yām̃ pom̃ ku śrī jaya harivarmmadeva cim̃ śivānandana Urām̃ ratnabhūmivijaya Anāk· yām̃ pom̃ ku śrī jaya rudravarmmadeva pu-pom̃ tana rayā nan· kṣatrānvaya dvipakṣa | 1069 | di śaka-rāja nī paracakra tam̃l· pu cī para-deśa-vijaya pu-pom̃ tana rayā nan· tuy· yām̃ pom̃ ku śrī jaya rudravarmma(de)va ya Amā nan· tam̃l· pāṇḍurāṅga yām̃ po(m̃) ku śri jaya rudravarmmadeva kā Aviḥ phala karmma pu-pom̃ tana rayā nan· bhraṣṭa riyo di nagara pāṇḍurāṅga ni hetu pu-pom̃ tana rayā nan· viṣṇumūrtta pratyakṣa si jem̃ Urām̃ pāṇḍurāṅga da Ā pu-pom̃ tana rayā nan· dr̥ṅ· rājya di nagara ni prayojana masampattī kam̃n· nagara campa chām̃ pūrvvakāla mulaṅ· dada[m̃]n· dr̥ṅ· rājya di nagara nī 1069 | di śakarāja nī mvoḥ vala kamvuja-deśa ṅan· vala vijaya pagu drim̃ marai mrasuḥ ṅan· pu-pom̃ tana rayā nan· di pāṇḍurāṅga tanr̥ñ· caklyaṅ· | 1070 di śakarāja nī | mvoḥ vala kamvujadeśa ṅan· vāala vijaya Avista pagu drim̃ mulaṅ· marai mrasuḥ ṅan· pu-pom̃ tana rayā nan· di tanr̥ñ· vīrapura humā kayev· suhetu pu-pom̃ tana rayā nan· praum̃ vīryya har̥ḥ kā paslyaṅ· Avista nan· ṅan· kṣaṇamātra mam̃n· 1071 di śakarāja nī pu-pom̃ tana rayā nan· kā (v)ā vala nau mak· cim̃ harideva ya Ad(i)m̃ sām̃ pu-tau kmir· si pu-tau kmir· vrim̃ rakṣā nagara campa pu-pom̃ tana rayā nan· paslyaṅ· vala kmir· ṅan· vala vijaya di tanr̥ñ· mahī pu-pom̃ tana rayā nan· rājyābhīṣeka tuy· carita rāja suhetu pu-tau yvan· tmam̃k· daḥ pu-pom̃ tana rayā nan· prauṅ· vīryya har̥ḥ papu-tau ām̃vaṅ· pajuṁ sa vandaḥ cvaḥ rayā tam̃l· picyam̃ ṅan· vala yvan· vrim̃ nau (mrasu)ḥ ṅan· pu-⌈[pom̃] (tana) rayā nan· tam̃l· tanr̥ñ· lavatān· pu-pom̃ tana rayā nan· kā paslyam̃ vala d[i]nan· Avista pandāp· tam̃l· hulum̃ rilvai | 1073 | di śaka-rāja nī m[l]eca-rāja Avi(sta padā) dr(im̃) ya vā vala nau mrasuḥ tam̃l· tanr̥ñ· ṅauk· vatuv· pu-pom̃ tana rayā nan· kā saṅhāra Avista | 1077 | di śakarāja nī | pū pom̃ tana rayā nan· kā vā vala pandāp· samānalanaḥ Avista [su]hetu pu-pom̃ tana rayā nan· Abhyāsa vā vala pāṇḍurāṅ(ga) nī jaya (sa)[dā]kāla mam̃n· si jem̃ Avista nan· Abhimāna Adhama di pu-pom̃ tana rayā nan· | 1082 | di śakarāja nī pu-pom̃ tana rayā nan· kā vā vala (urām̃ valagaṇa) dāk· pam̃khyā marai mak· ta(na) pāṇḍurāṅga śeṣa p(u-pom̃) tana rayā nan· saṅhāra pu-pom̃ tana rayā nan· vuḥ di yām̃ sim̃ ya madā kr̥tajña tupak· di pu-pom̃ tana rayā nan· vrim̃ dauk· vatāje(l/ṣ)a kā pūrvvakāla mulam̃ di janam̃ḥ pu-pom̃ tana rayā nan· kā pandāp· {5} pu-pom̃ tana rayā nan· vuḥ di yām̃ jaya hariliṅgeśvara di glai raprauk· kā vuḥ sarvabhogopabhoga ṅak· ra yām̃ harideva kā naga māk· si pam̃khyā pramāṇa pu-pom̃ tana rayā (nan· vā) [vala] Udyāna gulāc· nau nagara vijaya dauk· Aṅuy· rājyopabhoga tuy· yathā-Iṣṭa |

chām̃

...

All the dates were misread by Aymonier 1069 as 1067; 1069 as 1067; 1070 as 1080; 1071 as 1081; 1073 as 1083; 1077 as 1088.

Bergaigne 1888, pp. 83–86, no. 395, had published a partial reading of this inscription; Aymonier 1891, p. 39, no. 395, a partial translation; Finot 1915, p. 50 [EEPC, p. 198] examined the dates cited in the text; Majumdar 1927, pp. 192–193 provided a chronological summary of the text’s principal contents; and Golzio 2004, pp. 161–162 reproduced the reading and translation of the inscription. The text was completely deciphered for the first time by Arlo Griffiths in colaboration with Amandine Lepoutre in 2013, based on the EFEO estampages n. 1956–1995 as well as on reading the stone in situ.

83-86395 39395