siddhaM|| namaś śivāya||
jayati viśva-deva-saṁghāta
-nicitaika-mūrttis sanātanaḥ
sthānṇur indu-raśmi-vicchurita
-dyutimaj-jaṭābhāra-maṇḍanaḥ||
tam anu bhū-surā dvija-pravarās
sāmarg-yajur-vveda-vādinaḥ
yat-prasādas trāyate nityaṁ
bhuvana-trayaṁ pāpmano bhayāT||
anupadaṁ surendra-tulya-vapuẖ
kākusthavarmmā viśāla-dhīḥ
bhūpatiẖ kadamba-senānī
br̥had-anvaya-vyoma-candramāḥ||
Atha babhūva dvija-kulam prāṁśu
vicarad-guṇendv-aṁśu-maṇḍalaM
try-ārṣa-vartma-hāritī-putram
r̥ṣi-mukhya-mānavya-gotra-jaM||
vividha-yajñāvabhr̥ttha-puṇyāmbu
-niyatābhiṣekārdra-mūrddhajaM
pravacanāvagāha-niṣnātaṁ
vidhivat samiddhāgni-soma-paM||
praṇava-pūrvva-ṣaḍ-vidhāddhyeyam
-nānardyamānāntarālayaM||
akr̥śa-cāturmmāsya-homeṣṭi
-paśu-pārvvaṇa-śrāddha-pauṣṭikaM
Atithi-nitya-saṁśritāvasathaṁ
savana-trayāvandhyanaityakaM
gr̥ha-samīpa-deśa-saṁrūḍha
-vikasat-kadambaika-pādapaM||
tad-upacāravat-tadāsya taros
sānāmya-sādharmyam asya taT
pravavr̥te satīrtthya-viprāṇāṁ
prācuryyatas tad-viśeṣaṇaM
evam āgate kadamba-kule
śrīmān babhūva dvijottamaḥ
nāmato mayūraśarmmeti
śruta-śīla-śaucādy-alaṁkr̥taḥ
yaḥ prayāya pallavendra-purīṁ
guruṇāṁ samaṁ vīraśarmmaṇā
Adhijigāṁsuḫ pravacanaṁ nnikhilaṁ
ghaṭikāṁ viveśāśu tarkkukaḥ
tatra pallavāśva-saṁsthena
kalahena tīvreṇa roṣitaḥ
kali-yuge 'sminn aho bata kṣatrāt
paripelavā vipratā yataḥ
guru-kulāni samyag ārāddhya
śāstram adhītyāpi yatnataḥ
brahma-siddhir yyadi nr̥pādhīnā
kim ataḥ paraṁ duẖkham ity ataḥ
kuśa-samid-dr̥ṣat-srug-ājya-caru
-grahaṇādi-dakṣena pāṇinā
Udvavarha dīpim acchastraṁ
vijigīṣamāṇo vasundharāM||
yo 'ntapālān pallavendrāṇāṁ
sahasā vinirjjitya saṁyuge
Addhyuvāsaẖ durggamām aṭacīṁ
śrīparvvata-dvāra-saṁśritāM||
ādade karān br̥had-vāṇa
-pramukhād vahūn rāja-maṇḍalāT
evam ebhiḫ pallavendrāṇāṁ
bhru-kuṭī samutpatti-kāraṇaiḥ||
sva-pratijñā pāraṇotthāna
-laghuhbiẖ kr̥tārthaiś ca ceṣṭitaiḥ
bhūṣaṇair ivābabhau balavad
-yātrā-samutthāpanena ca||
abhiyuyukṣayā gateṣu bhr̥śaṁ
kāñcī-narendreṣv arātiṣu|
viṣama-deśa-prayāṇa-saṁveśa
-rajanīṣv avaskanda-bhūmiṣu||
prāpya senā-sāgaraṁ teṣāṁ
prāhaN balī śyenavat tadā
Apad-antān dhārayām āsa
bhuja-khaḍga-māttra-vyupāśrayaḥ||
pallavendrā yasya śaktim imāṁ
labdhvā pratāpānvayāv api
nāsya hāniś śreyasīty uktā
yam mitram evāśu vavrire||
saṁśritas tadā mahīpālān
ārādhya yuddheṣu vikramaiḥ
prāpa paṭṭa-bandha-saṁpūjāṁ
kara-pallavaiḫ pallavair ddhr̥tāM||
bhaṅgurormmi-valgitair nr̥tyad
-aparārṇavāmbhaẖ kr̥tāvadhiM
