəh saṅ vinuvus i vuvusniṅ vaṅ amuvus,

apan rakvekin tan vənaṅ inubhayān pan sira mucap,

sirānon tan kāton sira juga manon pan sira manon,

adoh tan dūra ṅke sira ta maparək tan kaparəkan.

yatekā pinrihniṅ viku ri təkāniṅ dharma kapatin,

savaṅ kris sah saṅkeṅ saruṅan inunus tan kavaraṇān,

təkapniṅ trinyārok rva pinasah ireṅ jñāna vimala,

vidagdhāniṅkap roma salaya tinūtniṅ nirupana.

acintyānumpak riṅ taya matapakan bhāskara vulan,

ikā lvir saṅ līnādhika sama lavan mokṣakaraṇa,

nda saṅsiptan siṅ solaha juga lamun nirmala sadā,

prasiddhāmor iṅ tan hana kaluput iṅ vāhyavibhava .

nāhan liṅ jinamūrti mājar i kadibyaniṅ patipati,

mvaṅ taṅ mokṣakamārga kempən i vuvusnirān pavacana,

ndan saṅ sāmajavaktra nāgapati sattvanātha karuṇa,

bhaktyāṅañjali jə̄ṅnirāmalaku sihnireki tulusa.

deniṅ yoga samādhi tan hana ri saṅ nirāśrayayati,

nis taṅ mārga viśeṣa rakva ri hiḍəp patik nṛpasuta,

siddhaṅ yoga yan ardha liṅnira nirāśrayeki kahiḍəp,

nəm kvehnyādhika riṅ śivatva ya rəṅə̄n mahottama təmən.

pratyāhāra ṅaranya* kālapan iṅ indriyeka vinalat,

saṅkeṅ artha jugeka rakva makamārga buddhi vimala,

nyaṅ dhyānādhika dhīra yoga humiḍəp svasādhya mapagəh,

dibyāmoha taman kasambi riṅ ulah prapañca satata.

prāṇāyāma ṅaranya bāyu vinatək mareṅ hulu təṅah,

sarvadvāra minəb təkapnya tinūt iṅ viśeṣa katəmu,

oṁkāra praṇaveki muṅgu ri daləm tvas ardha ya kasə̄k,

vetniṅ tattva śivatva dhāraṇa ṅaranya yoga saphala.

len taṅ tarka ṅaranya yoga gaganopamaṅ manohava,*

ṅhiṅ tan vāk dhara rakva len ika sake rikaṅ avaṅavaṅ,

mvaṅ taṅ jñāna vikalpa tārja malilaṅ visādhya pinələṅ,

nissandeha samādhi yoga paṅaranya mokṣakaraṇa.

tan dvāṅ aṣṭaguṇān kapaṅgih i təkapnya rakva karuhun,

dṛśyādṛśya vaśitva riṅ bhuvana rudramūrti sakala,

yekāṅbvat i manahniraṅ paramaśāntikārya nipuṇa,

kempər yan rusit iṅ jitendriya juraṅniṅ ambək ahajə̄ṅ.

yapvan dhīra manahta tuṅgəṅ ikanaṅ svacitta mabənər,

tan kevəh təkap iṅ trikāya vala siddhi sarvakaraṇa,

kevəhniṅ triguṇātmakārdha ya huvus kasimpən amatəh,

ṅkā rakvān sira śūnyarūpa paramārthatattva kahiḍəp.

nāhan tiṅkah ikaṅ śivatva ri siraṅ śaiva svapakṣādhika,

bheda mvaṅ jinatattva teki ri siraṅ bauddhāprameyeṅ jagat,

saṅ hyaṅ advayayogasandhi pinakeṣṭidvāra saṅ bhikṣuka,

aṁ ah śabdanikaṅ svabāyu ri daləm kaṇṭha prasiddhaṅ hayu.

rəp prāptaṅ ravi soma denya sumaput riṅ deha śuddhākṛti,

mvaṅ taṅ advayacitta divya mapagəh ṅkāne manah nirbhaya,

pə̄hniṅ rvānupamātiśīghra ri vijil hyaṅ buddha tan kāvaran,

śūnyākāra devāṅga nirmala sirān nirbāṇa nirlakṣaṇa.

āpan tan śiva tan maheśvara sirān tan brahma tan keśava,

tan saṅ hyaṅ parameṣṭhirudra tuduhən dūrān kavastverikā,

siṅgih yan paramārthabuddha təmahan saṅ siddha yogīśvara,

icchā nora kasaṅśayāganal alit tanmātra mātreṅ sarāt.

nāhan hetu bhaṭāra buddha kahiḍəp putrāprameyeṅ jagat,

saṅ hyaṅ advaya rāma tattvanira de saṅ paṇḍitāṅhayvani,

prajñāparimitebu tan sah i səḍəṅniṅ yoga sānusmṛti,

tan rāgodaya bhinna rakva kalavan hyaṅ durmukheṅātmaja.

maṅkā śīlanireṅ mahāyana vəkasniṅ bodhisattvān laku,

vetniṅ tattva viśeṣa tan huniṅa riṅ aṣṭeśvarānindita ,* yāvat prokṣaka rakva tāvat ikanaṅ niśśreyaseveh pinet,

nāhan hetuniraṅ śivatva makaḍat muṅsyāmriheṅ śūnyata.

saṅsipta teki bapa saṅ gajavaktrarūpa,

mvaṅ nāgarāja karuhun vara sattvanātha,

prih hayva tan dugaduge vuvus iṅ kadi ṅvaṅ,

buddhopadeśa təka riṅ śivatattvayoga.

āpan tivas juga siraṅ muni bauddhapakṣa,

yan tan vruh iṅ paramatattva śivatvamārga,

maṅkāṅ munīndra saṅ apaksa śivatvayoga,

yan tan vruh iṅ paramatattva jinatva manda.

nā deniraṅucapakən vacanopadeśa,

tan lambalamba tuhu yan jinamūrti sākṣāt,

durvaktra nāgapati sattvapati praṇamya,

bhaktyātibhakti manaḍah vacanātiguhya.

sampun mateki ya kinonira bhikṣva vikva,

yan kṣetra sindhu giri soṅgvanan iṅ mayega,

ṅhiṅ tan pakarvana tapovana hayva maṅkā,

yan maṅkaneka gati saṅ viku bauddhapakṣa.

nā liṅnirān tan ucapən ri gatinya rakva,

varṇan sireki təka riṅ giri merurāja,

ramyaṅ tapovana rikoṅgvan i saṅ hyaṅūni,

muṇḍisvabhāva sira yan makabuddhi śānta.

saṅ keśavarṣi masayut sira tan vikalpa,*

maṅkin kadhīran i manahnirāṅekacitta,**

nā hetu saṅ ṛṣi mulih sahamitrasaṅgha ,

sampun sirojar i munīndra sumitra bauddha.

byātītan ri lavasnireṅ vana mahə̄m suragaṇa ṛṣisaṅgha varṇanən,

vrinvrin deni kaśaktiniṅ sudaśaputra ri patapa nareśvarātmaja,

māyā bañcana teki rakva gəlarən təkapira ri mahardhikeṅ manah,

donyān maryanirān nirāgrahanirāśrayan atəmaha bhūmipālaka.

nāhan hetuniraṅ surāpsaravadhū mareka paḍa kinon sureśvara,

mvaṅ sakvehnikanaṅ huvus kṛtayaśeṅ hayu maṅalahakən jitendriya,

prāptānəmbah i jə̄ṅ surendra luṅayanyan asəmu ləməs iṅ vəlasharəp,

tiṅhalnyāṅaravinda yāṅənani sə̄ṅ smita sahana lanāmaṅun lulut.

lvir mukṣān dinələ̄ vaneh pramukha saṅ sukiraṇa kalavan tilottama,

saṅ hyaṅ brahma sirātimarma lumihat vinaliṅ ira sarasvatīn marək,

hyaṅ śrī liṅ madhusūdanājarira yan ḍatəṅa təkap i kiṅkiṅ iṅ hati,

devī śrī giriputri teki kahiḍəp paśupati təkap iṅ manah ləṅə̄ṅ.

maṅkāṅ cittanireki rakva karuhun surapati sira teki gə̄ṅ lulut,

hiṅanyān sutasoma liṅira bhaṭāra sira sama kəna prih aṅlare,

tan varṇan ri huvus surendra maməkasməkas i hayuni saṅ mamañcana,

sampun mamvit i jə̄ṅ purandara ta yāṅlarisakna saliṅ surādhipa.

taṅheh yan huniṅan lakunyan aməgat tavaṅ amuṅar i saṅhub iṅ laṅit,

lvir vintaṅ maṅalih parəṅ ri pakatonan* ika sumavur iṅ nabhastala,

və̄rnyānraṅ śarapuṣpa manmatha sakeṅ laras asəmu səkar səḍəṅ rurū,

morṇanūpura bhūṣaṇanya kuməñar kadi kilat alivə̄r iṅ ambara.

enjiṅ prāpta ri jə̄ṅnikaṅ giri tapovana maḍarat* i himbaṅ iṅ gəgər,

səṅkansəṅkan ikaṅ turunturunan iṅ juraṅ i havan ikāmaṅun ləṅə̄ṅ,

kapvāhurhur anəñuh ambək aṅayuh səkar asana hanāṅayuh vuṅu,

len tekaṅ maṅayuh gaḍuṅ kalukaran tapih akiput avarṇa riṅ jinəm.

lumrāvra təka riṅ vanāvijavijah kavigaran i kalaṅvan iṅ səkar,

ləṅləṅ piṇḍanikaṅ vukir kadi kamānuṣan umulat i rūmnya vvah laṅə̄,

nirdon taṅ katira kəta deni manis iṅ laṭi masəmu pinəñcər iṅ guyu,

kumbaṅnyāṅrəṅih iṅ səkar hilaṅ i deni rəṅih ikana pet karājasan.

