K. 1187. Stela from Prasat Ta Muean Thom, 942 Śaka

Face svāsti · 942 śaka pañcami roc· śrāvana vudhavāra nu mān· vraḥ karuṇā paramapavitra ta kaṁsteṅ· śri jayasiṅhavarmma ta pandval· vraḥ Ālākṣaṇa ta vraḥ kaṁmrateṅ· Añ· kadeṅ· sabhāpati nā trīṇi pi pre vraḥ sabhā nu pratihārapāla dau saṅ gol ta bhūmi siddhīpūra pi Oya prasāda ta teṅ· tvan ta jmaḥ teṅ· pit· thve nā thve caṁnāṁ ta gi vraḥ kaṁmrateṅ· Añ· nā trīṇi yugapat· nu vraḥ kaṁmrateṅ· Aña sabhapati Eka do nu vraḥ kaṁsteṅa svat· vraḥ dharmmaśāstra pandval· vraḥ Ālākṣaṇa ta mratāñ· khloñ· svāy ta vraḥ sabhā nu pratihārapāla saṅ gol ta bhūmi noḥ cuñ ta kaṁsteṅ· śri rājendrāditya ta mān· pramāna nu mratāñ· khloñ· trvac· vraḥ rājakāryya nu pradhāna Aṁpal· qnak· nu kule strījanaka nu Aṁcās· qnak· qval· syaṅ ta nāṁ caṅ·vāta bhūmi neḥ Oy· pi vraḥ sabhā saṅ gol· o toy· pūrvva toy· paścima toya dākṣina syaṅ ta nāṁ caṅvāt ta Oy ta vraḥ nā thve caṁnāṁ ta gi thmoya bhūmi noḥ ta Utara tarāp· gol· khñuṁ ti jvan ta kaṁmrateṅ· jagat· ta duk ta caṁnat· noḥ ta thve caṁnāṁ neḥ s taṁtāṁ caturmmāsa raṅko liḥ 5 tai kaṁrut· vraṅ· tai kanteṁ sarn tai (ca) pa tai kaṁpur· tai Āda tai sāmā tai kaṁvaiy· tai tai

Face kaj tai t· tai kan·daṁ tai vija tai thqyak· si sy si khnet· si saṁqap· si kanā vraḥ 20 4 mās· pāda III prak· liṅ· 4 khñuṁ nu caṁnāṁ drāvya ta Ampāla neḥha man· Añ· jvan ta kaṁmrateṅ· jagata śivapāda paścima Āyatva ta teṅ· tvana hvara ta saṁ Añ· ta jmaḥ teṅ· pit· thve nu kvana cau ta teṅ ta teṅa pit· thve gi nā Añ· samāpe gi ta Āc· paripāla pradāna dau nā kule Añ· phoṅa syaṅ· ta Añ· Oy· khñuṁ mās· prak· phnek sap· phoṅ· vvaṁ Āc ti sveṅ· karyya nu khñuṁ caṁnāṁ nu caṁnat· neḥha nau ge ta pan·hyata khñuṁ caṁnāṁ ta roḥha neḥha leṅ· kvan· cau teṅ· pit· thve nā Aña samāpe ge noḥ svey· naraka kālpa kotti . . . drāvya ti Oy ta Aṁcāsa qnak ta Oya bhūmi pi cat· vrīhi vraḥ go 4 thnap· yo I canlyak· yo 4 vraḥ raṅko jyaṅ· 5 vave II .

śākenākṣāvdhirandhrena sthānave śivahāriṇe grāmaṁ sadāsadāsīgo -hemarūpyan dadāti yaḥ . saś śrikr̥tajñavirākhyaḥ khyāto dharmmina dharmmiṇām· śrīsūryyavarmmanripatau dhautabhaktir viśuddhadhiḥ . Ā mahākoṭīsaṁhārāt kālpanā yena lupyate sa gacchatu mahāghauraṁ rauravaṁ saha vāndhavaiḥ . Faceśe tasya patni yā pālayāt· kā tatparaṁ yasyāḥ punaḥ