Mandsaur Stone Inscription of the Silk Weavers

siddham

yo bhr̥ty-arttham upāsyate sura-gaṇais siddhaiś ca siddhy-artthibhir ddhyānaikāgra-parair vvidheya-viṣayair mmokṣ-ārtthibhir yyogibhiḥ| bhaktyā tīvra-tapodhanaiś ca munibhiś śāpa-prasāda-kṣamair hetur yyo jagataẖ kṣayābhyudayayoḫ pāyāt sa vo bhāskaraḥ| tatva-jñāna-vido ’pi yasya na vidur brahmarṣayo ’bhyudyatāẖ kr̥tsnaṁ yaś ca gabhastibhiḥ pravisr̥taiḫ puṣṇāti loka-trayaM gandharvvāmara-siddha-kinnara-narais saṁstūyate ’bhyutthito bhaktebhyaś ca dadāti yo ’bhilaṣitaṁ tasmai savitre namaḥ| yaḫ pratyaham prativibhāty udayācalendra - vistīrṇṇa-tuṅga-śikhara-skhalitāṁśu-jālaḥ kṣībāṁganā-jana-kapola-talābhitāmraḫ pāyāt sa vas su-kiraṇābharaṇo vivasvāN kusuma-bharānata-taruvara-devakula-sabhā-vihāra-ramaṇīyāT lāṭa-viṣayān nagāvr̥ta-śailāj jagati prathita-śilpāḥ|| te deśa-pārtthiva-guṇāpahr̥tāḥ prakāśam addhvādi-jāny aviralāny asukhāny apāsya| jātādarā daśapuraṁ prathamaṁ manobhir anv āgatās sa-suta-bandhu-janās sametya|| mattebha-gaṇḍa-taṭa-vicyuta-dāna-bindu - siktopalācala-sahasra-vibhūṣaṇāyāḥ puṣpāvanamra-taru-ṣaṇḍa-vataṁsakāyā bhūmeḫ puran tilaka-bhūtam idaṁ krameṇa|| taṭottha-vr̥kṣa-cyuta-naika-puṣpa -vicitra-tīrānta-jalāni bhānti| praphulla-padmābharaṇāni yatra sarāṁsi kāraṇḍava-saṁkulāni|| vilola-vīcī-calitāravinda -patad-rajaḥ-piñjaritaiś ca hamsaiḥ sva-kesarodāra-bharāvabhugnaiḥ kvacit sarāṁsy amburuhaiś ca bhānti| sva-puṣpa-bhārāvanatair nnagendrair mmada-pragalbhāli-kula-svanaiś ca| Ajasra-gābhiś ca purāṅganābhir vvanāni yasmin samalaṁkr̥tāni|| calat-patākāny abalā-sanāthāny atyarttha-śuklāny adhikonnatāni| taḍil-latā-citra-sitābbhra-kūṭa - tulyopamānāni gr̥hāṇi yatra|| kauailāsa-tuṅga-śikhara-pratimāni cānyāny ābhānti dīrggha-valabhīni sa-vedikāni| gāndharvva-śabda-mukharānṇi niviṣṭa-citra -karmmāṇi lola-kadalī-vana-śobhitāni|| prāsāda-mālābhir alaṁkr̥tāni dharāṁ vidāryyeva samutthitāni| vimāna-mālā-sadr̥śāni yattra gr̥hāṇi pūrṇṇendu-karāmalāni|| yad bhāty abhiramya-sarid-dvayena capalormmiṇā samupagūḍhaṁ rahasi kuca-śālinībhyāṁ prīti-ratibhyāṁ smarāṅgam iva|| satya-kṣamā-dama-śama-vrata-śauca-dhairyya - svāddhyāya-vr̥tta-vinaya-sthiti-buddhy-upetaiḥ| vidyā-tapo-nidhibhir asmayitaiś ca viprair yyad bhrājate graha-gaṇaiẖ kham iva pradīptaiḥ|| Atha sametya nirantara-saṅgatair ahar-ahaḥ pravijr̥mbhita-sauhr̥dāḥ nr̥patibhis sutavat pratimaānitāḥ pramuditā nyavasanta sukhaṁ pure|| śravaṇa-subhage gāndharvve ’nye dr̥ḍhaṁ pariniṣṭhitāḥ sucarita-śatāsaṅgāẖ kecid vicittra-kathāvidaḥ| vinaya-nibhr̥tās samyag dharmma-prasaṅga-parāyaṇāḫ priyam aparuṣaṁ patthyaṁ cānye kṣamā bahu bhāṣituṁ|| kecit sva-karmmaṇy adhikās tathānyair vvijñāyate jyotiṣam ātmavadbhiḥ Adyāpi cānye samara-pragalbhāẖ kurvvanty arīṇām ahitaṁ prasahya|| prājñā manojña-vapuṣaḥ prathitoru-vaṁśā vaṁśānurūpa-caritābharaṇās tathānye| satya-vratāḥ praṇayinām upakāra-dakṣā visrambha-pūrvvam apare dr̥ḍha-sauhr̥dāś ca|| vijita-viṣaya-saṅgair ddharmma-śīlais tathānyair mr̥dubhir adhika-satvair llokayātrā-paraiś ca| sva-kula-tilaka-bhūtair mukta-rāgair udārair adhikam abhivibhāti śreṇir evaṁ-prakāraiḥ|| tāruṇya-kānty-upacito ’pi suvarṇṇa-hāra - tāṁbūla-puṣpa-vidhinā samalamkr̥to ’pi| nārī-janaḥ śriyam upaiti na tāvad agryāṁ yāvan na paṭṭamaya-vastra-yugāni dhatte|| sparśavatā