nyū dantārəja keṅineṅin asaput hima ri gəmuh ikaṅ payodhara,

moghārəsrəs ikaṅ vuluh gaḍiṅ aneka girimisən i gātraniṅ təṅah,

tan śobhaṅ ravi kevran aṅrəs i gəluṅnyan asəmu jaladāṅhəmu hudan,

hyaṅ candrākucəm eraṅ iṅ dina təkapni mukhanikan amūrṇacandramā.

gaṅgāṅhertali riṅ juraṅ svaranikān karuhuran i pataṅkis iṅ kale,

meghāraṅraṅi riṅ tavaṅ riṅ apa yan kəna huləsakəneṅ acaṅkrama,

gəntər mandra munī dukilyan apəyəhpəyəh i sirat i denikāṅucap,

hrikniṅ sundari sinraṅ iṅ taṅis i deniṅ karabhasan* məneṅ jinəm.

sakvehniṅ kalaṅə̄n paḍārəs avədi hajəṅ ika mukṣa riṅ səkar,

lvir hyaṅniṅ masa kārttikānurun i paṅjrahiṅ asana ri tambayiṅ kapāt,

len tekaṅ kadi campakāsəmu vilis ləṅəṅ araras arumpukan mənur, ñər tvasnyāsəmu rāga kāraṇa kaṅə̄naṅən i lulut i saṅ pakeṣṭinən.

honyekaṅ hana riṅ śīlānayana riṅ vitiṅ asana sumaṇḍayaṅliga,

glānāmbəknika yan ruməṅvakən i kāstavani manisiraṅ nṛpātmaja,

riṅ rūpādhika vijña sarvaguṇadhāraṇa vəkas iṅ inuttamottama,

yekāṅde rəsəp iṅ sakendran i tuvuhnira sahana rinəṅvarəṅvakən.

kīrṇekaṅ maṅaraṅ vimohita savaṅ tinulisakən i luṅgah iṅ gaḍuṅ,

ləṅləṅ lvir hinaveśa riṅ smara kadīṅ ulahulahiṅ akuṅ kəneṅ hunəṅ,

dudvekaṅ mahaṅan hanān kadi huvus vruh i sira kadi kadyanuṅsuṅa,

cət len taṅ katəkan haripnya təka riṅ svapna kadi katon sumaṇḍiṅa.

vvantən lvir silumaṇ ḍatəṅ kadi tulis vahu pinəpəs aṅambvakən raras,

ṅkāne yaśa* ri himbaṅ iṅ juraṅ aṅuṅkuli bañu tuməḍun sakeṅ vukir,

tan ryamban gumuliṅ mahāṅisisakən təṅah anuriga kabvatan susu,

tan śobhāṅlihanan sumuṅkəm i karaṅhulu ləṅəṅ amarantyakən taṅis.

ceṭinyāglar aneka riṅ natar apet raras araupu səkar telas rurū,

len tekaṅ hana riṅ batur marək i jə̄ṅ rasiki rəsəp amaṅku pavvahan,

təkvan vruh ri tuhanya yan milu viraṅrvaṅ aṅəsəsan anambyakən lulut,

marmanyāsəmu rāga hetuka vuvusnya kadi madhu pinəñcər iṅ juruh.

tuhanku saṅ avarṇa ratna liniṅir pinik inapi riniñci riṅ smara,

saṅ adyah inucap savaṅ mətu sakeṅ jaladhi madhu ri paṅjrah iṅ səkar,

baṅun karavuhan raras hati təkapniṅ pinakeṣṭiniṅ hiḍəp,

alum kadi luṅ iṅ vəlas ahyun amilət liraṅ i pamanas iṅ dinākara.

prayojananiṅ aṅhyaṅ ojar i tuhanku mapa kari viraṅrvaṅ iṅ hati,

mapaṅ kirakireki marmaniṅ aśāsəmu tan atən i ramyaniṅ vukir,

nihan rari ya rəṅvakən paṅucap iṅ vvaṅ umucap i nareśvarātmaja,

vaneh hana kalaṅvan ambək atəmah taṅis avətu palambaṅ iṅ yaśa.

atīta riṅ atīta rakva taya bhūpati madana ri saṅ nṛpātmaja,

saṅ arjunasahasrabāhu riṅ uśaṇa sakala parameśvarātmaka,

narendrasuta rāmabhadra harimūrti pinuji kadi deva manmatha,

saṅ arjuna surendraputra tuvi tan paṅirib i lituhayv anindita.

bhaṭāra tuvi tan hanā mapaga rūpanira parama nora darśanan,* surendra tiganetra keśava sirāhirəṅ analahasāmbək iṅ rimaṅ,

prajāpati caturmukhāṅrəsi manahniṅ umulat amaṅun raras hati,

hyaṅ īśvara ta nīlakaṇṭha makadoṣanira paṅucap iṅ janā kabeh.

siraṅ madana mūrtiniṅ turida rāga sinamayakən iṅ karāsikan,

surūpa vəkas iṅ raras kadi rusitniṅ aji ri ləyəpiṅ nirakṣara,* anaṅgamālaratna rūmira tatan pakatuduhan anūkṣmakən vulat,

nirāśraya** təmən sireki viparīta kahabəta ri layvan iṅ gəluṅ.

nda yeka magave viyoganiṅ akuṅ kalahanira tekap nṛpātmaja,

prasiddha vəkas iṅ nirāśraya* yayan kəna vinulatan iṅ kəneṅ hunəṅ,

manisni paṅucapnira səmu təkāṅupihupiha mənen pamaṅkvakən,

dəlitniṅ aśarīra tan panirakən siṅ ulahanira yogya sanmatan.

yadin ləpasa mukṣamukṣaṇa mareṅ pasir i valakaṅiṅ karaṅ liman,

katon ləyəpirāṅisapvakəna rūmta saphala suraratnakanyaka,

bhaṭāra kusumāstra kāmadayitānurun ika sira karva mār baṅun,

baṅun kāma sihən sireṅ panaṅis iṅ patər akitəran iṅ labəh kapat.

kaliṅan* ika māsku yogya dahatən paṅutus ira surendra taṅgaman,

səḍəṅ karaṇaniṅ rimaṅ sira lamun kavənaṅa juga rakva bañcanan,

apan kita jugeki rakva makapaṅrə̄ṇa ri pəjah ikaṅ jayāntaka,

titir vacana saṅ hyaṅ indra ri sirān sumiliha kadi saṅ dhanañjaya.

nahan liṅ ika yan pamarṇana ri polahan iṅ aṅayu rāga riṅ tilam,

jəṅər tvas ika saṅ śinabdan asahur taṅis aṅusapi luh tibeṅ pipi,

kakaṅku yatikāmrih i tvas i yarinta ri paṅutus i saṅ surādhipa,

asambhava ṅaranya dūra ri pakon iran amuhara luh kinə̄lakən.

gaḍuṅ lumayaṅol tavaṅ riṅ apa yan vənaṅ amiləta vimbaniṅ vulan,

vulan ri kəñar iṅ dinārka viparīta suminaṅa ri tambvaṅ iṅ kapāt,

kapāt ri* patiniṅ gərəh riṅ apa yan suməkarakna paṅjrah iṅ səkar,

səkar ri tayaniṅ madhubrata buṅun kusumaśara virūpa kasihan.

prasiddha raras iṅ səkar hilaṅ i tan təkanira rasikaṅ macaṅkrama,

hilaṅ raras i rasminiṅ hinələm iṅ sanagara yadi tan sinanmata ,

ndātan pahi lavan rarasraras i raśminiṅ iṅutus anūkṣma bañcana,

hilaṅ mara rarasnya tan pararasan rarasira təkap iṅ jitendriya.

ikāṅde leṅləṅniṅ hati sumusuk iṅ citta kumətər,

viraṅrvaṅ hambək deni viraviraṅ iṅ rāga sumaput,

tuvin deniṅ kuṅ ndin vənaṅ umulate* rūmnira ləṅə̄ṅ,

apan sākṣāt saṅ hyaṅ smara maṅulanəh riṅ vaṅ alaṅə̄.

ahah rakryan saṅ konəṅunəṅ iṅ adyah aṅaraṅ,

lihat pvekiṅ sambatkv anaṅis aṅamay* tan vriṅ ulaha,

mara ṅvaṅ yan sampun vihikana tuvin sojar adaləm,

baṅun ləṅləṅ deniṅ patər akətərāṅgyakna laṅə̄.

rakryan yan hana sanmatanta riṅ akuṅ yadi tulusa ri sihta ri ṅhulun,

ndātan mūra matāku* tan kadi manahmanahaniṅ atibañcanāṅlare,

sthityātuṅgva daganta riṅ ḍukuh amukti kaləṅəṅan i ramyaniṅ vukir,

yadyan mantuka riṅ svanāgara sukhākv atəmaha** parameśvarīṅ puri.

riṅ janmāntara yan madhubrata kitā ṅvaṅ asana harasənta riṅ taman,

sugyan ləṅləṅ amarṇanaṅ kakavin arja* karasa pakənaṅkva tan saha,

mvaṅ yan kārttikamāsa pāvakani rūmta gərəh atəmahaṅkva lampunən,

sakvan selvana ramya solura rarasku sasəkara sasinvam iṅ laṅə̄.

taṅeh yan ucapən laranyan aməgə̄ṅ taṅis yāsəkəl,

lalu pva ri tiliṅ hyaṅ arka masa tistisiṅ ve ḍatəṅ,

huvus sama maśaivaśauca śubhalakṣaṇaṅ apsarī,

nda śīghra tumuluy suməṅka ri hiriṅhiriṅniṅ talun.