preharāntām ananya-saṁcaraṇa
-samaya-sthitāṁ bhūmim eva ca||
vibudha-saṅgha-mauli-saṁmr̥ṣṭa
-caraṇāravindaṣ ṣaḍānanaḥ
yam abhiṣiktavān anudhyāya
senā-patiṁ mātr̥bhis saha||
tasya putraẖ kaṅgavarmmogra
-samaroddhura-prāṁśu-ceṣṭitaḥ
praṇata-sarvva-maṇḍalotkrir̥ṣṭa
-sita-cāmaroddhūta-śekharaḥ
tatsutaẖ kadamba-bhūmi-vadhū
-rucitaikanātho bhagīrathaḥ
sagara-mukhyas svayaṁ kadamba-kula
-pracchanna-janmā janādhipaḥ||
Atha nr̥pa-mahitasya tasya putraḥ
prathita-yaśā raghu-pārthivaḥ pr̥thu-śrīḥ
pr̥thur iva pr̥thivīM prasahya yo 'rīN
Akr̥ta-parākramatas sva-vaṁśa-bhojyāM||
pratibhaya-samareṣv arāti-śastro
llikhita-mukho 'bhimukha-dviṣāṁ praharttā
śruti-patha-nipuṇaẖ kaviḥ pradātā
vividha-kalā-kuśalaḫ prajā-priyaś ca||
bhrātāsya cāru-vapur-abda-gabhīra-nādo
mokṣa-tri-vargga-paṭur anvaya-vatsalaś ca
bhāgīrathir nnara-patir mr̥ga-rāja-līlaḥ
kākustha Ity avani-maṇḍala-ghuṣṭa-kīrttiḥ||
jyāyobhis saha vigraho 'rthiṣu dayā samyaK prajā-pālanaM
dīnābhyuddharaṇaṁ pradhāna-vasubhir mukhya-dvijābhyarhaṇaM
yasyaitat-kula-bhūṣaṇasya nr̥-pateḥ prajñottaraṁ bhūṣaṇaM
taM bhūpāẖ khalu menire sura-sukhaṁ kākustham atrāgataM||
dharmmākkrāntā Iva mr̥ga-gaṇā vr̥kṣa-rājiṁ praviśya
chāyā-sevā mr̥ḍita-manaso nirvr̥tiṁ prāpnuvanti
tadvaj jyāyo vihata-gatayo bāndhavās sānubandhāḥ
prāpuś śarmmā vyathita-manaso yasya bhūmiṁ praviśya||
nānā-vidha-draviṇa-sārasam ucchrayeṣu
matta-dvipendra-mada-vāsita-gopureṣu
saṁgīta-valgu-ninadeṣu gr̥heṣu yasya
lakṣmy-aṅganā dhr̥timatī suciraṁ ca reme||
guptādi-pārthiva kulāmbu-ruha-sthalāni
snehādara-praṇaya-sambhrama-kesarāṇi
śrīmanty aneka-nr̥pa-ṣaṭpada-sevitāni
yo 'bodhayad duhitr̥-dīdhitibhir nr̥pārkkaḥ||
yan daiva-sampannam adīna-ceṣṭaṁ
śakti-trayopetam athāsanasthaM
śeṣair guṇaiḥ pañcabhir apy asāddhyās
sāmanta-cūḍāmaṇayaḥ praṇemuḥ||
sayiha bhagavato bhavasyādi-devasya siddhy-ālaye siddha-gāandharvva-rakṣo-gaṇais sevite vividha-niyamaho madīkṣāparair brāhmaṇaiḥ snātakaiḥ stūyamāne sadā mantra-vādaiś śubhaiḥ
sukr̥tibhir avanīśvarair ātma-niśśreyasaṁ
prepsubhis sātakarṇyādibhiḥ śraddhayābhyarccite
Idam uru-salilopayogāśrayaṁ bhūpati
kārayām āsa kākusthavarmmā taḍākammahaT
tasyaurasasya tanayasya viśālakīrtteḥ
paṭṭa-trayārppaṇa-virājitacāru-mūrtteḥ
śrī-śāntivarmma-nr̥pater vvara-śāsana-sthaḥ
kubjas sva-kāvyam idam aśmatale lilekha||
namo bhagavate sthāna-kundūra-vāsine mahādevāya. nandatu sarvva-samantāgato 'yam adhivāsaḥ. svasti prajābhya Iti