varṇṇ-āntara-vibhāga-cittreṇa netra-subhagena yais sakalam idaṁ kṣiti-talam alaṁkr̥taṁ paṭṭa-vastreṇa|| vidyādharī-rucira-pallava-karṇṇapūra - vāteritāsthirataraṁ pravicintya lokaṁ| mānuṣyam arttha-nicayāṁś ca tathā viśālān teṣāṁ śubhe matir abhūd acale ca tasmiN|| catus-samudr-āṁbu-vilola-mekhalāṁ sumeru-kailāsa-br̥hat-payodharāM vanānta-vānta-sphuṭa-puṣpa-hāsinīṁ kumāragupte prithivīṁ praśāsati|| samāna-dhīś śukra-br̥haspatibhyāṁ lalāma-bhūto bhuvi pārtthivānāṁ| raṇeṣu yaḥ pārttha-samāna-karmmā babhūva goptā nr̥pa-viśvavarmmā|| dīn-ānukaṁpana-paraḥ kr̥paṇ-ārtta-vargga- sāntva-prado ’dhika-dayālur anātha-nāthaḥ| kalpa-drumaḥ praṇayinām abhayaṁ-pradaś ca bhītasya yo janapadasya ca bandhur āsīT|| tasyātmajaḥ sthairyya-nayopapanno bandhu-priyo bandhur iva prajānāṁ| baṁdhv-artti-harttā nr̥pa-bandhuvarmmā dviḍ-dr̥pta-pakṣa-kṣapaṇaika-dakṣaḥ| kānto yuvā raṇa-paṭur vvinayānvitaś ca rājāpi sann upasr̥to na madaiḥ smayādyaiḥ| śr̥ngāra-mūrttir abhibhāty analaṁkr̥to ’pi rūpeṇa yaẖ kusumacāpa Iva dvitīyaḥ|| vaidhavya-tīvra-vyasana-kṣatānāṁ smritvā yam adyāpy ari-sundarīṇāṁ| bhayād bhavaty āyata-locanānāṁ ghana-stanāyāsa-karaḥ prakampaḥ|| tasminn eva kṣitipati-vriṣe baṁdhuvarmmaṇy udāre samyak-sphītaṁ daśapuram idaṁ pālayaty unnatāṁse| śilpāvāptair ddhana-samudayaiḥ paṭṭa-vāyair udāraṁ śreṇībhūtair bbhavanam atulaṁ kāritaṁ dīpta-raśmeḥ|| vistīrṇṇa-tuṅga-śikharaṁ śikhari-prakāśam abhyudgatendv-amala-raśmi-kalāpa-gauraṁ| yad bhāti paścima-purasya niviṣṭa-kānta - cūḍāmaṇi-pratisaman nayanābhirāmaṁ|| rāmā-sanātha-bhavanodara-bhāskarāṁśu -vahni-pratāpa-subhage jala-līna-mīne| candrāṁśu-harmya-tala-candana-tālavr̥nta - hāropabhoga-rahite hima-dagdha-padme|| roddhra-priyaṁgu-taru-kunda-latā-vikośa - puṣpāsava-pramuditāli-kulābhirāme| kāle tuṣāra-kaṇa-karkkaśa-śīta-vāta - vega-pranr̥tta-lavalī-naga-naika-śākhe|| smara-vaśaga-taruṇa-jana-vallabhāṅganā-vipula-kānta-pīnoru-| stana-jaghana-ghanāliṅgana-nirbhartsita-tuhina-hima-pāte|| mālavānāṁ gaṇa-sthityā yāte śata-catuṣṭaye| tri-navaty-adhike ’bdānām ritau sevya-ghana-stane|| sahasya-māsa-śuklasya praśaste ’hni trayodaśe maṅgalācāra-vidhinā prāsādo yaṁ niveśitaḥ|| bahunā samatītena kālenānyaiś ca pārtthivaiḥ| vyaśīryyataika-deśo ’sya bhavanasya tato ’dhunā|| sva-yaśo-vriddhaye sarvva- dikṣūdāram udārayā| saṁskāritam idaṁ bhūyaḥ śreṇyā bhānumato gr̥haṁ|| Atyunnatam avadātaṁ nabhaḥ spr̥śann iva manoharaiś śikharaiḥ| śaśi-bhānvor abhyudayeṣv amala-mayūkh-āyatana-bhūtaṁ|| vatsara-śateṣu paṁcasu viṁśaty-adhikeṣu navasu cābdeṣu| yāteṣv abhiramya-tapasya-māsa-śukla-dvitīyāyāṁ|| spaṣṭair aśoka-taru-ketaka-siṁduvāra - lolātimuktaka-latā-madayaṁtikānāṁ| puṣpodgamair abhinavair adhigamya nūnam aikyaṁ vijr̥ṁbhita-śare hara-pūta-dehe|| madhu-pāna-mudita-madhukara-kulopagīta-naga-naika-pr̥thu-śākhe| kāle nava-kusumodgama-daṁtura-kāṁta-pracura-roddhre|| śaśineva nabho vimalaṁ kaustubha-maṇineva śārṅgiṇo vakṣaḥ| bhavana-vareṇa tathedaṁ puram akhilam alaṁkr̥tam udāraṁ|| Amalina-śaśi-lekhā-daṁturaṁ piṅgalānāṁ parivahati samūhaṁ yāvad īśo jaṭānāṁ| vikaṭa-kamala-mālām aṁsa-saktāṁ ca śārṅgī bhavanam idam udāraṁ śāśvatan tāvad astu|| sreṇy-ādeśena bhaktyā ca kāritaṁ bhavanaṁ raveḥ| pūrvvā ceyaṁ prayatnena racitā vatsabhaṭṭinā||

svasti kartr̥-lekhaka-vācaka-śrotr̥bhyaḥ|| siddhir astu||