patiṅhalan ikānavaṅ kusumaparvatāmarvata,

baṅun giri suvarṇa teja kadi pāvakātyadbhuta,

təkapni kāmadeva bhūṣaṇa makāmbhalārjāṅsuka,

maṇīndra pinakorṇa kaustubha tutup gəluṅnyan* murub.

byatīta təka riṅ tapovana tikaṅ surastryāgiraṅ,

girahyasən i paṅjrah iṅ kusuma parvatāṅde sukha,

vavaṅ muṅaṅ i saṅ nṛpātmaja haneṅ guhālvādbhuta,

katon kadi tan iṅ rāt iṅ gati rarasnirāveh ləṅə̄ṅ.

suteja kadi sūrya vimba rasa tan vənaṅ kocapa,* anūkṣma kadi tan kavastvana sire padevāśrayan,

ri de niran avarṇa campaka baṅun tapəl mās katon,

svabhāvanira māyamāya kadi mə̄ra mukṣeṅ tavaṅ.

sākṣāt sūkṣma viśeṣa riṅ bhuvana rūpanira ratuni devaniṅ rimaṅ,

ekacchattra sireṅ manis siniviniṅ juruh i vulat irāgranāsika,

mudrākāra bhaṭāra śākyamuni taṅ kinatuturan i* tuṅtuṅ iṅ hiḍəp,

lvir hyaṅniṅ kusumāsamādhi maharəp turunana ri kalaṅvan iṅ kapāt.

ndan sakvehnikaṅ apsarī paḍa jəṅər mihat i sira surūpa digjaya,

siṅgih yan para deva nora maḍane sira ṅuni-ṅuni yan prabhūttama,

tan saṅkeṅ paramārtha dharmaṅ usirən karaṇanira mayoga dhāraka,

eraṅ rakva ri noraniṅ savava rovaṅanira pakadevaniṅ* puri.

āpan yan nṛpaputrikā niyata tan hana savavanirānuṅ enaka,

riṅ svargāmarakāminī pva savatək rasika paḍa ya nora sambhava,

ṅhiṅ saṅ hyaṅ kusumāstrapātnyan upameṅ bhuvana pinuji yogya sanmatan,

eman rakva huvus hilaṅ ri gatiniṅ smara pəjah i kalaṅvan iṅ vukir.

maṅkā denyan amarṇānaha ri polah ira jənək i ramyaniṅ vukir,

len taṅ bhrānta vaneh hanāṅaku bhaṭāra madana maśarīra riṅ jagat,

kapvāmet i ratihniran karaṇaniṅ kavulatan atəmah nṛpātmaja,

yekā hetunika praṇamya rəsəp aṅhyaṅ acaru gəmuh iṅ payodhara.

strīstri ratna baṅun trikañcu pamulunyaṅ akuniṅ araras tiniṅhalan,

lvir maṅgiṣṭa rəmək guladrava siratsirat i manis i denikāṅucap,

pantəsnyān panulis tikānakanakan ləṅəṅ inamər i layvan iṅ gəluṅ,

prāpte sanmukha saṅ kinārya ya kinon* mucapa yayah i saṅ** nṛpātmaja.

tan tuṅgal rva mateki polahan* ika yan midemidəm agave vulat dudū,

hanyāt taṅ maṅiduṅ hanān pakakavinkakavin agəlikāṅdadak lumuh,

akveh buddhinikān mahāsəmu vival kadi vival iṅ arəs pinaṅkvakən,

marmāṅrəs ri təṅahnya keṅis i səḍəṅnyan aṅuvahi tapihnya tan lukar.

len tekaṅ mara madyus iṅ makara kendriya mapatələsan putih mirir,

madhya* lvir pupusiṅ gəḍaṅ gaḍiṅ avarṇa pəpəsa təkap iṅ samīraṇa,

len tekaṅ maśarīra yāṅucurakən gəgər i kucur i pəñcuriṅ bañu,

siñjaṅnyārja mirir kinañcutakən iṅ pupu majənar aṅambvakən smara.

honyekā vahu məntas aṅririh i romanika ləṅẽṅ i tīraniṅ ranu,

lvirnyūdanta kavarṣan aṅgəh i susunya təkap i titisiṅ vvay iṅ hulu,

len tekaṅ hana riṅ mahāntən aṅikət səkar asəmu tan imbak iṅ bañu,

mvaṅ tekaṅ maṅikət palambaṅ anulis kakavin inapi bhāṣa riṅ yaśa.

dudū taṅ asahutsahut kusuma* riṅ pipi kadi tapak iṅ vajāmrih anəsəb,

vəḍakvəḍak ikaṅ payodhara ginātra masəmu carik iṅ səḍəṅ silihasih,

kapantəs ika yan mahamirumiruṅ tapih aṅurayanīrṇakən hati təñuh,

mayaṅ məkar i paṅjrah iṅ kumuda təka vaṅinika baṅun tikārja vinəḍar.

vaneh hana sirāhajə̄ṅ kadi kadaṅniṅ asana riṅ aveh kalaṅvan iṅ akūṅ,

savarga kalavan vuluh gaḍiṅ aros* təṅah ika kadi pādapāṅlih araras,

tapihnyaṅ avulaṅ tatur təkan i puṇḍutan ika kanakārja kəṇḍit umurub,

maṇīndra pinakocal arja təka riṅ vətis asəmu puḍak hañar kadamaran.

apan yan ucapən rarasnika mabhūṣaṇa tuhutuhu katvaṅ iṅ suravadhū,

təkapnyan atutup gəluṅ sahasəkar taji suminaṅ i gātraniṅ mukha mavā,

kalihkalih ikātiśobhita hayunya kadi ratih amarva* sūkṣma sumilib,

nda śīghra teka tan pasaṅkan inucap təkanikan umarək ri jə̄ṅ nṛpasuta.

ikā ta pinakādiniṅ suravadhū saṅ inayamakən iṅ surendrabhavana,

huvus kṛtayaśeṅ tapovana ri ṅūni kavədivədi saṅ munīndra sahana,

tathāpi* təka tan pakārya ri narendrasuta pisan iṅūnəka taṅgama kunaṅ,

mavarṇa kadi polah iṅ vvaṅ aṅayuh viyat aharəp aṅola candra harasən.

balik pva ya males kabañcana viraṅrvaṅ avətu lara kāṇḍəhan lulut unəṅ,

hanan kadi vaśāṅdadak mihat i rūmnira həlahəla riṅ matāsəmu madhu,

prayojananikā təkāməluka maṅgaməlana maṅisapvanāṅarəkana,

mapeṅ dadi təkarəs aṅlih i manahnya kadi madhukareṅ səkar sumanasa.

apituvi rakva rūmniran anindya viśeṣa gati,

subhaga sakendriyan sira yayan kadi sūkṣmamaya,

təkap i tasaknikaṅ japa samādhi mahāparama,

ya ta magave rəs iṅ suravadhū ri sirāṅarasa.

karaṇanikān harəp muliha teki kabeh milaga,

divasa gənəp tigaṅ vəṅi lavasnya mavanti mara,

kṣaṇa ri ḍatəṅ surendra paḍa bhakti tikaṅ yuvati,

majar i təguhnireka juga tan kavənaṅ cinalan.

ndan saṅ hyaṅ suranātha kepvan i təkapniṅ bañcanālah larut,

tovin rakva ya tan vənaṅ maṅamərārəsniṅ* manah nirmala,

nāhan hetunirātəmah paramadevī saṅ putus riṅ hajə̄ṅ,

vimba hyaṅ parameśvarīnayu təkap saṅ hyaṅ surendrādhipa.

lvir pə̄hniṅ jaladhāṅəmū vari tətəlniṅ roma vetniṅ hirəṅ,

saṅ hyaṅ candra sireki moləm avənəs deniṅ mukhārjālila,

nyū dantārəja tan padharma təkap iṅ susv ahrit arjātənəṅ,

madhya lvir curigenunus rarasirānraṅ pādapā kāṅinan.

siṅgih yan parameka rūpanira himpər saṅ kamāṅiṇḍarāt,

vetniṅ rūpa viśeṣa rakva vəkasiṅ rāgāmaṅun tvas lulut,

sor tekaṅ surakanyakā paḍa tatan vantən vənaṅ taṇḍiṅa,

lvir vintaṅ ri vijil hyaṅ indu makucəm lvir indu riṅ bhāskara.

sakvehniṅ surakāminī paḍa kapeṅin ton saṅ devati,

maṅgəh kakvan i saṅ nṛpātmaja təkap saṅ hyaṅ surendrāhajə̄ṅ,

guntur kasturi kumkumāṅinaṅin iṅ siñjaṅ sumār mrik miṅiṅ,

marbuk lvir smararājya bəntar i hilaṅ hyaṅ kāma ṅūnīṅ vukir.

səbsəbnyāṅasut iṅ tapovana baṅun meghāṅasut riṅ vukir,

yekā miśra lavan sugandha vaṅiniṅ sarvārumniṅ parvata,

gəntər mandramunī dukilyan alaṅə̄ rəmrəm riris tan kara,

liṇḍū taṅ giri mātra kegu tikanaṅ śṛṅge ruhurnyāmarən.

tistis māsa ri sampuniṅ ravi tumuṅgaṅ acala sahateja riṅ laṅit,

maṅkin ləṅləṅ i rūmnirān vinulatan ləṅəṅ i rarasirāṅure gəluṅ,

līlā yan paṅalih* tapihnira limuṅsuṅaniṅ uraga śuddha mār mirir,

māyāmāyā tikaṅ hane daləm avarṇa śaśadhara ri saṅhubiṅ laṅit.

śūnyaṅ rāt paḍa kāgəman sahana saṅ hyaṅ iṅ acala mavarṇa kasrəpan, āpan hyaṅ giriputrikā ta kahiḍəpnira karaṇaniran śivastuti,

maṅkin prāpta ri saṅ kināryaniṅ ulahnira kadi hulahiṅ maheśvarī,

bhakty amvīt ri bhaṭāra yan paṅigəleṅ tavaṅ i pucakikaṅ surālaya.

solahbhāvanireki cumbu sahajāṅucap amanis anorakən juruh,

hāh saṅ lvir hyaṅ i devaniṅ masa kapāt ləṅəṅ umətu sakeṅ puḍak məkar,

nirdon teku rarasta nirva ri tuvuhta bapa viphala mūḍha kaśmala,

gə̄ṅ pāpāmati dharma saṅ viku salah kəna malalis i vīrya saṅ prabhu.

lāvan māsku paran sinādhyani manahta paran iku minuṣṭi riṅ* hiḍəp, āpan rakva huvus viśeṣa vəkaniṅ tribhuvanapati katvaṅ iṅ jagat,

varṇākāra bhaṭāra manmatha samāpta ri kita lituhayv anindita,

gə̄ṅniṅ vīryaparākramanta sakaleśvara tuhutuhu bhūmipālaka.

maṅke pvān kita bhikṣukāsəmu nirāgama tan ulahaniṅ kṣinatriya,

dūrān rakva haneki mūlyaṅ usirən lviha saka ri saṅ* nṛpātmaja,

bhrānta ṅvaṅ harəp iṅ nirāgraha bhaṭāra tuvi yayan arūpa riṅ jagat,

siṅhit riṅ smara saṅgamenulahakən pravala hinusi riṅ kamokṣan.

saṅsiptanya tuhanku mantuka kitātəlasana makabuddhi nirmala,

bhuktinteku haləpnikuṅ* nagara sarvakanakamaṇiratna bhāsvara,

nya ṅvaṅ milva ri jə̄ṅta tan bəsur anivya** ri kita pakalakṣmyaniṅ puri,

bhaktyāmoṅa ri rūmta riṅ pakasutan tan arəsəha ri luṅsuriṅ tapih.

yapvan varsih i ramyaniṅ nagara tan vihaṅa kalihaneṅ pasir vukir,

lilālālana mukṣamukṣana təkeṅ surabhavana maṅayva saṅgama,

yadyastun jənəkeṅ smarālaya matāku sivinən i kalaṅvaniṅ səkar,

byaktāvās ri pasuṅ bhaṭāra guru rakva sumiliha ri saṅ manobhava.

āpan yan* suraputrikā riṅ apa yan hana maḍana rarasku dug siṅī,

tovin sih parameśvarādbhuta təmən dəlit i vijil i kāpti riṅ tilam,

saṅ hyaṅ durmukha sesuk āpituvi tan kadi sihira bhaṭāra ri ṅhulun,

ṅhiṅ kevran juga deni tan hananikaṅ vənaṅa savava riṅ kadevatan.

maṅke pvā kita rājaputra səḍəṅ antuka sakala bhaṭāra riṅ jagat,

riṅ rūpādhika kāmamūrti saphalāṅrəməka maṇikiṅ adyah iṅ tilam,

saṅkṣepanya tuhanku taṅgapana kūṅku kaka suvalən iṅ hujar yayi,

paṅgil rakva vənaṅ harəp=harəpən iṅ* smarapada ri daləm pasaṅgaman.

nāhan liṅnira rāgakāraṇa mamatyakən i vuvusirān pamāñcana,

akveh bhāvanirān hanān pasəmu suṅkava maṅəsəsan aṅrəṅihrəṅih,

eñjuh yan paṅadəg mahāṅuvahi ken dadi kavudan apet raras hati,

līlāvās pakatonaniṅ vahu katon mahāṅaraṅa ri buṅkahiṅ pupū.

maṅkā raśmini denirāṅligaligāsəmu viraṅ i harəp nṛpātmaja,

buddhi śrī nṛpaputra tuṅgəṅ anaruh sphaṭikagiri katampəkañ javuh,

nāhan hetunirāharəp məkula jə̄ṅ nṛpasuta siraṅ indra keraṅan,

ləs mukṣātəmahan ta yaṅ nṛpatiputra tumuluy aśarīra devata.

śrī vairocana dibyarūpa pakarūpanira ri puputiṅ kaśāntikan,

mvaṅ padmāsana ratna paṅkaja paliṅgihanira sahabuddhalakṣaṇa,

līlābhūṣaṇa sarvaratna dumilah makuṭa maṇi suteja bhāsvara,

akṣobhyādi huvus mamūja ri sirājayajaya paramādidevata.

rəprəp śīghra surendra yatna murakəñjutinira tumuluy maṅañjali,

gandharvāpsararājasaṅgha maṅiriṅ suravaravanitāparampara,

kapvānəmbah i jə̄ṅ bhaṭāra jinarāja makamukha mahārṣi nārada,

huṅkāra stuti dhūpa dīpa makapaṅharəpira sahagandhalepana.

oṁ buddhastuti səmbahiṅ hulun i jə̄ṅ bhaṭāra sugata,

jñānāveśa minuṣṭi yoganiṅ aśevadharma satata,

saṅ sākṣāt sariniṅ samādhi təmahiṅ trikāya ginəgə̄,

saṅ lvir teja sakeṅ maṇīndra təkap iṅ manah pratihata.

siṅgih yan parameśvarādhika kiteṅ triporuṣapati,

yapvan pañcapitāmahādi śiva donta ṅūni karəṅə̄,

riṅ ratnatrayayoga śākyamuni tāpanəṅgah i kita,

śrī vairocana riṅ tathāgata makādi pañcasugata.

hyaṅ pṛtañjala rakva riṅ pravara pañcaṛṣy anupama,

śrī vāgīśvaramūrti vijña kita riṅ kavīndra vinuvus,

riṅ rāgasmaratattva rakva kita muṣṭiniṅ saturida,

yan riṅ dlāha bhaṭāra nāthagiri nāthaniṅ sabhuvana.

sakvehniṅ yavabhūminātha paḍa bhakti jə̄ṅta ya hələm,

mvaṅ dvīpāntarabhūmi tan hana vaneh vinurṣita kita,

hiṅanyan kita ṅūny anāgata ri vartamāna ta kita,

dūrān teki tan icchāpan ya pavak iṅ* triloka sahana.

āpan rakva kiteka dharma vəkasiṅ viśeṣa kahiḍəp,

tuṅgal riṅ paramārtha bheda təkap iṅ svatantra katəmu,

lvir dhārāṅusi parvatolahira saṅ maṅarcana kita,

saṅkeṅ pūrva ri dakṣiṇottara ri paścimāgra kinəñəp.

saṅsiptan juga tan haneki ya muvah viśeṣa kahiḍəp,

aṅhiṅ rakva bhaṭāra saṅ vinuvus iṅ trilokaśaraṇa,

hyaṅniṅ hyaṅ paḍa bhakti tan hana vənaṅ lumaṅghana kita,

icchāntā śivabuddhapakṣa paramārtha dharma ta kita.

donkvāṅastuti jə̄ṅ jinendra gurubhakti tenulahakən,

śṛddhānugraha sihta teki pinakeṣṭiniṅ maśaraṇa,

tan gyāgyākna* de bhaṭāra maluyeṅ nirātma palakun,

tolih taṅ bhuvanātiduhkha ri hilaṅta mokṣakaraṇa.

lāvan hayva bhaṭāra tan patutur iṅ daṅū pva karəṅə̄,

doniṅ mānuṣajanma tan tapa kinārya riṅ janapada,

bhūpāleśvara dharmarakṣaka kitāsiheṅ tribhuvana,

śāntāniṅ prabhu poruṣāḍa marənātimūrkha karaṇa.

təkvan jugekaṅ prabhu ratnakāṇḍaka,

rogī jəmah ri vvitikaṅ vaṭādbhuta,

naivedya sātus ratu pavvaterika,

hyaṅ kāla muktyakna yan sujīvana.

yekāmaṅun kasyasihiṅ vatək ratu,

nyā meh viniśśeṣa təkap mahāsura,

vrinvriṅ təkeṅ svarga paḍāharohara,

yan tan hanodhāni bhaṭāra riṅ jagat.

āpan tayaṅ bhūpati devasaṅgha ya,

indrādi gandharvapatī kadevatan,

īśādi dhātrādbhuta viṣṇvāgə̄ṅ takut,

jrih kumyus osah təkap iṅ mahāsura.

tan mithya liṅ saṅ viku vṛddha bhikṣuka,

mvaṅ hyaṅnikaṅ bhūmi təlas maṅañjali,

mojar majar dadyanikaṅ mahīdhara,

ekābdi yan tan jinamūrti bhūpati.

kālānikaṅ devagaṇān paṅastuti,

ṅkāne paḍa hyaṅ parameṣṭhi gotama,

yekān tutur kapva sirān vinurṣita ,

rəp sakṣaṇa ndah valuyaṅ nṛpātmaja.

śīghroməsat saṅ vara* devateṅ ghaṇa,

mantuk sira mvaṅ ṛṣisaṅgha riṅ laṅit,

saṅ śrī narāryātmaja teki varṇanən,

sampun sireky āṅurakən samāhita.

māvas tikā vruhnira yan jinātmaka,

mvaṅ tattvaniṅ rākṣasa vighnaniṅ sarāt,

ṅūnīki maṅke ri hələm ya riṅ galak,

tan len sirān hetunikāṅ* mahoṣadhi.

nā hetuniṅ mantuka seṣṭiniṅ hati,

śīghrādavaṅ romanirāpatah muvah,

māmvīt sirāṇamya rikaṅ mahāgiri,

ṅkā keśava prāpta sire samantara .

liṅ saṅ narendrātmaja riṅ mahāyati,

bhāgyāṇ ḍatəṅ saṅ paramarṣi maṅlavad,

tonton mare kaśmalaniṅ hulun kaki,

deniṅ vatək devagaṇān panaṅguhi.

meraṅhulun denira saṅ vatək ṛṣi ,

menak jugākvāhiḍəpe vuvusnira,

ḍū hayva saṅ śrī nṛpaputra maṅkana,

yogīśvara ndin kadi māskun uttama.

doniṅ śarīreki muvah kadīṅ daṅū,

icchānta tan bañcana roga hetukā,

sihteṅ mahāsattva sudharma karaṇa,

mvaṅ svasthaniṅ* sarvajagat pramāṇa ya.

taṅheh yadin goṣṭhinirān vivakṣitan,

sampun məsat rakva sirāhvan laṅit,

akveh tikaṅ parvatabhūmi koṅkulan,

vindhyādri len mandara mālyavān huvus.

saṅ hyaṅ mahāmeru kapuṅkur adbhuta,

lvir bahni muntab kanakāgra bhāsvara,

lambuṅ kidul taṅ vivarātiśobhita,

yekātiramyoṅgvaniraṅ tapodhara.

sampun ləpas lampahireṅ laṅit madoh,

mvaṅ saṅ ṛṣīndrā kadi kuntul aṅlayaṅ,

śīghrān təkeṅ bhāratabhūmimaṇḍala,

koṅaṅ tikaṅ rājya sarājyarājya ya.

nda yeka tumurun sirātut i hujuṅniṅ acala təpiniṅ tapovana,

ikaṅ vukir avarṇa garjita mihat ri siran umulih iṅ svanāgara,

paḍāsəmu manis tahən sənənikāgiragiraṅan i himbaṅiṅ juraṅ,

humuṅ svarani sundarinya kadi śabdaniṅ amapag akon arāryana.*

gərəhnya tan arən savaṅ misik i rūmnira mavarah i paṅjrahiṅ səkar,

marən taṅis i cātakanya təkap iṅ rərəb anələsi patraniṅ vuṅū,

dudū manisikān ri ṅūni ri larisniran aṅənəs aṅuṅsi śūnyata,

paḍāṅrəs i vuluhnya len titisiṅ ertalin ikin akəcap haneṅ juraṅ.

taṅeh yan ucapən gatinya ri layatnira ri təkanirāmaṅun laṅə̄,

baṅun katurunan hyaṅ iṅ masa kapāt sahanahananikaṅ sakendriya,

byatīta ri larisnireki tucapaṅ sudahana vararākṣasottama,

valaṅ nṛpati poruṣāḍa kaburan təkapira daśabāhu riṅ vana*.

tigaṅ dina lavasnya mapraṅ irikaṅ vana malaga ri saṅ nareśvara,

ilaṅ sahananiṅ śarottama təkapnira paḍa kadi mṛtyu yar hiḍəp,

kapiṅpat ikanaṅ dinā paḍa tikəl palunira vəkasan silih gəlut,

kacidra sinavat pilisnya tinut iṅ məsat alayu matuntunan kanin.

mukhemək ikaṅ aṅga rūkṣa rasa tan vənaṅ ahuripa liṅnika hati,

tuvin riṅ apa tan tutən ya təkapiṅ ripukula daśabāhubhūpati,

ya hetunika tan vruh iṅ paran abhakty anaṅis i suku saṅ nṛpātmaja,

malar sira vənaṅ tumaṅguhana saṅ prabhu sira kalavan munīśvara.

svajāti mami lokavighnakaraṇaṅ nṛpati mavuyuṅ iṅ kadi ṅhulun,

ndatan valuy abuddhi mūrkha palalun lamun ahuripa seṣṭiniṅ hati,

nahan liṅika garjitāmbəkira saṅ nṛpasuta mavuvus manohara,

nya mātalaṅa jīva rakva sira yan talər avuyuṅa saṅ nareśvara.

bhaviṣyati ḍatəṅ narendra daśabāhu rumuruh irikaṅ mahāsura,

sahāyudha surakṣa gadgada manahnira lumihat i saṅ nṛpātmaja,

pilih ratunikaṅ mahāsura nimittanika marək anamya sādara,

bhaṭāra karikānurun panaha saṅ prabhu karaṇanirojvalāmuvus .

ai saṅ vīrādbhutānvam lituhayu ratuniṅ rākṣasāduṣṭa liṅku,

mon hyaṅ mon deva rājādhika makaśaraṇāniṅ musuh tucchajāti,

oyuh tāṅsə̄ payuddhodhara laku patihaṅ pālagānuṅ viśeṣa,

rudrāstrānindya sambut vatəkakən aku tak* vədya sakvehnya bhasmya.

yadyan hyaṅ brahmaviṣṇvīśvara humətaknaṅ rākṣasā tar kavədya,

liṅanyān* mānuṣādharma ya vənaṅ amukekiṅ daśabāhu riṅ praṅ,

nā liṅ kāśīndra yekāṅhudani śaravarān kopamaṅ** mṛtyutulya,

rəp śīghrāmukṣake jə̄ṅ nṛpasuta kətikaṅ sarva rodrāhəli śānta.

sakvehniṅ sañjatālah hyaṅ anala matəmah varṣa tīrthāmṛteṅ rāt,

dukduk cakrāprameyāṅdadi ṭaṭit aṅəḍap lvir kəḍapniṅ katīkṣṇan,

hetu śrī bhūmināthāṅəṭək aṅaṅənaṅən tiṅkah iṅ śatru śakti,

āpan ṅūnī ri ṅūnin taya maḍana sirān deva sor iṅ prabhāva.

śry āvaṅga mvaṅ siraṅ bhūpati magadha musuh denirātyanta śūra,

sākṣāt hyaṅ kālarudre katatakut apa tan saṅkaniṅ kevran ambək,

maṅke puh tvasnirān dūran amənaṅa lamun jīvanaṅ tuṣṭacitta,

deniṅ śatrvādhikānopama juga malilaṅ kevalaṅ buddhiśānta.

ndan saṅ keśava sārjavojar irikā vruh riṅ nayāṅenaka,

he śrī bhūpati hayva vismṛti kite saṅ vvaṅ sinaṅguh musuh,

tan len teki vəkaṅ narendrasuta de saṅ śrī narendraprabhu,

khyātīṅ rāt sutasoma sājñanira saṅ luṅhāṅusir parvata.

maṅkin mantuka riṅ svarājya ri huvusniṅ mukṣa buddhātmaka,

tan saṅkeṅ parabañcanāhyunira mavəlas riṅ vatək devata,

bhakty āminta ri sih bhaṭāra təkapiṅ rāt durbala syuh hələm,

yan tan śrī jinarāja rakva ya tinūtniṅ mānuṣatvā muvah.

lāvan tan saka riṅ kadhīran abhimānākīrty adharmāyuddha,

tan saṅkeṅ havalepa hetunira yan kadyānukā riṅ musuh,

dharmāsihnira marya mūrkha kalavan svasthanikaṅ rāt kabeh,

nāhan kāraṇaniṅ yayāṅalaṅ i don saṅ nātha yan tuṣṭikā.

liṅ saṅ paṇḍita yatna śīghra mavuvus śrī candrasiṅhātmaja, ḍuh bhāgyeki tuhanku liṅnira təkāṅraṅkul ry avak saṅ yayi,

sihniṅ hyaṅ guru sanmateki ri hiḍəpni ṅvaṅ tumonton kita,

sākṣāt lvir karugan maṇik karavuhan jīvāprameyānurun.

bhoh tantuk ta bapaṅku māsku tamare rājyaṅkv i kāśīpura,

təkvan rakva* haneki sot mami yadin rəjve kadibyāṇ ḍatəṅ,

strīratnādhika candravaty arəja nāmānugrahaṅkve kita,

parṇah vuṅsu təkapku tan lyan amisan lavan kitāntən təmən.

nā liṅ śrī daśabāhu mārdava vuvus śrī hastinendrātmaja,

dibyekin paṅasih narendra kadi tan siṅgih təkapniṅ hulun,

ry unəṅkv īkiṅ arāmareṇa karaṇāgyan mantuke hastina,

tovin rakva lavasnirān katilarāṅde tan tutūtniṅ manah.

ṅhiṅ yan vvantən asih narendra ri manəh saṅ nātha maṅkveṅ ari,

deniṅ rākṣasa hayva tan hinuripan sākṣāt sihanta prabhu,

he saṅ śrī sutasoma bhasmi niyatekiṅ yakṣa deniṅ hulun,

yan saṅ śrī jinamūrti laṅghana mareṅ rājyātulak kanyakā.

lāvan māsku piraṅ dineka lavasanteṅ rājya kāśīpura,

tovin tan kinayogyakən taṅ atulak dānānuvarteṅ* jagat,

saṅsiptan ri huvusnikaṅ dina vivāhan mantukeṅ nagara,

lāvan milva kakanta bhaktya ri siraṅ śrī hastinendraprabhu.

nāhan liṅnira saṅ narendra karuhun saṅ keśavāṅayvani,

yekā hetunirāhiḍəp ri sapakon kāśīndra rājottama,

tan varṇan sira muṅgah iṅ ratha kalih saṅ keśavāmvit maluy,

mvaṅ taṅ rākṣasa sampun amvit i sirān bhikṣvātapeṅ parvata.

līlālon lariniṅ rathātut i hujuṅniṅ parvatājə̄ṅ kidul,

sə̄k tekaṅ balayodhasaṅgha maṅiriṅ ghūrṇaṅ mṛdaṅgāsəlur,

ndan śrī bhūpati rakva sārathi ri saṅ śrī hastinendrātmaja,

sākṣāt kṛṣṇa dhanañjaye huvusirāpraṅ mvaṅ vatək korava.

śīghra prāpta sireṅ avaṅgapura śūnyaṅ rājya vus kālasan,

śīrṇekaṅ gupurān rubuh katuvuhan vṛkṣālalaṅ mvaṅ sukət,

riṅ jro maṇḍapa mekhalanya hana saṅgar mvaṅ ḍəṅən syuh rəmuk,

veśmārjāgəlar iṅ natar sakanikā len taṅ panunduk basah.

tistis tan hana vuryaniṅ* mara madoh deśāmaṅun saṅśaya, āpan tan hana kāri vanva kuvu len dharmāśramālyus hilaṅ,

nāhan hetuniraṅ narendratanayātakvan sire saṅ prabhu,

rehniṅ rājya lavan syapeki paṅaran saṅ bhūminātheṅ daṅu.

liṅ saṅ bhāratavaṅśa yeka* sumahur kāśīndra rājādhipa,

ry āvaṅgeki ṅaranya rājyanika saṅ devāntakādiprabhu,

sānak vṛddha gatinya rakva ya təkap śrī māgadhendraprabhu,

khyātīṅ rāt maṅaran si kośa katakutniṅ vīra śaktīṅ raṇa.

karvālah təkapiṅ hulun masusupan boṅ ləs matiṅgal pura,

yekān rakva tinūtnya* bhaktin umusir śrī ratnakāṇḍādhipa; liṅ saṅ bhūpati saṅ nṛpātmaja matakvan hetuniṅ praṅ daṅu,

lāvan maṅkana pan sumitra karəṅə̄ dadya prabhaṅgenucap.

siṅgih liṅ nṛpaputra ṅūni kahiḍəp sambandha tan vvaṅ vaneh,

saṅ śrī mālava hetuniṅ masavalānak strī sukanyāhajə̄ṅ,

devī puṣpavatī ṅaranyan amisan saṅkeṅ hibu pvaṅkulun,

saṅkeṅ rāmanireki rakva kahiḍəp tan len sanak māparək.

saṅ kośālara ləṅləṅ epu kasəkan kūṅ de suputry āhajə̄ṅ,

marmānomah i mālavendra mabutəṅ denyān tatan vāndhava,

yekāṅuṅsira riṅ hulun dadi matəmvākun prasiddhenivə̄,

tan svaṅ vāda sameka jāti purihiṅ vvaṅ tan vaneh denira.*

śry āvaṅgādhipa mogha duhkha ri təkap saṅ kośa maṅgə̄ṅ viraṅ,

nāhan hetunikān panomah iy arintaṅ candravatyeṅ puri,

donyān həlyana mālavendraduhitā ṅvaṅ tan sukhānvam tuvi,

ṅhiṅ rakryan pinalarpalarku śaraṇanyāmūrva rāgeṅ tilam.

yekānuṅ karaṇanya rodra tinutiṅ praṅ ghora tan paṅkura,

ṅkā tākun daśabāhurūpa paṅalahni ṅvaṅ ri saṅ bhūpati,

nāhan liṅ naranātha śīghra lumaris taṅ syandanātūt vana,

makveh deśa huvus kalalvanika bhaktyāsuṅ mahābhojana.

mehmeh prāpta sireṅ svarājya maṅinəp glānaṅ balākveh rapuh,

kāla dvādaśarātri rakva midər iṅ bhūmy aṅrurah rākṣasa,

hetu śrī naranātha motus umareṅ kāśipurāṅdūtana,

ṅkā rakvaṅ majare ḍatəṅ nṛpasute jə̄ṅ śrī supatnīśvarī.

lāvan rakva sireky anuṅsuṅa mareṅ udyāna ratnālaya,

devī candravatīki hayva sira kāntun mvaṅ vvaṅ iṅ jro puri,

nā liṅ śrī naranātha yeka tujaraṅ dūtāməṅakən kuləm,

eñjiṅ prāpta ri jə̄ṅ narendramahiṣī mājar ry ujar saṅ prabhu.

ndan saṅ śrī parameśvarī paramatuṣṭāmbəknirān garjita,

de saṅ śrī sutasoma rakva karəṅə̄ mantuk sakeṅ parvata, āpan ṅhiṅ hiṅarəp=harəp nṛpati lakyā saṅ suputrīṅ puri,

tan len rakva sirekipenira rəsəp saṅ śrī narendrādhipa.

sampun sāpta majə̄ṅ* lavan saṅ apatih deyānirān** maṅkata,

mvaṅ saṅ śāla sucitra dakṣa tiga putra śrī narendrādulur,

yekāmūk ripu sāk tapovana təlas taṅ detya len rākṣasa,

nāhan hetunireki ṅūni juga tan tūt śrī narendrādhipa.

lumrāṅ vṛtta jinendramūrti sira rakva katəmu sira de nareśvara,

osik buddhinikaṅ vvaṅ adyah i daləm kadi tṛṇataru maṅrəṅə̄ gərəh,

kapvāluṅ turidāsəvə̄ lulut unəṅnyan asəmu kumudāṅdadak məkar,

hyunhyun deni manahnikaṅ vvaṅ aṅucap ri sira kadi śaśāṅka pūrṇama.

byātītan ri gatinya teki tucapən saṅ ahayu pinakesiniṅ puri,

saṅ sākṣāt maṇikiṅ smarālaya təmahniṅ aji madanatantra riṅ jinəm,

saṅ lvir sūkṣma sakeṅ tayānurun i rakva təka ri paṅaveśaniṅ hiḍəp,

hyaṅniṅ kendran aṅiṇḍarāt səmunirāvanəh i ləyəpikaṅ surālaya.

endah rūpanirāhyaṅ aṅḍiri suteja ri mukha manaruh niśākara,

nirbhagnaṅ tiləm iṅ sarājya satuvuhnira satata mamūrṇacandrama,

sāśrī varṇanirātulis manurigenunus i təṅahirāṅrəs iṅ hati,

susv arjārəja keṅineṅin asavaṅ kəna tulisa kasambat iṅ maṅə̄.

taṅheh yan vuvusən hajə̄ṅnira təkeṅ luṅayan asəmu luṅgahiṅ gaḍuṅ,

kīrṇaṅ ṣaṭpada keṅis aṅrasi* vətisnira kadi məkar ānamar puḍak,

suṅsutsuṅsutireki rakva caritan dumadak amahi rāganiṅ mihat,

kəmbəṅkəmbəṅ i luhnirāsəmu ririsriris i paṅayatiṅ** labuh kapāt.

sakvehniṅ kusumeṅ taman paḍa ya tan hana maṅinaki cittaniṅ maṅə̄,

sinvam konəṅunəṅ tatan kahuniṅāsəmusəmu makasaṅkaniṅ purik,

śīrṇaṅ tañjuṅ aśoka yeka rinuñahrañih ika pamavan lare hati,

tan hopən kusutiṅ gəluṅ humuray avra vahəlika huvus sumamburat.

nirvāmbəknira riṅ* tanah siṅi rəsəpniran anakanakan puḍak sumār,

nirdon teki vaṅinya dūranika yan tulisana kakavin palambaṅa,

ratnānopama kaṅkənādi pakabhūṣaṇanira ya huvus dinohakən,

aṅhiṅ luhnira tan pakāla karakət tumus anələsi himbaṅiṅ pipi.

maṅkin tībra manahnikaṅ vvaṅ umarək salah ulah i vuyuṅ* suputrikā,

prāptaṅ rātri makin baṅun hilaṅa rakva mamarəṅana tambvaṅiṅ vulan,

riṅ raṅkaṅ sphaṭikārja teki kahana rasiki sinaput** iṅ lare hati,

lvir padmāsana rakva rovaṅirān pəsata ri silibiṅ vvaṅ aṅhaḍəp.

maṅkā cittanikaṅ vvaṅ adyah i daləm kadi kahuvana* de suputrikā,

guṇḍik mvaṅ kaka len uveñā paḍa tan hana vihikan i duhkhaniṅ manah,

mukhya śrī parameśvarīki sira tan vruh i vuyuṅira** saṅ nṛpātmajā,

tan kāṅən ri pakon narendra tumute siran amapaga tan kavandhyana.

vvantən strī juruniṅ vicakṣaṇa kavīṅgita valuvaluniṅ kavīśvara,

khyātīṅ rāt maṅaran surāga pinujīṅ hayu vahuvahu liṅsir iṅ vayah,

prajñā vruh i tiṅkahiṅ marək aṅimbaṅi ri vuyuṅ i saṅ suputrikā,

lvir maṅgiṣṭa miṅiṅ guladrava manismanis i haturike* nṛpātmajā.

ibu saṅ avarṇa kārttika rarasta suksəka maṅə̄ viraṅrvaṅ alaṅə̄,

buṅah i mukhanta tan kram asavaṅ vulan kalamukan himāraṅ anipis,

ləṅəṅ apatər* taṅis sahakilatkilat kəḍap ikaṅ vulat tan aharis,

sahaja mavahvahan lara təkāṅhudanhudan i lūhta madrəs i pipi.

mapa kari hetuniṅ vvaṅ aviṅitviṅit kadi viṅitniṅ onəṅ alavas,

tuvi hana vṛtta mātra təkaniṅ madhubrata marāṅjajah səkar arum,

sipisipi rūmnirāsəmu nirāśrayān paṅucapiṅ vruh aṅhəlahəla,

tuhutuhu yan jinendra maśarīra rakva sira devarūpa kahiḍəp.

sira mara rakva ṅūni mamaṅun tapabrata rikaṅ sumeru karəṅə̄,

kinaraṇaniṅ vatək hyaṅ i payogadhārakanireki somya pinalar,

suravarakāminī sama mamañcanāṅdadi maləs kabañcana ləṅə̄ṅ,

təkap i haləpnirāsəmu manobhavānurun i ramyaniṅ masa kapāt.

karaṇa bhaṭāra śakra matəmah sira stry anupameśvarī bhagavatī,

apituvi tan kavighnan iki kevalāhəniṅ ikaṅ manah pratihata,

paramasukhāpti dharma ya nimitta saṅ nṛpatiputra mānuṣa muvah,

karuṇa sireṅ jagattraya siroṣadhi təkanikaṅ prakampa ya hələm.

krama ri huvusnirān mari tapodharān muliha seṣṭiniṅ tvas inamə̄r,

pravala kakendriyan sahananiṅ jagat təkap ikaṅ kaśāntan apagəh,

karaṇanirāṇ ḍatəṅ vruh i hayunta yan saphala ratvaniṅ vvaṅ ahajə̄ṅ,

savava səḍəṅ supatnya nṛpaputra rakva kita lakṣmyaniṅ sanagara.

tuvi panahaṅku hetunira tan kabañcana təkapnikaṅ suravadhū,

vədinira rakva kevran aṅisapva māsku ri səḍəṅnirān silihasih,

riṅ apa surendra tan pasuṅa yan hanāmbəknireṅ surāpsaravadhū,

riṅ apa sireki tan maharəperiyan yadi haneka rakva savava.

kaliṅanyekī tan hana ruruhən iṅ svarga sahana,

hayunta dyah yadyan susupana ri jə̄ṅniṅ girivana,

apan tan vvantən tovin umahasa lāvan nṛpasuta,

smarāṅicchā mvaṅ hyaṅ ratih atiki līlāṭikaṭikan.

ndi ta ṅvaṅ tan bhrāntāṅənaṅən i rūmniṅ kadi kita,

ndi devīdevānuṅ madana tuvi yan mānuṣa tahā,

təkeṅ viṣṇvaṇḍabrahmanagaraśivāṇḍāsəmu jəṅər,

umādevī byaktānaṅis ahiri rehniṅ silihasih.

saṅsiptanya tuhanku nora phalaniṅ gə̄ṅ duhkha tan popama,* təkvan saṅ hinarəp=harəp sira səḍəṅ karma suputrīṅ puri,

aṅhiṅ teki tuvuhta yogya pahayun rehniṅ sukanyākrama,

hayva vruhvruh i polah iṅ sama lavan devī ratih riṅ hajə̄ṅ.

pūjāmantrasamādhiyoga gavayən riṅ rātrikālāmərən,

pantənpantən aneka yogya pituhun sāliṅnikaṅ stry ātuha,

mvaṅ tekaṅ brata śuklabhukti gavayən hayvācavuh riṅ paṅan,

astam taṅ tahapən gilutgilutan aṅkən dīna yekāprihən.*

āpan rakva vəkasniṅ evəh inucap yan riṅ sukanyākrama,

akveh strīnujaran maliṅ raras avarṇa lvir səkar tan parūm,

vvantən lvir səkar iṅ ləmah yayan agandhānorakən campaka,

yekānuṅ purih iṅ pramāda riṅ ulah lāvan pranītīṅ laku.

kaka kahiḍəp ujarta lvir kady āmṛta kasirat,

kunəṅ amuhara ləṅləṅniṅ śokānaṅis asəkəl,

gati nṛpati jugāṅde trāsākon mapaga sira,

ragaragana təkapniṅ gəntərniṅ kapat alaṅə̄.

ndi kari hana səkarniṅ jaṅga mvaṅ kumuda kuniṅ,

sumar aṅaraṅ ināpet siṅ yogyāṅisəpa vaṅi,

tan imanimana tekaṅ kumbaṅ yan tuhu rəsəpa,

hulih i paranikātohtoh jīvāpuhara ləsəh.

guruvacana vəkasniṅ śabdekaṅ tuhu linəvih,

sphaṭika curiga ratnānindyaṅ mūlya sanagara,

pirapira harəp i ṅvaṅ siṅ denyān yan* rəsəpakna,

subhaga kadi səkar tan sumpaṅniṅ vahu vinaraṅ.

prasama samasamaṅkun tan luptāṅəmasi viraṅ,

ləhəṅa tiki kadi ṅvaṅ prāptāsuṅsuṅən i ṅuni,

patulakanika maṅkin tan vruh paṅlipur alara,

riniṅariṅa katuhvan tan sih bhūpati ri kami.

yan kāṅən mara tan padharmani tuvuhku rasa pəjaha tan hanenaka,

tovin rakvaṅ anəmva rājaduhitāphala makaśaraṇeṅ svayambara,

śrī devīndumatīṅ usāna karəṅə̄ siran amilihi jalva riṅ sabhā,

de saṅ bhoja makārya dharma karaṇan* tiruniṅ arari ratnakanyakā.

ndan dūran pva ta saṅ narendra viparīta yadi ləvəs asihnireṅ hulun,

lāvan rakva huvus subhāgya rasikān tayakəna palakun sihiṅ vidhi,

aṅhiṅ teky amalar narendra sira lot kasukəsukəraneṣṭiniṅ hati,

deniṅ gyānira hetuniṅ luh aṅəbak ri pipi sumarasah mareṅ kapə̄.

təkvan rakva kayogyan i ṅvaṅ iki yan kaka haji tulusāsiheṅ hulun,

kəmbaṅkəmbaṅa* donku ratnaduhitānira taləra makesiniṅ puri,

denya ṅvaṅ piṅitən malar sira hanāṅlamara ratu suməmbahe** haji,

tan gyāgyākəna siṅ rəsəprəsəp aṅampunana rəsəpa riṅ kadiṅ hulun.

maṅke pvān anubhāra kevala sirālaṅalaṅa tiki tan pamatyani,

sinvam śuṣka səkar ləvas vruh ika mūlya saka ri tan asihnireṅ hulun,

yekānuṅ gumave putək hati təkānaputi patilariṅ yayah bibi,

menak ṅvaṅ pəjaheki rakva tumute sira vihikana duhkhaniṅ manah.

hah rāmaṅku bibiṅku saṅ lumah iṅ agranagara dadi sūkṣmadevata,

tiṅhal te kasiharṣaniṅ kavəkas* iṅ kakak dinulur i tan sihiṅ vidhi,

dūran teki manəhta yan kita samāhuripa tulusa sanmateṅ hulun,

saṅsiptān dudutən ṅhulun bapa tibāna lara havananiṅ hulun pəjah.

ai koṅ hyaṅ vidhi mah hayuṅku valatən srahakna ri kalaṅvaniṅ kapāt,

rosniṅ madhya baṅun vuluh gaḍiṅ umantuka ri ləyəpi luṅgahiṅ gaḍuṅ,

nyū dantākuniṅ arja rakva dunuṅən paṅuliha* gəmuhiṅ payodhara,

keśārjātutureṅ himāṅəmu riris luṅayan umaluyeṅ vəlas harəp.

śokāṅrās* i manisnya rakva muliheṅ sarasija səḍəṅiṅ** samīraṇa,

sakvehniṅ dadiniṅ śarīra muliha təmaha ləyəpi ramyaniṅ vukir,

saṅ hyaṅ candra sireky anūkṣmakna raśmini buṅahi mukhaṅkv amūrṇama,

ṅkā tākun muliheṅ nirātmaka vaśātapakan i ləṅəṅiṅ divākara.

na vuvus narendraduhitāməlasakən anaṅis pəgatpəgat,

paḍa kapyuhan sahananiṅ marək anuhu saliṅ nṛpātmajā,

sira saṅ kavīndradayiteki sira milu maṅepvan iṅ manah,

ṅhiṅ ateki tan surud ikuṅ hati dəlit ulahiṅ kavīśvara.

tuhaniṅ hulun tuhatuhaṅku taham ibu vuvus suputrikā,

sipi gə̄ṅi sih nṛpati parvatasama ri tuhanku vah lulut,

hana ku pva hetunira tan makaśaraṇa tikuṅ svayambara,

sira rāma rakryan iṅ usāna tan atən irikaṅ* prayojana.

ṅhiṅ ateki mantva kaharəpnira kurukula hastinātmaja,

salagīki ṅūni vinəkasvəkasakən i səḍəṅnirāhurip,

ya nimitta saṅ prabhu vavaṅ kadi tṛṇataru maṅrəṅə̄ gərəh,

ri ḍatəṅ narendrasuta hetuniṅ aṅutus akon manuṅsuṅa.

tuvi rakva liṅnira titir vinacanakənire nareśvarī,

taya ṅūniṅūni karəṅə̄ prabhu matuha subhakti riṅ rari,* sira rakva bhaktya ri kite huvus atəmu lavan nṛpātmaja,

təhəreki ratvakna** riṅ pura sumiliha devaniṅ jagat.

sira rāka rakryan iki kevala pakabala rakṣakeṅ praja,

tumuteṅ vatək ratu samāṅjuru maləsa maseva sanmata,

taya tan vruheki paṅucapnira makamukha saṅ dvijeśvara,

ndya ta doni saṅ* nṛpati tan tulusanira ri saṅ nṛpātmajā.

nāhan hīṅan i goṣṭhi saṅ kavivadhū təka rəsəp i narendrakanyakā,* sīnlan gīta palambaṅ arja mamanismanisi vuvusikāmaṅun laṅə̄,

sampun rakva tibaṅ ḍavuh təlu paḍāturu sira təkaniṅ vvaṅ aṅhaḍəp,

eñjiṅ rakva sirenatag laris umaṅkata tumuta ri saṅ nareśvarī.

yekā hetunirāhyas arja masalin huləs arəja lavan tapih suji,

mvaṅ sakvehnikanaṅ vvaṅ adyah* i daləm sahana paḍa madumduman raras,

tuṣṭāmbəknira saṅ narendraduhita təka məkul i narendrakanyakā,

lvir kady anəmu gandhaniṅ kusuma layvan i marəni vuyuṅ suputrikā.

tan varṇan sira teki śīghran umijil təka ri ləbuhikaṅ svanāgara,

sə̄k tekaṅ balavāhanākrama sumaṅgraha katəmu matuṅgalan damar, ācārī* mvaṅ ikaṅ karaṇḍan aṅiriṅ kakakaka sama muṅgah iṅ ratha,

valvuṅkuk hana riṅ dvipāṅga tumut īñanira huvanirākramāhaləp.

ndan saṅ śrī parameśvarī mvaṅ ika saṅ nṛpavaraduhiteki tan kasah,

muṅgv iṅ syandana ratnasaṅgha sahavīragaṇapati mahādbhutāṅdulur,

ndan rakryan mapatih sasomahan ateki sira milu surakṣa śobhita,

mukhyaṅ śrī daśabāhuputra katigeka sira tumut i jə̄ṅ nareśvarī.

ndan riṅ sakṣaṇa śīghra teki ri larisnira livat i pamiṅgiriṅ pura,

deśākveh təpiniṅ havan hana juraṅjuraṅ adaləm i tuṅhaniṅ savah,

sampun rakva ləpasnireki vijiliṅ ravi sumuluhi bhūmimaṇḍala,

maṅkin ramya katon manuknya arəbut vvahan avurahan iṅ tahən ragas.

byātītan ri larisnireki təka riṅ hudyāna ratnālaya,

honyekaṅ gupurāpucak maṇi murub lvir tejaniṅ bhāskara,

sakvehniṅ ratha* ramya maṇḍəg irikāglar** taṅ dvipāṅgāḍəḍə,

kañcit śrī parameśvarī sira ḍatəṅ mvaṅ saṅ maṇikniṅ puri.

sampun rakva sira pva mañjiṅ umareṅ udyāna ramyālaṅə̄,

hyunhyun buddhinikaṅ sarājya təkap iṅ puṣpānəḍəṅ* mrik sumār,

nyūdantāṅliga harja nāgakusumā gambir mənur campaka,** yekānuṅ midər iṅ ranu ryakika ghūrṇaṅ lvir ryakiṅ sāgara.

tuñjuṅ baṅ tarate təṅahnya kamalāṅjrah ṣaḍpadanyāṅrubuṅ,

kīrṇaṅ mīna haneka māgəṅ aṅasut dhvastaṅ sarojāpətak,

miṅgəkmiṅgək ikaṅ huvurhuvur avarṇānūt arəṅgeṅ pasir,

puntī vahv aməḍar pupus kadi layar muṅgv iṅ təpinyāmijah.

paṇḍan raṅkaṅ i piṅgipiṅgir aṅuḍoḍaṅ ketakārjeṅ paruṅ,

ramya vvaṅ maṅalap samānakanakan rūmniṅ puḍak tan kasah,

len tekaṅ manulis svarūpani kakūṅnyan lot piniṇḍeṅ lavə̄,* mvaṅ tekaṅ kakavin sinūkṣma ya kənojarnyār umuṅgv iṅ jinəm.

guṇḍik vval hana kuñja len kakakakānvam lvir ratih riṅ hajə̄ṅ,

ramyādyus paḍa garjitāvudavude tusniṅ taṭākādaləm,

akveh lvirnya baṅun vulan mava savaṅ kevran təkapniṅ rəməṅ,

len tekaṅ kadi śaṅkhabāhu riṅ apekin tan subhuktyeṅ tilam.

akveh bhāvanikaṅ vaneh hana mareṅ yāśāṅuṅaṅ* pañcuran,

anyat taṅ kalaṅə̄n mihat ri ləyəpiṅ nūṣe təṅahniṅ ranu,

sākṣāt svarga piniṇḍa rūpanika himpər viṣṇulokānurun,

deniṅ kvehnikanaṅ suvarṇamaṇi raṅkaṅ lvir katoneṅ tavaṅ.

hyaṅhyaṅniṅ kalaṅə̄n bhaṭāra linəyəpniṅ inucapira saṅ kavīśvara,

baprā* mās kuməñar cinaṇḍy aruhur iṅ padu ri təṅahikārja kokiran,

līlāmarpat i gopuranya sinupit makara kanakaratna bhāsvara,

mvaṅ tekaṅ maṇi kostubhārja dumilah sumarasah irikaṅ yaśottama.

riṅ pūrvādiviśeṣa veśmakanakanya kadi vahu sake hyaṅ īśvara,

ṅkāneṅ dakṣiṇa dhātraveśma kahiḍəp marakata dumilahnirāntara,

ndan riṅ paścima yeka rakva ya mahāmarabhavana panarkaniṅ mulat,

nyāśeṅ uttara tulya veśma madhusūdana* pasajinireṅ vanīṅ raṇa.

riṅ madhya* sphaṭikendra śuddha vinaṅun gṛha linaraṅaniṅ surālaya,

bvat siṅhāsana sūrya candran umurub pucakika kadi mṛtyu bhāsvara,

vaiḍūryātəp anekavarṇani vuvuṅnya mabuka navaratnasaṅgha ta,

sākṣāt svarga bhaṭāra buddha paramārtha śiva ri səḍəṅiṅ nirātmaka.

yapvan rātri surupniṅ arka juga tan hana pətəṅ inucap sadā mavā,

deniṅ ratna viśeṣa muntab amaṅun dina sakala bhaṭāra bhāskara,

təkvan deni kəñarnikaṅ hariṇividruma makamata indranīla ya,

mvaṅ tekaṅ sphaṭikārja sugya rinəmuk kuməñar ika hənīnya śobhita.

sə̄k taṅ sarvasəkar məkar suməkar aṅjrah aṅibəki rikā ndatan ləsəh,

yan tapvan suməkar madəg kumuḍu taṅ kuḍu kadi kuḍuniṅ sarīṅ tulis,

mrik kəmbaṅ śatapattra riṅ vvay amapag vaṅini paməḍariṅ mayaṅ məkar,

ṅhiṅ tekaṅ kumudā məkar kumuḍu mājar i təkaniṅ aho lavan vəṅi.

kīrṇaṅ candana marbuk ambəni kapurnya suradaru mamandarāruhur,

mvaṅ kalpadruma pārijāta binatur pinik arəja rinəṅga riṅ tatur,

len cūḍāmani simsim* arja manəḍəṅ vvah ika kusumaratna paṅkaja,

luṅsirluṅsir anekapatranika mañjəṭi hana laka sutra baṅpəṭak.

ramyākveh tṛṇa kañcanāsəmu vəlas harəp amilət aśokapādapa,

dhūpā kastuririṅ pahoman amələk kadi hana sira bhikṣv aṅarcana, ñjrah taṅ kāñcanavṛkṣa cāmara ri heṅ muvah ika hana sattva kasturi,

mvaṅ səṅgah kanakārja rakva mavilāsa maməṅaməṅ avarṇa bañcana.

lor vetan hana tīrtha nirmala mijil saka riṅ upala padmarāga* ya,

len tekaṅ tuməḍun mareṅ ranu bañunya kuniṅ abaṅ anekavarṇana,

lumrākveh makaranya medərani təpinya kanaka maṇi teja bhāsvara,

svargākambaṅaniṅ tasik madhu paḍanya vahu təka sakeṅ smarālaya.

ndi ṅganya ṅvaṅ anəmva rājya kadi ramyanika yaya katona ri laṅit,

devī deva yayan kapūhan aṅaləm təka mara paḍa bhakty amurṣita,

tan hopən tikanaṅ vvaṅ adyah i daləm sahana kadi hañahañar mulat,

ṅhiṅ kevran juga deni tan vavaṅ ikān parana kadi tumiṅhal iṅ vulan.

kunaṅ ika saṅ savaṅ hyaṅ i kalaṅvaniṅ kusuma katvaṅ iṅ sanagara,

hana sira riṅ bukūr i təpiniṅ juraṅ liniput iṅ gaḍuṅ vahu mure,

ləṅəṅ alaṅə̄ mihat ri ləyəpiṅ kalaṅvan atiśobhitāparimita,

təkapi haləpnikaṅ sphaṭikaveśmaratna manaruh dināvyaṅ umurub.

riniṅariṅa pva mṛga kadi tan pamātra muvaheka rakva ya dələ̄n,

kadi məsateṅ kṣaṇāmarəṅane kəḍapniṅ umaraṅikət səkar arūm,

karanaṇiran maśabda ri siraṅ kavīśvaravadhū vidagdhan umarək,

mataña ri mūlaniṅ ranu manūṣanūṣa kadi sūkṣma nūṣa kahiḍəp.

saṅ inujaran vavaṅ humatur aṅhəbaṅhəbaṅ aṅakṣamāṅəmu manis,

dyah ari baṅun siratsirati raśminiṅ madhu vuvusta yogya dahatən,

niyata manəhta tan vruh i kamūlamūlanika ramya tan pasiriṅan,

ṅuni-ṅuni yan bhaṭāra sira saṅ makārya muni sajjana prabhu tuvi.

ṅhiṅ iki karəṅv anindya ya titir sinūkṣmakən i citta saṅ narapati,

ulih i samādhi saṅ pravara paṇḍitārya karuhun ta saṅ narapati,

kita juga saṅ pramāṇa ri kalaṅvaniṅ taman adṛvya ratnakanaka,

mayugala riṅ* humah sphaṭika śuddha rakva kalavan narendratanaya.

karaṇa narendra yan sira makon manuṅsuṅa ri saṅ nareśvaravadhū,

saha kalavan hayunta makamūlya nāyaka təkapniṅ adyah i daləm,

pravala sireki magya* mihateṅ smarārati haneṅ manobhavapada,

təmah i rarasta rakva kalavan jinendratanu riṅ gṛhārja kanaka.

sinamasama pva rūmta bibi yan matəmva kalavan nareśvarasuta,

səḍəṅ usirən təkapniṅ amarātapabrata makādi janma sahana,

vvaṅ apa ṅaranya tan maharəpeṅ kadibyaniṅ umeśvarāsihasihan,*

ndya vənaṅaniṅ nirāśraya təkapta lālana maṅayva rāga turida.

nahan liṅ saṅ strī prajña dadi sumahur saṅ nṛpasutā,